Taa, ero yinhîrî tak on wara xatken̂e Ixaw Yana komo, nîwracetken̂e tak kica. Okwe, okwe, ketîketken̂e ro mak kica. Kosope meero nîwracetken̂e.

2 Moises poko nîmtapowatken̂e marha kica, Araw komo poko. Akro so marha nîmtapowatken̂e Ixaw Yana komo ahnoro. On wara ketken̂e yîwya so, Ahce kacho waipîra tîxatken̂e okwe Exitu po rma? Ahce kacho waipîra tîxatken̂e hara okwe on yaxawan po rma?

3 Ahce kacho ma re xiya kehce so Kporin komo? Kanan pona kaar̂axe so ha re kwaihkachome so mak ha tko okwe kacipara imo ke oko. Kwaipuche so kihcinhîrî komo tak nahsîyaxe iitono komo cipici me so okwe. Kîmxîkîthîrî komo marha nahsîyaxe tanton komo me okwe. Ahce wa katî tatu? Wara n̂he na tatu Exitu pona kîwcetaw so hara? ketken̂e. Ero wa ketken̂e Moises komo ya okwe.

4 On wara marha ketken̂e okwe n̂examro, Anarî tak ciicerî kaan̂e kom hara. Noro xa tak kaar̂axe so Exitu pona hara, ketken̂e kica. Ero wa ketken̂e kica.

5 Yimtapotarî komo yentache tak n̂esewnapetken̂e Moises komo Araw yakro. Mer̂pora xatken̂e Ixaw Yana komo iito re cesenmeso. N̂examro yeepatai rma n̂esewnapetken̂e.

6 Iito rma xakn̂e Xoswe, Nun mumuru. Karebe marha xakn̂e iito Xepon̂e mumuru. Kanan yenso toxapunhîrî mîkyam xatken̂e. N̂examro tak nahxaiketken̂e tpononthîrî komo.

7 On wara ketken̂e Ixaw Yana komo ya, Kanan pore rma amna toye. Ero amna n̂entîkai. Kir̂wanî ro mak mîn roowo.

8 Kir̂wan̂he keen̂ataw so Kporin komo ya iina roro rma kaar̂atu so krowon komo me tak tîmtome. Kir̂wan mîn roowo. Paaka mown pen nas iito mer̂pora ro mak, wen pen marha. Ero rma wa nîmyasî Kporin komo kîwya so.

9 Ero ke Kporin komo anwekîra ro mak men ehcoko. Iitono komo pona erasîra marha ehcoko ha ke. Tar̂mexe rma wa ha. N̂examro pen yermomn̂e wara wa taxe. Yukurunînhîrî komo exihra tak wa nas ha. Kakro so rma nasî Kporin kom ha. Ero ke n̂examro pona erasîra ro mak cehcerî, ketken̂e. Ero wa ketken̂e Xoswe komo, Karebe yakro.

10 N̂examro tko nanwekyatken̂e Ixaw Yana komo. Toh ke n̂examro waihkacho poko takî nîmtapowatken̂e kica. Ero yimaw rma tak Kporin komo weyuru n̂esenpekn̂e Kesentacho potaw. Ahnoro Ixaw Yana komo ya rma n̂esenpekn̂e.

11 On wara kekn̂e Kporin komo Moises ya, Pahkî xa owîrîyakexe moxam okwe. Pahkî xa marha oyanwekyaxe. Yaake ro cirihnî wiire yîn̂enîrî komo. Ero yipu yenîn̂enho rma tko oyanwekyaxe. Ahcemaw xa natu ero warahra tak ha?

12 Ero ke n̂examro pen tak waihkes eper̂a ke. Oyanan mera so tak wiir̂asî. Awepamthîrî xa matko wiir̂asî oyanan me hara. Awepamthîrî komo xa matko wepamnoyasî mer̂pora ro mak moxam yopo. Kar̂itî me marha n̂examro wiir̂asî moxam yopo, kekn̂e. Ero wa kekn̂e Kporin komo Moises ya.

13 On wara tko n̂eyukyakn̂e Moises, Apa, moxam pen waihketaw awya Exipsiu komo men n̂encexe waihkachonhîrî komo. N̂examro chewnonho moxam mekyakn̂e. Kar̂pe xa awehtopo menpekn̂e n̂examro ya moxam yowyataw.

14 Ero ke Kanan pono komo ya tak n̂ekatîmyaxe Exipsiu komo. Moxam pen waihkachonho n̂ekatîmyaxe. Awehtopo yentan̂e rma mîkyam Apa, Kanan pono komo. Ixaw Yana komo chew awehtopo n̂encexe. On wara kacho n̂encexe, Noro xa tî n̂esenpe yîwya so kir̂wantaw. Kaweresî marha tî n̂iir̂a n̂examro yepoi. Esama yaw cetaw so Noro rma tî cee poturme so. Kaweresî nasî roro n̂examro yepoi yin̂irithîrî ha. Poturme so nîîce kaweresî chew rma, patawno chew. Kosope cetaw so wehto chew nîîce hara Noro poturme so, patawno chew ha, kacho tî n̂encetu. Ero wa so men wa n̂encetu Kanan pono komo.

