Taa, ero yimaw iito marha xakn̂e anarî hara kayaritomo. Kananita tî mîk xakn̂e, Araci pono komo kayaritomon ha. Suu n̂ixan pono mîk xakn̂e. Noro tî n̂encekn̂e Ixaw Yana komo mohtopo. Xiya men mokyaxe Ixaw Yana komo. Krowon komo yenso mohxapunhîrî yesamatho yaw mokyaxe, kacho tî n̂encekn̂e. Ero ke Ixaw Yana komo waparî me tak mokyatken̂e noro tmaywen komo yakro. Ixaw Yana pen komo tak nahsîyatken̂e ha re yaake. Cewton komo pona naar̂atken̂e okwe ahsîxapu pen komo.

2 Ero yinhîrî tak Kporin komo yakro nîmtapowatken̂e Ixaw Yana komo. On wara ketken̂e yîwya, Apa, n̂examro cma re mar̂mapes amna ya Araci pono komo. Ero wa ar̂mapoche amna ya n̂examro yewtontho tak nakn̂iyas amna yîmton me ro mak, ketken̂e. Yaaro xa amna kesî, cemaro pîn me ro mak, ketken̂e.

3 Yîmtapotarî komo tî n̂encekn̂e Kporin komo. Ero ke ar̂mapono rma n̂irpekn̂e yîwya so. Kananita pen komo nar̂metken̂e iitononhîrî pen kom ha. Ahnoro waihketîketken̂e iitononhîrî pen komo. Ewtonthîrî komo marha nakn̂iyatken̂e. Ero ke Ohma me tak n̂esesosocekn̂e ewtonthîrî komo. Ero wa n̂esesosocekn̂e.

4 Ero yinhîrî tak Oro Yîpîn yamrinai cetken̂e hara Ixaw Yana komo esama yaw hara. Cucurem Yewku yesamarî yaw cetken̂e hara. Eton rowon mamrikyatken̂e. Nahwoketken̂e tak okwe tîcetaw so esama yaw.

5 Ero ke Kaan yanwekn̂e me nîmtapowatken̂e xa hara kica, Moises yanwekn̂e me marha. On wara ketken̂e, Ahce kacho Exitu poi amna mekye kica axawa imo pona mak kica? Ahce kacho xiya amna mekye waihtome tan pohnîntaw mak okwe? Tan exihra ro mak nasî cuure. Tuuna marha exihra nasî kwokru komo. Poxumra ro mak amna nokyasî kica ontho kuuru kom ha, ketken̂e xa hara kica.

6 Ero ke tak okoyi n̂ekpekn̂e Kporin komo yîcheka so. Eskano tak niir̂akn̂e oko. Ixaw Yana pen komo waihyatken̂e okwe eskaxapu komo mer̂pono pîn.

7 Ero ke Moises yaka mokyatken̂e Ixaw Yana komo. On wara ketken̂e yîwya, Apa, kicicme amna n̂ehxe kica. Awein̂e wara amna nîmtapotai awakro kica. Kporin komo poko marha amna nîmtapotai kicicme. Wara rma Noro yakro cma re mîmtapowasî okoyi yen̂epetopo poko kîhyai so, ketken̂e. Ero ke Kporin komo yakro nîmtapowakn̂e Moises n̂examro yukurunpetopo poko.

8 Ero ke on wara kekn̂e Kporin komo Moises ya, Bronse tak akîhtoko okoyi me. Ero yipu akriko weewe pona entome eskaxapu komo ya. Ero wece een̂ataw tak waipîra naxe, kekn̂e. Ero wa kekn̂e Kporin komo Moises ya.

9 Ero ke bronse tak nakîhcekn̂e Moises okoyi me. Akîhtoche nakriyakn̂e weewe pona. Okoyi warai wece een̂ataw eskaxapu komo ya waipîra tak xatken̂e okre. Ero wa xatken̂e.

