Taa, Esekias yehtoponho tan wekatîmyas hara awya so, Akas pen mumutho yehtoponho ha. Osorwaw cimn̂ipu tî xakn̂e kayaritomo me Oseias yehtoponho, Ixaw Yana komo kayaritomon me ehtoponhîrî. Ero yimaw takî tî Xuta komo kayaritomon me tak xakn̂e Esekias hara, Akas pen mumutho ha.

2 25 cimn̂ipu tî xakn̂e noro yewrutoponho kayaritomo me ecir̂ataw. 29 cimn̂ipu tî xakn̂e kayaritomo me. Xerusaren tî xakn̂e noro yewton. Abi tî xakn̂e yînocwan yosotî. Sakarias yemsîrî tî mîk xakn̂e yînocwan.

3 Kir̂wan̂he tî Esekias n̂een̂akn̂e Kporin komo. Tporin pen wara rma xa tî xakn̂e Tapi pen wara.

4 Mîk hak ya tîmsom yakn̂itopo tî n̂ixkapekn̂e îh pono mko. Toopu marha nakuhr̂apekn̂e piiri ciixapu mko. Weewe mko marha tî xakn̂e, Ixaw Yana komo n̂iritho. Mîk hak warai me ciixaputho tî mîn xakn̂e. Ero yipu mko takî tî namapekn̂e kra noro, Esekias. Okoyi warai marha tî iito rma ka xakn̂e bronse ciixapu, Moises pen n̂iritho rma. Kotoporem tî nakn̂iyatken̂e roro Ixaw Yana komo kica erotho ya tîmsom me ha tî re. Ero takî tî nakuhr̂apopekn̂e Esekias. Bronsetho mak mîn, kekn̂e tî ero poko.

5 Kporin komo pona xa tî n̂een̂akn̂e okre Esekias, ponaro Ixaw Yana komo yehtopo pona. Anarî exihra takî tî xakn̂e Xuta yepamtho kayaritomon noro warai, Kaan pona en̂in̂e xa. Pahxan pen komo marha exihra xakn̂e noro warai, Kaan pona enîn̂e xa.

6 Kporin komo poko n̂etahsîtîkekn̂e ro mak tî etowîn me. Kpanatanmetopo tî n̂ewehcakn̂e roro, Moises ya Kporin komo n̂ekatîmyakn̂e ero.

7 Ero ke Kporin komo tî xakn̂e akronoman̂e me. Ahce na poko exitaw ehn̂ara ro makî tî xakn̂e. Asiria pono komo kayaritomon takî tî nanwekyakn̂e Esekias. Epeman̂e me exihra ro mak takî tî xakn̂e.

8 Piristew komo marha tî nar̂mekn̂e, Kasa pona rorono komo tî xatken̂e noro yewetîn̂e me. Yîmînthîrî komo tî marha nahsîyakn̂e waapa komo yentoponho yîwya so. Ewtonthîrî komo marha tî nahsîyakn̂e twacayemu mko meero.

9 Ero yinhîrî takî tî Sawmanese mokyakn̂e Samaria pono komo waparî me, Asiria pono komo kayaritomon ha. Ero wa tî mokyakn̂e 4 cimn̂ipu exitaw kayaritomo me Esekias yehtoponho. 7 cimn̂ipu xakn̂e Ixaw Yana kayaritomon me Oseias yehtoponho, Era mumuru yehtoponho ha. Ero yimaw takî tî Samaria mamcetken̂e Sawmanese sowtatun komo. Pahkî tî mamcetken̂e.

10 Osorwaw cimn̂ipu tî xatken̂e Samaria mamtorî poko. Ero yinhîrî takî tî ewto nahsîyatken̂e. 9 cimn̂ipu tî xakn̂e kayaritomo me Oseias yehtoponho, Ixaw Yana kayaritomon me ehtoponhîrî. 6 cimn̂ipu tî xakn̂e kayaritomo me Esekias yehtoponho. Ero yimaw tî Samaria pono komo nahsîyakn̂e Asiria pono komo kayaritomon.