15-16 Ponan̂e rma moxam waihketaw awya on wara men ketu amn̂e mîk hak maywen komo, awehtopo yentan̂enho kom ha, N̂examro Porinî cma tî re kekn̂e yîwya so, Kanan men wîmyasî arowon komo me, kekn̂e ha tî re. Yaaro xa wîîkesî cemaro pîn me, kekn̂e cma tî re esemîknopîn me ro mak. Cehn̂axmu me tko n̂ehxe ham okwe. Oona roro ekîhra thakwa nai ham. Ero ke axawa imo po rma thakwa n̂examro pen waihkai okwe, ketu men okwe Apa apoko.

17-18 Ero ke oroto tak kar̂pe xa awehtopo enpoko xa hara. On wara tko mîîkekn̂e owya, On warai xa Ow ha Aporin komo, yamoro tîrwon̂em Ow ha. Tooto pînîn yawno marha Ow ha. Kicicme tooto komo yehtoponho yîhcamnon̂e Ow, oyanwekn̂e komo yehtoponho yîhcamnon̂e ha. Kicicme exitaw so yîîm komo, yîmxîkrî komo pona meero wiir̂asî kicicme yîîm yehtoponho, Osorwaw ro na n̂ehretawnometu, 4 ro xa ha na. Ero wicakno komo pona wiir̂asî kicicme porin pen komo yehtoponho. Noro yipu men Ow ha Aporin komo, mîîkekn̂e owya.

19 Ero ke etpînîn yawno me ro mak awexirî ke kicicme moxam yehtoponho cma re mîhcamnoyasî oroto. Emapona roro ka mîhcamnoyakn̂e Exitu poi mohtoponhîrî komo n̂ixa ro. Ero ke ero wa ehtoponhîrî komo cma re mîhcamnoyasî xa hara oroto, kekn̂e. Ero wa kekn̂e Moises Kporin komo ya.

20 Ero ke on wara n̂eyukyakn̂e Kporin komo, Taa, n̂examro yehtoponho tak wîhcamnopu amtapotachonhîrî yanme rma.

21-22 On wara tko wîîkesî, waipîn me wasî yaaro xa, ero wa xa marha yaaro tan wîîkesî, kir̂wanî ro me Aporin komo n̂esenpesî rma wa roowo poko hakno komo ya. Moxam n̂een̂atken̂e kir̂wan̂he oyehtopo. Cirihnî komo marha n̂een̂atken̂e emapona roro on̂iritho. Exitu po cexitaw so rma n̂een̂atken̂e, axawa imo po cexitaw so marha. Ero yipu yenîn̂enho rma oyanwekn̂e me rma xatken̂e kica. Kir̂wan̂he kiin̂e ma re Mîk Kaan, kan̂e me roro xatken̂e 10 ro kica. Omtapotarî yewetîn̂e pîn me roro n̂ehce okwe.

23 Ero ke on wara tak wîîkesî yaaro xa, Kanan yenîhra ro mak men naxe n̂examro kîrkomo. Ero men wîmyas amn̂e awepamthîrî komo ya eken komo me, wîîkekn̂e cma ha re n̂examro porin pen komo ya. Yaaro xa tan wîîkesî, esemîknopîn me ro mak, wîîkekn̂e. Wara rma enîhra ro mak naxe oyanwekn̂enho komo reha.

24 Ero warahra reha n̂ehxe Karebe, oyanton. Kir̂wan̂he reha naî noro yekatî. Oyewetîtîkan̂e me nasî noro reha oyanwekn̂e pîn me. Ero ke noro rma waar̂asî iina yîn̂enîthîrî pona. Noro yepamtho yeken me tak nas iitono amn̂e.

25 Îîpî yotaw so naxe Amarekita komo, Kananew komo marha. Ero ke pahxaxa yaw xa marha etocoko hara. Axawa imo yesamarî yaw etocoko hara, Cucurem Yewku yesamarî yaw ha, kekn̂e. Ero wa kekn̂e Kporin komo Moises ya.

26-27 On wara marha kekn̂e Kporin komo Moises ya, Araw komo ya, Kicicme ro mak naxe okwe moxam Ixaw Yana kom ha. Oyanwecho poko yîmtapotacho komo wencesî.

28 Ero ke on wara men kasko yîwya so, On wara kesî Kporin komo awya so, Waipîn me wasî yaaro xa, ero wa xa marha yaaro tan wîîkes awya so, amtapotachonhîrî komo wenta ero yaw roro men kiir̂axe so, wîîkesî.

29 On pona rma axawa imo pona awokoputhîrî komo n̂epîrkesî. Ahnoro mîwayaxe 20 cimn̂ipu ehxapu komo, ero yopo ehxapu komo marha. Ahnoro wa mîwaitîkexe okwe yukuknomaxapu komo, owîrîyakacho yanme.

