1-2 Ero yinhîrî on wara kekn̂e hara Moises Ixaw Yana yantoman̂e komo ya, On warai poko kpanatanmekyaxe so Kporin komo, on wara na matu anarimaw, Kporin komo yakro na mîmtapowatu ahce wa na awehtopo komo poko. Ero wa men was amn̂e, mîîketu na. Ero warahra ro mak was amn̂e, mîîketu marha na anarimaw. Yaaro xa tan wîîkesî esemîknopîn pîn me ro mak, mîîketu na. Kaan n̂entarî me tan wîîkesî, mîîketu marha na anarimaw. Ahce na tîmtopo poko na mîmtapowatu, ahce na awecitopo komo poko marha na mîmtapowatu. Ero wara amtapotache so amtapotachonhîrî komo yaw roro rma men ehcoko. Esemîknopîra ro mak men ehcoko.

3 Anarimaw ero wa na nîmtapowa wooxam emasî me cehsom, tîîm yawno rma ka. Ero wa men was amn̂e, nîîke na Kporin komo ya. Ero warahra ro mak was amn̂e, nîîke marha na anarimaw yîwya. Yaaro xa tan wîîkesî, nîîke na ero poko.

4 Ero wa kacho yencetaw yîîm ya, Ero wa amtapota xera ro mak wasî, kahra na nai cemsîrî ya. Ero wa exitaw yîîm, noro yemsîrî mtapotachonho tak nasî towîhnî me.

5 On wara tko na nîîke yîîm anarimaw cemsîrî mtapotachonho yencetaw, Ero wara awexi xera wasî, nîîke na. Ero wara ketaw yîwya tîmtapotachonho tak nowpe emasî, tîîm yanme rma. On wara men was amn̂e, kachonho ha. Owî rma yîmtapotachonhîrî wîhcamnoyasî yîîm ya towrî ke, kesî Kporin komo kîwya so.

6-7 On wara marha kesî Kporin komo kîwya so, Anarimaw ciin̂o tak na nahsîya wooxam, Ero wara men wiir̂asî, kan̂enho rma, iin̂omnî ha ka. Ciin̂o yahsîche tak iin̂o tak na n̂ence cipici mtapotarî, Ero wa men wiir̂as amn̂e, kachonho ha. Encetaw, cipici mtapotachonho towhra rma na nai. Ero wa awexi xera ro mak wasî, kahra na nai. Ero wa kahra exitaw towîhnî me rma nasî yipici mtapotarî. Tîmtapotachonhîrî yaw roro rma n̂expe.

8 Anarimaw cipici mtapotarî yencetaw iin̂o ya noro tak na nowya. Ero warahra ro mak awexi xe wasî, nîîke na yîwya yîmtapotarî yentache rma. Ero wa karî ke nowyasî yîmtapotarî, Ero wa men wiir̂as amn̂e, kachonho ha. Ero wa exitaw, Owî rma wîhcamnoyasî yîmtapotachonhîrî, kesî Kporin kom ha.

9 Anarimaw ero wa na nîmtapowa wooxam iin̂o waixapu hara. Ciin̂onhîrî yai etowxapu marha na ero wa nîîke. Ero wa men wiir̂asî amn̂e. Yaaro xa tan wîîkesî, esemîknopîn me ro mak, nîîke. Ero wa ketaw towîhnî me ro mak nasî yîmtapotacho.

10-11 Anarimaw wooxam nîmtapowa ciin̂oyemu rma. Ero wa men was amn̂e. Yaaro xa tan wîîkesî Kaan n̂entarî me, nîîke. Yîmtapotarî rma na n̂ence iin̂o. Ero wa kahra ro mak esko, kahra tko na nai. Nîtîmamya mak na encetaw. Ero wa exitaw iin̂o towîhnî me nasî yipici mtapotacho.

12 Anarimaw na, cipici mtapotachonho nowya iin̂o ero po rma entatopo po rma. Yaaro xa tan wîîkesî esemîknopîn me rma, kachonho rma nowya. Ero wa ciri xera ro mak was awya, nîîke na cipici mtapotarî poko. Ero wa ketaw iin̂o ya towso tak nasî yipici mtapotachonho. Ero ke Kporin komo rma nîhcamnoyasî yîmtapotachonhîrî.

13 Ero wa nai wooxam komo mtapotarî, Ero wara xa men wasî. Yaaro xa tan wîîkesî esemîknopîn me, nîîke na. Kaan n̂entarî me tan wîîkesî, nîîke xa na. Wara rma tanmero mak nîhtînope iin̂o cipici mtapotachonho towtopo na, towîhnî me ehtopo ha na. Ero wa nai wooxam iin̂o cipici mtapotachonho poko ha.

14 Nîtîtmamya mak na iin̂o cipici mtapotarî yentache. Ero wa awexi xera ro makî wasî, kahra na nai cipici ya ero po rma. Ero wa exitaw yipici mtapotachonho nasî towîhnî me rma. Ero wa men was amn̂e, kachonho ha.

15 On wara tko na nai iin̂o, cipici mtapotachonho towîhra rma na nai entatoponhîrî po rma. Amn̂e mak na nowya anarî kaamo po. Ero wa exitaw, kicicme cipici yehtoponho nasî noro pokono me tak. Ero wa nasî iin̂o, kekn̂e. Ero wa kekn̂e Moises. Kporin komo mtapotarî n̂ekatîmyakn̂e Ixaw Yana komo ya.

16 Ero warai poko Moises panatanmekyakn̂e Kporin komo. Ero wa nasî wooxam, ciin̂oyem ha. Ero wa marha nasî wooxam emasî me cehsom hara, tîîm yawno rma ha ka, kacho poko panatanmekyakn̂e. Ero wa panatanmekyakn̂e.