11 Ero yinhîrî takî tî Ixaw Yana pen komo naar̂akn̂e Asiria pono komo kayaritomon tîrowon pona. Ara pona tî n̂examro pen n̂ekenmekn̂e, Abo pona marha tî n̂ekenmekn̂e, Kosan yewku yecihtawno pona. Metu komo yewton pona so marha tî n̂ekenmekn̂e.

12 Ero wa tî n̂esemetanmekyatken̂e Ixaw Yana pen komo Kporin komo yewetîra cexirî ke so okwe. Ow men ewetîcoko awakronomachome so owya, kachonho nanwekyatken̂e kica. Yîmtapotachonhîrî yewetîra ro mak xatken̂e, Moises pen ya n̂ekatîmyakn̂e tantonînhîrî pen ya, ero. Panahra ro makî tî xatken̂e. Ewetîra ro makî tî xatken̂e, ero ke n̂esemetanmetîketken̂e ro makî. Ero wa tî xatken̂e Ixaw Yana komo okwe.

13 Ero yinhîrî takî tî 14 cimn̂ipu xakn̂e kayaritomo me Esekias yehtoponho. Ero yimaw takî tî mokyakn̂e Senakeribe, Asiria pono kayaritomon. Xuta komo waparî me tî mokyakn̂e okwe. N̂examro yewtontho komo tî nahsîtîkekn̂e ahnoro twacayem kom ha.

14 Ero yimaw tak tî on wara xakn̂e Esekias, tîmtapotarî yekatîmn̂e komo takî tî n̂en̂epekn̂e Asiria pono komo kayaritomon yaka. Rakis po tî xakn̂e Asiria pono kayaritomon ero yimaw. On wara kacho tî n̂ekatîmyakn̂e yîwya, Ai Apa, kicicme wehxe ham kica. Owaparî me cma re mokuhra masî. Atî wicakî na awepethîrî xe awexitaw kasko mak owya. Ero wicakî tak wîmyas awya, kekn̂e tî yîwya. Ero ke on wara tî kekn̂e Asiria pono kayaritomon, Taa, prata xe wasî 300 tarentu wicakî. Ooru xe marha wasî 30 tarentu wicakî, kekn̂e tî. Ero wa kacho tî n̂ekatîmyakn̂e Esekias ya.

15 Ero ke prata takî tî narpekn̂e Esekias Asiria pono komo kayaritomon yaka. Kporin komo mîn yawnonho tî nîmtîkekn̂e yîwya, kayaritomo mîn yawnonho marha tî nîmtîkekn̂e yîwya puranta, yîmtotopo yawnonho ha.

16 On wara marha tî xakn̂e Esekias, ooru takî tî nowyakn̂e Kporin komo mîn metatanî mkarinonho. Mapata imo mkarinonho marha tî nowyakn̂e. Yîn̂irithîrî rma mîn xakn̂e, yîmkarino me yîn̂irithîrî ha. Ero yipu rma tî nowyakn̂e Asiria pono kayaritomon yaka arpotome. Ero wa tî prata narpekn̂e, ooru marha.

17 Ero yinhîrî on wara takî tî xakn̂e Asiria pono komo kayaritomon, tmaywen komo takî tî n̂en̂epekn̂e Xerusaren pona. Tahtan, Habe Saris, Habsake, ero wicakî tî n̂en̂epekn̂e iina. Sowtatu pen marha tî n̂en̂epekn̂e akro so mer̂pono pîn. Esekias yaka tî n̂examro n̂en̂epekn̂e. Ero ke Xerusaren pona tî cetken̂e, ewto panaka makî tî. Tuuna totopo mîtwo tî n̂ecececetken̂e n̂ikitho kwawnonho totopo mîtwo, yaasîno kwawnonho totopo mîtwo ha. Poono korokan̂e komo woskaran yesamarî yakumyawno mîn tuuna totopo. Iina tî n̂ecececetken̂e Asiria poono komo.

