Taa, on wara tî xakn̂e Asarias, Amasias pen mumutho, 27 cimn̂ipu takî tî xakn̂e kayaritomo me Xeroboaw yehtoponho, Ixaw Yana komo kayaritomon me ehtoponhîrî. Ero yimaw takî tî Xuta yepamtho kayaritomon me takî tî xakn̂e Asarias hara.

2 16 cimn̂ipu tî xakn̂e noro yewrutoponho ero wa ecir̂ataw. Pahkî ro makî tî xakn̂e kayaritomo me 52 cimn̂ipu ha tî. Xerusaren tî xakn̂e noro yewton. Xekorias tî xakn̂e noro nocwan yosotî, Xerusaren pono.

3 Kir̂wan̂he tî xakn̂e noro Kporin komo ya. Tîîm pen wara rma tî xakn̂e Amasias pen wara.

4 Îh pona so rma tko tî Xuta komo nakn̂iyatken̂e tookuthîrî komo pun, kotoporem marha. Ero yipu ahsîpînkara rma tî xatken̂e okwe.

5 Ero yinhîrî takî tî repra ken̂arî me tak kayaritomo pen n̂iir̂akn̂e Kporin komo. Ero wara tî xakn̂e miya roro twaihtopo pona roro. Cewyaro makî tî n̂enmayakn̂e okwe. Ero ke yumumuru takî tî xakn̂e kayaritomo mîn yenîn̂e me, Xuta komo yantoman̂e me marha. Xotaw tî xakn̂e yumumuru yosotî.

6 Miya rma nai Asarias yehtoponho, ciino ritoponho yîwya. Tmewreso nai karita yaw, Xuta Kayaritomon Komo Yehtoponho, kacho yaw.

7 Ero yinhîrî takî tî nîwînîkyakn̂e Asarias pen tporin pen komo yakro. Okoputhîrî tî nahruyatken̂e tporin pen komo mîtkoso, Tapi pen Yewtontho pona. Ero yinhîrî yumumuthîrî takî tî xakn̂e kayaritomo me tîîmînhîrî pen retawno me hara. Xotaw tî xakn̂e yumumuthîrî yosotî. Ero wa tî xakn̂e.

8 Taa, on wara tî xakn̂e Sakarias, Xeroboaw pen mumutho. 38 cimn̂ipu tî xakn̂e kayaritomo me Asarias yehtoponho, ero yimaw takî tî Sakarias xakn̂e Ixaw Yana komo kayaritomon me hara. 6 nuun̂i makî tî xakn̂e kayaritomo me. Samaria tî xakn̂e noro yewton.

9 Kicicme tî noro n̂een̂akn̂e Kporin komo. Tporin pen komo wara rma tî xakn̂e kica. Kicicme Xeroboaw N̂ebace pen yehtoponho yahsîpînkara tî xakn̂e okwe. Ixaw Yana komo panatanmekyakn̂e kicicme ehtopo komo poko. Noro pen yehtoponho yahsîpînkara tî xakn̂e Sakarias okwe.

10 Ero yinhîrî Sakarias pen waihkacho takî tî nîhtînoyakn̂e Sarun, Xabes mumuru. Ero ke noro pen tî waihkekn̂e yakentaw rma okwe. Ero wa tî kayaritomo pen waihkekn̂e. Ero yinhîrî kayaritomo me takî tî n̂ecir̂akn̂e noro Sakarias pen yemtaka hara. Ero wa tî xakn̂e Sarun.

11 Miya rma tî nai Sakarias pen yehtoponho. Ahnoro rma nasî tmewreso karita yaw, Ixaw Yana Kayaritomon Komo Yehtoponho, kacho yaw.

12 Ero ke Kporin komo mtapotacho yaw roro rma tak xakn̂e, Xeu pen ya kekn̂e ero yaw roro. On wara tî kekn̂e Kporin komo noro pen ya pahxa, Ixaw Yana komo kayaritomon me naxe amn̂e awepamthîrî komo, 4 me ehretawnomaxapu komo rma, kekn̂e tî. Yaaro kekn̂e ham. Ero wara rma tî xatken̂e noro yepamtho komo kayaritomo me. Ero wara tî xatken̂e.

13 Taa, 39 cimn̂ipu takî tî xakn̂e kayaritomo me Asarias yehtoponho, Xuta komo kayaritomon me ehtoponhîrî. Ero yimaw takî tî Sarun n̂ecir̂akn̂e kayaritomo me, Xabes mumuru. Cewn̂e nuun̂i makî tî xakn̂e kayaritomo me.

14 Ero yimaw iito xakn̂e Menaen, Kaci mumuru. Noro takî tî cekn̂e Cihsa poi Samaria pona. Iito takî tî Sarun pen waihkekn̂e. Ero yinhîrî kayaritomo me takî tî n̂ecir̂akn̂e noro Sarun pen yemtaka hara.

