Ero yinhîrî takî tî on wara xakn̂e Ataria, Akasias pen nocwanînho, tîmrethîrî pen waihkachonho tî n̂encekn̂e. Ero ke noro rma takî tî waihkano n̂iir̂akn̂e hara. Kayaritomo me ciisom komo tî waihkekn̂e ahnoro okwe.

2 Akasias pen mumutho tko tî naar̂akn̂e en̂epa me Xeoseba, Xoraw pen yemsîtho ha. Akasias pen yepeka tî mîk xakn̂e. Kayaritomo mumutho pen waihketaw Xoas ciki tî naar̂akn̂e noro Xeoseba, Akasias pen mumutho ciki. Noro ciki tî n̂eyamyakn̂e Xeoseba amtakpo yaka, tîwîntopo yaka. Rikomo yenîrî poko antomaxapu tî xakn̂e, ero ke tî noro yakro rma tî n̂eyamyakn̂e waihkara ehtome Ataria ha. Ero ke noro ciki tî waihkara xakn̂e.

3 Iito rma ciki tî xakn̂e noro Kporin komo mîn yaw. 6 cimn̂ipu tî xakn̂e ceyamso iito. Ero yimaw Ataria rma tî xakn̂e kayaritomo me okwe.

4 Taa, 7 cimn̂ipu exitaw tak Xoas yewrutoponho on wara takî tî xakn̂e Xoiata, sowtatu yantoman̂e komo tî nan̂ikyakn̂e, 100 komo yantoman̂e. Kayaritomo kurunpen̂e komo marha tî nan̂ikyakn̂e, porisia komo. Ero warai komo tî nan̂ikyakn̂e. Kporin komo mîn yaka tî n̂ekyakn̂e. Cewetîtopo poko tî nîmtapowakn̂e n̂examro yakro. Amtapotarî men amna n̂ewehcasî, kamexpekn̂e yîwya so. Yaaro xa kacoko Kporin komo n̂entarî me, kekn̂e yîwya so. Ero wa tî kamexpekn̂e yîwya so iito Kaan mîn yaw. Ero yinhîrî kayaritomo mumuru takî tî n̂enpekn̂e yîwya so.

5 Iitono komo marha tî nantomekn̂e. On wara tî kekn̂e yîwya so, On wara men ehcoko, sabatu po enîn̂e ro me awexitaw so 1 tehsa wicakî ehcoko kayaritomo mîn yenîn̂e me oroto.

6 1 tehsa wicakî xa hara ehcoko Suu metatan yenîn̂e me. 1 tehsa wicakî xa hara ehcoko metataw rma re sowtatu komo mkai mak. Kaan mîn men encoko oroto moso waihkan̂e ewomura ro mak ehtome, kekn̂e tî.

7 Anarî komo matu cepokaresom me sabatu po, amyamro marha ehcoko Kaan mîn yenîn̂e me oroto kayaritomo yukurunpetome.

8 Kayaritomo cetaw mîîmo yai etocoko noro yakro. Mokyataw hara amohcoko hara noro yakro. Wamtocoko mak. Kacipara imo ke cemyarke ehcoko. Anarî komo meyehra mokyataw waihkacoko, kekn̂e tî yîwya so.

9 Ero ke ero wara rma tî xatken̂e sowtatu yantoman̂e komo, Xoiata mtapotarî tî n̂ewehcatken̂e ahnoro, Kporin komo yaka cewomsom mtapotarî ha. Sabatu po cetapickaxmu komo nan̂ikyatken̂e, sabatu po cepokaresom komo meero. N̂examro yakro rma takî tî cetken̂e Xoiata yaka, Kporin komo yaka cewomsom yaka.

10 Sowtatu yantoman̂e komo ya tî n̂ekamyakn̂e noro raapu mko, kecen̂anî mko marha. Tapi pen kurunînho mîn n̂ekamyakn̂e. Kporin komo mîn yaw tî xakn̂e.

11 Ero yinhîrî takî tî kayaritomo yenîn̂e komo n̂ecececetken̂e Kaan mîn mîtkoso. Tukurun komo ke cemyarke kayaritomo tî wamcetken̂e. Mehxa tî xatken̂e, xehxa marha, Kaan mîn mîtwo tî xatken̂e, Kaan ya tîmsom yakn̂itopo mîtwo marha tî.