10 Ero yinhîrî tak esama yaw cetken̂e xa hara Ixaw Yana komo. Oboce pona tak n̂etakriyatken̂e hara.

11 Ero yinhîrî Oboce poi cetken̂e hara. Ixe-Abarin pona n̂etakriyatken̂e hara. Axawa imo pono mîn Ixe-Abarin. Moabe rowon panawno mîn ha resce n̂ixan ha.

12 En̂exa cetken̂e xa hara Sereci woskaran pona. Iina n̂etakriyatken̂e hara.

13 En̂exa cetken̂e hara Ahnon kwaka hara. Ero yeco pona n̂etakriyatken̂e hara. Axawa imo pore tîhtosom mîn Ahnon. Amohew komo rowon yemyatî poi tîhtosom marha mîn ha. Moabe rowon wokpanî rma mîn Ahnon. Xehxa nasî Moabe rowon, mehxa nas Amohew rowon hara. Ero warai mîn Ahnon, tuuna yaporî ha.

14-15 Iito xatken̂e Ixaw Yana komo. Iito ehtoponhîrî nasî tmewreso karita yaw, Ar̂mano Ritoponho Kporin Komo Ya, kacho yaw. On wara kacho mîn mewrexapu, Iito nasî Waebe, Supa po, Ahnon yaporî komo yotaw. Moabe rowon wokpan mîn Ahnon tarenakem xa. Arî pona roro nîhcesî ero komo tuuna yaporî. Moabe rowon yemyatwo nasî ero Arî, kacho. Ero wa kesî karita.

16 En̂exa cetken̂e hara Ixaw Yana komo Bee pona hara. Tuuna, kacho mîn Bee, ahtoxapu, kacho. Iito exitaw so on wara kekn̂e Kporin komo Moises ya, Ixaw Yana komo enmeko. Enmekîche tuuna wîmyasî yîwya so, kekn̂e.

17-18 Tuuna yenîche tak Ixaw Yana komo ya on warai naar̂atken̂e waano, Ai, tuuna awomko tak ahtoxapu yawno. Waano taacerî ero pokono, ahtoxapu pokono. Kantoman̂e komo nahtopotho mîn tuuna yewtarî, kpanatanmekn̂e komo nahtopotho, amoyi ke cemyarkem nahtotho ha. On tuuna nahtoce tamoyin komo ke rma, kacho naar̂atken̂e waano. Ero yinhîrî tak en̂exa cetken̂e hara Ixaw Yana komo axawa imo poi Matana pona hara.

19 Matana poi cetken̂e Nariew pona hara. Nariew poi cetken̂e Bamoce pona hara.

20 Bamoce poi cetken̂e woskara pona hara. Moabe rowon pono rma mîn woskara Piska Yîpîn yamrinawno ha. Axawa imo yemyatwono mîn ha. Iina n̂etakriyatken̂e hara.

21-22 Iito exitaw so kîrkomo n̂en̂epetken̂e hara Ixaw Yana komo Sion yaka. Amohew komo kayaritomon mîk xakn̂e Sion. On wara tî ketken̂e n̂examro Sion ya, Arowon pore cma re amna cesî. Esama yaw mak amna cesî kayaritomo yesamarî yaw mak. Ero yai etowra ro mak nas amna amararîn komo pona. Atunarî komo poi marha erîhra nas amna ahtoxapu yawno. Esama yaw mak ces amna arowon komo twatoso ro, ketken̂e tî yîwya.

23 Pîra ro mak kica, kekn̂e ha tko tî Sion yîwya so Ixaw Yana komo ya. Ero yinhîrî takî tî tmaywen komo nan̂ikyakn̂e ahnoro kîrkom ha. Ixaw Yana komo waparî me tak mokyatken̂e axawa imo pona Xasa pona. Iina mokuche so Ixaw Yana komo yakro tak n̂etar̂metken̂e.

