1-2 Taa, ero yinhîrî tak on wara kekn̂e hara Kporin komo Moises ya, Araw komo ya, On wara marha wîîkes awya so apanatanmetopo kom ha, on wara men kacoko Ixaw Yana komo ya, Paaka ehcoko woosî, cucurem. Apickan mak ehcoko, tupunporem mak. Noro yipu ehcoko xiya, kacoko yîwya so.

3 Ekîche tak Ereasa ya tîmcoko tîmsom pokono ya. Ero yinhîrî noro tak narpe awetarî komo yai. Iito tak waihkacowpe anarî komo Ereasa wero ro rma.

4 Ero yinhîrî tak paaka kamxukutho caramape tamoyaran ke. Roowo caramape 7 ro, Kesentacho komo potawno ha.

5 Ero yinhîrî yupunthîrî nakn̂ipe ahnoro, yîhcîpîthîrî, yupunthîrî, kamxukuthîrî, wethîrî, ahnoro mak nakn̂itîkacowpe Ereasa wero ro rma.

6 Paaka pun yecakyataw rma on warai nar̂mape tîmsom pokono cecahsom pona, setru yîrakaxapu, iisopu, oper̂a pocitho yucurexapu. Ero yipu nar̂mape paaka pun pona cecahsom pona rma.

7 Ero yinhîrî tak tponon korokape tîmsom pokono, n̂eyehpe marha. Ero yinhîrî mokope xa hara awetarî komo yaka hara. Kicicme rma tko nai kokmamso ro.

8 Ero wa xa marha n̂expe paaka pun yakn̂in̂enho hara, tponon xa marha korokape, n̂eyehpe marha. Ero yinhîrî kicicme rma ka nai noro hara kokmamso ro.

9 Ero yinhîrî anarî n̂enmekpe paaka yokoputho wemronho. Kicicitho yapen̂enho pîn mak n̂enmekpe. Tîn̂enmekîthîrî tak n̂irpe aiwaxapu pona, awetarî komo mkaino pona. Iito tak nîmtocowpe wemronho ero poko ehtome so amn̂e Ixaw Yana komo. Tuuna kwaka cesmaxmu mîn ha akir̂wamano ritopo kwaka. Kicicme awexitaw so awakir̂wamacho komo me nasî. Ero wa nasî tuuna, paaka wemronho yakro esmaxapu ha.

10 Ero yinhîrî tponon korokape wemronho yenmekn̂enho. Korokache kicicme rma ka nasî kokmamso ro. Ero wa kacho ponaro men n̂ehcowpe Ixaw Yana komo, yîcheka so mohxapu komo marha.

11 Taa, tooto yokoputho yapeyataw awya so kicicme maxe 7 kaamo.

12 On wara nasî noro yipu yakir̂wamacho, awakir̂wamacho komo ke n̂ecaramape rma, tuuna ke. 3-înhîrî kaamo po tak n̂ecaramape, 7-nhîrî kaamo po marha. Ero wa ecaramache kir̂wan̂he tak nasî yupun 7-nhîrî kaamo po. Etakir̂wamara cexitaw 3-înhîrî kaamo po, 7-nhîrî kaamo po marha kicicme rma nasî kica.

13 Anarimaw tooto pen yokoputho napeyatu apoyino komo. Anarimaw etakir̂wamara rma na nai okwe noro yipu. Noro yipu nasî Aporin komo mîn yikiciciren̂e me. Ero ke noro yipu twaihkapore nasî Ixaw Yana komo poyino pîn me tak ehtome. Tuuna ke ecaramara cexirî ke akir̂wamano ritopo ke kicicme rma nasî. Kicicme ehtoponhîrî nasî noro yipu poko rma okwe.

14 On wara nasî apanatanmetopo kom hara ero yipu pokono rma ha re, anarimaw mîîmo yaw rma na waihya tooto, roona warai yaw. Ero yinhîrî anarî n̂ewomya ero yaka okopu yaka rma. Anarî na nai ero yaw okopu waihyataw. Ero wa cexitaw so kicicme naxe 7 kaamo mak.

15 Ero yaw marha na nai ahce na yen. Ahrura na nai. Tahruso rma na nai anarî hara wara kyam mak. Ero yipu komo marha nasî kicicme ehxapu me.

16 Anarimaw so apoyino komo na natu katpanaw so. Iito cexitaw tooto yokoputho napeyatu, kacipara imo ke waihkaxa pen, tanme ro waixapu pen anarimaw. Anarimaw tooto yocho na napeyatu, ahrutoponhîrî mak na napeyatu anarimaw. Ero yipu yapeche kicicme nasî 7 kaamo.

17 Ero ke on wara men nasî noro yipu yakir̂wamacho, paaka pun wemronho tamekpore nasî, akir̂wamano rin̂e me akn̂ixapu wemronho poi ha. Ero tak tpahpore wooku yen yaka. Ero yaka tak tarkapore nasî tuuna, tîhtosom ha.

18 Ero yinhîrî tak iisopu namekpe apoyino, kicicme exihnî. Ahsîche ero tak nukpape tuuna kwaka, wemronho ken̂arî kwaka. Iike tak mîîmo caramape, yaw xakn̂e okopu ero. Ero yawno marha caramape aapo komo, ahce na kom ha. Tooto marha caramape ero mîîmo yawnonho komo, okopu yakrononho komo. Tooto yocho yapen̂enho marha caramape, okopu yahrutopo yapen̂enho marha. Waapa nwaihkatho yapen̂enho marha caramape noro yipu exitaw, tanme ro waixapu yapen̂enho marha. Noro yipu komo caramape.

19 On wara xa noro yipu komo caramape kicicme exihnî, 3-nhîrî kaamo po caramape, 7-nhîrî kaamo po marha. 7-nhîrî kaamo po tak nakir̂wamape xa tak, tponon korokape, n̂eyehpe marha. Ero yinhîrî kokmamche tak kir̂wan̂he nas hara kicicme ehxapunhîrî.

20 Anarimaw on wara na natu anarî komo, etakir̂wamara na natu kica okopu yapen̂enho. Ero wa exitaw noro pen waihkacoko achewno komo me exihra tak ehtome. Kporin komo mîn yîwîrîman̂e me nasî kica. Kicicme naxe okwe ecaramara exirî ke, akir̂wamano ritopo ke.

21 On wara marha nasî apanatanmetopo komo ero pokono rma. Miya roro ponaro awehtopo komo tan wîîkes awya so. Tuuna ke caraman̂enho marha tponon korokape. Ero yinhîrî kicicme rma ka nasî kokmamso ro. Anarimaw tuuna rma na napeya apoyino komo akir̂wamano ritopo ha. Ero yipu yapeche noro marha nasî kicicme kokmamso ro.

22 Anarimaw ahce na napeya noro kicicme ehxapu. Ero yipu yapeche kicicme xa marha nasî yînapethîrî hara. Ero yinhîrî yînapethîrî na napeya anarî hara apoyino komo. Ero yanme kicicme tak nasî noro yapen̂enho meero okwe, kokmamso ro nasî kicicme okwe. Ero wa nasî apanatanmetopo komo kicicme ehxapu yapen̂enho me awehtopo komo pokono, kekn̂e. Ero wa kekn̂e Kporin komo Moises komo ya.