Taa, ero yinhîrî tak on wara xakn̂e Kore, Xisa mumuru. Koace mumuru mîk xakn̂e hara Xisa, Repi mumuru mîk xakn̂e hara Koace. Kore yakro xatken̂e Tatan komo, Abiraw yakro. Eriabe mumuru komo mîkyam xatken̂e hara. Anarî marha xakn̂e Kore yakro, Oon, Perece mumuru ha. Huben yepamtho komo reha mîkyam xatken̂e.

2 N̂examro tak mokyatken̂e Moises yaka. Yaake xatken̂e n̂examro yakrono komo kîrkomo, 250 mîkyam xatken̂e okyo. Tpoyino yantoman̂e komo re mîkyam xatken̂e, cekaiporesom kom ha.

3 Iina mokyatken̂e Moises yaka noro yanweso, Araw komo yanweso marha. On wara ketken̂e yîwya so, Ai, Moises, Araw, on wara kes amna awya so, iyoponkano rin̂e me xa tak mecitîkexe kica. Kporin komo yanan me re tko taxe ahnoro Ixaw Yana komo. Amna chew marha nasî Noro. Ero ke ahce kacho Kporin komo yanan komo yopono me xa tak mecitîketu amyamro kica? ketken̂e yîwya so.

4-5 Ero yipu yentache tak n̂esewnapekn̂e mak tak Moises. On wara kekn̂e Kore ya, akrono komo ya marha, Pahxaxa xa Kporin komo rma tak n̂enpesî kir̂wanhe cehsom ha. Noro xa tak n̂iir̂asî tîhyaka cewomsom me. Amoro xa esko ohyaka cewomsom me, kesî tînîhtînoputhîrî ya.

6-7 On wara esko amoro Kore, awakrono komo marha, kotoporem yen ahsîcoko amyamro ahnoro. Pahxaxa tak wehto enkacoko ero komo yaka. Kotoporem marha merurkacoko wehto cheka. Ero wa ciicoko Kporin komo yaka awtotome so. Ero yimaw tak tîhyaka cewomsom me tînîhtînoputhîrî tak n̂enpesî Kporin komo. Repi yepamtho komo, amyamro xa matko iyoponkano rin̂e me mat ham ke kica, kekn̂e Moises yîwya so.

8-9 On wara marha kekn̂e Moises Kore ya, Omtapotarî ka entacoko amyamro Repi yepamtho komo, Tîmsom pokono ro me cma re awir̂atken̂e so Kaan, ponaro Ixaw Yana komo yehtopo. Ero wara cirihra reha xakn̂e anarî komo, apoyino kom ha. Amyamro mak maxe Noro mîtkoso tmohsom me xa, Kesentacho yawno pokono me awehtome so. Ixaw Yana komo yeepatai cececetosom me marha awir̂atken̂e so n̂examro yehtopo komo yahrun̂e me. Ero pîntho me katî meen̂atu ero wa awitoponhîrî komo yîwya?

10 Ero wara awîr̂atken̂e so, tîmîtkoso tmohsom me rma. Ero warai me xa marha awakno komo n̂iir̂akn̂e ahnoro Repi yepamtho kom ha. Oroto Kporin komo yaka cewomsom me xa tak awexi xe so mat haram kica.

11 Kporin komo yanweso xa matko mîmohcow awakrono komo yakro. Ero warai poko kyam mesentace ham okwe. Ahce wa katî Araw meen̂atu noro yanwekn̂e me awehtome so okwe? kekn̂e. Ero wa kekn̂e Moises Kore komo ya.

12 Ero yinhîrî tak Tatan komo nan̂ikpekn̂e Moises, Abiraw komo. Eriabe mumuru komo mîkyam xatken̂e. On wara tko tî ketken̂e n̂examro, Pîra ro mak, mokuhra ro mak nas amna, ketken̂e tî kica.

13 On wara marha tî ketken̂e, Pahxa rma amna mekyakn̂e amoro. Kir̂wanî ro poi amna mekyakn̂e Exipsiu komo rowon poi. Kir̂wan mîn yîrowon komo, paaka mownu pen nas iito okre, wen pen marha. Oona amna mekye kica axawa imo pona amna waihkachome okwe. Ero wa amna ciitopo ponarora ro mak ma mai ke? Oona amna yekîche tak amna kayaritomon me xa tak mecitîkesî kica.

