Taa, ero yimaw on wara xatken̂e Huben yepamtho komo, Kace yepamtho komo marha, mer̂pora ro mak xakn̂e iyoh komo. Ero ke Xase takî tî n̂een̂atken̂e roowo. Xireace marha tî n̂een̂atken̂e. Toh komo yeken mexe tî n̂een̂atken̂e okre.

2 Ero ke Moises yakro esentaxi tak mokyatken̂e. Ereasa yakro marha n̂esencetken̂e, Ixaw Yana yantoman̂e komo yakro marha.

3-4 On wara ketken̂e yîwya so, Ai, apa komo, mînto nai roowo kir̂wan okre. Ero pononho pen komo nar̂mapekn̂e Kporin komo kîwya so Ixaw Yana komo ya. Yaake nasî iitononhîrî komo yewtontho. Ataroce, Cibon, Xase, N̂in̂ira, Esbon, Ereare, Seban, N̂ebu, Beon, ero wa nasî ewtonthîrî komo yosotî, iitono ha. Amna yoku nahrî mexe nasî iitono cuupu. Tokye xa nas amna.

5 Ero ke tawake awexitaw so amna poko amna yeken me cma re mîmyaxe xehxan roowo. Xotaw yepu watocoko ha aweken komo yentome awya so iina, kahra cma re mas amna ya, ketken̂e.

6 On wara tko kekn̂e Moises yîwya so Kace yepamtho komo ya, Huben yepamtho komo ya marha, Apoyino komo mak ma cetu sowtatu me tan awexitaw so ceremaxi?

7 Ahce kacho Ixaw Yana komo mahwokamexpet hara tuuna wato xatî pîn me ehtome so. Kporin komo nîmyasî yîwya so ero pona tîto xatî pîn me n̂examro mîîr̂axe okwe.

8 Ero wa pahxa ahwokamexpono n̂iir̂atken̂e aporin pen kom hara Kates Bahn̂eia poi n̂examro yen̂epetaw owya Kanan yenîn̂e me.

9 N̂examro cetken̂e Eskoro woskaran pona. Ahnoro tî n̂een̂atken̂e iitononhîrî komo rowon. Enîn̂enhîrî Ixaw Yana komo nahwokamexpetken̂e ero pona tohra ehtome so okwe, Kporin komo nîmîtho pona tohra ehtome so ha.

10-12 Ero ke nîrwonakn̂e tak Kporin komo Ixaw Yana komo poko. Ero ke n̂examro poko tak nîmtapowakn̂e. On roowo wîmyas awya so, wîîkekn̂e Abraaw ya, Isake ya marha, Xako ya marha. Yaaro xa wîîkekn̂e yîwya so esemîknopîn me ro mak. Moxamu tko enîhra ro mak naxe. Yaaro xa tan wîîkes hara esemîknopîn me ro mak. Iina tohra ro mak naxe oyewetîra cexirî ke so. Oyewetîtîkara n̂ehcow okwe. 20 cimn̂ipu ehxapu komo tohra naxe, ero yopono komo marha. Karebe mak ces iina Xepon̂e mumuru, Kenesew mumuru. Xoswe marha ces iina Nun mumuru. N̂examro mak iina cexe oyewetîtîkarî ke cma ha, kekn̂e. Ero wa kekn̂e Kporin komo Ixaw Yana komo poko.

13 Ero ke, tanwekrî komo poyero, nîrwonakn̂e xa Kporin komo Ixaw Yana komo poko. Ero ke n̂examro waimamnoyakn̂e axawa imo pore pahkî. 40 cimn̂ipu pahkînon waimamnoyakn̂e, poritomo pen komo twaihtîkaxi ro. Kicicme tî xatken̂e Noro wero ro. Ero ke ero wa waihkano n̂iir̂akn̂e.

14 Taa, tan maxe amyamro hara kicicitho pen komo yepamtho kom ha. Aporin pen komo retawno me tak maxe amyamro hara Kporin komo yîrwonmekn̂e me xa hara okwe.

