1-3 Taa, ero yinhîrî on wara kekn̂e hara Kporin komo Moises ya, On wara kasko Ixaw Yana komo ya, Arowon komo wîmyas awya so. Ero pona awepatakache so on wara ehcoko, kacho tan wekatîmyas awya so. On wara na matu anarimaw so, awokuthîrî komo pun makn̂iyatu paaka pun, oper̂a pun ha na. Ero wa so na makn̂iyatu Kporin komo ya tîmsom me kotoporem me ehtome yîwya. Anarimaw na yupun makn̂itîketu. Anarimaw, Ero men wîmyas amn̂e, kachonho yaw roro na makn̂iyatu, anarimaw awanme ro so rma tîmsom me na makn̂iyatu, anarimaw awesenmekyataw so oponarono me na yupun makn̂iyatu owya tîmsom me.

4 Ero wa awoh komo tîmyataw owya Aporin komo ya, puruma marha tîmcoko akihxapu, 2 ritru wicakî mak ha. 1 ritru wicakî esmacoko katî ero cheka. Ero warai tîmcoko.

5 Oper̂a xîkrî na mekyatu takn̂itîkaxmu me, ahce wa na tîmsom me. Ero yakro rma uupa yukun tîmcoko hara, 1 ritru wicakî mak.

6-7 Kahn̂eru yekyataw puruma marha ehcoko pin̂ipici me akihxapu, 4,5 ritru wicakî mak ehcoko ha. Katî yakro esmaxapu ehcoko. 1,2 ritru wicakî esmacoko katî ero cheka. Uupa yukun marha ehcoko ero yakro rma 1,2 ritru wicakî xa marha. Ero yipu tîmcoko awya, Aporin komo ya kotoporem me ehtome owya.

8 On wara na matu anarimaw so, bui na mîmyatu owya, kar̂pamxan. Ero wa men wîmyas amn̂e, kachonho yaw roro rma na mîmyatu. Anarimaw, Aaxe xa wasî, kacho me na mîmyat ha.

9-10 Ero wa tîmyataw puruma marha tîmcoko akihxapu 6,5 ritru wicak ha. Katî yakro esmaxapu mîn tîmcoko, 2 ritru wicakno yakro ha. Uupa yukun marha tîmcoko ero yakro ro, 2 ritru wicak ha. Ero yipu tîmcoko takn̂isom yekyataw bui. Kir̂wan̂he nasî ero yipu owya, Aporin komo ya, kotoporem me nasî.

11-12 Ero warai tîmcoko roro awoh komo yakro, bui tîmyataw, kahn̂eru tîmyataw, oper̂a xîkrî tîmyataw, cabritu tîmyataw. Yukuknomacoko awoh komo yîwya tîmsom. Yukuknomacoko marha noro wickano komo yakro tîmsom marha. Ero wicaki so mîmyaxe Aporin komo ya.

13 Ero yipu tîmcoko amyamro Ixaw Yana me ewruxapu komo. Awokuthîrî komo pun na mîmyatu takn̂isom me, Aporin komo ya tîmsom me, kotoporem me ha. Takronoi mak tîmcoko ero yipu yîwya, wîîka awya so ero yipu tîmcoko amyamro.

14 Anarimaw achewno komo marha na tokuthîrî komo pun tîmî xe so natu Aporin komo ya. Akn̂ipu xe nai kotoporem me ehtome owya. Ero ke wîîka awya so ero yipu xa marha nîmcowpe toh komo yakro takn̂isom me. Awara so xa marha nîmcowpe ero yipu komo.

15 Ero wara re tîmcoko amyamro Ixaw Yana me cesenmesom komo, acheka so mohxapu komo marha. Ero wara roro tîmcoko amyamro, awepamthîrî komo marha miya rorono komo. Ero wara re ehcoko omîn yaka amokyataw so amyamro, acheka mohxapu komo marha.

16 Etîme re mak ehcoko omtapotacho ponarono me re. Ero wa ehcoko amyamro Ixaw Yana komo, acheka mohxapu komo marha, kacoko Ixaw Yana komo ya, kekn̂e Kporin komo Moises ya.

