Taa, on wara tî xakn̂e Xoas, 7 cimn̂ipu takî tî xakn̂e kayaritomo me Xeu yehtoponho, ero yimaw takî tî Xoas n̂iir̂atken̂e kayaritomo me. Pahkî tî xakn̂e kayaritomo me 40 cimn̂ipu ha tî. Sibia tî xakn̂e yînocwan yosotî. Behseba pono tî mîk xakn̂e yînocwan.

2 Kir̂wan̂he tî ka Xoas n̂een̂akn̂e Kporin komo. Xoiata exitaw ha ka noro panatanmekn̂e me kir̂wan̂he tî xakn̂e.

3 Îh po so rma tko tî xakn̂e okwe tîmsom yakn̂itopo mko. Iina so rma tî Xuta yepamtho komo nakn̂iyatken̂e tookuthîrî komo pun, kotoporem marha.

4-5 Ero yinhîrî takî tî on wara kekn̂e Xoas Kporin komo mîn yenîn̂e komo ya, Puranta n̂ekyaxe kpoyino komo Kporin komo mîn yaka. Anarimaw so iyakenon yukuknomatopo yimawno n̂ekyatu, On wicakî ehcoko, kacho yaw roro tîmsom ha. Anarimaw so tanme ro so mak nîhtînoyatu Kaan mîn yaka puranta yehtopo. Ero yipu mko nahsîcowpe Kporin komo mîn yenîn̂e komo. Ero ke rma tak Kporin komo mîn yakir̂wamacho epemacoko. Etawkacho mko, exixkacho mko, ero yipu mko akir̂wamapocoko akir̂waman̂e komo ya puranta pona, anahsîthîrî komo pona, kekn̂e tî.

6 Ero yinhîrî takî tî pahkî exiche Kporin komo mîn yakir̂wamara rma tî xatken̂e tîmsom pokono komo. 23 cimn̂ipu takî tî xakn̂e kayaritomo me Xoas yehtoponho. Ero yimaw rma tî etakir̂wamara xakn̂e Kporin komo mîn okwe.

7 Ero ke Xoiata takî tî nan̂ikyakn̂e Xoas, Kporin komo mîn yenîn̂e komo ahnoro. Mokuche so on wara tî kekn̂e yîwya so, Ahce kacho Kporin komo mîn yakir̂wamara rma mîxatken̂e hara okwe? Ero ke on wara wîîkes awya so, Kaan mîn yaka tmohsom komo n̂ekîtho ahsîra ro mak tak ehcoko puranta. Kporin komo mîn yakir̂waman̂e komo ya xa matko tîmcoko tak ha ero yakir̂wamachome, kekn̂e tî yîwya so.

8 Ero ke on wara tî ketken̂e tîmsom pokono komo, Taa, ero wa ham. Puranta yahsîra tak nas amna Kaan mîn yaka tmohsom komo n̂ekîtho. Kporin komo mîn yakir̂wamara marha nas amna, ketken̂e tî.

9 Ero ke takî tî yamata nahsîyakn̂e Xoiata, porin ha. Ahruru tî nawkekn̂e puranta yenkachome ero yaka. Kporin komo ya tîmsom yakn̂itopo mîtkoso takî tî n̂iir̂akn̂e ero ha, yamata. Kporin komo mîn yaka kewomtopo mîtwo tî xakn̂e kaari n̂ixa. Ero yaka takî tî n̂enkayatken̂e puranta Kaan mîn yaka ehxapu. Tîmsom pokono komo tî n̂enkayatken̂e, metata yenîn̂e me cehsom kom ha.

10 Ero yinhîrî takî tî mer̂pora exitaw puranta yamata yaw Kporin komo yaka cewomsom tî mokyakn̂e kayaritomo purantan yukuknoman̂e yakro. N̂examro tî nukuknometken̂e puranta Kporin komo mîn yaka ehxapu. Kumixi yaka marha tî n̂enkayatken̂e yakeno yaka.

