Ero yinhîrî takî tî Ixaw Yana komo kayaritomon me tak xakn̂e Oseias hara, Era pen mumutho. 12 cimn̂ipu tî xakn̂e Akas yehtoponho Xuta komo kayaritomon me, ero yimaw takî tî Oseias xakn̂e kayaritomo me. Samaria tî xakn̂e noro yewton. 9 cimn̂ipu makî tî xakn̂e kayaritomo me.

2 Kicicme rma tî re noro n̂een̂akn̂e Kporin komo, anarî komo warahra ha tko, Ixaw Yana kayaritomon pen komo warahra. Ero wa tî xakn̂e Oseias.

3 Ero yinhîrî Sawmanese takî tî mokyakn̂e cepeman̂e me tak Oseias ciiso. Asiria pono komo kayaritomon mîk xakn̂e Sawmanese. Ero ke noro yepeman̂e me roro tî ka xakn̂e Oseias. Sawmanese purantan tî nîmyakn̂e roro okwe.

4 Ero yinhîrî takî tî on wara xakn̂e Oseias, tîmtapotarî yekatîmn̂e komo tî n̂en̂epekn̂e Exipsiu komo kayaritomon yaka, Soo yaka. Sawmanese purantan tîmîhra takî tî xakn̂e, yîwya ka nîmyakn̂e roro yicimn̂ipuntaxera ero yipu takî tî tîmîhra xakn̂e. Ero wa Oseias ya tanwecho tî n̂encekn̂e Sawmanese. Ero ke Oseias pen tî nahruyakn̂e ahruno ritopo ro yaka. Ero wa tî Oseias pen n̂iir̂akn̂e Sawmanese.

5 On wara tî xakn̂e Asiria pono komo kayaritomon Ixaw Yana komo poko, n̂examro pen waparî me takî tî mokyakn̂e. Yîrowonthîrî komo poko hakî tî cekn̂e ewto pono komo waparî me, mîn hak pono komo waparî me. Ero yinhîrî takî tî Samaria panaka mokyakn̂e. Ewto tî mamcetken̂e noro sowtatun komo pahkî. 3 cimn̂ipu tî iitono pen komo mamcetken̂e.

6 Ero yinhîrî 9 cimn̂ipu takî tî xakn̂e kayaritomo me Oseias yehtoponho, ero yimaw takî tî Samaria pono komo nahsîyakn̂e Sawmanese. Ahsîxapu komo tî naar̂akn̂e miya Asiria pona. Ara pona takî tî n̂ekenmekn̂e hara. Kosan pona marha tî n̂ekenmekn̂e, Abo yewku yecihtawno pona. Metu komo yewton pona marha tî n̂ekenmekn̂e. Ero wa tî Ixaw Yana komo naar̂akn̂e anana ekenmaxi.

7 Ero wa tî n̂esemetanmekyatken̂e Ixaw Yana komo kicicme roro cexirî ke so Kporin komo poko, ponaro cehtopo komo poko rma. Pahxa Exitu poi cma re n̂examro n̂ekyakn̂e. Paraw yantonînho komo mîkyam xatken̂e. Kporin komo tko tî naar̂akn̂e n̂examro pen yemetanmekîra tak ehtome Exitu pono komo kayaritomon. Kicicme rma tko tî xatken̂e. Anarî ro komo ponaro tî xatken̂e kica Ixaw Yana komo.

8 Anarî yana komo panatanmetopo marha tî n̂ewehcatken̂e. Kanan pononho komo nar̂mapekn̂e Kporin komo Ixaw Yana komo ya, n̂examro panatanmetopo rma tî n̂ewehcatken̂e kica. Ixaw Yana kayaritomon penî mtapotachonho marha tî n̂ewehcatken̂e okwe, panatanmekno ritoponho yîwya so ha.

9 Kicicme tî xatken̂e Kporin komo poko, ponaro cehtopo komo poko. En̂epa me makî tî xatken̂e ero wara. Tîmsom yakn̂itopo tî n̂iir̂atken̂e cewton komo pona so. Anarimaw so kawno n̂iir̂atken̂e mîîmo waapa mokrî yentopo. Iina so tî tîmsom yakn̂itopo n̂iir̂atken̂e. Ewto imo pona so marha tî n̂iir̂atken̂e twacayem pona so. Iina so tî n̂iir̂atken̂e tîmsom yakn̂itopo.

10 Kawno marha tî n̂iir̂atken̂e toopu mko, ponaro cehtopo komo yakro tîmtapotacho komo me. Ero yipu tî n̂iir̂atken̂e îh pona so miyan pona so rma. Iina so marha n̂iir̂atken̂e weewe, mîk hak warai me ciixaputho mko. Weewe yapomyaka so marha tî n̂iir̂atken̂e ahnoro, taakem yapomyaka so.

