Taa, ero yinhîrî on wara kekn̂e xa hara Kporin komo Moises ya, Taa, 7-nhîrî nuun̂i po esenmecoko roro Kaan poko awahwotachome so. 1-nhîrî kaamo po xa esenmecoko. Tuu kacho me xa tak ero cirko yihcirî kaamo.

2 Ero po bui pun akn̂icoko cewn̂e mak, kar̂pamxan me cehsom. Kahn̂eru marha akn̂icoko cewn̂e. Oper̂a xîkrî marha akn̂icoko 7. Cewn̂e cimn̂ipu ehxapu komo re akn̂îcoko, tupunporem komo mak. Noro yipu yakn̂iyataw kotopore xa nasî Aporin komo ya.

3-4 Bui yakro puruma tîmcoko akihxapu, katî ke ceskem, 6,5 ritru mak tîmcoko. Kahn̂eru yakro ero yipu xa marha tîmcoko 4,5 ritru mak. Oper̂a xîkrî yakro so ero yipu xa marha tîmcoko 2 ritru wicakî so mak.

5 Boce marha akn̂icoko cewn̂e mak kicicme awehtoponhîrî yahrutopo me.

6 Ero warai tîmcoko owya, kaamo po roro tîmsom yakro rma. Nuun̂i yepataketaw okno makn̂iyaxe takn̂itîkaxmu. Ero yimaw so marha wooku marha mîmyaxe. Ero yipu komo yakro rma anatîrî komo yepetachen meero tîmcoko. Aporin komo ya tîmsom mîn. Ero ke ero wa akn̂icoko kotoporem owya.

7 Ero yinhîrî tak 7-nhîrî nuun̂i po rma esenmecoko xa hara Kaan poko awahwotachome so. 10-nhîrî kaamo po xa esenmecoko. Ero po marha etapickara ehcoko.

8 Ero po bui akn̂icoko cewn̂e mak. Kahn̂eru marha akn̂icoko cewn̂e marha. Oper̂a xîkrî komo marha akn̂icoko 7, tupunporem komo mak. Ero wa akn̂iyataw kotopore nasî Aporin komo ya.

9-10 Bui yakro puruma tîmcoko akihxapu. Katî ke ceskem tîmcoko 6,5 ritru ha. Kahn̂eru yakro ero yipu xa marha ehcoko, 4,5 ritru mak. Oper̂a xîkrî komo yakro ero yipu xa marha tîmcoko 2 ritru wicakî so mak.

11 Ero po rma boce akn̂icoko hara, kicicme awehtoponhîrî komo yahrutopo me. Kicicme awehtopo komo yahrutopo me takn̂isom ro yakro rma noro akn̂icoko xa hara. Kaamo po roro mîmyaxe awoh komo takn̂itîkaxmu me tîmsom. Puruma marha mîmyaxe, wooku marha, ero yipu yîhremacho me rma boce tîmcoko ero po hara. Ero warai tîmcoko owya 7-nhîrî nuun̂i po, 10-înhîrî kaamo po ha, kekn̂e. Ero wa kekn̂e kporin komo Moises ya.

12 On wara marha kekn̂e Kporin komo Moises ya, On wara ehcoko 7-nhîrî nuun̂i po, 15-nhîrî po xa kaamo po hara, ero po xa esenmecoko xa hara Kaan ponarono me. Ero po etapickara ehcoko. 7 kaamo wicakî opoko ahwotacoko.

13 Awahwotacho komo yihcitopo po awoh komo akn̂icoko owya tîmsom me, kotopore ehtome Aporin komo ya. On warai xa akn̂icoko, Bui akn̂icoko 13, kar̂pamxan warai re. Kahn̂eru marha akn̂icoko 2 mak. Oper̂a xîkrî marha akn̂icoko 14. Cewn̂e cimn̂ipu ehxapu komo re mak akn̂icoko, tupunporem komo re mak ha.

14 Bui komo yakro puruma tîmcoko akihxapu, katî ke ceskem. 6,5 ritru wicakî so tîmcoko. Kahn̂eru komo yakro marha ero yipu ehcoko 4,5 ritru wicakî so mak ha. Ero wicakî so tîmcoko kahn̂eru yakro so.