18 En̂exa rma tî nîmtapowatken̂e. On wara ketken̂e, Ai, kayaritomo yakro tîmtapota xe nas amna Esekias yakro, ketken̂e tî. Kar̂pe tî ketken̂e. Ero ke Esekias maywen komo takî tî cetken̂e yîhyaka so. Eriakin, Iwkias mumuru mîk, kayaritomo mîn yenîn̂e mumuru, Sebna, kayaritomo karitan mewren̂e mîk, Xoa, Asape mumuru mîk, kayaritomo yehtoponho mewren̂e mîk hara, n̂examro tî cetken̂e yîhyaka so yîmtapotarî komo yentaxi.

19 N̂examro yenîche on wara tî kekn̂e Habsake yîwya, Ai, on wara kacoko Esekias ya, On wara tî nîîke kayaritomo yukurumîkno xa, Asiria pono komo kayaritomon ha, Onok pona xa meen̂atu akurunpen̂e komo me?

20 On wara mîîkexe ha re, Takîhso nas amna, kar̂pe marha nas amna, amna waparî komo yopono me, mîîkexe cma ha re. Tohnaw mak mîmtapowatu ero wara. Onok pona xa meen̂atu oyanwetome awya so?

21 On wara na matu, Exitu pono komo kayaritomon pona na meen̂atu. Tuuwa waraitho mak mîk kica, etatukmaxaputho warai mak. Noro yipu pona kecececetaw n̂etaxikwesî mak kica, kamoyatpesî marha oko. Erotho warai xa mîk Exitu pono komo kayaritomon tpona enîn̂e komo poko.

22 Anarimaw on wara na mîîket owya, Kporin komo pona xa amna n̂een̂asî ponaro amna yehtopo ro pona. Noro ya tîmsom yakn̂itoponho rma tko Esekias n̂ixkekn̂e, îh pononho, ahtononho ha na. On wara tî nîîkai awya so, On mîtwo xa mak Kporin komo poko ahwotatamcoko, tîmsom yakn̂itopo mîtwo, Xerusaren pono mîtwo, nîîkai tî Xuta pono komo ya, Xerusaren pono komo ya marha.

23 Ero ke on wara men wîîkes awya so, puranta tîmcoko okayaritomon ya, Yaaro xa tan amna kesî, kacho ha. Ero yinhîrî awan̂e komo tak wekpesî ahyaka so kawaru, 2.000 wekpesî. Exihra katî nat ahyaw so ero wicakno mkaw tîtosom komo.

24 Ahce wa thakwa ma re amna men̂epetu? Cewn̂e mak na mokya okayaritomon maywen, sowtatu yantoman̂e, yaana pîntho me cehsomu mak na mokya. Noro yipu rma mokyataw en̂epera thakwa maxe okwe. Tohnaw men Exitu pono komo kayaritomon pona meen̂atu tarara yawno komo yen̂epetome akurunpen̂e me, kawaru mkaw tîtosom komo yen̂epetome me marha.

25 Kporin komo yanmera katî kmokye awaparî komo me awya so? On wara xa matko kekn̂e Kporin komo rma owya, Xuta rowon pono komo waparî me etoko. Iitono komo waihkatîkata, kekn̂e xa owya, nîîke tî Asiriu komo kayaritomon, kekn̂e tî Habsake. Ero wa tî kekn̂e Esekias maywen komo ya.

26 Ero yinhîrî on wara takî tî ketken̂e n̂examro Habsake ya, Eriakin, Sebna, Xoa, ero warai komo tî ketken̂e, Ai, Siriu komo mtapotarî yaro cma re mîmtapowas amna yakro. N̂examro mtapotarî yentan̂e rma amna. Ebrew yaro cma re yîmtapotara masî moxam n̂entarî me, waaca pono komo n̂entarî me, ketken̂e tî yîwya.

27 On wara tko tî n̂eyukyakn̂e Habsake, Akayaritomon komo yaka mak ma re oyen̂epekn̂e okayaritomon, ahyaka so mak ha? Awya so mak ma re wekatîmya yîmtapotarî? Pîra, waaca pono komo n̂entarî meero tî wekatîmya yîmtapotarî. N̂examro meero nahyaxe twetîthîrî komo amn̂e, tuxkuthîrî komo marha n̂eer̂axe. Ero wa naxe awakro so rma. Ero ke yîwya so kaxi meero oyen̂epei kayaritomo, kekn̂e tî.