11 Iina so marha tî kotoporem nakn̂iyatken̂e kica îh pona so. Ero wa tî ka xatken̂e anarî yana komo, Ixaw Yana komo ya Kporin komo nwaihkapotho pen kom ha. N̂examro pen yehtoponho yaw roro rma tî xatken̂e Ixaw Yana kom hara kica. Kicicitho poko ro makî tî xatken̂e. Ero wa cehtopo komo ke Kporin komo nîrwonmekyatken̂e okwe.

12 Ciixaputho mamakan me tî nutupenwatken̂e. Ero yipu pokohra ro mak men ehcoko, kekn̂e cma re Kporin komo yîwya so. Wara rma ero yipu poko rma tî xatken̂e kica.

13 Tpoko weronomano rin̂e komo rma re n̂en̂epekn̂e Kporin komo Ixaw Yana komo yîtwermaxi, Xuta komo yîtwermaxi marha. Tîn̂enporî yenîn̂e ro komo marha n̂en̂epekn̂e yîhyaka. Yaake tî n̂en̂epekn̂e. On wara tî ketken̂e n̂examro yîwya so, Kicicme awehtoponhîrî komo tak men ahsîpînkacoko. Owya apanatanmetopo komo mak tak ewetîcoko. Aporin pen komo panatanmekyakn̂e miyan poko rma. Ahyaka so marha wen̂epekn̂e oyanton komo, aweronoman̂e kom ha. N̂examro ya apanatanmetopo ewetîcoko, kesî Kporin komo awya so, kekn̂e cma re yîn̂en̂epethîrî komo yîwya so.

14 Panahra ro makî tî xatken̂e okwe. Tîpîmîyewaxkem wara xatken̂e kica tporin pen komo wara rma kica. N̂examro pen marha tî Kporin komo pona enîhra xatken̂e okwe.

15 Yîwya tpanatanmetopo komo tî nanwekyatken̂e kica. N̂examro porin pen komo yakro cma tî re nîmtapowakn̂e Kporin komo. Kakronomexe so oyewehcataw awya so, kachonho tî nanwekyatken̂e. Weronomano marha tî n̂iir̂akn̂e panaretopo komo poko. Yîmtapotachonhîrî tko tî nanwekyatken̂e. Mîn hak warai me enporixaputho poko makî tî xatken̂e kica. Ixaw Yana komo rowon yemyatwo tî xatken̂e mîk hak rowon pono komo, n̂examro yehtopo tî nukukmetken̂e kica. Mîk hak rowon pono komo yehtopo yukukmara ro mak men ehcoko, kekn̂e rma re Kporin komo yîwya so. Wara rma noro yipu komo yehtopo komo nukukmetken̂e rma kica.

16 Kporin komo Kaan ya tpanatanmetopo komo nahsîpînketîketken̂e kica. Paaka xîkrî warai tî n̂iir̂atken̂e asakî, ooru ha. Mîk hak warai mko marha n̂iir̂atken̂e ponaro cehtopo komo me. Kah yawno mko poko marha tî nahwowatken̂e miyan poko rma. Baaw poko marha tî xatken̂e kica.

17 Tîmxîkîthîrî pen komo marha ciki tî nakn̂iyatken̂e okwe. Ero wa tumumuthîrî pen komo n̂iir̂atken̂e, cemsîthîrî pen komo marha okwe. Erem poko marha tî xatken̂e kica. Pahxarono marha tî re n̂ekatîmyatken̂e cehtopo komo. Kicicitho ya makî tî n̂etîmyatken̂e epethîrî pona etîmxapu wara. Kporin komo n̂enîrî mexan mera ro mak xatken̂e, yîrwonmekn̂e me mak xatken̂e okwe.

18 Ero ke nîrwonakn̂e xa takî tî Kporin komo Ixaw Yana komo poko. Tîn̂enîrî mera takî tî n̂en̂epekn̂e miya anarî komo rowon pona. Exihra takî tî xatken̂e Ixaw Yana komo Kanan po. Xuta komo makî tî ka xatken̂e iito rma ero po.

19 Xuta komo meero tko tî Kporin komo Kaan ya tpanatanmetopo komo yewetîra xatken̂e okwe. Ixaw Yana komo yehtopo yaw roro xa matko tî xatken̂e, Tpanatanmetopo ro komo n̂ewehcatken̂e Ixaw Yana komo, ero yipu marha n̂ewehcatken̂e Xuta komo marha okwe.