15 Oper̂a xîkrî komo yakro marha ero yipu ehcoko, 2 ritru wicakî so mak.

16 Boce marha tîmcoko cewn̂e ero po. Noro yipu tîmcoko kicicme awehtoponhîrî komo yahrutopo me. Kaamo po roro tîmsom yakro rma tîmcoko, takn̂itîkaxmu yakro ha. Puruma mîmyaxe enmar̂atîxera ero yakro, wooku marha, ero yipu tîmcoko xa hara boce yakro hara. Yihcirî kaamo po ero yipu tîmcoko owya.

17 Taa, 2-nhîrî kaamo po tak bui xa hara tîmcoko, takn̂itîkaxmu me. 12 tîmcoko, kar̂pamxan warai re. Kahn̂eru marha tîmcoko 2 mak. Oper̂a xîkrî marha tîmcoko cewn̂e cimn̂ipu me ehxapu re, 14. Tupunporem mak tîmcoko owya awokuthîrî komo.

18 Ero yipu yakro puruma marha tîmcoko, wooku marha. Wîîka awya so ero wicakî so ehcoko bui yakro so, kahn̂eru yakro so marha, oper̂a xîkrî yakro so marha.

19 Boce marha tîmcoko cewn̂e ero po cewn̂e, kicicme awehtoponhîrî komo yahrutopo me. Kaamo po roro mîmyaxe takn̂itîkaxmu, puruma, wooku marha, ero yipu yakro rma boce tîmcoko hara ero po. Ero yipu tîmcoko owya 2-înhîrî kaamo po.

20 Taa, 3-înhîrî kaamo po tak bui xa hara tîmcoko, 11 ha. Kahn̂eru marha tîmcoko 2 mak. Oper̂a xîkrî komo marha tîmcoko, cewn̂e cimn̂ipu me ehxapu komo re, 14. Tupunporem mak tîmcoko awokuthîrî komo.

21 Noro yipu komo yakro marha puruma tîmcoko, wooku marha. Wîîka awya so ero wicakî so tîmcoko bui yakro so, kahn̂eru yakro so marha, oper̂a xîkrî yakro so marha.

22 Boce marha tîmcoko cewn̂e ero po kicicme awehtoponhîrî komo yahrutopo me. Ero yipu tîmcoko owya kaamo po roro tîmsom yakro rma, takn̂itîkaxmu yakro. Puruma mîmyaxe roro, wooku marha, ero yipu yakro xa marha boce tîmcoko hara ero po. Ero yipu tîmcoko owya 3-înhîrî kaamo po.

23 Taa, 4-nhîrî kaamo po bui xa hara tîmcoko, 10. Kahn̂eru marha tîmcoko 2 mak. Oper̂a xîkrî marha tîmcoko, 14, cewn̂e cimn̂ipu ehxapu komo re. Tupunporem mak tîmcoko owya awokuthîrî komo.

24 Noro yipu komo yakro puruma marha tîmcoko, wooku marha. Wîîka awya so ero wicakî so tîmcoko paaka yakro so, kahn̂eru yakro so marha, oper̂a xîkrî yakro so marha.

25 Boce marha tîmcoko cewn̂e ero po kicicme awehtoponhîrî komo yahrutopo me. Ero yipu tîmcoko owya kaamo po roro tîmsom yakro rma, takn̂itîkaxmu yakro. Puruma mîmyaxe roro, wooku marha, ero yipu yakro rma boce tîmcoko hara ero po. Ero yipu tîmcoko owya 4-nhîrî kaamo po.

26 Taa, 5-nhîrî kaamo po bui xa hara tîmcoko, 9 mak. Kahneru marha tîmcoko 2 mak. Oper̂a xîkrî komo marha tîmcoko 14. Cewn̂e cimn̂ipu me ehxapu re tîmcoko, tupunporem komo mak.

27 Ero yipu yakro marha puruma tîmcoko, wooku marha. Wîîka awya so ero wicakî tîmcoko bui yakro, kahn̂eru yakro so marha, oper̂a xîkrî yakro so marha.

