Taa, Akas yehtoponho tan wekatîmyas hara, Xotaw pen mumutho yehtoponho. Peka tî xakn̂e Ixaw Yana kayaritomon me. 17 cimn̂ipu tî xakn̂e kayaritomo me noro yehtoponho, ero po takî tî Akas xakn̂e Xuta komo kayaritomon me hara.

2 20 cimn̂ipu tî xakn̂e Akas yewrutoponho kayaritomo me ecir̂ataw. 16 cimn̂ipu tî xakn̂e kayaritomo me. Xerusaren tî xakn̂e noro yewton. Kir̂wan̂he noro yenîhra tî xakn̂e Kporin komo. Tporin pen warahra tî xakn̂e, Tapi pen warahra.

3 Ixaw Yana kayaritomon komo wara xa matko tî xakn̂e kica. Kanan pononho pen komo wara marha tî xakn̂e kica. Ixaw Yana komo ya waihkapekn̂e Kporin komo n̂examro pen wara rma tî xakn̂e. Tumumuthîrî pen meero tî nakn̂iyakn̂e okwe. Kicicitho me ro mak n̂examro yehtopo yaw roro rma xakn̂e okwe.

4 Îh pona so marha tî tookuthîrî pun nakn̂iyakn̂e, kotoporem marha. Weewe yapomyaw so marha tî ero yipu nakn̂iyakn̂e, taakem yapomyaw so, mîn hak yapomyaw.

5 Ero yimaw takî tî mokyatken̂e Hesin, Siriu komo kayaritomon. Peka yakro mokyatken̂e, Hemarias mumutho yakro. Ixaw Yana kayaritomon tî mîk xakn̂e Peka. Xerusaren pona tî mokyatken̂e iitono komo waparî me okwe. Ewto tî mamcetken̂e Akas pen yar̂machome. N̂ehn̂etken̂e tko tî ar̂mara rma tî xakn̂e.

6 Ero yimaw marha tî Erace nahsîyakn̂e Hesin cewton me. Iitononhîrî komo tî n̂en̂epekn̂e Xuta yepamtho pen kom ha. Ero yinhîrî Erace pona takî tî n̂esekenmetken̂e Eton pono komo. Iito rma naxe oroto.

7 Ero yimaw on wara takî tî xakn̂e Akas, tîmtapotarî yekatîmn̂e komo tî n̂en̂epekn̂e Cikrace-Pirese yaka, Asiria pono komo kayaritomon yaka. On wara kacho tî n̂ekatîmyatken̂e yîwya, Ai apa, awanton mak ow ha. Ero ke on wara cma re wîîkes awya, owaparî me mokyaxe okwe Siriu komo kayaritomon, Ixaw Yana kayaritomon marha. Ero ke cma re mîmokyasî amoro okurunpen̂e me, kacho tî n̂ekatîmyatken̂e yîwya.

8 Ekatîmn̂e komo torî me prata tî nahsîyakn̂e Akas Kporin komo mîn yawnonho, ooru marha. Ero yipu marha tî nahsîyakn̂e kayaritomo mîn yawnonho. Ero yipu takî tî narpekn̂e Asiria pono komo kayaritomon yaka yîwya tîmsom me.

9 Ero ke Akasî mtapotachonho takî tî n̂ewehcakn̂e Asiria pono kayaritomon. Tamasku pona tî cekn̂e iitono komo waparî me. Iitononhîrî komo tî naar̂akn̂e Kiri pona. Hesin pen tî waihkekn̂e. Ero wa tî xakn̂e Asiria pono komo kayaritomon.

10 Ero yinhîrî takî tî Tamasku pona cekn̂e Akasî Cikrace-Pirese yenso. Iito cexitaw tîmsom yakn̂itopo tî n̂een̂akn̂e. Enîche karita yaka tî mewrekn̂e yukuknon, yukuknomacho marha. On wara ciiso nasî Tamasku pono tîmsom yakn̂itopo, kacho tî mewrekn̂e. Mewreche takî tî karita narpekn̂e Urias yaka, Kaan yaka cewomsom yaka.

