Taa, ero yimaw tak wooxam komo mokyatken̂e. Seropeace yemsîtho komo mîkyam xatken̂e. Epe pen mumutho mîk xakn̂e Seropeace pen. Xireace pen mumutho reha mîk xakn̂e Epe pen hara. Maki pen mumutho reha mîk xakn̂e Xireace pen hara. Manases pen mumutho reha mîk xakn̂e Maki pen hara. Xose pen mumutho reha mîk xakn̂e Manases pen hara. Ero wa xatken̂e n̂examro porinînho pen kom ha. On wara xakn̂e Seropeaci yemsîtho komo yosotî, Maara, Noa, Okra, Miwka, Cihsa. Ero wa so xakn̂e osotî komo.

2 Taa, Kesentacho potaka mokyatken̂e n̂examro. Moises komo yeepatai n̂ecececetken̂e, Ereasa yeepatai marha Kaan yaka xa cewomsom yeepatai. Iito marha xatken̂e Ixaw Yana komo ahnoro. N̂examro yeepatai marha n̂ecececetken̂e.

3 On wara tak ketken̂e wooxam komo yîwya so, Ay Apa komo, pahxa waihyakn̂e amna yîmînho pen okwe axawa imo po. Koore pen yakrononho pîn mîk xakn̂e apapa pen. Kporin komo yanwecho poko n̂esencetken̂e n̂examro pen yakrononho pîn mîk xakn̂e apapa pen. Kicicme cehtoponhîrî poyero rma waihyakn̂e noro pen. Yumumuthîrî exihra ro makî tko xakn̂e okwe. Ero wa xakn̂e apapa pen.

4 Ero ke on wara kes amna awya so, ahce kacho reha apapa yosotî n̂ehcamnoya okwe yumumuthîrî exihtorî ke makî? Ero ke amna yekenî ro cma re mîmyaxe apapa yaknonho komo ya mîmyaxe ero wara rma, ketken̂e. Ero wa ketken̂e Seropeace pen yemsîtho komo.

5-7 Ero ke tak Moises n̂esencekn̂e Kporin komo yakro n̂examro mtapotarî poko. On wara n̂eyukyakn̂e Kporin komo, Yaaro wa kexe Seropeace pen yemsîtho komo. Yîrowonî ro komo rma tîmcoko yîwya so. Yîmînhîrî pen yaknonho ya mîmyaxe ero wa xa marha tîmcoko yîwya so hara. Yîîmînhîrî pen rowontho raconho tîmcoko rma yîwya so, kekn̂e Kporin komo.

8 On wara kacoko Ixaw Yana komo ya, kekn̂e xa hara Kporin komo Moises ya, Apoyino komo na waihya anarimaw yumumura rma okwe. Ero wa waihyataw so yîrowonthîrî komo tîmcoko emsîthîrî komo ya.

9-10 Emsîthîrî exihra exitaw tîmcoko aknonhîrî komo ya. Aknonhîrî exihra exitaw waixa pen yîmînho yaknonho ya tîmcoko hara.

11 Waixa pen yîmînho yaknonho exihra exitaw iyananînhîrî komo ya tîmcoko hara iyanan me xa cehsom komo ya. Noro yipu komo rowon me tak n̂expe. Ero wa nasî Ixaw Yana komo panatanmetopo. Wîîkesî tan awya ero xa nasî panatanmetopo komo me, kekn̂e. Ero wa kekn̂e Kporin komo Moises ya.

12 Ero yinhîrî on wara kekn̂e hara Kporin komo Moises ya, Ai Moises, on wara wîîkes awya, on tak awnuko îîpî Abarin Yîpîn ha. Ero meretwo awexitaw esewyariko. Ixaw Yana komo ya onîmrî enko, yîrowon komo me onîmrî ha.

13 Ero yinhîrî tak amoro makîrha tak mîîcesî aporin pen komo yaka hara. Awakno toye Araw ero wa xa marha mîîcesî amoro hara.

14 Pahxa Ixaw Yana komo xatken̂e kanwekn̂e me. Sin Yaxawan po mîxatken̂e, Meriba yecihtaw, Kates po ha. Ero yimaw omtapotarî manwekyatken̂e amyamro meero okwe. Ponaro awehtopo komo me xa Ow enpora mîxatken̂e yîwya so. Ero ke yîrowon komo pona tohnî me mas amoro, kekn̂e.

15-17 On wara n̂eyukyakn̂e Moises, Taa, ero wa ham Apa. On wara makî tko wîîkes awya, ahnoro tooto komo yekatî yecehton̂e xa Amoro. Ero ke Amoro cma re moxam yaan̂e meen̂asî anarî hara. Noro tak cirko n̂examro wero ro tîtosom, tmohsom me hara. Moxam yaan̂e me marha noro cirko, ekn̂e komo me marha yîmîn yaka so hara. Ayanan komo moxam amna Porin yanan. Ero ke oper̂a warahra exi xe so wasî osomumnî warahra, kekn̂e Moises.

18 Ero ke on wara kekn̂e Kporin komo Moises ya, Xoswe xa an̂ihko Nun pen mumutho. Oyekatî nasî noro ropotaw. Noro tîpîrî tak ahsîko.

19-20 Noro eeko Ereasa yaka, ohyaka cewomsom yaka ha. Noro yepatai n̂ececetope, Ixaw Yana komo yepatai marha. N̂examro yaan̂e me tak noro cirko n̂examro wero ro rma. Moso tak nasî awaan̂e komo me oyemtaka hara, kasko Ixaw Yana komo ya. Ero wa kasko yîwya so noro yewetîtome hara amn̂e.

21 On wara marha nasî noro, Xoswe ha, Ereasa yaka cesî roro ohyaka cewomsom yaka. Aporin komo mtapotarî yentaxi cesî. Omtapotarî yentan̂e mîk noro, Ereasa Urin ke. Ero tak n̂ekatîmyasî Xoswe ya hara. Noro yanme tak cexe Ixaw Yana komo ahnoro. Noro yanme marha mokyaxe hara n̂examro tîmîn komo yaka hara, kekn̂e. Ero wa kekn̂e Kporin komo Moises ya.

22 Ero ke ero wara rma Xoswe n̂iir̂akn̂e Moises, Kporin komo mtapotachonho yaw roro rma. Noro n̂ekyakn̂e Ereasa yeepataka, Kporin komo yaka xa cewomsom yeepataka. Ixaw Yana komo yeepataka marha n̂ekyakn̂e miyan komo yeepataka rma.

23 Yîhtîpîrî tak nahsîyakn̂e. Ero wa Ixaw Yana komo yaan̂e me tak n̂iir̂akn̂e. Kporin komo kekn̂e yîwya ero yaw roro rma Xoswe n̂iir̂akn̂e Moises. Ero wa n̂iir̂akn̂e.