Taa, ero yinhîrî on wara tak kekn̂e Kporin komo Araw ya, On wara maxe amyamro, amumuru komo, ayanan komo ahnoro, omîn na mikiciciretu ahce wa na ciir̂ataw. Ero wa ciir̂ataw, kicicme awya so ciitoponhîrî wiir̂asî apona so, amumuru komo pona marha, aamo pen yepamtho komo pona marha. Ero wa kicicme omîn ciitopo wiir̂asî apona so.

2 Ayanan komo rma mekyaxe Kesentacho potaka, Repita kom. Awakronoman̂e me naxe n̂examro, amumuru komo yakronoman̂e me marha. Omtapotacho mînî mkaino poko awexitaw so mak awakronomexe so.

3 Ahce xe na matu Kesentacho yawno poko awexitaw so ero yipu yekn̂e me naxe ahyaka so. Oyamtakponî ro yawno mîtkoso xa tko tohra ro mak n̂ehcowpe. Tîmsom yakn̂itopo mîtkoso marha tohra n̂ehcowpe. Ero poko exitaw so waihyaxe hara men okwe. Amyamro meero mîwaiyaxe okwe.

4 Awakronoman̂e me naxe Kesentacho komo yenîrî poko awexitaw so. Ahce xe so na awexitaw so n̂examro mak n̂ehcowpe ahyaka so. Repita pîn komo reha mokuhra ro mak n̂ehcowpe ahyaka so iito awexitaw so.

5 Amyamro makî reha maxe omîn yawno pokono me, tîmsom yakn̂itopo pokono me marha. Ero poko ehcoko amyamro yîrwomra oyehtome Ixaw Yana komo poko.

6 Owî rma Ixaw Yana komo wîcherenonkai, Repita komo wahsîye oyanton me. Amaywen me so wiir̂akn̂e. Oyanton me rma naxe Kesentacho komo poko anantomarî komo me. Ero yawno yenîrî poko awakronomexe so.

7 Amyamro mak maxe amumuru komo yakro tîmsom yakn̂itopo pokono me. Amyamro marha maxe omîn yahruru mkaino pokono me. Owya awakrecho komo rma mîn ero yipu poko awitopo komo. Anarî komo mokyataw omîn yahruru xehxa n̂examro men waihkacoko, kekn̂e. Ero wa kekn̂e Kporin komo Araw ya.

8 On wara marha kekn̂e Araw ya, Amyamro makî reha maxe Ixaw Yana komo nîmrî yahsîn̂e me, owya yînîmrî komo yahsîn̂e me. Kahsî tanîmsom me yînîmrî komo, ahnoro yînîmrî komo wîmyas awya hara, amumuru komo ya marha. Ero ke ero yipu ahsîcoko miya roro anahrî komo me.

9 Owya tîmsom yekyataw yîwya so yîraconhîrî mak akn̂icoko. Yîraconhîrî xa hara akn̂ipîra ehcoko. Ero reha ahsîcoko anahrî komo me. Ahce na yekyataw yîwya so owya tîmsom me anahrî komo me rma wa nas ha. Ero wa so ahsîcoko puruma raconho komo, kicicme cehtoponhîrî komo yahrutopo raconho, Kicicme weexi kica, kacho raconho marha. Ero yipu nasî anahrî komo me, amumuru komo yakro.

10 Owyan me rma ero yîhtînocoko ahyataw awya so. Omînî ro yaw ahcoko. Ahnoro kîrkomo nahrî me rma nas ha.

11 On warai komo mak ero yipu tonocoko awotî komo me, ahcoko anahrî komo me marha, kahsî yînanîmîthîrî komo, powpow me yînmîthîrî komo marha. Ero yipu ahsîcoko awotî komo me, anahrî komo me marha. Ero yipu nahcowpe amumuru komo, awemsîrî kom ha. Ahyawno komo ahnoro nahcowpe kicicitho yapen̂enho mera exitaw so.