11 Puranta yukuknomache takî tî cetapickaxmu yantoman̂e komo ya takî tî nîmyatken̂e Kaan mîn yakir̂wamapotome tak yîwya so. Ero ke takî tî Kporin komo mîn yakir̂waman̂e komo n̂epemetken̂e. Mîîmo yawno ciin̂e komo tî n̂epemetken̂e, mîîmo yakir̂waman̂e komo marha tî.

12 Toopu ciin̂e ro komo marha tî n̂epemetken̂e, toopu yenporin̂e komo marha tî. Weewe marha tî naponukyatken̂e sahsamaxapu, toopu marha tî enporixapu. Ero yipu tî naponukyatken̂e Kaan mîn yakir̂wamacho. Ero wa tî antoman̂e komo ya nîmyatken̂e puranta, Kporin komo mîn yaka ehxapunhîrî.

13 Prata tî mîn xakn̂e puranta, ooru marha. Tutumu mko me tko tî cirihra xatken̂e Kporin komo mîn yawno me, weeyu potkotopo me marha cirihra, raatî me marha. Ero yipu me cirihra ro makî tî xatken̂e Kporin komo mîn yaka ehxapu puranta ha.

14 Mîîmo ciin̂e ro komo ya makî tî nîmyatken̂e Kporin komo mîn yakir̂wamacho yepetho me.

15 On wara kahra makî tî xatken̂e antomano rin̂e komo ya puranta tîmn̂enho komo, ahce pona puranta mîm ha, kahra tî xatken̂e yîwya so. Kemîknon̂e pîn me exirî ke n̂examro, antomano rin̂e komo, ero wa kahra tî xatken̂e yîwya so.

16 Kporin komo mîn yaka tko tî ekîhra xatken̂e anarme tîmxapu puranta. Kicicme wehxe kica, kacho me tîmxapu, kicicme ekn̂e komo yehtoponho yahrutopo me tîmxapu marha tî ekîhra xatken̂e iina. Tîmsom pokono komo purantan me makî tî xakn̂e ero yipu reha. Ero wa tî xakn̂e.

17 Ero yinhîrî on wara takî tî xakn̂e Asaew, Siriu komo kayaritomon, Kace pono komo yahsîso tî cekn̂e, tmaywen komo me ahsîso so ha. Nahsîyakn̂e takî tî. Ero yinhîrî Xerusaren pono komo makîrha tî ahsî xe xakn̂e.

18 Ero ke on wara tî xakn̂e Xoas, Xuta yepamtho kayaritomon, tporin pen komo nîmîtho takî tî nahsîyakn̂e, Kporin komo ya yînmîthîrî komo. Xeosapa pen nîmîtho, Xoraw pen nîmîtho, Akasias pen nîmîtho, n̂examro pen nîmîtho tî nahsîyakn̂e. Kporin komo ya tînmîthîrî meero tî nahsîyakn̂e. Ooru tî nahsîyakn̂e ahnoro Kporin komo mîn yawno, kayaritomo mîn yawno marha. Ero yipu takî tî narpekn̂e Asaew yaka. Ero yahsîrî ke takî Xerusaren pono komo yahsîso mokuhra takî tî xakn̂e. Anana makî tî cekn̂e. Ero wa tî xakn̂e Asaew.

19 Miya rma nai Xoas yehtoponho. Ahnoro rma tko nai tmewreso karita yaw, Xuta Kayaritomon Komo Yehtoponho, kacho yaw.

20 Ero yinhîrî noro maywen komo takî tî n̂esencetken̂e Xoas waihkacho poko. Ero ke noro pen takî tî n̂etapetken̂e okwe Bece-Miro po. Sira yesamarî yawno mîn Bece-Miro.

21 On wara tî xakn̂e noro wapatho komo yosotî, Xosaka, Simeace mumuru ha, Xosabace, Some mumuru hara. Ero wara tî xakn̂e Xoas pen yetapan̂enho komo yosotî. Ero ke thakwa tî waihyakn̂e okwe Xoas pen. Okoputhîrî tî nahruyatken̂e tporin pen komo yakro, Tapi pen Yewtontho pona. Ero yinhîrî yumumuthîrî takî tî xakn̂e kayaritomo me noro pen retawno me hara. Amasias tî xakn̂e yumumuthîrî yosotî. Ero wa tî xakn̂e.