17-19 On wara marha kekn̂e Kporin komo Moises ya, On wara marha kasko Ixaw Yana komo ya, On wara marha kesî Kporin komo awya so, Amn̂e mepatakexe arowon komo me cehsom pona, iina kaar̂axe so ero pona. Iito awexitaw so ero pono yeperîrî tak mahyaxe naatî yeperîrî. Ero wa awexitaw so ero raconho tak tîmcoko owya, Aporin komo ya. Kahsî ka anîmcoko owya tîmtopo ha, kasko.

20 Cewn̂e so mak tîmcoko cuure warai. Puruma yakipuche awya so, aiche marha yihcirî xa tîmcoko aixapu yîwya, Kporin komo ya. Kahsî anîmcoko yîwya tîmtopo. Puruma yîpîpîtîkacho pononho poyino rma anîmcoko, yîwya tîmtopo ha.

21 Yihcirî me anatîrî yeperîrî yakipuche ero poyino anîmcoko kahsî yîwya tîmtopo, owya tîmtopo ha. Ero warai tîmcoko roro Aporin komo ya miya roro ehretawnomaxapu komo meero, kesî Kporin komo awya so, kasko yîwya so, kekn̂e Kporin komo. Ero wa kekn̂e Moises ya.

22-23 On wara marha kasko Ixaw Yana komo ya, kekn̂e Kporin komo Moises ya, On wara na matu anarimaw, Kporin komo mtapotarî yewetîra na matu awen̂ekarî so mak. Moises ya wîîkekn̂e Ow Aporin komo, ero wa kacho na ewetîra matu. Pahxa n̂he kekn̂e awya so mîn hak poko. Ero yipu na ewetîra matu, awepamthîrî komo marha na ewetîra natu miya rono komo.

24 Awen̂ekarî so mak na ero wa matu. Taa, kicicme awehtopo komo yîhtînopuche tak awya so bui pun akn̂icoko kar̂pamxan warai pun, owya tîmsom me. Puruma marha tîmcoko owya, omtapotachonho yaw roro rma. Wok marha tîmcoko, boce marha tîmcoko cewn̂e kicicme awehtoponhîrî komo yahrutopo me. Ero warai tîmcoko owya kotoporem me ehtome.

25 Ero yipu nakn̂ipe tîmsom pokono kicicme awehtoponhîrî komo yahrutopo me. Ero wa akn̂ipuche Ow tak wîhcamnoyasî ero wa awehtoponhîrî komo, Ixaw Yana komo yehtoponho ha. Kicicme rma re mîxatken̂e awen̂ekarî so makî tko. Ero yipu yahrutopo tîmcoko takn̂isom, owya tîmsom, ero wa awehtoponhîrî komo yahrutopo me ha. Ero yiipu tîmîche awen̂ekarî awehtoponhîrî komo tak wîhcamnoyasî.

26 Ahnoro na matu kicicme Ixaw Yana komo, acheka mohxapu komo marha. Awen̂ekarî so makî tko na kicicme matu. Ero ke ahnoro awehtoponhîrî komo tak wîhcamnoyasî.

27 Anarimaw cewn̂e mak na nai kicicme, apoyino kom ha. Twen̂ekarî marha na nai kicicme. Kicicme cehtoponhîrî yîhtînoyataw cewn̂e kabra tak n̂ekpe cewn̂e cimn̂ipu ehxapu. Ero nîmpe kicicme cehtoponhîrî yahrutopo me.

28 Noro yipu yekîche tîmsom pokono nahsîpe. Nakn̂ipe tak kicicme ehtoponhîrî yahrutopo me. Kicicme rma re xakn̂e owya Aporin komo ya. Twen̂ekarî makî tko xakn̂e kicicme. Ero ke ero yipu yahrutopo me rma nakn̂ipe. Ero wa akn̂ipuche ehtoponhîrî tak wîhcamnoyasî Ow, Aporin komo.

29 Ero warai nîmcowpe ahnoro kicicme ehxapu komo, twen̂ekano me mak kicicme ehxapu kom ha. Ixaw Yana komo ero wa n̂ehcowpe, acheka so mohxapu komo marha. Ero yipu tîmcoko ahnoro mak.