30 Wîîkekn̂e cma re ka awya so, Ero men wîmyas amn̂e awya so roowo, wîîkekn̂e. Yaaro xa tan wîîkesî cemaro pîn me, wîîkekn̂e awya so esemîknopîn me ro mak. Kapockantai rma yaarono me xa ekatîmtome omtapotarî. Wara rma on wara tak wîîkes oroto, ero pona tohra ro mak men maxe. Karebe makî reha cesî iina Xepon̂e mumuru. Xoswe marha cesî iina Nun mumuru ha, kesî Kporin komo awya so, kasko.

31-32 On wara marha kasko yîwya so, On wara marha kesî Kaan awya so, On wara mîîkacow amxîkrî komo poko, Kîmxîkrî komo men nahsîyaxe okwe Kanan pono komo. Tanton me nahsîyaxe, mîîkacow. N̂examro rma tko waar̂asî iina Kanan pona. Awto xera so mehce iina rma n̂examro waar̂asî. Pîra reha wa maxe amyamro, awokoputhîrî komo reha n̂epîrkesî tan axawa imo po rma.

33 Amxîkrî komo n̂etar̂axe mak tan axawa imo po. 40 cimn̂ipu pahkînon tan naxe axawa po rma okwe. Ow manwece okwe. Ero wa awehtoponhîrî komo poyero tan naxe. Ero wa naxe tan pahkî awaihtîkacho komo mîtwo rma.

34 40 kaamo mîîcetken̂e Kanan pore. Ero ke 40 cimn̂ipu tak maxe tan axawa imo po ahwon me. Cewn̂e cimn̂ipu nasî cewn̂e kaamo yepetho me ha. Ero wa maxe tan kicicme awehtoponhîrî komo yanme. On wara tanwekn̂e komo ciin̂e Mîk ham, mîîkexe tak opoko ero yimaw.

35 Owî rma Ow ha Aporin komo. Ero wa men kiir̂axe so amn̂e amyamro ahnoro. Kicicitho mak amyamro kica. Mesenmecow oyanwecho poko awesentachome so mak kica. Ero ke tanî rma mexponkexe axawa imo po rma okwe. Tan mîwayaxe okwe, kesî. Ero wa kesî Kporin komo awya so, kasko, kekn̂e. Ero wa kekn̂e Kporin komo Moises ya Ixaw Yana komo ya yîn̂ekatîmrî.

36-37 Taa, ero yinhîrî tak on wara xatken̂e Kanan yenso toxapunhîrî komo, Moises n̂en̂epetho kom ha, waihyatken̂e tak okwe. Eper̂a nahsîyakn̂e n̂examro pen tîhra rma, waihtopo kom ha. Ero wa so xatken̂e okwe, Tohra ro thakwa men taxe ha Kanan pona, kan̂enho pen komo. Ero wa karî ke yîwya so tak Moises nîwîrîyaketken̂e Ixaw Yana komo ahnoro n̂examro poyero rma okwe. Ero ke Kporin komo rma n̂examro pen waihkekn̂e epera ke.

38 Asakî tko waipîra xatken̂e Kanan yenîn̂enho komo. Xoswe, Nun mumuru, Karebe, Xepon̂e mumuru, ero wicakî mak waipîra xatken̂e. Ero wa xatken̂e.

39 Taa, Kporin komo mtapotachonho n̂ekatîmyakn̂e Moises Ixaw Yana komo ya. Ero yipu yentache tak nîwracetken̂e xa tak Ixaw Yana komo okwe.

40 Ero yinhîrî pahxaxaro rma tî cetken̂e Ixaw Yana komo îîpî meretkoso. On wara ketken̂e ero yimaw, Kicicme amna n̂ehxe ham kica, tanî rma tko taxe. Ero ke amna rma cesî Kanan pona, Ero wîmyas amn̂e aweken komo me, kekn̂e Kporin komo, iina amna cesî, ketken̂e tak okwe.

41 On wara tko kekn̂e Moises yîwya so, Ahce kacho Kporin komo mtapotarî yanwekn̂e me matu xa hara kica? Mehn̂exe men wa okwe.

42-43 Tohra men ehcoko ha ke. Awakro so tohra men nas okwe Kporin komo. Awar̂mexe so men okwe iitono komo. Iito men naxe Amarekita komo, Kananew kom ha. Kporin komo yewetîn̂e mera mak mehce kica. Ero ke exihra tak men nasî Noro awakro so. Ero ke mîwayaxe men okwe kacipara imo ke, kekn̂e. Ero wa kekn̂e Moises Ixaw Yana komo ya.

44 Panahnî me rma tko cetken̂e okwe îîpî meretkoso. Ero wa xatken̂e Ixaw Yana komo. Iito rma tko xakn̂e Moises cetarî komo yaw rma, akro so tohra. Iito marha xakn̂e Kporin komo mtapotarî yen, yamata.

45 Ero yimaw tak Amarekita komo n̂enîhcetken̂e îîpî, Kananew komo marha. Yuu yuu, ketken̂e takî tî Ixaw Yana komo waparî me. Ixaw Yana pen komo tî weken̂emekyatken̂e, nar̂metken̂e marha miya roro Ohma pona roro. Ero wa Ixaw Yana pen komo nar̂metken̂e okwe.