15 Yîhyai awetowche so Ixaw Yana komo men nahsîpînkesî xa hara Kporin komo tanî rma axawa imo po. Waihkatîkano rin̂e me maxe amyamro hara okwe, kekn̂e. Ero wa kekn̂e Moises yîwya so.

16 Ero yipu yentache Moises yaka ro xa tak mokyatken̂e Huben yepamtho komo, Kace yepamtho komo marha. On wara ketken̂e yîwya, Ai apa, on wara cexi xe nas amna. Tanî rma ciri xe mak nas amna tooku wacan komo, tîmxîkrî komo yewton komo marha.

17 Amna reha cesî Ixaw Yana komo yakro. Tuwuhreke amna cesî sowtatu me. Pahkî nas amna n̂examro yakronomacho poko eken komo tahsîso ro. N̂examro yakro exitaw ka amna tanî rma naxe amna pici komo, amna xîkrî komo marha. Ewto po naxe twacayem po. Ero warai po naxe tantono ro komo pona erasîra ehtome so.

18-19 Ceken pona etîramara ka nas amna. Ceken yahsîche mak ahnoro Ixaw Yana komo ya ero yimaw mak amna n̂etîrames hara cewton pona hara. Ceken yahsîra ro mak amna nasî n̂examro yakro Xotaw yeco pono. Xehxan makî cma re amna nahsîyasî, resce n̂ixan mak ha, ketken̂e.

20-22 On wara tî n̂eyukyakn̂e Moises, Taa, ero wa mat ham, Kporin komo yanme awuhre komo ahsî coko sowtatu me awtotome so. Kir̂wan̂he nasî ero wa awehtopo komo. Tuwuhreke Xotaw watocoko Kporin komo wero ro. Pahkî marha iito ehcoko Kporin komo xatî pîn komo cen̂epetîkaxi ro. Noro rma n̂en̂epesî tîîxatî pîn komo. Yiixatî pîn komo exihra tak exitaw ero yimaw tak metîramexe hara. Amtapotachonhîrî komo yaw rorono me tak maxe. Kporin komo ya mîîkexe, Ixaw Yana komo ya marha mîîkexe, ero yaw rorono me maxe. Kemîknon̂e mîkyam kica, kacho mera ro mak maxe okre. Ero ke on tak nasî aweken komo me Kporin komo yanme me rma.

23 Ero wa tohra tko awexitaw so kicicme men maxe Kporin komo ya. Kicicme awehtoponhîrî komo rma men awepotîkexe so men amn̂e okwe.

24 Ero ke oroto ha ka amxîkrî komo yewton ciicoko, awoh komo wacan marha ciicoko. Ero yinhîrî amtapotachonhîrî komo yaw roro men ehcoko, kekn̂e. Ero wa kekn̂e Moises yîwya so.

25-27 On wara n̂eyukyatken̂e Kace yepamtho komo, Huben yepamtho komo marha, Awanton komo mak amna apa. Amna rma wa n̂ewehcasî amtapotarî. Tanî rma amna nînomyasî cipici komo, tîmxîkrî komo marha Xireace po rma. Tan marha nas amna yoh komo oper̂a komo, paaka komo. Amtapotarî rma tko amna n̂ewehcas apa. Tuuna yepu amna wacesî Kporin komo yanme. Tuwuhreke amna cesî sowtatu me. Amtapotarî yaw roro rma amna nas apa, ketken̂e. Ero wa ketken̂e n̂examro.

28 Ero yinhîrî Ereasa yakro nîmtapowakn̂e Moises, Kporin komo yaka cewomsom yakro. Xoswe yakro marha nîmtapowakn̂e, Nun mumuru yakro. Ixaw Yana yantoman̂e komo yakro marha nîmtapowakn̂e, noro re yepatho yantoman̂e komo yakro. Huben yepamtho komo poko nîmtapowakn̂e, Kace yepamtho komo poko marha.