14 Kir̂wan pona amna yarîhra ro mak mehxe. Tpoxwem ken̂arî pona amna yarîhra mehxe wen pen ken̂arî pona, paaka mownu pen ken̂arî pona ha. Ero warai pona amna yarîhra ro mak mehxe kica. Amna mararîn tîmîhra ro mak mehxe kica amna natîrî marha tîmîhra mehxe uupa yat ha. Ahce wa katî n̂examro miir̂a, mewke xa katî emîknotome tak awya? Pîra ro mak kica, mokuhnî me ro mak nas amna ahyaka, ketken̂e tî kica. Ero wa tî ketken̂e Tatan komo, Abiraw kom ha.

15 Ero yentache nîrwonakn̂e xa tak Moises. On wara kekn̂e Kporin komo ya, Apa, kotoporem yakn̂iyataw n̂examro ya amn̂e tawake exihnî me cma re masî n̂examro poko. N̂examro yemetanmekn̂e pînî ro mak ow ha. Iyokuthîrî komo towîhra ro mak wîxakn̂e buhu na rma, kekn̂e. Ero wa kekn̂e Moises Kporin komo ya.

16 Ero yinhîrî on wara kekn̂e xa hara Moises Kore ya, Amohcoko xa hara men pahxaxa Kporin komo yaka. Awakrono komo yakro rma amohcoko ha. Araw marha mokupe.

17 Kotoporem yen ke cemyarke men amohcoko ahnoro. 250 ehcoko akn̂itopo komo. Kotoporem merurkacoko ero yaka wehto cheka Kporin komo yaka awtotome so. Ero warai ke cemyarke so amohcoko. Ero wa kotoporem yenî mko ehcoko amyamro. Araw marha n̂ekpe, kekn̂e. Ero wa kekn̂e Moises yîwya so.

18 Ero ke enmapuche tak kotoporem yen nahsîyatken̂e Kore komo ahnoro. Wehto tak n̂enkayatken̂e ero yaka. Ero cheka tak kotoporem merurketken̂e. Ero wa ciriche Moises komo yakro tak n̂ecececetken̂e Araw komo yakro. Kesentacho komo potaw n̂ecececetken̂e.

19 Ixaw Yana komo tak n̂ekyakn̂e Kore ahnoro xa tak. Moises komo yanwetome n̂ekyakn̂e Kesentacho komo potaka. Ero wa ekno riche tak Kporin komo weyuru tak n̂esenpekn̂e kopi Ixaw Yana komo ya.

20-21 Kporin komo weyuru yesenpoche on wara tak kekn̂e Noro Moises ya, Araw komo ya, Ai Moises, esenmexapu komo yai men etocoko waihkachome tak owya. Tîhra rma waihkesî, kekn̂e. Ero wa kekn̂e Kporin komo.

22 Ero yipu yentache n̂esewnapetken̂e tak Moises komo, Araw yakro. On wara ketken̂e, Apa, Kaan xa Amoro. Tooto komo yekatî yecehton̂e xa Amoro miyan komo yekatî yecehton̂e rma. Cewn̂e mak kicicme exitaw miyan komo poko rma mîrwona noro poyero mak Apa? ketken̂e Kporin komo ya.

23-24 Ero yinhîrî on wara kekn̂e hara Kporin komo Moises ya, On wara kasko Ixaw yana komo ya, Kore mîn yai tak mooxe etocoko. Tatan mîn yai marha, Abiraw mîn yai marha, kasko men yîwya so, kekn̂e.

25 Ero ke tak Moises cekn̂e Tatan mîn yaka, Abiraw mîn yaka marha. Ixaw Yana komo poritomon komo cetken̂e noro wenari rma.

26 Iina tîtoche on wara kekn̂e Moises Ixaw Yana komo ya, Ai oyakno komo, Kicicitho komo mîkyam. Ero ke yîmîn komo yai men mooxe etocoko. N̂examro yemyawno apehra ro mak men ehcoko. Apeche awya so amyamro meero mîwaiyaxe kicicme n̂examro yehtopo yanme rma, kekn̂e. Ero wa kekn̂e Moises Ixaw Yana komo ya.

