1-2 Taa, ero yinhîrî on wara kekn̂e hara Kporin komo Moises ya, Ai Moises, on wara wîîkes awya, Ixaw Yana komo ya ekpoko amoyi, 12 yakenon. Noro re yepamtho yantoman̂e komo yamoyin ekpoko cewn̂e so mak noro re yepamtho komo poko hakî. Ahsîche awya mewreko tak tîmn̂enhîrî yosotî amoyin komo poko.

3 Repita komo yamoyin poko mewreko Araw yosotî reha. Noro re yepamtho komo yantoman̂e komo yamoyin ahsîko cewn̂e so mak.

4 Kesentacho yaka cirko amoyin komo, omtapotarî yen yahruru mîtkoso rma. Iina amoyin komo cirko.

5 Ero yinhîrî ohyaka cewomsom me onîhtînoputho yamoyin tak natîkronwasî. Ero wa awanwetopo komo tak wîtîtmamnoyasî, Ixaw Yana komo ya awanwechonhîrî ha, kekn̂e. Ero wa kekn̂e Kporin komo Moises ya.

6 Ero ke Kporin komo mtapotarî tak n̂ekatîmyakn̂e Moises Ixaw Yana komo ya. Ero ke tamoyin komo nîmyatken̂e antomano rin̂e komo Moises ya. Anarî yepamtho komo yantoman̂e nîmyakn̂e cewn̂e, anarî yepamtho komo yantoman̂e nîmyakn̂e cewn̂e hara, ero wa so nîmyatken̂e cewn̂e so tporin pen yepamtho komo yantoman̂e komo poko ha kî. Araw yamoyinî rma xakn̂e yîchew.

7 Ero ke tak amoyi komo naar̂akn̂e Moises Kporin komo yaka, Noro yamtakpon mîtkoso, Kaanî mtapotarî yamatan mîtkoso ha. Iina naar̂akn̂e.

8 Enmapuche tak Kesentacho yaka n̂ewomyakn̂e xa hara Moises. Anarî me tak n̂een̂akn̂e Araw yamoyin, Repita komo yamoyin. Tatîkroi tak xakn̂e, cepemrutuntaxi, ceperke marha xakn̂e okyo. Amentowa me xakn̂e eperîrî kopi.

9 Ero yinhîrî tak amoyi komo naar̂akn̂e hara Moises. Kporin komo yamtakpon mîtîn̂i naar̂akn̂e katpanaka Ixaw Yana komo n̂enîrî me. Ero ke tak amoyi n̂een̂atken̂e n̂examro. Tamoyin komo tak naar̂atken̂e hara osom komo. Ero wa so naar̂atken̂e hara.

10 Ero yinhîrî on wara kekn̂e xa hara Kporin komo Moises ya, Araw yamoyin cirko xa hara omtapotarî yamatan mîtkoso. Iito mak n̂expe oyanwekn̂e komo yîtîtmamnon̂e me. Iito exitaw tak oyanwekîra tak natu, waipîra tak ehtome so oyanwetopo yanme.

11 Ero ke iina n̂iir̂akn̂e Moises Kporin komo mtapotarî yaw roro rma.

12-13 Ero yinhîrî tak on wara ketken̂e Ixaw Yana komo Moises ya, Amna mak waihtîkes okwe. Ahnoro ro mak amna waihtîkesî. Kporin komo mîn yaka tmokuche amna tak waihyas okwe. Ahce wa katî amna nai, ahnoro katî amna waihtîke? ketken̂e okwe. Ero wa ketken̂e Ixaw Yana komo.