15 Nai rma tî Sarun pen yehtoponho, kayaritomo pen waihkan̂e komo yaan̂e me ehtoponhîrî meero. Ahnoro rma tî nai tmewreso karita yaw, Ixaw Yana Komo Kayaritomon Komo Yehtoponho, kacho yaw.

16 Ero yinhîrî takî tî Cihsa poi cekn̂e Menaen Cipsa pona. Iitono komo waparî me tî cekn̂e, yîmîtwono komo waparî me marha. Taa, amna kayaritomon me mai ham, kahtorî ke yîwya so n̂examro pen waihkekn̂e ahnoro. Wooxam komo marha tî wetîhkekn̂e oko tarkem pen kom okwe. Ero wa tî xakn̂e noro okwe.

17 Taa, on wara tî xakn̂e Menaen, Kaci mumuru, 39 cimn̂ipu tî xakn̂e kayaritomo me Asarias yehtoponho, Xuta komo kayaritomon me ehtoponhîrî, ero yimaw tî Menaen n̂ecir̂akn̂e Ixaw Yana kayaritomon me hara. 10 cimn̂ipu tî xakn̂e kayaritomo me. Samaria tî xakn̂e noro yewton.

18 Kicicme tî noro n̂een̂akn̂e Kporin komo. Kicicme Xeroboaw N̂ebace pen yehtoponho yahsîpînkara tî xakn̂e okwe, Ixaw Yana komo panatanmekyakn̂e kicicitho poko, noro pen yehtoponho yahsîpînkara.

19 Ero yinhîrî takî tî Puw mokyakn̂e Asiria pono komo kayaritomon. Ixaw Yana komo waparî me tî mokyakn̂e. Noro tko tî n̂epemekn̂e Menaen. Prata tî nîmyakn̂e yîwya 1.000 tarentu wicakî. Ero wa tî noro n̂epemekn̂e takronomachome n̂he, yukurumîkno me n̂he tak cehtome. Ero wa ehtome Puw n̂epemekn̂e.

20 Ero ke Ixaw Yana komo ya takî tî prata nîmpekn̂e Menaen. Tupurantayem komo ya tî ero wa nîmpekn̂e. Ahnoro tîmcoko 50 sikru wicakî so, kekn̂e tî yîwya so. Ero takî tî nahsîyakn̂e Asiria pono komo kayaritomon ya tîmtome hara. Ero wicakî puranta yahsîche tîwya n̂etîramekn̂e hara Asiria pono komo kayaritomon. Ixaw Yana komo chew exihra takî tî xakn̂e.

21 Taa, miya rma tî nai Menaen yehtoponho, ciino ritoponho yîwya. Ahnoro rma nasî tmewreso karita yaw, Ixaw Yana Kayaritomon Komo Yehtoponho, kacho yaw.

22 Ero yinhîrî n̂epokarekn̂e takî tî Menaen pen tporin pen komo yakro. Ero yinhîrî yumumuthîrî takî tî xakn̂e kayaritomo me hara tîîm pen retawno me. Pekaias tî xakn̂e yumumuthîrî yosotî. Ero wa tî xakn̂e.

23 Taa, on wara tî xakn̂e Pekaias, Menaen pen mumutho, 50 cimn̂ipu tî xakn̂e kayaritomo me Asarias yehtoponho, Xuta komo kayaritomon me ehtoponhîrî, ero yimaw takî tî Pekaias n̂ecir̂akn̂e Ixaw Yana komo kayaritomon me hara. Samaria tî xakn̂e noro yewton. 2 cimn̂ipu makî tî xakn̂e kayaritomo me.

24 Kicicme tî noro n̂een̂akn̂e Kporin komo. Kicicme Xeroboaw N̂ebace pen yehtoponho yahsîpînkara tî xakn̂e okwe, Ixaw Yana komo tî panatanmekyakn̂e kicicitho poko, noro pen yehtoponho yahsîpînkara.

25 Ero yimaw iito tî xakn̂e anarî hara, Peka tî osotî, Hemarias mumuru ha. Pekaias maywenî rma tî mîk xakn̂e, sowtatu yantoman̂e me ha. Pekaias waihkacho tko tî nîhtînoyakn̂e. Peka yakro tî xatken̂e 50 kîrkomo Xireace pono komo. Ero ke Pekaias pen tî waihkekn̂e Samaria po. Kayaritomo mîn yaw rma tî waihkekn̂e, mîîmo maxixin yaw. Ahkobe, Arie, n̂examro pen marha tî Peka nakronomekn̂e Pekaias waihkacho poko. Ero wa tî Pekaias pen waihkekn̂e. Ero yinhîrî kayaritomo me takî tî n̂ecir̂akn̂e noro hara Peka ha.

26 Nai rma tî Pekaias pen yehtoponho, ahce wa so na ciino ritoponho yîwya. Ahnoro rma tko nasî tmewreso karita yaw, Ixaw Yana Kayaritomon Komo Yehtoponho, kacho yaw.

