1-2 Ero yinhîrî on wara kekn̂e hara Kporin komo Moises ya, Taa, Moises, Ixaw Yana komo antomakî xa hara owya tîmsom tîmtopo poko, On wara kasko yîwya so, Ay oyakno komo, on wara men kesî Kporin komo awya so, Erewsî ehcoko takn̂isom yakro tîmsom ha. Ero yipu yakn̂iyataw awya so kotopore nas owya. Akn̂itopo ro me exitaw roro akn̂icoko, kasko yîwya so.

3 On wara kacho marha ekatîmko yîwya so, On warai men ehcoko Kporin komo ya tîmsom, takn̂isom ha. Oper̂a xîkrî ehcoko ahnoro kaamo po roro asakî so. Cewn̂e cimn̂ipu me ehxapu mak ehcoko, tupunporem komo mak ha. Noro yipu komo akn̂icoko kaamo po roro.

4 Anarî akn̂icoko pahxaxaro. Anarînhîrî akn̂icoko kokon̂i hara.

5 Puruma marha ehcoko oper̂a xîkrî yakro ro rma. 2 ritru wicakî so ehcoko. Aseci marha ehcoko apikmotopo ke ciixapu. 1 ritru wicakî so ehcoko.

6 Ero warai poko kpanatanmekyatken̂e so Sinai Yîpîn yamrinaw awexitaw so. Ero ke ero yipu akn̂icoko roro Kporin komo ya tîmsom kotopore ehtome yîwya.

7 Oper̂a xîkrî yakro marha ehcoko wooku Kporin komo ya tîmsom me hara. Anarî yakro ehcoko 1 ritru wicakî, anarînhîrî yakro hara ero wicakî xa marha ehcoko. Ero yipu yukmamcoko Kporin komo ya tîmsom me.

8 Anarînhîrî akn̂icoko kokon̂i. Puruma xa hara tîmcoko yîwya ero yakro ro rma, wooku marha. Pahxaxaro so mîmyaxe ero warai xa marha tîmcoko kokon̂i takn̂isom yakro hara. Ero wa owya tîmsom akn̂icoko. Ero wa akn̂iyataw kotopore xa nas owya, Kporin komo ya.

9-10 Taa, awepokaretopo komo po 2 xa hara akn̂icoko oper̂a xîkrî. Cewn̂e cimn̂ipu me ehxapu xa marha akn̂icoko, tupunporem mak ha. Ero warai akn̂icoko owya tîmsom me. Wooku marha tîmcoko oper̂a xîkrî yakro ro. Puruma aposokaxapu marha tîmcoko 4,5 ritru wicakî so, katî ke ceskem ha. Ero warai komo tîmcoko awepokaretopo komo po roro anîmrî komo yîhremacho hara. Ero wicakî so tîmcoko owya awepokaretopo komo po so hara.

11 Taa, nuun̂i yepatakacho po roro tak on warai tîmcoko hara Kporin komo ya tîmsom me. Bui tîmcoko asakî kar̂pamxan me cehsom re. Kahn̂eru marha tîmcoko cewn̂e, oper̂a xîkrî marha tîmcoko 7. Cewn̂e cimn̂ipu me ehxapu re ehcoko, tupunporem ha. Ero warai ehcoko nuun̂i yepatakacho po roro.

12 On warai tîmcoko bui pun yakro so hara, puruma akihxapu tîmcoko 6,5 ritru wicakî so, katî ke ceskem ha. Ero wa tîmcoko roro bui pun yakro anarî yakro mak ha. Ero wicakî xa marha tîmcoko anarînhîrî yakro hara. Kahn̂eru yakro xa marha tîmcoko puruma akihxapu 4,5 ritru wicakî so mak, katî yakro ceskem ha.

13 Oper̂a xîkrî yakro marha tîmcoko puruma akihxapu 2 ritru wicakî so mak, katî ke ceskem ha. Ero wa tîmcoko anarî yakro, anarînhîrî yakro xa marha oper̂a xîkrî poko hakî so. Ero wa men ehcoko ha takn̂isom, owya tîmsom me. Ero yipu yakn̂iyataw awya so kotopore xa nas Aporin komo ya.

14 Wooku marha tîmcoko awoh komo yakro. Bui pun yakro so tîmcoko 2 ritru wicakî so. Kahn̂eru yakro so tîmcoko 1,2 ritru wicakî so. Oper̂a xîkrî yakro tîmcoko 1 ritru wicakî so mak. Ero wicakî so tîmcoko wooku awoh komo pun yakro rma. Ero wa so men awoh komo akn̂icoko roro owya tîmsom me. Ero warai akn̂icoko nuun̂i yepatakaxera cimn̂ipu cenatkaxi ro.