30 Ero warahra naxe Aporin komo mtapotarî yanwekn̂e komo reha, tanme ro so anwekn̂e kom ha. Owîrîyakacho rma nasî ero wa ehtopo komo. Ero ke noro yipu komo twaihkapore nasî apoyino komo pîn me tak ehtome. Ero wara ciicoko Ixaw Yana komo, acheka so mohxapu komo marha.

31 Omtapotacho yîwîrîyakan̂e komo mak mîkyam noro yipu komo, omtapotarî yewetîn̂e pîn komo marha. Ero ke twaihkapore ro mak nasî apoyino komo pîn me tak ehtome so. Kicicme ehtopo komo nasî yîhcamnopîn me ro mak, kesî Kporin komo awya so, kasko yîwya so, kekn̂e. Ero wa kekn̂e Moises ya.

32 Taa, ero yinhîrî on wara takî tî xakn̂e anarî Ixaw Yana, kîîrî, twehtorî tî n̂enmekyakn̂e kepokaretopo po rma. Ero wa enmekrî tî n̂een̂atken̂e poyino komo. Ero wa n̂enmekyakn̂e axawa imo po rma exitaw so.

33 Ero ke enmekn̂e nahsîyatken̂e takî tî enîn̂enhîrî komo. Moises yaka naar̂atken̂e Araw komo yaka, Ixaw Yana komo yaka ahnoro.

34 Camkî tko xatken̂e Moises komo noro yipu ciitopo poko. Ahce wa tî re moso ciir̂a ha? ketken̂e mak. Ero ke nahruyatken̂e mak ha ka camkî exirî ke so ciitopo poko.

35 Ero yinhîrî on wara tak kekn̂e Kporin komo Moises ya, Noro men waihkacoko awepokaretopo komo po twehtorî yenmekn̂enho. Ahnoro Ixaw Yana komo naacowpe awetarî komo yai. Iina tak waihkacowpe toh ke, kekn̂e. Ero wa kekn̂e Kporin komo Moises ya.

36 Ero ke noro pen tak naar̂atken̂e Ixaw Yana komo ahnoro cetarî komo yai. Iina tak n̂etapetken̂e toh ke oko twaihkaxi ro. Ero wa noro pen waihketken̂e Kporin komo yanme rma. Moises ya kekn̂e ero wa kachonho yaw roro rma waihketken̂e. Ero wa waihketken̂e.

37-38 Ero yinhîrî on wara tak kekn̂e hara Kporin komo Moises ya, On wara marha kasko Ixaw Yana komo ya, On wara ciicoko aponon komo amn̂e atpetaw, aponon komo yeknu ciicoko tamcoi so. Ero mamcon ciir̂ataw awya so ceske ciicoko mamcon, tîswayem ke ceske cewn̂e yatî mak. Ero wa ciicoko aponon komo. Ero wa xa marha tponon komo n̂iicowpe awepamthîrî komo marha amn̂e miya roro.

39 Ero wa aponon komo mamcontocoko an̂enîrî komo me. Mamcon yenîche awya so Kporin komo ya apanatanmetopo komo ponarono me tak maxe miyan ponarono me rma. Ero warai ponarono me maxe ewetîtome awya so. Ero yewehcataw awya so kicicitho poko epohkara tak maxe. Apehceme mepohkexe kicicitho poko kica anarimaw so aropotarî komo yanme, awewru komo yanme marha na. Ero warahra tak maxe Kporin komo mtapotarî ponaro awexitaw so.

40 Aponon komo pokono rma tak meen̂axe mamcon ha. Ero yeen̂ataw awya so apanatanmetopo komo ponaro tak ehcoko. Aporin komo ponaro xa tak maxe Kaan ponaro ha.

41 Ponaro awehtopo komo xa Ow ha Aporin komo. Exitu poi kekyatken̂e so Oponaro awehtome so tak. Ponaro awehtopo komo xa Ow ha. Aporin kom ha, wîîkes awya an̂ekatîmrî yîwya so, kekn̂e. Ero wa kekn̂e Kporin komo Moises ya.