24 Sion maywenînho pen komo tko nar̂metken̂e Ixaw Yana komo kacipara imo ke. Xehxan nahsîyatken̂e yîrowonthîrî komo Ahnon pona rorono. Mehxan nahsîyatken̂e Xaboke yecihtaka rorono hara. Amon komo rowonî reha ahsîra xatken̂e sowtatu komo iito exirî ke. Emyatîrî porero xakn̂e sowtatu mîn komo. Ero ke ahsîra xatken̂e ero reha.

25 Amohew pen komo yewtontho komo tak nahsîyatken̂e Ixaw Yana komo cewton komo me. Esbon yaka meero n̂esekenmetken̂e ero mîtwono komo yaka marha, ewtoci komo yaka.

26 Sion yewtontho mîn xakn̂e Esbon, Amohew komo kayaritomon yewtontho ha. Pahxa Moabita komo kayaritomonînho pen yakro tî n̂etar̂mekn̂e noro pen. Ero yimaw Moabe rowontho nahsîyakn̂e miya rorono, Ahnon yecihtaka rorono ha. Ero tak nahsîyatken̂e Ixaw Yana komo.

27 Ero ke on wara kacho mewretken̂e waano yakîhton̂e komo, Esbon yaka amohcoko. Ero ciicerî hara, Sion yewtontho ciicerî hara, kacho.

28 Wehto warai n̂epatakekn̂e Esbon poi Sion yewtontho poi. Aahî nakn̂iyakn̂e okwe Moabe rowontho. Ahnon yecihtawno komo n̂ecakyatken̂e okwe îh pono pen kom ha.

29 Awaparî komo men mokyaxe Moabita komo okwe. Awaikexe so tak okwe amyamro Kemos ponarono kom ha. N̂emahciyatken̂e mak amumuthîrî komo miya so. Tanton komo me tak nahsîyatken̂e emsîthîrî komo okwe. Ero wa Sion maywenînho komo nahsîyatken̂e.

30 Sion mawyenînho komo tko tar̂metken̂e. Esbon pono komo tak nasî cecahso mîîmo komo. Miya rorono komo nasî cecahso Cimon pona rorono kom ha. Iitononhîrî komo marha tar̂metken̂e Nopa pona rorono pen komo, Meteba pona rorono pen komo marha. Iitononhîrî komo xa tar̂metken̂e, kacho naar̂atken̂e waano.

31 Ero yinhîrî Amohew pen komo yewtontho po tak n̂esekenmetken̂e Ixaw Yana kom hara. Ero wa xatken̂e.

32 Ero yimaw marha Xase rowon yerasman̂e komo n̂en̂epekn̂e xa hara Moises. Ero pono pen komo tak nar̂metken̂e hara Ixaw Yana komo, ero mîtwono pen komo marha. Ero wa Amohew pen komo nar̂metken̂e Ixaw Yana komo.

33 N̂examro pen yar̂mache n̂esewkor̂metken̂e tak Ixaw Yana komo. Basan yesamarî yaw tak cetken̂e. Ero yaw cetaw so Oki tak n̂epatakekn̂e n̂examro waparî me hara, Basan pono komo kayaritomon ha. Tmaywen komo n̂ekyakn̂e sowtatu komo ahnoro Ixaw Yana komo waparî me. Etîrei po tak n̂etar̂metken̂e Ixaw Yana komo yakro.

34 Oki maywen komo mokyataw ka on wara kekn̂e Kporin komo Moises ya, Noro pona erasîra ehcoko, Oki pona. Noro pen war̂mapes awya so, maywenînhîrî komo yakro rma. Yîrowonthîrî marha wîmyas awya so. Sion pen mar̂metken̂e Amohew komo kayaritomon Esbon pono pen ero wa xa marha Oki mar̂mexe hara, kekn̂e.

35 Ero ke Oki pen nar̂metken̂e, yumumuthîrî pen komo marha, maywenînhîrî pen komo marha ahnoro. Waipîn komo exihra ro mak tak xatken̂e. Ero wa ar̂mache ewtonthîrî komo pona tak n̂esekenmetken̂e hara Ixaw Yana komo. Ero wa xatken̂e.