Taa, Xeoakas yehtoponho tan wekatîmyas hara, Xeu pen mumutho yehtoponho ha. 23 cimn̂ipu tî xakn̂e Xoas yehtoponho, Xuta komo kayaritomon me ehtoponhîrî, ero yimaw takî tî Xeoakas n̂iir̂atken̂e Ixaw Yana komo tîkayaritomon me hara. Samaria tî xakn̂e noro yewton. 17 cimn̂ipu tî xakn̂e kayaritomo me. Ero wa tî xakn̂e Xeoakas.

2 Kicicme tî noro n̂eenakn̂e Kporin komo. Xeroboaw N̂ebace pen yehtoponho yaw roro rma tî xakn̂e okwe. Ixaw Yana komo tî panatanmekyakn̂e Xeroboaw pen kicicitho poko, ero wara rma tî xakn̂e Xeoakas hara. Kicicme noro pen yehtoponho yahsîpînkara tî xakn̂e okwe.

3 Ero ke takî tî Ixaw Yana komo poko nîrwonakn̂e Kporin komo. Asaew ya tî n̂examro pen waihkapekn̂e roro okwe, Siriu komo kayaritomon ya. Asaew mumutho ya marha tî Ixaw Yana komo waihkapekn̂e, Ben Atace ya ha. Twaihtopo komo pona roro tî xatken̂e n̂examro Ixaw Yana komo yemetanmekn̂e me okwe.

4 Ero yinhîrî tak tî Kporin komo yakro nîmtapowakn̂e Xeoakas. Cerewre tî nîmtapowakn̂e takronomacho poko. Yîmtapotarî tî n̂encekn̂e Kporin komo. Ixaw Yana pen komo yemetanmekrî tî n̂een̂akn̂e. Miya xe xa tî n̂examro n̂emetanmekyakn̂e Siriu komo kayaritomon.

5 Ero ke yukurunpen̂e komo takî tî n̂enpekn̂e Kporin komo yîwya so. Ero ke Siriu komo mamawra tak xatken̂e Ixaw Yana komo. Ero ke takî tî tîmîn komo yaw so n̂enmayatken̂e hara, pahxa xatken̂e ero wara xa hara.

6 Wara rma tî kicicme Xeroboaw yehtoponho yahsîpînkara rma xatken̂e okwe. Kicicitho poko Ixaw Yana komo panatanmekyakn̂e noro pen, noro yehtoponho yaw roro rma tî xatken̂e. Samaria po marha tî xakn̂e Axera me enporixaputho mko kica.

7 On wara tî xatken̂e Xeoakas sowtatun komo, 50 makî tî xatken̂e kawaru mkaw tîtosom komo okwe. 10 makî tî xakn̂e n̂examro tararan, 10.000 makî tî xatken̂e tîhtarî po tîtosom komo. Ero wicakî makî tî xatken̂e Xeoakas sowtatun komo. Anarî pen komo tî waihkekn̂e Siriu kayaritomon okwe. Puruma pîpîtho wara ro makî tî n̂examro pen n̂iir̂akn̂e, yîpîpîtîkacho pono wara. Ero wa tî Ixaw Yana sowtatun pen komo n̂iir̂akn̂e Siriu kayaritomon okwe.

8 Miya rma tî nai Xeoakas yehtoponho, ciino ritoponho yîwya, kar̂pe ehtoponhîrî marha. Ahnoro rma nai tmewreso karita yaw, Ixaw Yana Kayaritomon Komo Yehtoponho, kacho yaw.

9 Ero yinhîrî nîwînîkyakn̂e takî tî Xeoakas tporin pen komo yakro. Okoputhîrî tî nahruyatken̂e Samaria pona. Ero yinhîrî Xeoas takî tî xakn̂e kayaritomo me hara noro pen retawno me. Ero wa tî xakn̂e.

10 37 cimn̂ipu tî xakn̂e kayaritomo me Xoas yehtoponho, Xuta kayaritomon me ehtoponhîrî. Ero po rma takî tî Xeoas takî tî n̂iir̂atken̂e Ixaw Yana komo tîkayaritomon komo me hara. Samaria tî xakn̂e noro yewton. 16 cimn̂ipu tî xakn̂e kayaritomo me noro yehtoponho.

11 Kicicme xa marha tî noro n̂een̂akn̂e Kporin komo. Xeroboaw N̂ebace pen yehtoponho yahsîpînkara ro makî tî xakn̂e okwe. Ixaw Yana komo tî panatanmekyakn̂e kicicitho poko, noro pen yehtoponho yaw roro rma tî xakn̂e okwe.

12 Miya rma tî nai Xeoas yehtoponho. Ahnoro ciino ritopono yîwya, kar̂pe ehtoponhîrî marha, Amasias yakro etar̂machonhîrî, ero yipu nai tmewreso karita yaw, Ixaw Yana Kayaritomon Komo Yehtoponho, kacho yaw.

13 Ero yinhîrî nîwînîkyakn̂e takî tî Xeoas pen tporin pen komo yakro rma. Okoputhîrî tî nahruyatken̂e Samaria pona Ixaw Yana kayaritomon pen komo yakro. Ero yinhîrî Xeroboaw takî tî xakn̂e kayaritomo me hara noro pen retawno me. Ero wa tî xakn̂e.

