Taa, ero yinhîrî tak Ixaw Yana komo cetken̂e hara esama yaw. Woskara pona cetken̂e Moabe woskaran pona. Xotaw yecihtaka n̂etakriyatken̂e Xer̂ko yecen̂e rma.

2 Iito exitaw so Barake n̂encekn̂e Amohew pen komo yar̂machonho Ixaw Yana komo ya. Siporo mumuru tî mîk xakn̂e Barake.

3 Ero ke n̂eraswatken̂e xa takî tî Moabita komo Ixaw Yana komo pona mer̂pora ro mak exirî ke so. Ahwora ro makî tî xatken̂e cekar̂kaxi ro twaparî komo me yîhtînorî ke so.

4 Ero wa exitaw so Mician̂ita poritomon komo yakro tî nîmtapowatken̂e Moabita komo. On wara tî ketken̂e yîwya so, Oyakno komo, mer̂pono pînî ro mak mîkyam kopi Ixaw Yana komo. Kîwyam pen kwaihkexe so okwe. Paaka nahtîkesî cuupu woskara pono ero wa xa marha n̂examro kwaihkexe so kîwyam pen hara kopi, ketken̂e tî. Ero yimaw Barake xakn̂e Moabita komo kayaritomon me. Siporo mumuru tî mîk xakn̂e.

5 Ero ke Baraw yan̂ikn̂e komo takî tî n̂en̂epekn̂e Barake. Beo mumuru tî mîk xakn̂e Baraw. Peto pono tî mîk xakn̂e, tuuna yepu pahnoke. Iito tî xakn̂e tîyanan komo chew. On wara tî kekn̂e Barake tîn̂en̂eperî komo ya, On wara kacoko Baraw ya, Ai Apa, on wara tî nîîke Barake awya, tooto komo mohce Exitu poi. Orowon mîtwo naxe kopi. Roowo yawronohkatîkan̂e mak mîkyam kopi mer̂pono pînî ro mak, nîîke ha tî awya.

6 Ero ke amoko amoro oroto n̂examro yeremkaxi. Oyopono me thakwa naxe okwe kar̂pe xa. N̂examro yeremkache awya iyopo so tak na wai. En̂epen̂e komo me tak na wai orowon poi. On wara wîhtînoyasî awehtopo, tooto poko amtapowataw n̂examro wakretopo poko, Kir̂wan̂he exi xe wasî n̂examro, ketaw awya kir̂wan̂he tak naxe okre. Eremkano riyataw hara awya an̂eremkathîrî komo naxe tîwîrîmaxi hara. Ero ke amok ha, nîîke tî awya Barake, kacoko yîwya, kekn̂e tî Barake. Ero wa tî kekn̂e tîn̂en̂eperî komo ya.

7 Ero ke takî tî cetken̂e Moabita poritomon komo, Mician̂ita poritomon komo marha. Puranta tî naar̂atken̂e eremkacho yepetho. Baraw yaka cepatakache so takî tî Barake mtapotarî n̂ekatîmyatken̂e yîwya.

8 Ai ha, kekn̂e tî Baraw. Tan ka enmacoko ohyaw. Enmapuche wekatîmyasî Kporin komo mtapotarî awya so, kekn̂e tî. Ero ke iito rma tî n̂enmayatken̂e Moabita yantoman̂e komo yîhyaw.

9 Ero yinhîrî takî tî Kaan mokyakn̂e Baraw yaka. On wara tî kekn̂e yîwya, Ai Baraw, onoke mîkyam ahyaka mohxapu komo? kekn̂e tî.

10-11 On wara tî Baraw n̂eyukyakn̂e, Barake yanme mohxapu komo tî moxam, Moabita komo kayaritomon yanme ha. On wara tî noro nîîke owya, Tooto komo mohce Exitu poi mer̂pono pîn komo, roowo yawronohkatîkan̂e komo kopi. Ero ke cma re mîmokyasî n̂examro yeremkaxi. Eremkache awya kar̂pe tak na wai iyopo so. Ohyai tak na wen̂epe, nîîke tî owya, kekn̂e tî Baraw Kporin komo ya.

12 On wara tko tî kekn̂e Kaan Baraw ya hara, N̂examro yakro tohra ro mak men esko. Exitu poi mohxapu komo eremkara marha esko. Onakronomarî me ciixapu mak mîkyam, kekn̂e tî. Ero wa tî kekn̂e Kaan Baraw ya.

13 Ero ke enmapuche takî tî on wara kekn̂e Baraw Barake maywen komo ya, Ai, awewton komo pona etocoko hara. N̂examro yakro tohra ro mak men esko, nîîka owya Kporin komo. Ero ke thakwa mokuhra wasî awakro so, kekn̂e tî yîwya so.