12 Ero yinhîrî takî tî kayaritomonhîrî pen mumutho n̂ekyakn̂e Xoiata. Kayaritomo yarokorî tî namrupekn̂e yîwya. Kaan karitan marha tî nîmyakn̂e yîwya, Kporin komo ya kpanatanmetopo. Nîhkapetken̂e marha takî kayaritomo me ciitome. Kîkayaritomon komo moso ha, ketken̂e takî tî. Ktowktow ketken̂e marha tî kar̂pe. Pahkî waipîra n̂expe moso kîkayaritomon kom ha, ketken̂e kar̂pe. Ero wa tî ketken̂e.

13 Ero yimaw takî tî kayaritomo kurunpen̂e komo mtapotarî n̂encekn̂e Ataria, mîk hakî mtapotarî tî n̂encekn̂e. Ero ke yîhyaka so takî tî mokyakn̂e. Kporin komo mîn yaka tî n̂ewomyakn̂e.

14 Ero yimaw takî tî kayaritomo n̂een̂akn̂e noro mapata mîtwo, kayaritomo komo yecececetopo ro to. Antomano rin̂e komo tî xatken̂e kayaritomo mîtwo, raatî yecen̂e komo marha tî xatken̂e iito. Xuta komo ahnoro tî nahwowatken̂e, raatî marha tî n̂eceyatken̂e. Ero ke tpononthîrî takî tî nahxaikekn̂e Ataria pen. Kayaritomo waparî amyamro okwe. Kayaritomo waparî amyamro okwe, kekn̂e tî. Kar̂pe xa tî kekn̂e.

15 On wara tî kekn̂e Xoiata sowtatu yantoman̂e komo ya, Noro aacoko miya. Amyamro rma wamtocoko. Meye kr̂a tak waihkacoko. Akro cetaw anarî komo n̂examro meero kr̂a waihkacoko, kekn̂e tî yîwya so. Kporin komo mîn yaw waihkara ehcoko, kekn̂e tî. Ero wa tî kekn̂e Xoiata.

16 Ero ke takî tî Ataria pen nahsîyatken̂e. Miya tî cekn̂e noro kayaritomo mîn yaka. Kawaru yewomtopo yaro tî cekn̂e. Iito takî tî noro pen waihketken̂e. Ero wa tî waihyakn̂e Ataria pen.

17 Ero yinhîrî takî tî Xoiata nîmtapowakn̂e Kporin komo yakro, kayaritomo yakro marha tî nîmtapowakn̂e, esenmexapu komo yakro marha. Yaaro xa tan wîîkesî cemarontan me, Kporin komo yanan me cehcirî, etponaro marha cehcirî, kapore nasî. Moso tak kîkayaritomon, ero ke noro cewetîcerî roro kapore marha nasî, kekn̂e. Ero wa tî xatken̂e iina esenmexapu komo.

18 Ero yinhîrî Xuta yepamtho komo takî tî cetken̂e Baaw mîn yaka. Erotho takî tî n̂ixketken̂e kr̂a. Baaw ya tîmsom yakn̂itopo marha tî nakuhr̂apetken̂e, Baaw warai me ciixaputho mko marha. Matan pen marha tî waihketken̂e Baaw ya tîmsom pokono ro pen. Tîmsom yakn̂itopo mîtkoso rma tî noro pen waihketken̂e. Ero yinhîrî Kporin komo mîn yawno pokono me ciisom komo takî tî men̂ekekn̂e Xoiata.

19 Ero yinhîrî takî tî sowtatu komo naar̂akn̂e Xoiata, ahnoro tî naar̂akn̂e kayaritomo kurunpen̂e ro komo, 100 komo yantoman̂e komo, Xuta yepamtho komo marha tî naar̂akn̂e. Ahnoro takî tî naar̂atken̂e Kporin komo mîn yai. Kayaritomo kurunpen̂e ro komo metatan yaro tî cetken̂e kayaritomo mîn yaka. Iina takî tî kayaritomo n̂eremanmekyakn̂e kayaritomo yapon pona.

20 Ero ke nahwowatken̂e takî tî Xuta yepamtho komo ahnoro. Erasîra takî tî xatken̂e Xerusaren pono komo Ataria pen waihkarî ke. Kayaritomo komo mîn yaw tî waihketken̂e noro pen.

21 7 cimn̂ipu makî tî xakn̂e Xoas yewrutoponho kayaritomo me ciir̂ataw. Ero wa tî xakn̂e.