11 Ero ke ero yipu takî tî nakîhcekn̂e Urias, Akasî nmewretho yaw roro rma, Tamasku poi n̂ekpekn̂e karita ero yaw roro tî nakîhcekn̂e. Meye rma ka exitaw Akas Tamasku po rma nakîhcekn̂e.

12 Ero yinhîrî Tamasku poi noro mokuche hara, tîmsom yakn̂itopo tî n̂een̂akn̂e. Ero yaka tî cekn̂e. Ero pona tî nakn̂iyakn̂e tîmsom komo.

13 Ero pona tî tokuthîrî pun nakn̂iyakn̂e takn̂itîkaxmu me cehsom, puruma marha tî nakn̂iyakn̂e hara tîmsom. Ero pona marha tî nukmamyakn̂e wooku tînîmrî hara. Tokuthîrî kamxukutho ke marha tî caramekn̂e, Aaxe xa wasî, kacho me tîmsom kamxukutho.

14 Kporin komo ya tîmsom yakn̂itopo marha tî n̂ekpekn̂e bronse ciixapu. Mehxa tî xakn̂e Kaan mîn, xehxa n̂he tî xakn̂e yaxan, tîmsom yakn̂itopo. Iyotawnonhîrî tî mîn n̂ekpekn̂e Kporin komo mîn potawnonho. Mehxa tî n̂iir̂akn̂e tînakîtothîrî yawxari rma nohce n̂ixa.

15 Ero wa cirpoche on wara tî kekn̂e Akas Urias ya, On wara cirko yaxan, tîmsom yakn̂itopo, porin ha, ero pona akn̂iko pahxaxa ro takn̂itîkaxmu, kokon̂i tîmsom marha puruma. Kayaritomo nîmrî marha akn̂iko iina oyok pun, puruma marha. Xuta komo yokutho pun marha akn̂iko takn̂itîkaxmu me cehsom, puruma, wooku marha tîmsom kom ha. Ero yipu ahnoro akn̂iko porin pona. Takn̂isom kamxukutho ke marha caramakî ahce na me tîmsom kamxukutho. Ero wa cirko an̂irithîrî, porin ha. Owî reha bronse ciixapu pona wakn̂iyasî Kporin komo ya tîmsom yîmtapotarî yenta xe oyexitaw mak, kekn̂e tî. Ero wa tî kekn̂e Akas Urias ya.

16 Ero ke ero wara rma tî tîmsom yakn̂itopo n̂iir̂akn̂e Urias, Kaan yaka cewomsom, Akasî mtapotachonho yaw roro rma.

17 Ero yimaw marha tî on wara xakn̂e Akas, tîmsom pokono komo yesemokacho yapon tî nawickekn̂e. Esemokacho mko marha tî narpekn̂e ero pononho mko. Tuuna yen marha tî n̂enîhcekn̂e porin hara, paaka warai mkawnonho, bronse ciixapu mkawnonho ha. Toh pona makî tî n̂iir̂akn̂e tmemehsem pona.

18 Iito marha tî xakn̂e mîîmo roona warai, sabatu po esenmecho kom ha. Ero pen takî tî n̂ixkekn̂e Akas. Iito marha tî xakn̂e Kporin komo mîn yaka ewomtopo, kayaritomo komo yewomtopo ro. Ero marha tî nahruyakn̂e Akas. Asiria pono komo kayaritomon yanme rma tî nahruyakn̂e.

19 Miya rma tî nai Akas yehtoponho, ahce wa so na ehtoponhîrî. Ahnoro nasî tmewreso karita yaw, Xuta Yepamtho Kayaritomon Komo Yehtoponho, kacho yaw.

20 Ero yinhîrî nîwînîkyakn̂e takî tî Akas tporin pen komo yakro. Okoputhîrî tî nahruyatken̂e tporin pen komo yocho mîtwo, Tapi pen Yewtontho po. Ero yinhîrî yumumuthîrî takî tî xakn̂e kayaritomo me noro pen retawno me hara. Esekias tî xakn̂e yumumuthîrî yosotî. Noro tî xakn̂e kayaritomo me hara. Ero wa tî xakn̂e.