Taa, on wara kekn̂e Baraw Barake ya, Kporin komo ya tîmsom yakn̂itopo akîhtoko tan 7. Bui eeko, 7 xa marha. Kahn̂eru marha eeko, 7 xa marha. Ekîche awya waihkakî tak akn̂itome owya, kekn̂e tî.

2 Ero ke takî tî ero yipu nakîhcekn̂e Barake Baraw mtapotarî yaw roro rma. Ero wa ciriche aapo pona takî tî bui pun nakn̂iyatken̂e Barake, Baraw kom ha. Kahn̂eru pun marha nakn̂iyatken̂e ero pona. Ero yinhîrî anarî pona nakn̂iyatken̂e noro yipu pun xa marha. Ero wa so okno pun nakn̂iyatken̂e 7-nhîrî komo cirihtîkaxi ro takn̂isom kom ha.

3 Ero yinhîrî takî tî on wara kekn̂e Baraw Barake ya, Tan ka esko amoro knakn̂iputhîrî mîtwo rma. Moro na mak kîwces ow. Kporin komo na mokya iina oyakro yîmtapotaxi. Oyakro yîmtapotache ero tak wekatîmyas awya, kekn̂e tî Baraw. Ero yinhîrî toopu pona takî tî cekn̂e Baraw kawno pona.

4 Toche Kaanî rma takî tî mokyakn̂e yîmtapotaxi noro yakro. On wara tî kekn̂e Baraw yîwya, Apa, akn̂itopo komo wirpoi yaake, 7 ha. Ero komo pona bui pun wakn̂ipu, kahn̂eru pun marha. Ero wa wakn̂ipu, kekn̂e tî.

5 Ero yinhîrî takî tî tîmtapotarî n̂iir̂akn̂e Kaan Baraw mtaka. Ero yinhîrî takî tî on wara kekn̂e Kaan yîwya, Barake yaka tak etok hara. Omtapotarî mak men ekatîmko yîwya, kekn̂e tî yîwya.

6 Ero ke Barake yaka tî cekn̂e hara Baraw. Iito rma tî xakn̂e noro cececetoso akn̂itoponhîrî mîtwo rma. Iito marha tî xatken̂e noro maywen komo ahnoro, Moabita yantoman̂e kom ha.

7 Ero ke Kaanî mtapotarî takî tî n̂ekatîmyakn̂e Baraw. On wara tî kekn̂e, Mehxa oyan̂ikpoi Barake Aran poi. Îîpî pononho oyan̂ikpoi Moabita komo kayaritomon ha. On wara kai owya, Amok ha Xako yeremkaxi. Amok ha Ixaw Yana komo yîwîrîmaxi amtapotarî ke, kekn̂e owya.

8 Ahce wa ha re n̂examro weremke ha? Kaan nîwîrîmarî pîn thakwa mîkyam. Ahce wa ha re n̂examro poko wîîke, Kporin komo nakronomarî pînî ro mak n̂examro, wîîke ero wa kahra exitaw Noro hara?

9 Xehxa Ixaw Yana komo ween̂asî toopu meretîn̂i, kawno meretîn̂i. Îîpî meretîn̂i marha ween̂asî. Ixaw Yana komo mîkyam, cewyarono kom ha. Mîk hak maywen komo warai pîn kom ha.

10 Yukuknomarî yopo ro mak nasî roowo pupun Xako yepamtho komo yewton pono. 1 kwahtu wicak mak Xako Yepamtho komo yukuknoma xe kexitaw yukuknomarî yopono me naxe. Kir̂wan komo waihyaxe ero wa xa marha owaipu xe was ow hara. Ixaw Yana komo n̂exponkexe ero wa xa marha oyexponka xe was ow hara, kekn̂e tî. Ero wa tî kekn̂e Baraw Ixaw Yana komo poko.

11 Ero yipu yentache on wara tî kekn̂e Barake Baraw ya, Ahce wa mîîka hara kopi? kekn̂e tî. Yiixera oyehtopo yeremkaxi kan̂ikpo cma re oona. Eremkara ro mak meexi okwe. Akronomatîkacho komo poko mak mîmtapota ham kica, kekn̂e tî yîwya.

12 On wara tko n̂eyukyakn̂e Baraw, Ahce warai me ow meen̂a ke? Kporin komo xa n̂iir̂asî tîmtapotarî omtaka, ero yekatîmn̂e pîn me katî wai? kekn̂e tî. Ero wa tî kekn̂e Baraw.

13 Ero yinhîrî on wara tî kekn̂e hara Barake Baraw ya, Amoko xa hara oyakro anana hara. En̂exa tak Ixaw Yana komo meen̂as hara. Ahnoro tko enîhra masî, poyino komo mak meen̂asî. En̂exa een̂ataw awya eremkakî xa tak oyanme, kekn̂e tî yîwya.