29 On wara kekn̂e yîwya so, Kace yepamtho komo tî cetu awakro so tuwuhreke, Huben yepamtho komo marha tî. Sowtatu me tî cetu Xotaw yeco pona. Kporin komo yanme tî cetu. Iitononhîrî pen komo yar̂matîkache makî tî n̂etîrametu oona hara. Ero wa cetaw so Xireace tîmcoko yîwya so eken komo me, kekn̂e.

30 Tuwuhreke tohra exitaw so awakro so Kanan pono makî reha tîmcoko yîwya so eken komo me, kekn̂e Moises yîwya so.

31-32 On wara n̂eyukyatken̂e Kace yepamtho komo, Huben yepamtho komo marha, Awanton komo mak amna. Kporin komo mtapotachonho yaw roro rma n̂iir̂as amna amn̂e. Sowtatu me amna cesî Kanan pona. Kporin komo yanme rma. On pono rma tko amna nahsîyasî roowo ceken me ha, ketken̂e.

33 Ero ke ero pono rma nîmyakn̂e Moises yîrowon komo me. Sion pen rowontho nîmyakn̂e yîwya so, Amohew komo kayaritomon pen rowontho ha. Oki pen rowontho marha nîmyakn̂e yîwya so, Basan ha. Takwekem xa mîn nîmyakn̂e yîwya so. Ewtonthîrî komo marha nîmyakn̂e yîwya so, woskara komo marha ewto panawno kom ha. Ahnoro nîmyakn̂e yîwya so iitono roowo. Ero warai tî nîmyakn̂e Kace yepamtho komo ya, Huben yepamtho komo ya marha, Manases yepamtho poyinonho komo ya marha. Xose mumutho mîk xakn̂e Manases. Ero warai komo ya nîmyakn̂e iitono. Ero wa nîmyakn̂e Moises.

34-36 Ero ke mîîmo komo tak n̂iir̂atken̂e Kace yepamtho komo ewto komo po. On wara xakn̂e n̂examro yewton yosotî, Cibon, Ataroci, Aroe, Ataroci-Sopan, Xase, Xokbea. Ero warai pona n̂iir̂atken̂e n̂examro tîmîn komo. Bece N̂in̂ira pona marha n̂iir̂atken̂e tîmîn komo, Bece Aran pona marha. Twacaye so n̂iir̂atken̂e ewto mko ha. Toh komo marha wacancetken̂e iina oper̂a komo.

37-38 Huben yepamtho komo marha n̂iir̂atken̂e tîmîn komo ewto pona so. Esbon pona n̂iir̂atken̂e, Ereare pona marha. N̂ebu pona marha n̂iir̂atken̂e, Baaw Meon pona marha. Anarî me tak ero komo nosohcetken̂e ewto komo. Sibma pona marha n̂iir̂atken̂e. Ero warai pona so n̂iir̂atken̂e tîmîn komo. Ewtonthîrî pona ciriche tîmîn komo anarme tak ero ewto nosohcetken̂e. Ero wa nosohcetken̂e cewton komo.

39 On wara xatken̂e Maki yepamtho komo hara, Manases mumutho yepamtho kom ha, Xireace pona tî cetken̂e. Amohew komo n̂en̂epetken̂e iitononhîrî komo. Ewtonthîrî komo tak nahsîyatken̂e cewton komo me.

40 Ero ke Xireace tak nîmyakn̂e Moises Maki ya, Manases mumutho mîk noro ya. Ero ke iina tak n̂esekenmekn̂e noro.

41 Ero yinhîrî Xai cekn̂e hara Xireace pona, Manases mumuru ha. Ewtonthîrî komo marha nahsîyakn̂e noro hara cewton me. Yaake nahsîyakn̂e iitono Xireace pono. Ahsîche Apoci Xai me nosohcekn̂e cewton komo iitono kom ha.

42 Noba marha cekn̂e Kenace pono pen komo yar̂maxi. Ewtonthîrî komo nahsîyakn̂e noro cewton me, ewtoci marha nahsîyakn̂e yîmîtwono mko. Ahsîche Noba me takî tî nosohcekn̂e. Tosohcaw rma ewto nosohcekn̂e. Ero wa nosohcekn̂e.