1-2 Taa, iito rma xatken̂e Ixaw Yana komo Sitin po rma. Iito cexitaw so Moabita wosîn komo poko tak xatken̂e kica anarî komo. On wara tî ketken̂e Moabita wosîn komo yîwya so, Ponaro amna yehtopo ya tîmsom nîmyas amna oroto. Mokuhra mat amyamro amna yakro? ketken̂e tî yîwya so. Ero ke cetken̂e takî tî kîrkomo n̂examro yakro rma. Moabe yepamtho komo yakro tî n̂eseresmetken̂e. Ponaro n̂examro yehtopo mamakan me marha nutupenwatken̂e kica.

3 Ero wa tî xatken̂e kica Ixaw Yana komo, Baaw mamakan me nutupenwatken̂e kica, Peo pono mamakan me ha. Ero ke nîrwonakn̂e takî tî Kporin komo Ixaw Yana komo poko.

4 Ero yimaw on wara kekn̂e Kporin komo Moises ya, kicicitho poko aano rin̂e komo ahsîcoko ahnoro. N̂examro pen waihkacoko. Okoputhîrî komo amposotocoko katpanaw on̂enîrî me rma oyetîrwoxinkachome tak Ixaw Yana komo poko, kekn̂e tî.

5 Ero ke on wara tî kekn̂e Moises Ixaw Yana komo ya en̂ekano rin̂e komo ya, Awakrononhîrî pen komo rma men waihkacoko Baaw poko ehxapunhîrî pen komo, Peo pono poko ehxapunhîrî kom ha, kekn̂e.

6 Ero ke nîwracetken̂e tak Ixaw Yana komo Kesentacho potaw rma. Ero wa yîwracetaw so rma on wara xakn̂e Ixaw Yana anarî, Micianita wosîn n̂ekyakn̂e Moises wero ro, mer̂pono pîn komo wero ro rma kica. Tîyanan komo yaka rma naar̂akn̂e kica.

7-8 Iito tko tî xakn̂e Pin̂easî, Ereasa mumuru ha. Wooxam yekrî yenîche cekn̂e tak noro esenmexapu komo chei. Raapu namekyakn̂e cecehkem. Ixaw Yana wenari takî tî cekn̂e yîmîn yaka roro. Mîîmo yaka cewomche n̂examro pen tak paraxkekn̂e rah ke. Asakno roro rma tî paraxkekn̂e wethîrî yaw so. Ero yinhîrî tak Ixaw Yana komo yahsîra tak xakn̂e eper̂a.

9 Mer̂pono pîn komo tko waihyatken̂e okwe eper̂a ke ero yimaw. 24.000 yakenon waihyatken̂e okwe. Ero wa waihyatken̂e.

10-11 Ero yinhîrî on wara kekn̂e Kporin komo Moises ya, Kir̂wan̂he n̂eexi Pin̂easî, Ereasa mumuru, Araw pen parînho ha. Ohyaka cewomsom parînho mîk ha. Noro xa orwoxinka Ixaw Yana komo poko. Noro xa nîrwonmo orwon ke rma. Kîrwonmo xa ow. Noro yanme makî tko Ixaw Yana komo waihkatîkara weexi.

12-13 Ero ke on wara kasko yîwya Pin̂easî ya, Kporin komo tî nîmtapota awakronomacho poko. Tawake tî nai apoko. Yaaro xa tî ero wa nîîke esemîknopîn me ro mak. Owya tîmsom pokono me nasî noro, epamthîrî marha. Miya roro naxe ero pokono me. Ero wa wiir̂asî noro yanme rma. Noro xa nîrwonmo ponaro cehtopo mtapotarî yanwekrî ke Ixaw Yana komo ya. Ero ke kicicme n̂examro yehtoponho nahruyakn̂e, kekn̂e. Ero wa kekn̂e Kporin komo Pin̂easî poko.

14 On wara xakn̂e Ixaw Yana pen yosotî, Micianita wosîn yakro paraxkaxapu yosotîtho. Simri pen tî mîk xakn̂e Saru mumutho pen ha. Simeaw yepamtho komo yantoman̂e mîk xakn̂e noro yîîm ha.

15 On wara xakn̂e Micianita wosîn pen yosotîtho hara, paraxkaxapu yosotîtho ha. Kosbi pen mîk xakn̂e, Suuru yemsîtho pen ha. Micianita komo yantoman̂e tî mîk xakn̂e noro yîîm, tporin komo yepamtho komo yantoman̂e ha.

16-18 Ero yinhîrî on wara tî kekn̂e hara Kporin komo Moises ya, Micianita komo emetanmecoko, ar̂macoko marha. Ero wa n̂examro pen ciicoko awemetanmekn̂e komo me exirî ke so. Apohketken̂e so Peo pona awtotome so kica. Ero yanme aweper̂an komo tak awahsîce so. Ero poi rma mokye Micianita, Kosbi pen acheka so, Micianita komo yantoman̂e yemsîtho pen ha. Noro pen waihye aweper̂an komo awahsîtoponhîrî komo kamon po. Peo pona awtorî ke so eper̂a awahsîche so. Ero wa apohketken̂e so Micianita komo. Ero poyero n̂examro pen emetanmecoko, ar̂macoko marha, kekn̂e. Ero wa kekn̂e Kporin komo Moises ya.