14 Ero ke Moabita yantoman̂e komo tî n̂etîrametken̂e hara Barake yaka. On wara tî ketken̂e yîwya, Ai, Barake, pîra ha tî okwe. Mokuhra rma was okwe awakro so, nîîkai Baraw amna ya, ketken̂e tî yîwya.

15 Ero yinhîrî takî tî tmaywen komo n̂en̂epekn̂e xa hara Barake yaake n̂he takî tî. Antomano rin̂e me cehsom xa takî tî mîkyam n̂en̂epekn̂e.

16-17 Ero ke Baraw yaka tî cetken̂e n̂examro hara. On wara tî ketken̂e yîwya, Ai, Baraw, on wara tî nîîke Barake, Siporo mumuru, Ehn̂ara ro mak men esko amohtopo poko. Anarî komo yopono me xa tak kiir̂asî moxam yeremkache awya. Ahce na marha wiir̂asî awanme xa. Ero ke amoko xa men moxam yeremkaxi oyanme, nîîke tî awya, ketken̂e tî yîwya.

18 On wara tko tî n̂eyukyakn̂e Baraw, Tîmîn na takpî n̂iir̂a Barake prata ke, ooru ke marha. Ero wicakî na nîmya owya n̂examro yeremkachonho yepetho. Ponaro oyehtopo mtapotarî makî tko wewehcasî thakwa, Kporin komo mtapotarî ha. Yîmtapotachonhîrî yewetpormara ro mak wasî. Ero yopo ciino cirihra marha wasî. Ero yaw roro mak wasî.

19 Wara rma, tan tko ka enmacoko pahxa mohxapu komo wara xa marha. Kporin komo mtapotarî ka wentaxi xa hara, kekn̂e tî Baraw yîwya so.

20 Ero ke kosope takî tî Kaan mokyakn̂e hara Baraw yaka. On wara takî tî kekn̂e yîwya, Ai Baraw, awan̂iso mokyataw so xa hara Moabe komo, akro so rma tak etoko. Omtapotarî yaw roro makî tko esko, kekn̂e tî. Ero wa tî kekn̂e Kaan Baraw ya.

21 Ero ke enmapuche takî tî pakekn̂e Baraw. Tooku mkahsî nakriyakn̂e ceremacho, buhu mkahsî ha. Cekn̂e takî tî noro mkaw Moabita komo yakro, antomano rin̂e komo yakro ha.

22 Nîrwonakn̂e tko tî Kaan noro torî ke. Ero ke Kporin komo yancun takî tî mokyakn̂e. Baraw yesamarî yaka tak n̂ecececekn̂e noro wahkototome. Tooku mkaw rma cekn̂e Baraw buhu mkaw. Noro yakro marha tî cetken̂e maywen komo asakî. Ero wa tî cetken̂e.

23 Ero yinhîrî buhu takî tî n̂een̂akn̂e Kporin komo yancun. Esama yaw xakn̂e cececetoso kacipara ke cemyarke. Enhîrî yai tmohkaxi tî xakn̂e kacipara imo. Noro tî n̂een̂akn̂e buhu. Ero ke esama yai takî tî n̂etowyakn̂e mararî pona. Ero ke tooku tî petîkatapekn̂e Baraw totohme esama yaka hara.

24 Ero yinhîrî esama yaw tî cetken̂e hara. Ancu tko tî cekn̂e miya n̂he hara. Esamaka tî n̂ecececekn̂e xa hara, amtaci men na takî. Xehxa tî xakn̂e naatî, uupa yatî, mehxa tî xakn̂e ero yipu xa marha. Naatî wacan marha tî xakn̂e esama pore ro, mehxa xehxa wara.

25 Ero yinhîrî buhu tî n̂een̂akn̂e hara Kporin komo yancun. Ero ke waaca po mak takî tî cekn̂e buhu pen kar̂pe. Baraw pen tarî tî natmunukyakn̂e waaca oko. Ero ke tooku tî petkatapekn̂e xa hara Baraw.

26 Ero yinhîrî takî tî yîywapu n̂he xa hara cekn̂e ancu. Amtaci men na tî cekn̂e xa hara. Iina takî tî n̂ecececekn̂e hara. Ancu yawxari totopo mera ro mak takî tî xakn̂e iito. Kaari n̂ixa totopo mera thakwa tî xakn̂e, poowa n̂ixa totopo mera marha.

27 Ero ke buhu tî ancu n̂een̂akn̂e xa hara Kporin komo yancun. Ero ke n̂eremekn̂e mak takî tî buhu Baraw ke tîmkawnoye rma. Ero ke nîrwonakn̂e xa takî tî osom. Tooku tî n̂etapekn̂e xa hara tamoyin ke oko.

