Ero yinhîrî on wara takî tî xakn̂e Nabukotonoso, Xerusaren panaka tî mokyakn̂e xa hara. Sowtatu komo yakro tî mokyatken̂e. Iina takî tî waaca warai n̂iir̂atken̂e cecen̂an komo me. Roowo tî n̂enmekyatken̂e ero yipu me Xerusaren tmamritîkaxi ro. Ero wa tî mokyakn̂e Nabukotonoso komo 9 cimn̂ipu exitaw kayaritomo me Setekias yehtoponho. 10-înhîrî nuun̂i po, 10-înhîrî kaamo po, ero po xa tî mokyatken̂e Nabukotonoso komo.

2 Iito rma tî xatken̂e Nabukotonoso komo pahkî. Ewto pen tî mamrikyatken̂e. 11-nhîrî cimn̂ipu pona roro tî iito xatken̂e, kayaritomo me Setekias yehtoponho pona roro ha.

3 On wara takî tî xatken̂e Xerusaren pono komo 4-nhîrî nuun̂i po, 9-nhîrî kaamo po, ero po xa takî tî rooma poko ro thakwa makî tî xatken̂e ewto pono komo tîyopo so okwe. Yînahrî komo exihra ro mak takî tî xakn̂e okwe.

4 Ero po xa tî ewto wacan nawketken̂e Xerusaren pono komo. N̂epataketken̂e takî tî metata yaro. Asakî tî xakn̂e waaca iito. Ero yotaw tî xakn̂e metata. Kayaritomo natîrî panaw tî xakn̂e metata. En̂exa tî n̂epataketken̂e. N̂emahciyatken̂e sowtatu komo kosope. Ewto mamhoko rma exitaw Kawtew komo tî n̂emahciyatken̂e. Woskara wece tî n̂emahciyakn̂e kayaritomo.

5 Noro wenari tko tî cetken̂e Kawtew komo. Noro pen takî tî nahsîyatken̂e Xer̂ko woskaran po. Noro sowtatun komo yetakparî ke tî nahsîyatken̂e okwe.

6 Ero ke Babiron̂a pono komo kayaritomon yaka takî tî Setekias pen naar̂atken̂e Hibra pona. Iina arîche, Kicicme masî kica, ketken̂e takî tî yîwya.

7 Ero yinhîrî takî tî Setekias mumutho pen komo tî waihketken̂e yîîmînhîrî pen wero ro rma okwe. Ero yinhîrî Setekias pen takî tî n̂ewkanoyatken̂e oko. Ero yinhîrî bronse ke takî tî nîhraknumiyakn̂e marha. Ero wa takî tî noro pen naar̂atken̂e Babiron̂a pona. Ero wa tî naar̂atken̂e.

8 Ero yinhîrî N̂ebusaratan takî tî mokyakn̂e Xerusaren pona. Kayaritomo kurunpen̂e komo yantoman̂e tî mîk xakn̂e. 19 cimn̂ipu exitaw kayaritomo me Nabukotonoso yehtoponho tî mokyakn̂e. 5-nhîrî nuun̂i po, 7-nhîrî kaamo po ero po tî mokyakn̂e.

9 Kporin komo mîntho takî tî nakn̂iyakn̂e okwe, kayaritomo mîntho marha. Ahnoro tî nakn̂iyakn̂e mîîmotho, Xerusaren pononho mko. Enîno rin̂e komo mîntho tî nakn̂itîketken̂e ahnoro.

10 Xerusaren wacantho takî tî macaketken̂e sowtatu komo, Kawtew komo, N̂ebusaratan maywen komo. Ahnoro tî macaketken̂e.

11 Ewto pononho pen komo tak naatîkekn̂e N̂ebusaratan iito etîmtoxapunhîrî pen kom okwe. Anarî komo tî n̂etowyatken̂e Setekias maywenînho komo. Nabukotonoso maywen me tak n̂esekatîmyatken̂e. Ero wa tî xatken̂e anarî komo Xuta komo. N̂examro meero tî naar̂akn̂e. Ero warai komo tî naar̂akn̂e okwe iitononhîrî pen komo.

