1-2 Ero yinhîrî on wara kekn̂e hara Kporin komo Moises ya, Ai Moises, on wara wîîkes hara awya, Ixaw Yana komo n̂esepancowpe Micianita komo poko. Ero wa awesepanpîche so apoyino pen komo yaka tak mîîces amoro, kekn̂e. Ero wa kekn̂e Kporin komo Moises ya.

3 Ero ke on wara kekn̂e Moises Ixaw Yana komo ya, Kîrkomo men̂ekacoko sowtatu me tîtosom komo. On wara kacoko men̂ekaxapu komo ya, Amyamro tak etocoko Micianita komo yar̂maxi. Awuhre komo aacoko, kacipara imo marha, arahnu komo marha. Kporin komo yanme rma esepancoko n̂examro poko.

4 Huben yepamtho komo poyino men̂ekacoko 1.000 kîrkomo, Simeaw yepamtho komo marha men̂ekacoko ero wicakî xa marha. Ero wicakî so men̂ekacoko sowtatu komo mîk hak tribun poyino. Men̂ekaxapu komo tak en̂epecoko cetar̂maxmu me.

5 Ero ke 12.000 men̂eketken̂e kîrkomo. 1.000 so men̂eketken̂e mîk hak tribun komo poyino. N̂examro xatken̂e tuwuhreke so, tîkaciparai so marha. Ero wa xatken̂e sowtatu me tîtosom komo.

6 Ero ke waapa me tak en̂epeno n̂iir̂akn̂e Moises. 1.000 so noro re yepamtho komo poyino mîkyam n̂en̂epekn̂e. Pin̂easa marha n̂en̂epekn̂e akro so Ereasa mumuru, Kporin komo yaka xa cewomsom mumuru. Noro n̂en̂epekn̂e Kporin komo mîn yawno komo yaan̂e me. Tuu kacho marha naar̂akn̂e noro sowtatu komo yan̂ihtopo. Ero warai naar̂akn̂e Pin̂easa.

7 Ero ke Micianita komo yakro takî tî n̂etar̂metken̂e. Kporin komo kekn̂e Moises ya ero yaw roro rma n̂etar̂metken̂e. Kîrkomo pen tî waihketîketken̂e.

8 Micianita kayaritomon pen komo marha tî waihketken̂e, Epi, Heken, Suu, Uuru, Heba kom ha. Ero warai komo tî nar̂metken̂e, Micianita kayaritomon pen kom ha. Baraw pen marha tî waihketken̂e kacipara imo ke, Beo mumutho pen ha.

9 Wooxam komo reha tî nahsîyatken̂e, Micianita wosîn kom ha. Rikomo komo marha tî nahsîyatken̂e. Iyokuthîrî marha tî nahsîyatken̂e paaka, oper̂a komo. N̂examro pen yemyawnonho marha tî nahsîyatken̂e.

10 Ero yipu yahsîche takî tî yîmînthîrî komo nakn̂iyatken̂e ewto komo pononho pen ha. Sowtatu mîntho pen marha tî nakn̂iyatken̂e.

11-12 Ero yinhîrî tak tînahsîthîrî komo n̂ekyatken̂e sowtatu komo Moises yaka, Ereasa komo yaka, Ixaw Yana komo yaka marha tî n̂ekyatken̂e. Tooto komo n̂ekyatken̂e, iyokuthîrî komo, emyawnonhîrî komo marha. Ero warai komo n̂ekyatken̂e yîhyaka so. Moabe woskaran po rma ka xatken̂e n̂examro ero yimaw. Xotaw yecihtaw xakn̂e Xer̂ko yecento rma. Ero ke iina n̂ekyatken̂e.

13-14 Ero ke Moises komo cetken̂e enso, Ereasa yakro, Kporin komo yaka cewomsom yakro ha. Ixaw Yana komo yantoman̂e komo marha cetken̂e enso. Yîn̂ekîthîrî komo yenîche nîrwonakn̂e tak Moises sowtatu yaan̂e komo poko, 1.000 yaan̂e komo poko, 100 yaan̂e komo poko marha. Noro yipu komo poko nîrwonakn̂e Moises, etar̂maxapunhîrî komo poko ha.

15-16 On wara kekn̂e yîwya so, Ahce kacho wooxam komo mehcow hara waihkatîkara rma kica? Moxamu yanme rma Ixaw Yana komo xatken̂e kicicme kica. Kporin komo yanwekn̂e me rma n̂iir̂atken̂e kica Baraw penî mtapotarî yanme. Peo po kexitaw so ero wa xatken̂e okwe. Ero yanme Kporin komo yanan pen komo tak nahsîyakn̂e eper̂a okwe.