14 Ero yinhîrî takî tî namotoyakn̂e Erisew pen okwe. Twaihtopo me rma namotoyakn̂e okwe. Ero ke noro yenso tî cekn̂e Xeoas. Noro yepona tî nîwracekn̂e. On wara tî kekn̂e yîwya, Apa, apa, Ixaw Yana komo kurunpen̂e amoro okwe, merpono pîn yîtararan komo warai. Merpono pîn tarara yaan̂e komo warai marha amoro okwe, kekn̂e tî.

15 Ero yinhîrî on wara takî tî kekn̂e Erisew yîwya, Ai okopuci, krapa ahsîko, waiwî marha. Ero ke krapa tî nahsîyakn̂e, waiwî mko marha.

16 Krapa ahsîko, kekn̂e tî Erisew yîwya. Ero ke tî nahsîyakn̂e. Ero yinhîrî Erisew takî tî n̂iir̂akn̂e tamorî kayaritomo yamorî pona.

17 On wara marha tî kekn̂e Erisew, Mîîmo yewkanapan ahrunkakî resce n̂ixan, kekn̂e tî. Ero ke tî nahrunkekn̂e. Taa, waiwî ar̂makî, kekn̂e hara tî. Ero ke waiwî tî nar̂mekn̂e ahrunkaxapu yaro rma. Ero yinhîrî on wara tî kekn̂e Erisew yîwya, Kporin komo yuhre yarman̂e me rma meexi ero yar̂metaw. Amn̂e tak Apeke po awetarmetaw Siriu komo yakro ero yipu ke cemyarkem wara rma n̂examro pen waihkapesî awya so. Ero ke Siriu pen komo men waihkatîkacoko iito exihra cehso ro, kekn̂e tî yîwya.

18 Ero yinhîrî on wara marha tî kekn̂e Erisew, Waiwî mko tak ahsîko, kekn̂e tî. Ero ke tî nahsîyakn̂e. Knai knai kasko tak roowo pona ero ke, kekn̂e takî tî yîwya. Ero ke knai knai knai kekn̂e tî osorwaw ro mak. Ero yinhîrî tî nîtîhkekn̂e.

19 Ero ke nîrwonakn̂e takî tî Kaanî yakrono ro. On wara tî kekn̂e kayaritomo ya, 5 ro xa cetapapore n̂eexi, 6 ro ha na. Ero wicakî knai knai kache awya Siriu komo mar̂marî yaake ro, exihra cehso ro tak ha. Oroto tak osorwaw ro mak mar̂mes okwe, kekn̂e tî. Ero wa tî kekn̂e Erisew Xeoas ya.

20 Ero yinhîrî takî tî waihyakn̂e Erisew pen okwe. Okoputhîrî tî nahruyatken̂e. Taa, ero yimaw on wara tî xatken̂e Moabita komo, kaamo me yihcitopo yimaw roro tî mokyatken̂e n̂examro waapa me, asakî so mak. Ixaw Yana pen komo waparî me tî mokyatken̂e, n̂examro pen yemyawnonho yahsîso marha.

21 Taa, anarî kaamo po takî tî iitononhîrî pen yokoputho nahruyatken̂e Ixaw Yana komo. Ero yinhîrî ponan̂e rma tî waapa komo n̂een̂atken̂e kopi. Ero ke waihxa pen yokoputho tî nar̂metken̂e ewtarî yaka mak, Erisew pen yocho yenaka rma. Erisew pen yocho yapeche takî tî pakekn̂e hara okoputhîrî iina ar̂maxapu. Piiri takî tî n̂ecececekn̂e. Ero wa tî xakn̂e.

22 Taa, pahkî tî Ixaw Yana pen komo n̂emetanmekyakn̂e Asaew, Siriu komo kayaritomon. Kayaritomo me Xeoakas pen yehtoponho poko hakî tî n̂emetanmekyakn̂e okwe.

23 Yîpînîn yaw so rma tko tî xakn̂e Kporin komo. Ero ke nakronomekn̂e ha re. N̂examro ponaro rma tî xakn̂e. Tîmtapotachonhîrî ponaro rma tî xakn̂e. Abraaw pen yakro tî nîmtapowakn̂e, Isake yakro marha, Xako yakro marha. Ero ke tîmtapotachonhîrî ponaro tî xakn̂e. Ero ke tî Ixaw Yana pen komo waihkatîkara xakn̂e. Mooxe ehcoko on̂enîrî mera ro mak tak, kahra marha tî xakn̂e.

24 Ero yinhîrî takî tî waihyakn̂e Asaew pen Siriu komo kayaritomon pen. Yumumuthîrî takî tî xakn̂e kayaritomo me hara yîhretawno me. Ben-Atace tî xakn̂e noro yosotî.

25 Ero yinhîrî Ixaw Yana komo yewtontho mko takî tî nahsîyakn̂e hara Xeoas, Xeoakas pen mumutho. Ben-Atace nahsîtho rma takî tî nowyakn̂e, Asaew pen mumutho nahsîtho ha. Pahxa n̂he rma tî noro yîîm pen mokyakn̂e waapa me, Xeoakas pen yewtontho mko tî nahsîyakn̂e, ero mko tî nowyakn̂e hara Xeoas. Osorwaw ro tî Ben-Atace komo nar̂mekn̂e Xeoas. Ero ke Ixaw Yana komo yewtontho tî nahsîyakn̂e hara. Ero wa tî xakn̂e.