12 Iito rma tko tî nînomyakn̂e emyawnomnî komo. Naatînanotho yenîn̂e me tî nînomyakn̂e uupa yatî yenîn̂e me, mararî pomon̂e me marha.

13 Mapata imotho marha tî naar̂atken̂e Kawtew komo, bronse ciixaputho. Esemokacho mko, tuuna yentho porin, ero mko marha tî naar̂atken̂e bronse ciixaputho mko. Ero warai mko naar̂atken̂e Kaan mîn mîtwononho mko. Nahketken̂e ha tî ka wahra so cehso ro aatome tak Babiron̂a pona.

14 On warai marha tî naar̂atken̂e, tahrem, caarapa, ramha yetahsîtopo mahkototopo, warapapoturu, ahnoro tî naatîketken̂e, poko Kporin komo mîn yenîn̂e komo yehtoponho mko.

15 Wehto roron yenî mko, tuuna yenî mko marha. Ahce na me ciixapu mko ooru ciixapu, prata ciixapu marha, ero yipu tî naar̂akn̂e kayaritomo kurunpen̂e komo yantoman̂e.

16 Asakî tî xakn̂e mapata imo, cewn̂e tî xakn̂e tuuna yen porin, yaake xakn̂e esemokachonhîrî komo, ero yipu tî n̂irpekn̂e Saromaw pahxa Kporin komo mîn yawno me, yîmîtwono me marha. Mer̂pora ro makî tî xakn̂e bronse eronhîrî mko. Yukuknomarî yopo tî xakn̂e bronse.

17 8,1 metru kawnon tî xakn̂e mapata imo. 1,3 metru kawnon tî xakn̂e mapata imo kanahtawno hara. Mîîye warai marha tî xakn̂e ero pokono, roman warai marha tî xakn̂e ero pokono. Bronse ciixapu re tî mîn xakn̂e ahnoro. Ero yaknonho marha tî xakn̂e ero wicakî xa marha bronse ciixapu rma, mîîye ke tporokyem marha tî mîn xakn̂e.

18 Ero yimaw Seraias tî xakn̂e Kaan ya tîmsom pokono ro me. Soponias marha tî xakn̂e iito noro yemtakan me hara ero yipu tîmn̂e me. Kporin komo mîn metatan yenîn̂e komo marha tî xatken̂e iito osorwaw. N̂examro tî naar̂akn̂e kayaritomo kurunpen̂e komo yantoman̂e.

19 Iito marha tî n̂een̂akn̂e sowtatu yantoman̂e. Kayaritomo yakrononho ro komo, 5 mak. Sowtatu yosotî mewren̂e ro marha tî n̂een̂akn̂e, sowtatu komo yan̂ikn̂e ro tî mîk xakn̂e noro. 60 kîrkomo marha tî n̂een̂akn̂e noro nantomatho komo.

20 N̂examro takî tî naar̂akn̂e N̂ebusaratan, Babiron̂a pono komo kayaritomon yaka, Hibra pona.

21 N̂examro pen takî tî waihkapekn̂e Babiron̂a pono komo kayaritomon Hibra po rma, Amace pono po ha. Ero wa tî xatken̂e Xuta pen kom okwe. Waapa narîtho me thakwa tî cetken̂e tîrowonthîrî komo poi okwe.

22 Ero yinhîrî takî tî iito rma tî xatken̂e Xuta komo tîrowonî ro po so rma cik ha re. Nabukotonoso nînomîtho komo mîkyam xatken̂e. N̂examro yenîn̂e tî n̂iir̂akn̂e Nabukotonoso. Xetarias tî mîk n̂iir̂akn̂e iitono komo yenîn̂e me. Aikaw mumuru mîk xakn̂e Xetarias, Sapan parî ha.