28 Boce marha tîmcoko ero po. Noro yipu tîmcoko owya kicicme awehtoponhîrî komo yahrutopo me. Ero yipu komo tîmcoko owya kaamo po roro tîmsom yakro rma, takn̂itîkaxmu yakro. Puruma mîmyaxe roro, wooku marha, ero yipu yakro rma boce tîmcoko hara ero po. Ero yipu tîmcoko 5-nhîrî kaamo po.

29 Taa, 6-nhîrî kaamo po bui xa hara tîmcoko, 8. Kahn̂eru marha tîmcoko 2 mak. Oper̂a xîkrî marha tîmcoko 14, cewn̂e cimn̂ipu me ehxapu komo mak. Tupunporem mak tîmcoko owya awokuthîrî komo.

30 Noro yipu komo yakro puruma marha tîmcoko, wooku marha. Wîîka awya so ero wicakî so tîmcoko bui yakro, kahn̂eru yakro marha, oper̂a xîkrî yakro so ha.

31 Boce marha tîmcoko ero po kicicme awehtoponhîrî komo yahrutopo me. Ero yipu tîmcoko owya kaamo po roro tîmsom yakro rma, takn̂itîkaxmu yakro. Puruma mîmyaxe roro, wooku marha, ero yipu yakro rma boce tîmcoko hara ero po. Ero yipu tîmcoko 6-înhîrî kaamo po.

32 Taa, 7-nhîrî kaamo po awokuthîrî komo xa hara tîmcoko. Bui xa hara tîmcoko kîîrî, 7. Kahn̂eru marha tîmcoko 2 mak. Oper̂a xîkrî marha tîmcoko 14, kîîrî re marha. Tupunporem mak tîmcoko awokuthîrî komo.

33 Ero yipu yakro marha puruma tîmcoko, wooku marha. Wîîka awya so ero wicakî so tîmcoko bui yakro so, kahn̂eru yakro so marha, oper̂a xîkrî yakro so marha.

34 Boce marha tîmcoko ero po kicicme awehtoponhîrî komo yahrutopo me. Noro yipu tîmcoko kaamo po roro tîmsom yakro rma, takn̂itîkaxmu yakro. Puruma mîmyaxe roro, wooku marha, ero yipu yakro rma boce tîmcoko hara ero po. Ero warai tîmcoko 7-nhîrî kaamo po.

35 8-nhîrî kaamo po tak esenmecoko xa hara Kaan poko awahwotachome so xa hara. Ero po marha etapickara ehcoko.

36 Ero po marha awokuthîrî komo tîmcoko takn̂itîkaxmu me ha. On warai xa tîmcoko owya ero po kotopore ehtome owya. Bui akn̂icoko cewn̂e mak, kahn̂eru marha cewn̂e mak. Oper̂a xîrî marha akn̂icoko 7. Tupunporem komo mak tîmcoko awokuthîrî komo.

37 Ero yipu yakro marha puruma tîmcoko, wooku marha. Wîîka awya so ero wicakî so tîmcoko bui yakro, kahn̂eru yakro so marha, oper̂a xîkrî yakro so marha.

38 Boce marha tîmcoko ero po kicicme awehtoponhîrî komo yahrutopo me. Noro yipu tîmcoko kaamo po roro tîmsom yakro rma, takn̂itîkaxmu yakro. Puruma mîmyaxe roro, wooku marha, ero yipu rma ehcoko ero po.

39 Ero yipu tîmcoko Kporin komo ya yukuknomaxapu po awahwowataw so. Takn̂itîkaxmu tîmcoko rma owya, puruma marha, wooku marha, wîîka awya so ero wicakî tîmcoko. Aaxe xa wasî, kacho me tîmsom marha tîmcoko. Awanme ro so tîmsom mak na mîmyatu anarimaw. Yaaro xa amtapotachonhîrî komo yaw rorono marha na mîmyatu anarimaw. Ero warai tîmcoko rma yîwya, kekn̂e. Ero wa kekn̂e Kporin komo Moises ya.

40 Ero ke ero wara rma kekn̂e Moises Ixaw Yana komo ya hara. Ahnoro n̂ekatîmtîkekn̂e Kporin komo mtapotacho, Ero wa men ekatîmko yîwya so, kachonho. Ero wara rma n̂ekatîmyakn̂e Moises.