28 Ero ke on wara takî tî Kporin komo n̂iir̂akn̂e, buhu takî tî n̂iir̂akn̂e tîmtapotaxmu me okyo. On wara takî tî kekn̂e noro rma Baraw ya, Ahce wa kyam ow meen̂a ha? Kicicme katî wai awya? Ahce kacho ow metapa osorwaw ro oko? kekn̂e tî tosom ya.

29 On wara tî Baraw n̂eyukyakn̂e, Noro pîntho me mak ow miir̂asî kica. Kacipara imo xe wasî. Ero exitaw ketaw re oyemyaw kwaihkesî kr̂a oroto, kekn̂e tî yîwya.

30 On wara tî buhu n̂eyukyakn̂e hara, Awok pîn me katî ow meen̂a? Awoku thakwa cma re ow hara. Pahxa awan̂enhîrî thakwa owî awok me oyahsîtopo n̂ixa ro. Oroto mak anana kaarî. Ero wara roro katî kaar̂akn̂e awya? kekn̂e tî. Ero wa tî kekn̂e buhu Baraw ya. Pîra ha re, kekn̂e tî Baraw yîwya.

31 Ero yimaw rma takî tî Baraw ewyanîrexapu warai me n̂iir̂akn̂e Kporin komo. Ero ke Kporin komo yancun takî tî n̂een̂akn̂e. Iito rma xakn̂e esama yaw. Kacipara imo ke cemyarke rma tî xakn̂e oko. Noro yenîche nutupenwakn̂e makî takî tî Baraw, n̂esewnapekn̂e marha tî roowo pona roro.

32 On wara tî kekn̂e ancu yîwya, Ahce kacho awoku metapa? Osorwaw ro metapa oko. Awesamarî yaka tan kmoko awahkotoso cma ha re. Kanwekn̂e me keen̂as okwe. Ero ke awahkotoso kmoko.

33 Oyenwo cma re awoku. Omamrikî xe re n̂eexi. Ero ke osorwaw ro ohyai tomo. Ero wa omamrikîra exitaw ketaw ha re noro pahxa rma re kwaihkarî ha re okwe. Buhu reha waihkara wexirî, kekn̂e tî ancu Baraw ya.

34 On wara tî n̂eyukyakn̂e Baraw, Ai ha okwe, kicicme weexi ham ke kica. Awenîra weexi okwe. Iito men nasî ancu oyesamaw owahkoton̂e, kahra thakwa weexi apoko. Taa, kicicme awya exitaw owtotopo ketîrames hara, kekn̂e makî tî Baraw ancu ya.

35 On wara makî tî kekn̂e Kporin komo yancun yîwya, Etoko rma moxam yakro. Barake yaka awtoche tko omtapotarî mak men ekatîmko, kekn̂e tî yîwya. Ero wa tî kekn̂e ancu. Ero ke Barake maywen komo yakro rma tî cekn̂e Baraw.

36 Ero yinhîrî, Baraw mohtopo takî tî n̂encekn̂e Barake. Ero ke noro yakro eseposo tî cekn̂e Moabe yewton pona. Ahnon kwaka tî cekn̂e Moabe rowon wokpan kwaka ha.

37 On wara tî kekn̂e Barake Baraw ya, Ahce kacho pahxa rma mokuhra mehxe ke okwe? Cerewre awan̂ikpotopo yentara katî mîxakn̂e? Tooto komo yopono me xa orihra ro mak nai Barake, mîîkai katî? kekn̂e tî yîwya.

38 Kmoko rma ha, enko xe, kekn̂e tî Baraw. On wara tko wîîkes awya, oyanme ro mak yîmtapotara ro mak wasî. Tîmtapotarî rma n̂iir̂asî Kaan omtaka. Ero mak men wekatîmyasî an̂entarî me ha, kekn̂e tî yîwya.

39-40 Ero yinhîrî Barake yakro takî tî cekn̂e Baraw Kiriaci-Usoci pona. Iito tak paaka pun nakn̂iyakn̂e Barake, oper̂a pun marha nakn̂iyakn̂e tîmsom me. Paaka pun marha tî nîmyakn̂e Baraw ya, noro yakrono komo ya marha, antomano rin̂e komo ya.

41 Enmapuche takî tî îh pona Baraw naar̂akn̂e Barake, Baaw poko ehtopo komo pona tî. En̂exa takî tî Ixaw Yana komo n̂een̂akn̂e Baraw. Ahnoro enîhra tko xakn̂e, poyino komo cik mak n̂een̂akn̂e. Ero wa tî n̂een̂akn̂e.