27 Ero ke n̂examro mîn mîtîn̂i cetken̂e Ixaw Yana komo mooxe n̂he Kore mîn mîtîn̂i, Tatan mîn mîtîn̂i, Abiraw mîn mîtîn̂i marha. Ero yimaw tîmîn komo potaka tak mokyatken̂e Tatan komo, Abiraw komo. Iito mak tak n̂ecececetken̂e tîmîn komo potaw. Cipici yakro rma n̂ecececetken̂e, tîmxîkrî komo yakro marha, wahrai komo yakro meero.

28 Ero yinhîrî on wara kekn̂e hara Moises Ixaw Yana komo ya, Kaan yanme mak antomano wiir̂asî. Oyanme ro mak antomano cirihra ro mak wasî. Oroto ero wa oyehtopo meen̂axe. Tanme ro mak antomano cirihra nai ham, mîîketu tak na on wara moxam yehtopo yenîche awya so.

29 Nasî xa kwaihtopo ro komo miyan komo waihtopo rma. Ahce yanme na waihyatu tooto komo ahnoro. Ero wara xa marha n̂examro waihyataw rma, Kporin komo yanmen pîn mîk ham Moises, kacoko tak opoko.

30 Anarme tko na Kporin komo n̂iir̂a n̂examro, kwaihtopo ro warahra ro mak. Roowo tak na n̂etîmtake n̂examro yermomn̂e wara. N̂examro yemyawnonho marha n̂ermomya. N̂examro pen tak cetu roowo yatumnaka waipîra rma. Ero wa toche so on wara men kacoko, Kporin komo yanwekn̂enho pen komo xa mîkyam ham kica, kacoko, kekn̂e. Ero wa kekn̂e Moises Ixaw Yana komo ya.

31 Ero wa katîkache rma tak roowo n̂etîmtakekn̂e kopi n̂examro yaponho rma okwe.

32 Cemcaxmu wara ro mak tak xakn̂e roowo kopi. N̂examro pen tak n̂ermomyakn̂e okwe, towsuru. Ahnoro n̂ermomtîkai ro mak yîhyawnonhîrî pen komo meero. Kore yakrononho pen komo marha n̂ermomtîkekn̂e, emyawnonhîrî pen komo marha.

33 Waipîra rma cetken̂e roowo yatumnaka takrononhîrî komo yakro rma okwe. N̂examro yepîrkache roowo tak n̂etamtawnukyakn̂e hara, knuru. Exihra tak xatken̂e okwe n̂examro pen Ixaw Yana komo chewnonho.

34 N̂examro pen tak n̂emtaraketken̂e cepîrketaw so. Emtarakacho komo yentache n̂emahciyatken̂e tak Ixaw Yana komo yîmîtwononhîrî kom ha. Kîwyam pen meero kermomyaxe so kopi, ketken̂e tak. Ero wa ketken̂e cemahcirî me so.

35 Ero yimaw rma tak wehto n̂epatakekn̂e Kporin komo mîn yai, 250 komo nakn̂iyakn̂e hara oco Kore pen yakrononho pen komo. Kotoporem yakn̂iyataw rma yîwya so n̂epatakekn̂e wehto oco. Ero wara reha waihyatken̂e n̂examro pen hara okwe. Ero wa xatken̂e okwe.

36-37 Ero yinhîrî on wara kekn̂e xa hara Kporin komo Moises ya, On wara kasko Ereasa ya, Araw mumuru ya, ohyaka cewomsom mumuru ya, Kotoporem yen komo amehta wehto roron chei. Aporin komo ya tîmxapu me exirî ke amehta. Wehto rorontho pahta miya mooxe n̂he, ero mko yawnonho ha.

38 Ero wa amehko waixapu pen yemyawnonho kotoporem yen. Kicicme ro mak exirî ke so waihcow ero yosom pen komo. Ero ke amehko. Amekîche tak papaknoreko aama ke takweke cehso ro. Kotoporem yakn̂itopo tak yîmkarinomacoko iike, Ero wa cirko Aporin komo ya tîmxapu me exirî ke. Ero wa exirî ke kir̂wanî ro me nasî. Ero wa cirko osomunhîrî pen komo ponaro ehtome so Ixaw Yana komo. Ero wa men cirpoko Ereasa ya, kekn̂e. Ero wa kekn̂e Kporin komo Moises ya.