20 Ero ke Ixaw pen yepamtho komo ahnoro takî tî nahsîpînkekn̂e Kporin komo. Nahwokamexpekn̂ e ro mak okwe. Anarî yana komo ya takî tî n̂emetanmekpekn̂e. Emyawnonhîrî pen komo tî n̂examro naar̂atken̂e, ewtonthîrî komo nakn̂iyatken̂e, n̂emetanmekyatken̂e ro mak okwe. Ero wa tî Ixaw Yana pen komo n̂iir̂akn̂e Kporin komo tîn̂enîrî me exihra cehso ro okwe.

21 Ixaw Yana komo yarixkan̂e wara tî xakn̂e Kporin komo. Tapi pen yepamtho pîn maywen me takî tî n̂examro n̂iir̂akn̂e. Ero ke Xeroboaw N̂ebace takî tî n̂iir̂atken̂e tîkayaritomon komo me. Noro tko tî Ixaw Yana komo panatanmekyakn̂e anarî ro poko yukurumîkno me. Ero ke Kporin komo pokohra tak xatken̂e. Ero ke kicicme ro makî tî xatken̂e n̂examro noro pen yanme, Xeroboaw pen yanme.

22 Kicicme noro pen yehtoponho yaw roro rma tî n̂ehtîketken̂e Ixaw Yana komo miya roro. Ero yipu yahsîpînkara ro makî tî xatken̂e okwe.

23 Ero ke Ixaw Yana pen komo takî tî n̂en̂epekn̂e Kporin komo mooxe tîn̂enîrî mera tak ehtome so. Tpoko weronomano rin̂e pen komo ya kekn̂e pahxa ka ero wara rma takî tî n̂iir̂akn̂e. Ero ke tîrowonthîrî po exihra takî tî xatken̂e Ixaw Yana komo. Asiria pono komo rowon pona tî narpekn̂e okwe. Iito rma naxe oroto okwe. Ero wa naxe.

24 Ero yinhîrî takî tî on wara xakn̂e Asiria pono kayaritomon, anarî ewto pononho komo tî n̂ekpekn̂e hara Samaria pononho komo yewtontho pona ekenmachome so. Babiron̂a pononho komo, Kuta pononho komo, Apa pononho komo, Amace pononho komo, Sepahpain pononho komo, noro yipu komo tî n̂ekpekn̂e Ixaw Yana komo yekenho yakan me so. Tmokuche so Samaria pono komo yewtontho mko takî tî nahsîyatken̂e. Cewtonî ro komo me tî n̂iir̂atken̂e.

25 Taa, yihcirî me ka Ixaw Yana komo yewtontho pona mohxapunhîrî komo rma Kporin komo ponarora ro makî tî xatken̂e. Ero ke Noro rma takî tî reaw n̂en̂epekn̂e yîcheka so eskan̂e komo me oko. Ero ke anarî pen komo tî waihyatken̂e okwe.

26 Ero ke Asiria pono komo kayaritomon ya takî tî n̂ekatîmyatken̂e Samaria pona mohxapu komo. On wara tî ketken̂e yîwya, Apa, on wara amna nai, Samaria pona anarîthîrî komo, iina an̂ekenmathîrî kom ha. Camkî amna nasî ponaro iitono komo yehtopo ro poko. Yîwya panatanmekno ritopo poko camkî nas amna okwe. Ero ke reaw tak tî Noro n̂en̂epe amna cheka amna poyinonho pen waihkaxi okwe. Ero wa tî amna waihke ponaro iitononhîrî komo yehtopo, tîwya panatanmekno ritopo yentara exirî ke amna okwe, ketken̂e tî yîwya.

27 Ero yipu yentache on wara tî kekn̂e Asiria pono kayaritomon, Taa, en̂exa aaxapunhîrî tak en̂epecoko iina hara iitono ya tîmsom tîmn̂e ro. Iitono ro me tope iitono komo panatanmekn̂e me cehtome. On wara xa ehcoko tantono ro poko, ponaro amna yehtopo ro poko, kan̂e me n̂expe yîhcamhokano rin̂e me, kekn̂e tî.

28 Ero ke mokyakn̂e hara iitononhîrî Kaan ya tîmsom pokononho, Samaria poi aaxapunhîrî. Betew pona tî n̂esekenmekn̂e. On wara xa ehcoko Kporin komo ponaro awehtome so, kekn̂e takî tî noro iitono komo ya. Ero wa tî yîhcamhokano tak n̂iir̂akn̂e.

