Ero yinhîrî Amasias takî tî xakn̂e Xuta yepamtho komo kayaritomon me hara. Xoas pen mumutho tî mîk xakn̂e Amasias. 2 cimn̂ipu tî xakn̂e kayaritomo me Xeoakas yehtoponho, Ixaw Yana kayaritomon me ehtoponhîrî, ero yimaw tî Amasias tak xakn̂e kayaritomo me.

2 25 cimn̂ipu tî xakn̂e noro yewrutoponho kayaritomo me ecir̂ataw. 29 cimn̂ipu takî tî xakn̂e kayaritomo me. Xerusaren tî xakn̂e noro yewton. Xoatan tî xakn̂e yînocwan yosotî, Xerusaren pono ha.

3 Kir̂wan̂he tî noro n̂een̂akn̂e Kporin komo. Tporin pen warahra tko tî xakn̂e, Tapi pen warahra. Tîîmînhîrî pen wara makî tî xakn̂e, Xoas pen wara. Ero wa makî tî xakn̂e.

4 Îh po so rma tko tî Xuta yepamtho komo nakn̂iyatken̂e tokuthîrî komo pun, kotoporem marha. Ero yipu yahsîpînkara rma tî xatken̂e okwe.

5 Kayaritomo me xa tak cehtîkache on wara takî tî xakn̂e Amasias, tîîmînhîrî pen waihkan̂enho pen komo tî waihkekn̂e.

6 Yîmxîkîthîrî komo tko tî waihkara xakn̂e. Moises penî mtapotachonho yaw roro makî tî n̂examro n̂iir̂akn̂e mewrexapu yaw roro. On wara tî kekn̂e Kporin komo Moises pen ya, Kicicme exitaw apoyino komo xîkrî, yîîm komo waihkara ehcoko yîmxîkrî yehtoponho poyero. Kicicme exitaw yîîm, yîmxîkrî komo waihkara cexpore marha nasî yîîm komo yehtoponho poyero. Kicicme ehxapu makî reha waihkacoko kicicme noro yehtoponho yanme mak ha, kekn̂e tî yîwya. Ero ke ero wa kachonho yaw roro rma tî ciino n̂iir̂akn̂e Amasias.

7 Ero yinhîrî takî tî Eton pono pen komo waihkapekn̂e noro 10.000 ha tî. Woskara pono komo tî mîkyam waihkekn̂e, Yîmîtî Ken̂arî, kacho pono komo. Sera marha tî nahsîyakn̂e ewto. Ahsîche Xoktew me takî tî nosohcekn̂e hara. Ero wa tî ewto nosohcekn̂e.

8 Ero yinhîrî takî tî on wara xakn̂e Amasias, tîmtapotarî yekatîmn̂e takî tî n̂en̂epekn̂e Xeoas yaka, Ixaw Yana komo kayaritomon yaka. Xeoakas pen mumutho tî mîk xakn̂e Xeoas, Xew pen parînho ha. On wara tî nîîke Amasias awya, kekn̂e tî ekatîmn̂e, Xiya ka amohcoko ketar̂machome so, nîîke tî, kekn̂e tî ekatîmn̂e.

9 Tmaywen komo tko tî Xeoas n̂en̂epekn̂e Amasias yaka hara, Xuta komo kayaritomon yaka, Ai, on wara tî nîîke Xeoas awya, ketken̂e tî, Ribanu po xakn̂e peentho, cekyekyem. Setru yepu marha xakn̂e iito. Cekyekyem takî n̂en̂epekn̂e setru yepu yaka tîmtapotarî yekatîmn̂e komo. Ero ke yîmtapotarî tak n̂ekatîmyakn̂e. On wara tî nîîke cekyekyem awya, kekn̂e, Awemsîrî cma re mîmyasî omumuru ya yipici me, nîîke tî, kekn̂e. Ero yimaw rma tko mokyakn̂e comota pono. Cekyekyem pen tak napikyakn̂e mak okwe, kekn̂e tî.

10 Eton pono komo rma re mar̂mai. Ero ke mehcoyoponke mak ham kica. N̂examro pen yopono me awehtoponhîrî poko mak ahwotakî iito aweken po rma. Ahce kacho awemetanmetopo wece mak amoku xe mai hara okwe epîrkaxapu wara tak awehtome, ero wa xa marha ehtome so Xuta kom hara okwe, kan̂e tî n̂en̂epekn̂e hara Amasias yaka.

11 Panahra ro makî tko tî xakn̂e Amasias. Ero ke cekn̂e takî tî Xeoas, noro yakro etar̂maxi. Bece-Semes mîtwo takî tî n̂etar̂metken̂e, Xuta yepamtho komo yewton mîtwo.

12 Xuta sowtatun komo yopo tî xatken̂e Ixaw Yana komo sowtatun. Ero ke n̂emahciyatken̂e takî tî Xuta pen komo tîmîn komo yaka hara.

13 Ero ke Amasias pen takî tî nahsîyakn̂e Xeoas, Xuta komo kayaritomon. Bece-Semes po tî nahsîyakn̂e. Ero yinhîrî Xerusaren pona takî tî cekn̂e Xeoas. Ewto wacan pen tî macakekn̂e kr̂a. Eprain yepamtho komo metatan n̂ixa tî macakekn̂e metata yaka roro, eknutawno yaka. 180 metru wicakî ehyatkawnon tî macakekn̂e okwe.

14 Ooru tî naatîkekn̂e marha Kporin komo mîn yawnonho, kayaritomo mîn yawnonho marha. Prata marha tî naatîkekn̂e. Mîn hak mak naatîkekn̂e iitononhîrî. Xuta yepamtho pen komo marha tî naar̂akn̂e. Ero warai tî naar̂akn̂e Xeoas Samaria pona tîcetaw hara. Ero wa tî xakn̂e Xeoas.

