Taa, ero yimaw on wara takî tî kekn̂e Baraw, Ixaw Yana komo yakronoma xe mak nai ham Kporin komo, kekn̂e tî. Ero ke tohra takî tî xakn̂e eremkacho yentaxi, yihcirî me tîtotopo warahra tak xakn̂e. Axawa imo wece makî takî tî n̂een̂akn̂e.

2 Ixaw Yana komo tî n̂een̂akn̂e ahnoro. Tribu komo tî n̂een̂akn̂e tpomxe so. Ero wa een̂ataw Kaan Yekatî takî tî mokyakn̂e yîropotaka.

3-4 Ero ke Kaanî mtapotarî takî tî n̂ekatîmyakn̂e xa hara. On wara tî kekn̂e, On wara xa wîîkesî. Baraw ow ha, Beo mumuru ha. Cewkem xa ow ha, Kaanî mtapotarî yentan̂e marha ow. Karitî ro n̂enpotho yenîn̂e xa ow. Ero yipu yenîche kesewnapesî tak cewke rma. Noro yipu mtapotarî tak entakî.

5 On wara wîîkesî, Cenporem xa mîn amîn komo okre, wîîkesî Xako yepamtho komo ya. Ero wa nasî aweken komo amyamro Ixaw Yana kom ha.

6 Miya rma nasî amîn komo. Woskara wara nasî miya so ro mak. Mararî wara marha nasî aweken komo, tuuna yecihtawno wara. Santaru yepu wara marha nasî Kporin komo natîrî wara. Setru yepu wara marha nasî tuuna yecihtawno wara. Ero wa nas aweken komo.

7 Tuuna pîtho wara nasî Ixaw Yana komo weer̂an. Tuuna ke tîhso xa nasî n̂examro natîrî amn̂e. Yukurumîkno xa Mîk n̂examro kayaritomon Akake yopono xa. Anarî yana komo kayaritomon yopono me xa naxe n̂examro kayaritomon amn̂e.

8 Exitu poi n̂examro n̂ekyasî Kaan. Kar̂itî komo xa mîkyam, bui warai, comota chewno warai. Mîk hak maywen komo yermomn̂e wara naxe, tîîxatî pîn komo yermomn̂e wara. Noro yipu komo yocho naxikwexe ro mak oko. Waiwî ke marha wexe. Ero wa n̂iir̂axe tîîxatî pîn komo.

9 Reaw wara n̂eremexe Ixaw Yana komo. Reaw wara marha n̂etîrapexe, woosî wara. Onoke thakwa re n̂examro nukurunke enpakachome hara? Ero wa maxe amyamro Ixaw Yana komo. Kaan nakronomarî me so naxe awakronoman̂enhîrî komo. Kaan nîwîrîmarî me so naxe aweremkan̂enhîrî kom hara, kekn̂e tî. Ero wa tî kekn̂e Baraw Ixaw Yana komo poko.

10 Ero yipu yentache Barake ya nîrwonakn̂e xa takî tî Baraw poko. Tamorî n̂etapekn̂e ececoka rma tîrwonîmrî ke. On wara tî kekn̂e yîwya Baraw ya, Ooxatî pîn komo yeremkaxi cma re kan̂ikpoi. Makronomatîkapesî xa matko kica Kaan ya. Osorwaw ro makronomapo okwe yîwya.

11 Ero ke etoko kr̂a hara kar̂pe awewton pona hara. Tooto komo n̂ewetîrî me xa kiir̂asî, wîîkai cma ha re awya. Kaanî tko ero wa awir̂pora n̂ex ham owya, kekn̂e tî.