15 On warai marha tîmcoko nuun̂i yepatakaxera, boce pun ehcoko Kporin komo ya tîmsom hara. Kicicme awehtoponhîrî komo yahrutopo mîk akn̂icoko. Ero warai tîmcoko ahnoro kaamo po roro takn̂itîkaxmu yîhremacho hara, wooku yakro tîmsom yîhremacho, kekn̂e. Ero wa kekn̂e Kporin komo Moises ya.

16 On wara marha kekn̂e Kporin komo Moises ya, Taa, 1-înhîrî nuun̂i po tak owya awatotoponhîrî komo yukukmacoko hara. 14-nhîrî kaamo po xa ero yukukmacoko.

17 15-nhîrî kaamo po tak awahwotacho komo me nas hara. 7 kaamo nasî ero me, awahwotacho komo me. Wahrututpamnî mak tohcoko awru komo ero wicakî pahkînon.

18 Ero wa awahwotacho komo yihcitopo po esenmecoko Kaan ponaro mak. Ero po etapickan me ro mak ehcoko.

19 Kporin komo ya tîmsom marha akn̂icoko ero po. Bui pun akn̂icoko asakî, kar̂pamxan warai. Kahn̂eru marha akn̂icoko cewn̂e. Oper̂a xîkrî marha akn̂icoko 7, cewn̂e cimn̂ipu me ehxapu komo re. Tupunporem mak tîmcoko awoh kom ha.

20 Bui yakro tîmcoko puruma akihxapu 6,5 ritru wicakî, katî ke ceskem. Ero wa tîmcoko anarî yakro, anarînhîrî yakro marha. Kahn̂eru pun yakro so marha tîmcoko puruma akihxapu katî ke ceskem ha. 4,5 ritru wicakî tîmcoko.

21 Oper̂a xîkrî komo yakro marha puruma tîmcoko akihxapu, katî ke ceskem ha. 2 ritru wicakî so tîmcoko oper̂a xîkrî yakro so.

22 Boce marha tîmcoko cewn̂e. Kicicme awehtoponhîrî komo yahrutopo me noro pun akn̂icoko.

23 Ero warai akn̂icoko pahxaxaro so takn̂isom yakro rma.

24 Ero wa xa awoh komo akn̂icoko ero yimawno me awahwowataw so. 7 kaamo po roro wicakî so akn̂icoko. Ero wa erewsî marha akn̂icoko. Ero wa akn̂iyataw kotopore nasî Aporin komo ya. Kaamo po roro tîmsom yîhremacho me so ero yipu tîmcoko owya.

25 Taa, 7-nhîrî kaamo po tak esenmecoko xa hara Kaan ponaro mak hara. Ero po xa marha etapickara ehcoko, kekn̂e. Ero wa kekn̂e Kporin komo Moises ya.

26 On wara marha kekn̂e Kporin komo Moises ya, Anatîrî komo yeperîrî yenmekyataw awya so puruma yeperîrî, yihcirî me epetaxapu ehcoko Aporin komo ya tîmsom me. Ero ehcoko ohyaka Kporin komo yaka 49 kaamo yenatîchen me awahwowataw so. Ero yimaw tak esenmecoko Kaan poko awahwotachome so xa hara. Ero wa awesenmetopo komo po marha etapickara ehcoko.

27 Ero po bui akn̂icoko asakî, kar̂pamxan. Kahn̂eru marha akn̂icoko cewn̂e mak. Oper̂a xîkrî marha akn̂icoko 7, cewn̂e cimn̂ipu me ehxapu komo re. Ero yipu akn̂itîkacoko owya tîmsom me. Kotopore xa nas owya ero yipu yakn̂itopo.

28-29 Bui pun yakro tîmcoko puruma akihxapu, katî ke ceskem. 6,5 ritru wicakî so tîmcoko. Kahn̂eru yakro marha tîmcoko puruma akihxapu, katî ke ceskem, 4,5 ritru wicak ha. Oper̂a xîkrî yakro so ero yipu xa marha tîmcoko 2 ritru wicakî so mak. Ero wa puruma tîmcoko akihxapu.

30 Boce marha akn̂icoko cewn̂e mak kicicme awehtoponhîrî komo yahrutopo me.

31 Ero warai ehcoko tîmsom me. Kaamo po roro tîmsom makn̂itîkexe okno pun, puruma marha, wooku marha mîmyaxe ero yipu xa marha tîmcoko anatîrî komo yepetacho yimaw hara. Awoh komo yekyataw tupunporem men ehcoko owya tîmsom me, kekn̂e. Ero wa kekn̂e Kporin komo Moises ya.