27 Ero ke Peka makîrha takî tî xakn̂e kayaritomo me hara. On wara tî xakn̂e Asarias, Xuta komo kayaritomon ero yimaw, 52 cimn̂ipu tî xakn̂e kayaritomo me noro yehtoponho. Ero yimaw xa Ixaw Yana komo kayaritomon me tî n̂ecir̂akn̂e Peka hara, Hemarias mumuru ha. Samaria tî xakn̂e noro yewton. Ero yinhîrî takî tî 20 cimn̂ipu xakn̂e kayaritomo me.

28 Kicicme marha tî noro n̂een̂akn̂e Kporin komo okwe. Xeroboaw N̂ebace yehtoponho yahsîpînkara tî xakn̂e okwe, Ixaw Yana komo panatanmekyakn̂e kicicitho poko, Noro pen yehtoponho yahsîpînkara tî xakn̂e.

29 Kayaritomo me exitaw Peka, Cikrace-Pirese takî tî mokyakn̂e, Asiria pono komo kayaritomon. Ixaw Yana komo waparî me tî mokyakn̂e okwe. Ixon pono komo tî nahsîyakn̂e, Abew-Bece-Maaka pono komo, Xanoa pono komo, Ketes pono komo, Aso pono komo, Xireace pono komo, Karireia pono komo, ahnoro Nahtari yepamtho rowon pono komo, ero warai komo tî nahsîyakn̂e. N̂examro pen takî tî naar̂akn̂e tîrowon pona, Asiria pona. Ero wa tî aano n̂iir̂akn̂e okwe Cikrace-Pirese.

30 Ero yinhîrî takî tî iito xakn̂e anarî hara, Oseias tî osotî. On wara tî xakn̂e noro, takrono komo yakro tî n̂esencekn̂e Peka waihkacho poko, Hemarias mumuru waihkacho poko. Ero ke takî tî Peka pen waihkekn̂e. Emtaka tak hara tî Oseias xakn̂e kayaritomo me. Ero yimaw tî Xotaw xakn̂e Xuta komo kayaritomon me, 20 cimn̂ipu tî xakn̂e kayaritomo me noro yehtoponho. Ero yimaw takî tî Ixaw Yana komo kayaritomon me n̂ecir̂akn̂e Oseias.

31 Miya rma tî nai Peka pen yehtoponho, ahce wa so na ciino ritoponho yîwya. Ahnoro nasî tmewreso karita yaw, Ixaw Yana Kayaritomon Komo Yehtoponho, kacho yaw. Ero wa nasî.

32 Taa, on wara tî xakn̂e Xotaw hara, Usias pen mumutho ha, Peka tî xakn̂e Ixaw Yana kayaritomon me. 2 cimn̂ipu tî xakn̂e kayaritomo me ehtoponhîrî. Ero yimaw takî tî Xotaw n̂ecir̂akn̂e Xuta kayaritomon me hara.

33 25 cimn̂ipu tî xakn̂e noro yewrutoponho kayaritomo me ecir̂ataw. 16 cimn̂ipu tî xakn̂e kayaritomo me. Xerusa tî xakn̂e yînocwan yosotî, Satoke yemsîrî ha.

34 Kir̂wan̂he tî Xotaw n̂een̂akn̂e Kporin komo. Tîîm pen wara rma tî xakn̂e Usias pen wara.

35 Îh po so rma tko tî tîmsom nakn̂iyatken̂e tookuthîrî komo pun, kotoporem marha. Taa, on wara tî xakn̂e Xotaw, Kporin komo mîn metatan tî n̂iir̂akn̂e anarî hara, îpî n̂ixan. Ero warai tî n̂iir̂akn̂e.

36 Miya rma tî nai Xotaw yehtoponho, ahce wa so na ciino ritoponho yîwya. Ahnoro rma nasî tmewreso karita yaw, Xuta Kayaritomon Komo Yehtoponho, kacho yaw.

37 Kayaritomo me exitaw Xotaw Xuta komo waparî takî tî n̂en̂epekn̂e Kporin komo. Hesin tî n̂en̂epekn̂e Siriu komo kayaritomon. Peka marha tî n̂en̂epekn̂e Ixaw Yana kayaritomon. N̂examro tî n̂en̂epekn̂e Kporin komo Xuta komo waparî me okwe.

38 Ero yinhîrî takî tî n̂epokarekn̂e Xotaw tporin pen komo yakro. Okoputhîrî tî nahruyatken̂e tporin pen komo mîtwo. Tapi pen Yewtonthotho po tî nahruyatken̂e, tporin pen yewtontho po. Ero yinhîrî takî tî yumumuthîrî xakn̂e kayaritomo me noro pen retawno me hara. Akas tî xakn̂e yumumuthîrî yosotî. Ero wa tî xakn̂e.