39 Ero ke kotoporem yakn̂itoponho n̂enmetîkekn̂e Ereasa, tîmsom pokono mîk ha. Ecahxapu pen komo yemyawnonho mîn n̂enmekyakn̂e, bronse ciixapu kom ha. Enmekîche papaknorekn̂e kotoporem yakn̂itopo yîmkarinomacho me. Ero wa n̂iir̂akn̂e, Kporin komo kekn̂e Moises ya ero yaw roro rma.

40 Ero wa n̂iir̂akn̂e on wara kachome tak Ixaw Yana komo ya, Araw yepamtho komo mak mohcowpe Kporin komo mîtkoso kotoporem yakn̂iso. Anarî komo mokyataw Kore pen wara xa marha men waihyaxe okwe, noro yakrononho pen komo wara xa marha. Kaanî mtapotacho yaw roro rma waihyakn̂e, Moises ya kekn̂e yîwya so yîn̂ekatîmrî me ero yaw roro rma ha. Ero ke ero warahra cexpore nasî, kachome. Ero wa kachome yîwya so ecahxapu pen komo yemyawnonho n̂iir̂akn̂e ero wara. Ero wa n̂iir̂akn̂e.

41 Enmapuche tko on wara xatken̂e hara Ixaw Yana komo kopi, Moises poko xa hara nîmtapowatken̂e kopi, Araw komo poko. Kporin komo yanan komo rma mîwaikace kica, ketken̂e yîwya so kica.

42 Mer̂pora ro mak mokyatken̂e Ixaw Yana komo Moises yaka, Araw komo yaka. N̂examro yanweso mokyatken̂e xa hara. Mokuche so Kesentacho wece tak n̂esewkor̂metken̂e. Ero yimaw rma tak Kporin komo mîn nahruyakn̂e kaweresî, ponan̂e rma. Kporin komo weyuru marha n̂esenpekn̂e.

43-45 Ero wa esenpoche Moises komo tak cetken̂e Kesentacho potaka, Araw yakro. Iina toche so on wara kekn̂e Kporin komo Moises ya, N̂examro yai men mooxe etocoko esenmexapu komo yai n̂examro pen waihkachome tak owya. Ponan̂e rma waihkano wiir̂asî, kekn̂e. Ero yentache n̂esewnapetken̂e xa hara Moises komo.

46 Ero yinhîrî on wara kekn̂e Moises Araw ya, Ai oyakno, awemyawno arko kotoporem yen. Wehto enkakî ero yaka tîmsom yakn̂itopo pononho. Kotoporem marha merurkakî ero cheka. Ero wa ciriche kar̂pe tak etoko esenmexapu komo cheka. Iito tak kotoporem akn̂iko kicicme ehtoponhîrî komo yahrutopo me. Nîrwonasî xa tak Kporin komo kopi. Ero ke ahsîno tak n̂iir̂asî eper̂a, n̂ihciw okwe ero wa ciitopo yîwya, kekn̂e Moises.

47-48 Ero ke ero wa tak n̂iir̂akn̂e Araw Moises mtapotarî yaw roro rma. Esenmexapu komo cheka n̂emahciyakn̂e. Ceper̂ai so tak xatken̂e anarî komo. Kotoporemî tko nakn̂iyakn̂e iito. Ero yakn̂irî ke rma kicicme ehtoponhîrî komo nahruyakn̂e. Tpoyino komo yotaw n̂ecececekn̂e Araw. Mehxa xatken̂e waixa pen komo. Xehxa reha xatken̂e waipîn kom hara. Iyotaw so noro xakn̂e. Ero wa xakn̂e Araw. Ero ke n̂etowyakn̂e hara eper̂a.

49 Mer̂pono pînî rma tko waihyatken̂e okwe eper̂a yaka, 14.700 ha. Anarî pen komo mîkyam waihyatken̂e, Kore yakro waipîn pen komo mîkyam xatken̂e okwe.

50 Ero yinhîrî Araw cekn̂e hara Moises yaka Kesentacho potaka hara. Ahsîno cirihra tak xakn̂e eper̂a, ero ke iina cekn̂e hara noro. Ero wa cekn̂e Araw.