17-18 Ero ke kîîrî mren komo waihkacoko ahnoro. Wooxam komo marha waihkacoko kîîrî poko ehxapu komo. Emasî komo reha mîmcexe ahyawno komo me kîîrî pokono pîn kom ha.

19 Taa, tanî rma ka ehcoko amyamro waihkano rin̂enho komo, okoputhîrî yapen̂enho marha. Ketarî komo yaka tohra ka ehcoko. 7 kaamo ka tan ehcoko. 3-nhîrî po etakir̂wamacoko 7-nhîrî po marha. Ero wa xa marha akir̂wamacoko anahsîthîrî komo. Ero po marha anahsîthîrî komo akir̂wamacoko.

20 N̂examro ponontho marha akir̂wamacoko ahnoro, emyawnonhîrî marha. Iyokuthîrî komo picho ciixapu akir̂wamacoko, kabra poci kahxapu marha, weewe enporixapu marha. Ero yipu akir̂wamacoko n̂examro yemyawnonho ha, kekn̂e Moises yîwya so.

21-23 Ero yinhîrî on wara kekn̂e Ereasa hara yîwya so waapa me toxapunhîrî komo ya, On wara ehcoko Kporin komo ya kpanatanmetopo yaw roro rma awehtome so, Moises ya kekn̂e ero yaw roro rma awehtome so. Ooru na mehcow Micianita pen komo yemyawnonho, prata marha na, bronse marha na, pehu marha na, estan̂u marha na, xumbu marha na. Ahce na mehcow ecakîn me cehsom. Ero yipu exitaw wehto ywari aacoko kir̂wan̂he tak ehtome. Tuuna ke marha korokacoko kakir̂wamacho ro komo ke. Ero wa ciicoko ecakîn me cehsom komo reha. Cecahsom reha korokacoko tuuna ke mak.

24 7-nhîrî kaamo po tak aponon komo korokacoko. Ero korokache kir̂wan̂he tak maxe amohtome so awetarî komo yaka hara, kekn̂e. Ero wa kekn̂e Ereasa waapa me toxapunhîrî komo ya.

25-26 Ero yinhîrî on wara kekn̂e hara Kporin komo Moises ya, On wara esko amoro, Ereasa marha ohyaka cewomsom, Ixaw Yana komo yantoman̂e komo marha, sowtatu komo n̂ekîtho yukuknomacoko ahnoro. Tooto yukuknomacoko, iyokuthîrî komo marha yukuknomacoko.

27 Yukuknomache awya so yîraconhîrî tîmcoko sowtatu me toxapu komo ya rma. Yîraconhîrî hara tîmcoko tohnînhîrî komo ya hara.

28 Taa, ero wicakî tîmîche sowtatu me toxapu komo ya ero poyino rma ahsîcoko hara Aporin komo ya tîmsom me. 500 yukuknomache tooto, cewn̂e ahsîcoko amyamro hara. 500 yukuknomache xa hara cewn̂e xa hara ahsîcoko. Ero wa ahsîcoko yîn̂ekîthîrî komo poyino cirihtîkaxi ro. Ero wicakî xa marha ahsîcoko iyokuthîrî komo poyino hara, paaka komo, buhu komo, oper̂a komo, noro yipu komo poyino ahsîcoko. Ero wa ahsîcoko Aporin komo ya tîmsom.

29 Ero wicakî so ahsîcoko sowtatu komo nahsîtho poyino, Micianita komo yemyawnonho poyino. Ero wicakî so ahsîche tîmcoko Ereasa ya, ohyaka cewomsom ya. Kahsî anîmcoko rma Kporin komo ya tîmtopo. Ero yinhîrî tak tîmcoko Ereasa ya.

30 Ero yinhîrî tak on wara yîraconkacoko Ixaw Yana komo ya tîmsom hara, ahsîxapu komo raconho yukuknomacoko hara. 50 yukuknomache cewn̂e ahsîcoko ero wicakno poyino. Ero wicakî so ahsîcoko tooto poyino, iyokuthîrî komo poyino marha, paaka komo, buhu komo, oper̂a komo, ahnoro iyokuthîrî komo poyino ha. Ero wicakî so ahsîche tîmcoko tak Repita komo ya, Aporin komo mîn yawno yenîn̂e komo ya ha, kekn̂e. Ero wa kekn̂e Kporin komo Moises ya.

31 Ero ke ero wara rma n̂iir̂atken̂e Moises komo Ereasa yakro. Kporin komo kekn̂e Moises ya ero yaw roro rma n̂iir̂atken̂e. Ero wa n̂iir̂atken̂e.