12-13 Aseci marha wîmyas awya so kir̂wanî ro. Uupa yukun marha wîmyasî awya so yaxan ciixapu. Kir̂wan xa mîn wîmyas anahrî komo, awokru komo marha. Owya nîmyaxe Ixaw Yana komo Aporin komo ya ha. Yihcirî me epetaxapu nîmyaxe owya ero yipu wîmyas awya so hara. Ahnoro yihcirî me epetaxapu, mararî pono ohyaka ekyataw Aporin komo ya tîmsom me, ero wîmyas awya so hara anahrî komo me. Ahnoro ahyawno komo nahrî me nasî ero yipu kicicitho yapen̂enho mera exitaw so mak.

14 Anarimaw na on wara ketu Ixaw Yana komo cemyawno komo poko, On men wîmyasî Kporin komo ya eroromerono me, ket ha na. Ero wa tîmxapu tak nas awemyawno komo me.

15 Poturme ewruxapu marha nîmyaxe Ixaw Yana komo owya, Aporin komo ya. Noro yipu nîmyaxe tîmxîkrî komo, toh komo xîkrî marha. Awyan komo me tak naxe noro yipu komo tîmxapunhîrî. Yumumuru komo reha epemacoko tooto xîkrî kaxi. Awoh komo marha epemacoko owya tîmsom pînî ro komo. Ero wa so tîmcoko poturme ewruxapu komo.

16 Noro yipu komo yepemetaw awya so on wara epemacoko, cewn̂e nuun̂i ewrutoponhîrî komo exitaw epemacoko yukuknomacho yecenarî. 5 sikru tîmcoko prata, epethîrî me. Omîn yawno yecenarîno men tîmcoko sikru ha. 20 xeera yecenarîno mîn 1 sikru. Ero wicakî xa epemacoko.

17 Paaka xîkrî reha epemara ehcoko, oper̂a xîkrî marha, kabra xîkrî marha. Noro yipu komo epemara ehcoko poturme ewruxapu. Owyan me rma wa naxe noro yipu komo. Noro yipu kamxukutho ke owya tîmsom yakn̂itopo caramacoko. Katîthîrî marha akn̂icoko Aporin komo ya tîmsom me. Ero yipu yakn̂iyataw kotopore nas owya, Aporin komo ya ha.

18 Awotî komo me rma nasî noro yipu pun. Ewanthîrî nasî awotî komo me powpow me anîmxapu, petîthîrî marha kaari n̂ixan ha.

19 Ahnoro Ixaw Yana komo n̂ekîtho nas awotî komo me Kporin komo ya tîmxapunhîrî. Kahsî anîmxapu nasî awotî komo me, amumuru komo yotî me marha, awemsîrî komo yotî me marha. Ahsîcoko roro awotî komo me. Yîmîtî mîmyaxe apoyino komo ya, cemaro pîn me ro mak entachome amtapotarî komo ero wa xa marha wîîkes ero poko awya so. Awepamthîrî komo ya marha wîîkesî, kekn̂e. Ero wa kacho ponaro wasî miya roro towîhnî me ro mak. Ero wa kekn̂e Kporin komo Araw ya.

20 On wara marha kekn̂e Kporin komo Araw ya, Arowonî ro komo tîmîhra ro mak was awya so. Tîrowon komo yîraconkara n̂ehcowpe Ixaw Yana komo arowon komo me. Ow mak was aweken komo me, awemyawno komo me marha. N̂examro warahra reha maxe amyamro reha.

21 On warai xa wîmyasî Repita komo nahsîrî me, tînahrî komo me marha, cisimu xa nahsîcowpe Ixaw Yana komo nîmîtho. Ero yipu nasî n̂examro yepetho me, oyakro awesentacho komo yawno poko ehtopo komo yepetho me, wîîkesî.