12-13 On wara Barake mtaka n̂eyukyakn̂e Baraw, Mencekn̂e rma na re omtapotachonho. Ohyaka an̂en̂epethîrî komo ya wîîkai re. Tîmtapotarî n̂ekatîmyasî Kporin komo owya. Ero ke ero wa kacho mak wekatîmyasî, wîîkai yîwya so. Oyanme ro mak ekatîmra ro mak wasî. Kicicitho yekatîmra wasî oyanme ro. Kir̂wan marha ekatîmra wasî oyanme ro hara. Anarimaw tîmîn na copoyi n̂iir̂a Barake ooru ke, prata ke marha. Ero wicakno ke oyepemetaw rma yîwya oyanme ro mak ekatîmra ro mak wasî, wîîkekn̂e yîwya so.

14 Taa, oyanan komo yaka kîwce haram. Amoko tko ka xiya. Ixaw Yana komo yehtopo ka wekatîmtîkes awya. On wara ayanan komo n̂iir̂axe n̂examro amn̂e, kacho wekatîmyasî awya, kekn̂e tî.

15-16 Ero ke Kaanî mtapotarî n̂ekatîmyakn̂e xa hara Baraw. On wara kekn̂e hara, Omtapotarî rma ka entakî, Baraw ow ha Beo mumutho ha. Cewkem xa ow. Kaanî mtapotarî yentan̂e marha ow. Kyopono ro oyakîrei Yîtîhkathîrî xa. Karitî ro n̂enpotho yenîn̂e xa ow. Ero yipu yenîche owya kesewnapesî Noro yamrinaka. Cewke rma kesewnapesî.

17 Noro xa tak ween̂as amn̂e, oroto tko ka enîhra wasî. Noro xa tak ween̂asî. Meyehra tko enîhra wasî. Xako yepamtho komo chei n̂epatakesî xir̂ko. Ixaw Yana komo chei nawomyasî kayaritomo kuknon ke cemyarkem. Noro tak Moabita pen komo pekatapesî. Sece yepamtho komo waihketîkes ahnoro.

18 Eton komo rowon tak nasî n̂examro rowon me. Seitho tak nahsîyaxe n̂examro cewton komo me, tîîxatî pîn komo yewtontho ha. Kar̂pe tak n̂ehtîkexe Ixaw Yana komo Eton komo yopo.

19 Kayaritomo me cehsom tak n̂ewruyas amn̂e Xako yepamtho rma. Noro nar̂metîkesî ewto imo pono komo yakwenho pen kom ha, kekn̂e tî.

20 Ero yinhîrî Amarekita komo wece takî tî n̂een̂akn̂e hara Baraw. N̂examro yenîche on wara tî kekn̂e hara, Pahxa anarî yana komo yopono me tî xatken̂e Amarekita komo. Waihtîkexe xa takî tko amn̂e, kekn̂e tî.

21 Ero yinhîrî Kenita komo tî n̂een̂akn̂e hara. Ero ke n̂examro pokono takî tî n̂ekatîmyakn̂e hara Kaanî mtapotarî rma, On wara tî kekn̂e, Cecen̂ayem komo xa amyamro mînto aweken komo po. Ewtarî yaw xa nasî amîn komo, toopu yetîmtakaxapu yaw ha.

22 Awaparî komo rma tko Kenita komo yewton nakn̂iyaxe okwe. Ahcemaw xa Asu pono komo awar̂atu so aweken komo poi? kekn̂e tî.

23-24 Ero yinhîrî on wara tî kekn̂e hara, Okwe, ahtono komo xa re natu waipîra ero yimaw, ar̂mano riyataw Kaan ya? kekn̂e tî. Kitin̂i pono komo mokyaxe amn̂e kanawa yaw. Asu pono pen komo tak n̂emetanmekyaxe n̂examro, Ebe pen komo marha. N̂examro pen meero waihyaxe amn̂e, kekn̂e tî. Ero wa tî kekn̂e Baraw Barake komo n̂entarî me.

25 Ero yinhîrî ceken pona takî tî n̂etîramekn̂e hara Baraw. Barake marha tî cekn̂e cewton pona hara. Ero wa tî cetken̂e.