29 On wara tko tî xatken̂e mîk hak rowon pononho komo, Samaria pona aaxapu komo, ponaro cehtopo ro komo rma tî n̂enpor̂atken̂e. Ero wa tî n̂enpor̂atken̂e cewtonî ro komo po so. Mîîmo yaka so tî ero yipu mko n̂iir̂atken̂e, îh pono yaka so. Pahxa Samaritanu komo n̂iir̂atken̂e poko cehtopo komo mînî mko, ero yaka rma takî tî tîn̂enporithîrî komo n̂iir̂atken̂e cewton me ahsîxapu pona so.

30 On wara tî xatken̂e Samaria pona ehxapu komo, ponaro cehtopo komo rma tî n̂enpor̂atken̂e. Sukoci-Benoce tî n̂enpor̂atken̂e Babiron̂a pononho komo, N̂ehkaw tî n̂enpor̂atken̂e Kuta pononho komo, Asima tî n̂enpor̂atken̂e Amace pononho komo,

31 Nibasi tî n̂enpor̂atken̂e Apew komo, Tahtake marha tî n̂enpor̂atken̂e n̂examro rma. On wara tî xatken̂e Sepahpain pononho komo, tîmxîkîthîrî pen komo tî nakn̂iyatken̂e okwe Atamereke ya tîmsom me, Anamereke ya tîmsom me marha. Ponaro xatken̂e pahxa cewtonthîrî po noro yipu ponaro rma tî xatken̂e Samaria pona aaxapu me exitaw hara okwe.

32 Ero wa tî xatken̂e iitono komo, Samaria pono komo, Kporin komo poko meero tî twerî xatken̂e. Anarmerpan warai komo rma tko tî n̂iir̂atken̂e tîmsom pokono me, îh po tîmsom pokono me ha. Iina so tî ponaro cehtopo komo ya tîmsom nakn̂iyatken̂e tokuthîrî pun, kotoporem marha.

33 Kporin komo poko rma tî re twerî xatken̂e. Tîwyanî ro komo poko rma tko tî xatken̂e, ponaro cehtopo komo poko. Tpoyinonhîrî komo yehtopo yaw roro rma xatken̂e, yîchei so n̂esekyatken̂e n̂examro yehtopo yaw roro ha.

34 Oroto rma tî cehtoponhîrî komo yaw roro rma natu. Kporin komo ponaro xa exihra nat okwe. Kporin komo ya kpanatanmetopo yewetîra nat okwe. Xako yepamtho komo panatanmekyakn̂e, Ixaw me tak n̂osohcekn̂e noro yepamtho kom ha, yîmtapotachonhîrî yewetîra tko nat okwe.

35 Ixaw Yana komo yakro tî nîmtapowakn̂e Kporin komo cewetîtopo poko. On wara tî kekn̂e yîwya so, Ponaro anarî komo yehtopo ponarora ro mak men ehcoko. Noro yipu komo mamakan me yutupentara ehcoko, pokohra ro mak ehcoko. Yîwya so tîmsom tîmîhra marha ehcoko.

36 Aporin komo ponaro xa ehcoko. Noro xa awekyatken̂e so Exitu poi. Kar̂pe cehtopo xa n̂enpekn̂e awowrî komo poko. Apoyankaxapu wara xakn̂e awekrî komo poko, Noro ponaro mak ehcoko, Oporinî ro Amoro, kacoko Noro ya mak. Noro ya mak tîmcoko anîmrî komo.

37 Apanatanmetopo komo tî mewrekn̂e an̂enîrî komo me ero men ewetîcoko miya roro mak etowîn me ro mak. Ponaro anarî komo yehtopo ponarora ro mak ehcoko, mîk hak warai me enporixaputho ponarora.

38 Awakro so kîmtapowakn̂e oyewetîn̂e me awehtopo komo poko, ero wa kacho yîhcamnopîra men ehcoko. Anarî ponarora ro mak men ehcoko mîk hak warai me enporixapu komo ponarora.

39 Aporin komo Kaan ponaro mak men ehcoko. Noro xa akurunpexe so awaikara ro mak ehtome aaxatî pîn komo, kekn̂e tî. Ero wa tî kekn̂e Kporin komo Ixaw Yana komo ya pahxa rma.

40 Yîmtapotarî tko tî ewetîra xatken̂e iina ehxapu komo. Pahxa xatken̂e ponaro cehtopo komo poko ero wara rma tî xatken̂e Samaria pona tmokuche so hara.

41 Ero wa tî xatken̂e iina ehxapu komo, mîk hak rowon pono komo, Kporin komo poko rma tî re xatken̂e twerî. Mîk hak warai me cin̂irithîrî komo poko rma tko tî xatken̂e. Ero wara rma naxe yîmxîkîthîrî komo oroto, miya roro epamthîrî komo marha. Tporin pen komo yehtoponho yaw roro rma naxe okwe. Ero wara naxe.