15 Taa, miya rma tî nai Xeoas yehtoponho, ciino ritoponho yîwya, kar̂pe ehtoponhîrî, Amasias yakro etar̂machonhîrî. Ahnoro nasî tmewreso karita yaw, Ixaw Yana Kayaritomon Komo Yehtoponho, kacho yaw.

16 Ero yinhîrî nîwîkyakn̂e takî tî Xeoas pen tporin pen komo yakro. Samaria pona tî okoputhîrî nahruyatken̂e. Ero yinhîrî yumumuthîrî takî tî n̂iir̂atken̂e kayaritomo me hara tîîmînhîrî pen retawno me. Xeroboaw tî xakn̂e yumumuthîrî yosotî.

17 Ero yinhîrî takî tî on wara xakn̂e Amasias Xeoas pen waipuche, Ixaw Yana kayaritomon pen waipuche, 15 cimn̂ipu rma ka xakn̂e Xuta komo kayaritomon me.

18 Miya rma tî nai Amasias yehtoponho. Ahnoro rma nasî tmewreso karita yaw, Xuta Komo Kayaritomon Komo Yehtoponho, kacho yaw.

19 Ero yinhîrî noro waihkacho poko tî n̂esencetken̂e maywen komo. Xerusaren pono komo tî mîkyam n̂esencetken̂e ero poko. Ero ke Rakis pona tî n̂emahciyakn̂e Amasias. Iina rma tko waparî komo n̂en̂epetken̂e. Iito takî tî waihketken̂e okwe.

20 Ero yinhîrî noro pen yokoputho takî tî n̂ekyatken̂e Xerusaren pona. Iina tî nahruyatken̂e tporin pen komo yakro Tapi pen Yewtontho po.

21 Ero yinhîrî Xuta komo takî tî n̂esenmekyatken̂e ahnoro. Amasias pen mumutho tî n̂iir̂atken̂e kayaritomo me yîîmînhîrî pen yemtaka hara. Asarias tî mîk xakn̂e yumumuthîrî yosotî. 16 cimn̂ipu tî xakn̂e noro yewrutoponho kayaritomo me ciir̂ataw yîwya so.

22 Tîîmînhîrî pen waipuche Erace takî tî n̂iir̂akn̂e Asarias, Xuta komo yewtontho ha. Ero wa tî n̂iir̂akn̂e.

23 Taa, pahxa n̂he ka 15 cimn̂ipu makî ka exitaw kayaritomo me Amasias yehtoponho, Xuta kayaritomon yehtoponho, Ero yimaw takî tî Xeroboaw tak xakn̂e Ixaw Yana kayaritomon me hara. Samaria tî xakn̂e noro yewton. Pahkî tî xakn̂e noro kayaritomo me, 41 cimn̂ipu ha tî.

24 Kicicme xa marha tî noro n̂een̂akn̂e Kporin komo. Xeroboaw N̂ebace pen yehtoponho yahsîpînkara rma tî xakn̂e okwe, Ixaw Yana komo panatanmekyakn̂e kicicitho poko, noro pen yehtoponho ha.

25 Ixaw Yana rowontho tî nahsîyakn̂e hara miyanî rma Amace potarî n̂ixan n̂ikitho imo kwaka rorono, Araba pono kwaka rorono ha. Ero wicakî arowonthîrî komo mahsîyaxe hara amn̂e, kekn̂e rma tî Kporin komo, ponaro Ixaw Yana komo yehtopo. Xonas mtari tî ero wa kekn̂e, Amitai mumuru mtari. Kweronoman̂e tî mîk xakn̂e Xonas, Kace-Epe pono. Ero ke noro mtapotaconho yaw roro rma tî nahsîyakn̂e.

26 Ixaw Yana komo yemetanmetopo tî n̂een̂akn̂e Kporin komo. Ero ke nakronomekn̂e tîrowonthîrî yahsîtome xa hara. N̂esemetanmekyatken̂e ro makî tî okwe. Anto me cehsom komo tî n̂esemetanmekyatken̂e, tanme ro cetapickaxmu komo meero tî n̂esemetanmekyatken̂e okwe. Ixaw Yana yakronoman̂e exihra ro makî tî ka xakn̂e.

27 On wara tko tî kahra xakn̂e Kporin komo, Ixaw Yana komo kr̂a tak wîhcamnoyasî, osotî komo meero wîhcamnopesî roowo poko hakno komo ya, kahra tî xakn̂e. Xeroboaw ke xa matko tî nukurunpekn̂e, Xeoas pen mumutho ke ha.

28 Miya rma tî nai Xeroboaw yehtoponho, ahce wa so ciino ritoponho yîwya, kar̂pe ehtoponhîrî, etar̂maxi totoponhîrî marha. Ixaw Yana komo rowontho nahsîyakn̂e hara noro Amace yaka rorono komo, Tamasku yaka rorono komo marha. Xuta rowontho rma re ka mîn xakn̂e, ero rma nahsîyakn̂e. Ero wa ahsîtoponhîrî nasî tmewreso karita yaw, Ixaw Yana Kayaritomon Komo Yehtoponho, kacho yaw. Ahnoro tî noro pen yehtoponho nasî tmewreso ero yaw.

29 Ero yinhîrî nîwînîkyakn̂e takî tî Xeroboaw pen tporin pen komo yakro, Ixaw Yana kayaritomon komo yakro. Ero yinhîrî yumumuthîrî takî tî tak xakn̂e kayaritomo me hara tîîmînhîrî pen retawno me. Sakarias tî mîk xakn̂e yumumuthîrî yosotî. Ero wa tî xakn̂e.