Taa, ero yinhîrî tak esama yaw cetken̂e xa hara Ixaw Yana komo. Yihcirî nuun̂i po tak Sin Yaxawan pona n̂etakriyatken̂e hara Kates po ha. Iito exitaw so tak Mirian pen waihyakn̂e okwe. Ero ke iina rma tak nahruyatken̂e noro yokoputho. Ero wa xakn̂e noro pen okwe.

2 Iito tko tuuna exihra ro mak xakn̂e okwe Ixaw Yana komo wokru. Ero yanme Moises pen yanweso tak mokyatken̂e mer̂pono pîn komo, Araw komo yanweso.

3 Moises n̂eiyatken̂e kica. On wara ketken̂e yîwya, Kakno pen komo waihkekn̂e Kporin komo okwe. N̂examro pen yakro rma cma re twaihpore xakn̂e.

4 Ahce kacho amna mehce xiya axawa imo pona hara? Kporin komo yananî rma amna. Oona mak amna mehce amna waihkaxi mak ham okwe, amna yokutho pen komo waihkaxi marha okwe.

5 Ahce kacho Exitu poi amna mehce oona kicicitho pona kica. Puruma yewtî mera ro mak nasî tan, piiku yewtî mera marha, uupa yewtî mera marha, roman yewtî mera marha. Kwokru komo exihra marha nasî tuuna okwe, ketken̂e. Ero wa ketken̂e kica.

6 Ero wa yîmtapotarî komo yentache Moises komo tak cetken̂e Kesentacho potaka, Araw kom ha. Iina tîtoche so n̂esewnapetken̂e. Ero wa exitaw so Kporin komo weyuru tak n̂esenpekn̂e yîwya so.

7-8 On wara kekn̂e Kporin komo Moises ya, Ai Moises, awamoyin tak arko toh pona porin pona. Araw yakro Ixaw Yana komo enmecoko iina. Toopu yakro tak amtapotakî amoro n̂examro n̂entarî me ro rma. Amtapotache tak toopu yatumnai rma n̂epatakesî tuuna Ixaw Yana komo wokru. Mer̂pora nukmesî n̂examro wokru, iyoh komo wokru marha, kekn̂e. Ero wa kekn̂e Kporin komo Moises ya.

9-10 Ero ke tak tamoyin naar̂akn̂e Moises Kporin komo yamtakpon mîtwono rma. Kporin komo mtapotarî yaw roro rma naar̂akn̂e. Ixaw Yana komo marha naar̂atken̂e Araw yakro. Toopu mîtkoso rma enmekno n̂iir̂atken̂e. Iina mokuche so tak on wara kekn̂e Moises yîwya so, Ai oyakno komo, on wara wîîkes awya so, Kanwekn̂e komo ro mak amyamro ham kica. Ahce wa katî nai amna awya so? Toh yaino xa kat amna n̂enpe awokru kom ha? kekn̂e yîwya so.

11 Ero wa kache napockanwakn̂e tak Moises. Toopu tak n̂etapekn̂e asakî ro tamoyin ke, knai, knai. Etapache, xoo kekn̂e tak, tuuna mer̂pora ro mak nukmekn̂e Ixaw Yana komo wokru, iyoh komo wokru marha.

12 On wara tko kekn̂e Kporin komo Moises ya, Araw komo ya ha, Ai, okopuci komo, opona enîhra mehcow ham okwe. Aponarono komo me xa Ow enpora mehcow okwe Ixaw Yana komo ya. Ero ke Ixaw Yana komo yarîhra tak maxe miya roro yîwya so onîmîtho pona okwe, kekn̂e. Ero wa kekn̂e Kporin komo Moises komo ya.

13 Ero yinhîrî tak Meriba me tak n̂esosohcekn̂e iitono tuuna. Iito Kporin komo nanwekyatken̂e Ixaw Yana komo. Iito rma tko kir̂wanî ro me cehtopo n̂enpekn̂e rma Noro yîwya so. Ero wa n̂enpekn̂e.

14 Ero yinhîrî tak kîrkomo n̂en̂epekn̂e Moises Eton pona iitono komo kayaritomon yaka. Kates po exitaw so Ixaw Yana komo n̂en̂epekn̂e. On wara kekn̂e yîwya so, On wara men kacoko amn̂e iitono komo kayaritomon ya, On wara tî nîîke awakno Ixaw, amna yesemetanmetoponho mentai ha na?