14 Ero ke Piska yîpîn pona takî tî Baraw naar̂akn̂e hara. Iito xakn̂e woskara, Sopin tî osotî. Iina tî naar̂akn̂e. Iina tî takn̂isom yapon n̂irpekn̂e hara Baraw 7 xa hara. Ero komo pona marha tî nakn̂ipekn̂e bui cewn̂e so. Kahn̂eru marha nakn̂ipekn̂e cewn̂e so.

15 Ero yinhîrî on wara tî kekn̂e hara Baraw Barake ya, Tan ka esko. Mîîna kîwcesî Kaan yakro yîmtapotaxi xa hara, kekn̂e tî.

16 Ero ke Baraw yakro yîmtapotaxi mokyakn̂e xa hara Kporin komo. Tîmtapotarî tî n̂iir̂akn̂e xa hara yîmtaka. On wara tî kekn̂e yîwya, Taa, etok hara ka Barake yaka hara. Omtapotarî mak men ekatîmko yîwya, amtaka wiirî ero ha, kekn̂e tî yîwya.

17 Ero ke Barake yaka tî cekn̂e hara Baraw. Iito rma tî xakn̂e noro cececetoso akn̂itoponhîrî mîtwo rma. Noro maywen komo marha tî xatken̂e iito Moabita yantoman̂e kom ha. Ahce wa tak nîîka Kporin komo awya? kekn̂e tî Barake yîwya.

18 Ero ke Kporin kmo mtapotarî takî tî n̂ekatîmyakn̂e hara Baraw. On wara kekn̂e, Taa, piiri awomko Barake omtapotarî yentachome. Omtapotarî ka entakî amoro Siiporo mumuru ha.

19 Cemarontanî ro mak Mîk Kaan tooto pîn kaxi. Ahce wa na kache, Pîra tko na, on wara xa matko wîhtînopu hara, kan̂e pînî ro mak Mîkî tooto me ewruxapu pîn kaxi. Ero wa men wiir̂asî, kachonho yaw roro cirihra ma re nai awya? Tîmtapotachonhîrî yaw roro ciin̂e pîn katî Noro awya?

20 N̂examro yakronomacho mak ekatîmko, nîîka owya. Kaanî nakronomatho mak mîkyam. Ero ke anarme kahra ro thakwa mak was ow poko so.

21 Kicicitho me enîhra nasî Kaan Xako yepamtho komo yehtopo. Akpîn me enîhra marha nas Ixaw Yana komo. Kporin komo xa nasî n̂examro yakrono me, ponaro n̂examro yehtopo rma. Noro ha kayaritomo, kacho n̂esencesî yîchew so.

22 Kaan xa Mîk n̂examro n̂ekyakn̂e Exitu poi. Karitî xa mîkyam bui warai, comota chewno warai.

23 Xako yepamtho komo yeremkacho exihra ro mak nasî. N̂examro waihkacho exihra marha nasî. On wara kexe tooto komo oroto rma Xako yepamtho komo poko, Kaanî nakronomatho xa mîkyam okre. Enko xe exirî kom ha, kexe Ixaw Yana komo poko.

24 Reaw wara xa nawomyaxe woosî wara. Reaw wara xa n̂ekaricexe tîrapo ehxapunhîrî wara. Etîrapora nas hara tînahsîthîrî tonotîkara ka cexitaw, tîn̂eskathîrî kamxukuthîrî yemehra ka cexitaw ha. Ero wara naxe n̂examro, kekn̂e tî. Ero wa tî kekn̂e Baraw Ixaw Yana komo poko.

25 Ero yipu yentache takî tî on wara kekn̂e Barake Baraw ya, N̂examro eremkara ro mak esko, akronomacho marha ekatîmra esko, kekn̂e tî Barake yîwya.

26 Ai ha, kekn̂e takî tî Baraw yîwya, Kporin komo mtapotarî yanme ekatîmn̂e mak ow, wîîkai mexe re awya, kekn̂e tî Baraw yîwya.

27 Ero yinhîrî on wara tî kekn̂e hara Barake Baraw ya, Amoko xa hara. Anana tak kaar̂as hara. En̂exa tak na n̂examro n̂eremkape Kaan awya, kekn̂e tî.

28 Ero ke îh pona takî tî Baraw naar̂akn̂e xa hara Barake, Peo pona. Axawa imo panawno mîn Peo. Iina tî naar̂akn̂e îîpî meretkoso rma.

29 Iito exitaw so on wara tî kekn̂e xa hara Baraw, 7 xa hara akîhtoko awokuthîrî pun yakn̂itopo oona. Bui xa hara paraxkakî 7 rma. Akpotko marha. Ero wa xa marha cirko kahn̂eru hara, 7 xa marha, kekn̂e tî.

30 Ero ke ero wara tî n̂iir̂akn̂e Barake Baraw mtapotarî yaw roro rma. Aapo komo akîhtoche ero yipu pona so tî nakn̂iyakn̂e xa hara bui pun, kahn̂eru pun marha. Ero wa tî nakn̂iyakn̂e.