32-35 Taa, ero wicakî ahsîche ahsîxapu komo poyino, on wicakî rma tî xakn̂e sowtatu komo n̂ekîtho komo Micianita pen komo yokutho, n̂examro pen yemsîtho marha. 675.000 xakn̂e oper̂a, 72.000 paaka, 61.000 buhu, 32.000 woosî komo, kîîrî pokononho pîn kom ha.

36-40 Ero yipu raconho mak nahsîyatken̂e waapa me toxapunhîrî komo. On wicakî so nahsîyatken̂e tîwyan me, 337.500 oper̂a nahsîyatken̂e. Ero poi 675 nîmyatken̂e Kporin komo ya. 36.000 paaka nahsîyatken̂e. Ero poi 72 nîmyatken̂e Kporin komo ya. 30.500 buhu nahsîyatken̂e. Ero poi 61 nîmyatken̂e Kporin komo ya. 16.000 woosî komo nahsîyatken̂e. N̂examro poi 32 nîmyatken̂e Kporin komo ya. Ero wicakî so nahsîyatken̂e sowtatu me toxapunhîrî komo. Ero wicakî so marha nîmyatken̂e Kporin komo ya.

41 Kporin komo ya tîmsom nahsîyakn̂e Moises, kahsî anîmxapu me tîmsom ha. Ero tak nîmyakn̂e Ereasa ya. Ero wa n̂iir̂akn̂e Moises. Kporin komo kekn̂e yîwya ero yaw roro rma n̂iir̂akn̂e.

42 Taa, ero yinhîrî yîraconhîrî hara nîmyakn̂e Moises Ixaw Yana komo ya hara. Sowtatu komo ya tîmîche, yîraconhîrî nîmyakn̂e Ixaw Yana komo ya hara, tohnînhîrî komo ya.

43-46 On wicakî xakn̂e yîwya so tîmsom, 337.500 oper̂a, 36.000 paaka, 30.500 buhu, 16.000 tooto. Ero wicakî xakn̂e Ixaw Yana komo ya tîmsom.

47 Taa, cewn̂e so nahsîyakn̂e Moises 50 poi so. Ero wa nahsîyakn̂e tooto, okno marha. Kporin komo kekn̂e yîwya ero yaw roro rma n̂iir̂akn̂e. Ero wicakî so ahsîche Repita komo ya nîmyakn̂e, Kporin komo mîn pokono komo ya. Ero wa nîmyakn̂e.

48 Ero yinhîrî tak sowtatu yantoman̂e komo mokyatken̂e Moises yaka. 1.000 yakenon komo yaan̂e komo, 100 yakenon komo yaan̂e komo marha, ero warai komo mokyatken̂e Moises yaka.

49 On wara ketken̂e yîwya, Ai apa, amaywen mak amna. On wara kes amna awya. Tînarîthîrî komo nukuknomai amna sowtatu komo. Ahnoro rma naxe waipîra. Noro pen waihye ham okwe, kacho exihra ra ro mak nas amna yakrono komo.

50 Ero ke Kporin komo ya tîmsom amna n̂eekî ooru ciixapu komo Micianita pen komo porokutho amna n̂eekî, apomithîrî, emeknathîrî, amoyeknathîrî, panatathîrî, wathîrî, ero warai amna n̂eekî Kporin komo ya tîmsom. Kicicme amna yehtoponho yahrutopo me amna n̂eekî, ketken̂e Moises ya.

51 Ero ke yîn̂ekîthîrî komo nahsîyatken̂e Moises, Ereasa komo. Porokuthîrî komo nahsîyatkekn̂e.

52 On wicakî xakn̂e sowtatu yaan̂e komo nîmîtho, 1.000 yakenon yaan̂e komo nîmîtho, 100 yakenon yaan̂e komo nîmîtho marha, 190 kiru wicakno mîn xakn̂e yukuknomaxapu. Ooru re mîn xakn̂e. Ero wicakî nîmyatken̂e Kporin komo ya.

53 Micianita pen komo yemyawnonho tko nahsîyatken̂e sowtatu komo ahnoro cemyawno komo me.

54 Yînmîthîrî komo rma tko nahsîyatken̂e Moises komo, Ereasa yakro. 1.000 yaan̂e komo nîmîtho mîn nahsîyatken̂e, 100 yaan̂e komo nîmîtho marha. Kesentacho yaka tak naar̂atken̂e. Kporin komo xa kakronometken̂e so ham, kacho me Ixaw Yana komo ya iina n̂aar̂atken̂e. Ero wa n̂aar̂atken̂e.