15 Amna porin pen komo cetken̂e pahxa Exitu pona. Iito amna xakn̂e pahkî ro mak. Amna n̂emetanmekyatken̂e kica Exitu pono komo. Amna porin pen komo marha n̂emetanmekyatken̂e.

16 Amna tko nîmtapowakn̂e Kporin komo yakro cerewre ro mak. Noro tak amna mtapotarî n̂encekn̂e. Ero ke tak ancu n̂en̂epekn̂e amna yakrono me. Noro tak amna n̂ekyakn̂e Exitu poi. Oroto tak amna nasî Kates po, arowon mîtwo.

17 Ero ke amna cma re cesî arowon pore. Amararîn komo pore tohra ro mak nas amna, anatîrî komo chere tohra marha. Ahtoxapu yawno yerîhra marha nas amna atunarî komo. Esama yaw roro mak amna cesî kayaritomo yesamarî yaw mak ha. Ero yai etowîn me ro mak amna cesî. Kaari n̂ixa etowra, poowa n̂ixa etowra marha. Ero wa amna cesî arowon twatoso ro, kacoko men yîwya. Ero wa kacoko kayaritomo ya Eton pono ya, kekn̂e Moises yîwya so en̂epeno rirî me. Ero ke ero wa tî ketken̂e n̂examro kayaritomo ya Eton pono ya.

18 On wara tko tî n̂eyukyakn̂e Eton pono komo kayaritomon, Pîra ro mak. Amna rowon pore tohra ro mak men ehcoko. Taixa amokyataw so rma awaparî komo me kr̂a amna mokyasî. Awar̂mexe so kr̂a amna kacipara imo ke, kekn̂e tî. Ero wa tî kekn̂e okwe.

19 Ketken̂e xa hara tko Ixaw Yana komo yîwya, Esama yaw roro mak amna cesî porin yaw roro mak. Atunarî komo poi eer̂ataw amna poyino ero n̂epemes amna. Ero wa xa marha amna yoku ya eer̂ataw amna nîmyasî tuuna yepetho awya so. Ahyari so mak tîto xe nas amna tîhtarî po. Ahce na xera ro mak nas amna, ketken̂e tî yîwya.

20 Pîra ro mak kica, kekn̂e rma tko tî Eton pono komo kayaritomon. Amna yari tohra ro mak ehcoko ha, kekn̂e tî kica. Ero yinhîrî kîrkomo tak mokyatken̂e Eton pono komo. Mer̂pono pîn mokyatken̂e sowtatu me cehsom kom okwe.

21 Ero ke anana takî tî cetken̂e Ixaw Yana komo. Tîrowon komo yamenmekrî ke Eton pono komo kayaritomon ya anana cetken̂e. Ero wa cetken̂e okwe.

22-24 Ero yinhîrî tak Kates poi cetken̂e hara Ixaw Yana komo. Ooro Yîpîn cyamrinaka n̂etakriyatken̂e hara. Iito exitaw so Eton rowon yemyatwo rma on wara kekn̂e Kporin komo Moises ya, Araw komo ya, Ai Moises, Araw totopo me tak nas aporin pen komo yaka. Arowon komo me onîmrî pona tohra nasî noro, Ixaw Yana komo ya onîmrî pona ha. Omtapotarî manwece okwe amyamro asakno roro rma. Meriba po awexitaw so Ow manwece, tuuna mokyakn̂e toh yai, iito. Ero ke tohra nasî noro okwe.

25-26 Ero ke Araw arko Oro Yîpîn meretkoso. Ereasa yakro rma arko. Iito awexitaw so Araw ponontho tak mohkakî. Yumumuru ya amrupoko hara. Iito tak aporin pen komo yaka cesî Araw pen. Îîpî meretwo rma waihyasî, kekn̂e. Ero wa kekn̂e Kporin komo Moises ya.

27 Ero ke Kporin komo mtapotarî yaw roro rma n̂iir̂akn̂e Moises. Oro Yîpîn nawnukyatken̂e Ixaw Yana komo wero ro rma.

28 Awnutîkache tak Araw ponontho mohkekn̂e. Yumumuru ya tak namrupekn̂e hara. Ero yinhîrî tak iito rma waihyakn̂e Araw pen okwe îîpî meretwo rma. Ero yinhîrî îîpî n̂enîhcetken̂e hara Moises komo Ereasa yakro.

29 Ero yinhîrî tak Araw waihtoponho tak n̂encetken̂e Ixaw Yana komo. Ero ke yîpînîn yaw tak nîwracetken̂e 30 kaamo. Ero wa xatken̂e.