22 Ixaw Yana komo reha tohra ro mak n̂ehcowpe oyakro Awesentacho komo mîtkoso. Mooxe n̂he mak n̂ehcowpe. Meyehra mokuche so waihyat hara men okwe kicicme cexirî ke so.

23 Repita komo reha naxe Kesentacho komo pokono me. Tîrowon yîraconkara n̂ehcowpe Ixaw Yana komo yîrowon komo me. Ero wa xa marha n̂ehcowpe n̂examro yepamtho xa hara miya rorono kom ha. Kicicme exitaw so Ixaw Yana komo n̂examro tak naxe kicicme ehtoponhîrî komo yahrun̂e me.

24 Cisimu komo wîmyasî Repita komo ya emyawno komo me. Ixaw Yana komo n̂ekyaxe Kporin komo ya tîmsom me, kahsî tanîmsom me, ero warai komo rma wîmyasî yîwya so. Ero ke ero wara wîîka Repita komo ya, Arowonî ro komo tîmîhra ro mak was awya so Ixaw Yana komo rowon raconho ha, wîîka, kekn̂e. Ero wa kekn̂e Kporin komo Araw ya.

25-26 Ero yinhîrî on wara kekn̂e xa hara Kporin komo Moises ya, On wara kasko Repita komo ya, Amn̂e Ixaw Yana komo nîmîtho tak mahsîyaxe cisimu me tîmxapu komo awemyawno komo me. Eronhîrî tak yîraconkacoko xa hara Kporin komo ya tîmsom me hara, kahsî tanîmsom me tîmsom me ha. Cisimu wicakî xa marha yîraconkacoko amyamro hara, kasko men yîwya so.

27 Yînmîthîrî komo yîraconketaw xa hara awya so, kahsî tanîmsom me tîmsom me yîraconketaw, mararî pono yeperîrî yîpîpîtîkacho pononho wara rma ween̂asî. Uupa yukun tîmtopo ween̂asî ewkukacho yawnonho wara rma hara, kasko yîwya so.

28 Ero wa tîmcoko owya anahsîthîrî komo raconho Kporin komo ya kahsî anîmxapu me tîmsom me ha. Ixaw Yana komo nîmîtho mahsîyaxe cisimu me ero raconho rma tîmcoko hara owya, Aporin komo ya. Kahsî tanîmsom me tîmcoko owya. Ero yinhîrî Araw ya xa tîmcoko, ohyaka cewomsom ya.

29 Ahce na tîmyataw awya so Aporin komo ya, cisimu me tîmyataw, kir̂wanî ro xa yîraconkacoko hara kahsî tanîmsom me, yîwya tîmsom xa ha, kasko Repita komo ya.

30 On wara marha kasko Repita komo ya, Kir̂wan xa tîmyataw awya so ero ween̂asî puruma yîpîpîtîkacho pononho wara rma, yaxan wara rma okre. Ero wa xa marha wooku tîmyataw, yaxan me ciixapu wara rma ween̂as okre, uupa yewkukacho yawnonho wara.

31 Ero tak ahcoko ahto so na apu xe awexitaw so. Ahyawno komo marha nahcowpe. Awepethîrî komo rma mîn ero, oyakro awesentacho pokono me awehtoponhîrî kom ha.

32 On wara xa ehcoko, Ixaw Yana komo nîmrî mahsîyaxe awyan me. Ero raconho rma tko manîmyaxe owya tîmsom me xa hara. Kir̂wanî xa manîmyaxe. Ero yipu tîmn̂e me roro awexitaw so kicicme exihnî me rma maxe owya tîmxapu yahsîn̂e rma. Ero pîntho me mak cirihra ro mak men ehcoko Ixaw Yana komo nîmîtho. Ero wa ciir̂ataw awya so mîwaiyaxe men okwe, kasko yîwya so. Ero wa kasko Repita komo ya, kekn̂e Kporin komo Moises ya.