28 Ero yinhîrî takî tî kar̂pe xa kekn̂e Habsake, Ebrew mtapotarî yaro rma tî kekn̂e. Ai, kekn̂e tî, Asiriu komo kayaritomonî mtapotarî tan wekatîmyas awya so, yukurumîkno mtapotarî xa.

29 On wara tî nîîke noro, okayaritomon, Tohnaw men nîmtapowasî Esekias okwe. Ero ke yîmtapotarî kr̂a entara ehcoko. Akurunpera so nasî noro. Ero ke Asiriu pono komo nar̂marî me thakwa maxe okwe.

30 Tohnaw men nîmtapowasî Esekias Kporin komo poko awakro so, Noro pona entopo poko. On wara na nîîke awya so, Kporin komo xa kukurunpexe so. On ewto pono komo ar̂mara ro mak nasî Asiriu komo kayaritomon ha, nîîke na. Yîmtapotarî ewetîra ro mak men ehcoko.

31 Esekiasî mtapotarî entara ro mak ehcoko. On wara tko kesî Asiriu komo kayaritomon, Puranta tîmcoko owya, Awewecasî tak amna, kacho ha. Ero yinhîrî tak awewton komo poi epatakacoko ohyaka. Ero yinhîrî iito rma ka maxe awewton komo po rma. Anatîrî komo yeperîrî yukun meeraxe uupa yukun, piiku yeperîrî marha mahyaxe. Atunarî ro komo marha meer̂axe. Ero wara ka maxe.

32 Ero yinhîrî tak kmokyasî oona awaso so anarî pona. On warai rma mîn roowo, pona kaar̂axe so, ero. Puruma yewtî mîn, uupa yewtî marha. Ero ke turke xa maxe iito, twokye marha maxe okre. Iito marha nasî oripa yepu, ween marha. Ero yipu pona kaar̂axe so waipîra awehtome so. Kar̂pe xa matko maxe iito okre. Esekias mtapotarî tko entara ehcoko, Kporin komo xa kukurunpexe so, kacho yîwya.

33 Mîk hak rowon pono komo waihkan̂enho tko mîkyam Asiriu kayaritomon komo. Naxe rma re ponaro n̂examro yehtopo komo. Noro yipu komo ma re xatken̂e tpona enîn̂e komo kurunpen̂e me. Asiriu kayaritomon nwaihkatorî me ma re xatken̂e awya so?

34 Ahto natu ponaro Amace pononho pen komo yehtoponho, ponaro Ahpaci pononho pen komo yehtoponho marha? Ahto natu ponaro Sepahpain pononho pen komo yehtoponho, ponaro Ena pononho pen komo yehtoponho, ponaro Ipa pononho pen komo yehtoponho? Ponaro Samaria pononho pen kom hara, n̂examro pen ma re nukurunpekn̂e ponaro ehtoponhîrî komo? Pîra ro mak.

35 Ahtono komo kurunpen̂e me xakn̂e ha re ponaro ehtopo komo awya so? Ero ke ahce wa thakwa re Xerusaren pono komo nukurunpe Aporin kom hara awya so? kekn̂e tî yîwya so Xerusaren pono komo ya. Ero wa tî kekn̂e Habsake Xerusaren pono komo ya.

36 Tîtken̂e makî tko tî xatken̂e Xerusaren pono komo, yîmtapotarî yeikura ro makî tî xatken̂e kayaritomo yanme. On wara tî kekn̂e noro yîwya so, Yîmtapotarî eikura ro mak men ehcoko, kekn̂e tî.

37 Ero yinhîrî takî tî n̂etîrametken̂e hara Esekias maywen komo yîhyaka hara. Eriakin, Iwkias mumuru ha, kayaritomo mîn yenîn̂e mumuru mîk ha, Sebna, kayaritomo karitan mewren̂e mîk ha, Xoa, Asape mumuru ha, kayaritomo yehtoponho mewren̂e mîk ha, n̂examro tî n̂etîrametken̂e hara Esekias yaka. Tponon komo tî nahyaxketken̂e. Habsake mtapotachonho tî n̂ekatîmyatken̂e yîwya. Ero wa tî n̂ekatîmyatken̂e.