23 Xatken̂e rma tî sowtatu yantoman̂e komo, n̂examro maywen komo marha. N̂examro takî tî n̂encetken̂e Xetarias yehtoponho. Xetarias takî tî n̂iir̂akn̂e kopenato me. Babiron̂a pono komo kayaritomonî rma tî noro n̂iir̂akn̂e, kacho tî n̂encetken̂e. Ero ke Xetarias yaka tî mokyatken̂e. On wara tî xakn̂e n̂examro yantoman̂e yosotî, Ismaew, N̂etanias mumuru mîk noro, Xoanan, Karea mumuru mîk noro, Seraias, Tanumece mumuru mîk noro, N̂etopa pono mumuru ha, Xasanias, Maaka pono mumuru mîk noro. N̂examro tî mokyatken̂e Xetarias yaka.

24 Taa, Xetarias takî tî nîmtapowakn̂e n̂examro yakro cetkurunpetopo komo poko. Yaaro xa tan wîîkesî Kaan n̂entarî me rma, kir̂wan̂he rma maxe on po rma awexitaw so. Ero ke tanî rma ehcoko. Erasîra ehcoko Kawtew sowtatun komo pona. Babiron̂a pono komo kayaritomon ewetîcoko. Ero wa awexitaw so kir̂wan̂he rma wa maxe, kekn̂e tî yîwya so.

25 On wara tko tî xakn̂e Ismaew, N̂etanias mumuru, Erisama parî ha. Kayaritomo yepamtho tî mîk xakn̂e. Noro takî tî mokyakn̂e Xetarias yaka 7-nhîrî nuun̂i po. 10 kîrkomo tî n̂ekyakn̂e takrono komo. Xetarias pen tî waihketken̂e okwe. Xutew pen komo marha tî waihketken̂e noro yakrononho komo, Kawtew pen komo marha tî. Ero wa tî waihkano n̂iir̂atken̂e Mispa po.

26 Ero yinhîrî takî tî iitonohîrî pen komo cetken̂e Exitu pona. Cemyawnoyem komo, emyawnomnî komo, sowtatu yantoman̂e komo ahnoro tî cetken̂e iina. Ero wa tî cetken̂e cerahtîmrî ke so Kawtew komo pona. Ero wa tî xatken̂e.

27 Ero yinhîrî takî tî pahkî exiche Xoakin takî tî nahrunkekn̂e Babiron̂a pono komo kayaritomon. Kahrutopo yawnonho tî n̂en̂emhatakekn̂e. 37 cimn̂ipu tî xakn̂e kahrutopo yaw ehtoponhîrî. 12-nhîrî nuun̂i po, 27-nhîrî kaamo po, ero po tî nahrunkekn̂e. Epiw-Merotake tî mîk xakn̂e kayaritomo yosotî. Yihcirî cimn̂ipu po kayaritomo me cehtoponhîrî po tî nahrunkekn̂e.

28 Tawake tî nîmtapowakn̂e Xoakin yakro. Anarî komo yopono me tî n̂iir̂akn̂e. Kayaritomo yaw tî xatken̂e yaake kayaritomonhîrî komo, n̂examro yopono me tî n̂iir̂akn̂e Xoakin.

29 Ero ke anarî takî tî namruyakn̂e Xoakin tponon. Kahrutopo yaw cehtoponhîrî yawhra takî tî xakn̂e. Kayaritomo yakro tî n̂eseresmekn̂e miya roro twaihtopo pona roro.

30 Puranta marha tî nîmyakn̂e kayaritomo yîwya. Tukuknoi tî nîmyakn̂e yîwya enmar̂atîxera. Ero wa tî nîmyakn̂e miya roro noro waihtopo pona roro. Ero wa tî xakn̂e Xoakin. Iina mak nai ekatîmtopo.