1-2 Taa, ero yinhîrî tak on wara kekn̂e Kporin komo Moises ya, Ai Moises, kîrkomo en̂epeko Kanan pona, roowo enîn̂e me. Ixaw yana komo rowon me wîmyasî ero yenîn̂e komo en̂epeko. Cewn̂e so en̂epeko mîk hak tribun poyino. Antoman̂e me cehsom komo mak en̂epeko, kekn̂e. Ero wa kekn̂e Kporin komo Moises ya.

3 Ero ke kîrkomo n̂en̂epekn̂e Moises Paran Yaxawan poi Kanan pona. Ixaw Yana komo yantoman̂e me cehsom komo re mîkyam n̂en̂epekn̂e.

4 En̂epexapu komo yosotî tan wetahcasî. Huben yepamtho komo yantoman̂e n̂en̂epekn̂e Samua, Sakuru mumuru.

5 Simeaw yepamtho komo yantoman̂e n̂en̂epekn̂e Sapace, Ori mumuru.

6 Xuta yepamtho komo yantoman̂e n̂en̂epekn̂e Karebe, Xepon̂e mumuru.

7 Isaka yepamtho komo yantoman̂e n̂en̂epekn̂e Xixeaw, Xose mumuru.

8 Eprain yepamtho komo yantoman̂e n̂en̂epekn̂e Oseias, Nun mumuru.

9 Benxamin yepamtho komo yantoman̂e n̂en̂epekn̂e Pawti, Hapu mumuru.

10 Seburon yepamtho komo yantoman̂e n̂en̂epekn̂e Kaciew, Soci mumuru.

11 Manases yepamtho komo marha n̂en̂epekn̂e. Xose yepamtho me rma naxe Manases yepamtho komo. N̂examro yantoman̂e n̂en̂epekn̂e Kaci, Susi mumuru.

12 Taan yepamtho komo yantoman̂e n̂en̂epekn̂e Amiew, Xemari mumuru.

13 Ase yepamtho komo yantoman̂e n̂en̂epekn̂e Setu, Mikaew mumuru.

14 Nahtari yepamtho komo yantoman̂e n̂en̂epekn̂e Nabi, Popsi mumuru.

15 Kace yepamtho komo yantoman̂e n̂en̂epekn̂e Xeuew, Maki mumuru.

16 Ero wa xakn̂e kîrkomo yosotî, Kanan rowon yenso tîtosom komo yosotî, Moises n̂en̂eperî komo yosot ha. Anarî me tko Oseias nosohcekn̂e Moises, Nun mumuru ha, Xoswe me tak noro nosohcekn̂e.

17 On wara kekn̂e Moises yîwya so Kanan rowon yenîn̂e me en̂epetaw so, Oyakno komo, suu n̂ixan pore ka etocoko. Ero yinhîrî îîpî chere tak etocoko hara.

18 Ahnoro encoko, Ero wa nai ham, kachome. Iitono komo marha encoko kar̂pe ehtopo komo, kar̂pera ehtopo kom ha na. Mer̂pora ehtopo komo encoko, asak mak ehtopo kom ha na.

19 Kir̂wan̂he roowo yehtopo marha encoko, kicicme ehtopo ha na. Ewton komo marha encoko twacaye ehtopo, wacamra ehtopo ha na.

20 Naatî yewtî me roowo yehtopo encoko, ewtî mera ehtopo ha na. Comota marha encoko iito. Comota exihra ehtopo encoko. Erasîra ro mak etocoko. Comota yeperîrî men ehcoko amokyataw so hara, kekn̂e. Ero wa kekn̂e Moises yîwya so. N̂examro cetaw uupa yepetacho me xakn̂e. Yihcirî me yupurmamxapu xakn̂e ero yimaw.

21 Ero ke cetken̂e tak Moises n̂en̂epetho komo. Kanan rowon takî tî n̂een̂atken̂e. Axawa imo yemyatwono ka n̂een̂atken̂e yihcirî me. Miya ro mak tak cetken̂e Heobi pona roro Amace mîtwono pona ha.

22 Suu n̂ixan pore tî cetken̂e Ebron yaka roro. Enake pen yepamtho yewton mîn Ebron. Iito xatken̂e Aiman, Sesai, Tawmai komo. Noro pen yepamtho mîkyam xatken̂e. Pahxanî rma tî mîn ewto, Ebron. 7 cimn̂ipu xakn̂e ero ciitoponho Soan ciir̂ataw tak Exitu pono ha.

23 Ero yinhîrî aporî yecihtaka tî cetken̂e hara, Eskoro yecihtaka, aporî yecihtaka. Iito cexitaw so uupa yatî peremru takî tî nîhkocetken̂e. Ero poko tî xakn̂e uupa yeperîrî cewn̂e pîmîrî mak. Porin mîn xakn̂e uupa pîmîrî. Weewe po tî naar̂atken̂e asakî aan̂e. Roman yeperîrî marha naar̂atken̂e, piiku yeperîrî marha.

24 Ero ke iitono nosohcetken̂e aporî Eskoro me. Porin xa mîn nîhkocetken̂e Ixaw yepamtho komo uupa yeperîrî. Ero ke Eskoro me iitono nosohcetken̂e aporî.

25 40 kaamo yenmapuche tak n̂etîrametken̂e hara tîyanan komo yaka. Ero wa xatken̂e.

26 Moises yaka tak mokyatken̂e hara Araw komo yaka. Ixaw yepamtho komo yaka mokyatken̂e hara ahnorono komo yaka. Kates po rma xatken̂e n̂examro Paran Yaxawan po rma. Ero ke iina mokyatken̂e. Yîwya so tak n̂esekatîmyatken̂e. Naatî yeperîrî marha n̂enpetken̂e yîwya so Kanan poi ehxapu.

27 On wara n̂esekatîmyatken̂e Moises ya, Kanan rowon yenso cma re amna toye. Ero yenso etocoko, mîîkekn̂e amna ya iina amna toye. Yaaro ro mak mîîkekn̂e, tînahke xa naxe iitono komo. Paaka mown pen nas iito mer̂pora, wen pen marha. On ha comota yeperîrî iitononho.

28 Karitî komo xa tko mîkyam iitono komo. Twacaye so nas ewton komo, porin me so marha nasî. Enake yepamtho komo meero amna n̂een̂e kopi iito.

29 Amarekita komo naxe suu n̂ixan po. Etew komo naxe îîpî chew, Xebusew komo marha, Amohew komo marha. Tuuna imo yecihtaw naxe Kananew komo, Xotaw yecihtaw marha naxe. Ero wa naxe iitono komo, ketken̂e. Ero wa ketken̂e yîwya so.

30 Pîra, ero wa kahra ehcoko, kekn̂e Karebe Moises yaka esenmexapu komo ya. Tîtopore rma tko nasî Kanan rowon yahsîso. Tar̂mexe rma wa ha iitono komo, kekn̂e. Ero wa kekn̂e Karebe reha yîwya so.

31 Yîmtaka tko n̂eyukyatken̂e Karebe yakrono komo, Iitono komo yar̂mara ro mak men taxe okwe. Karitî komo xa mîkyam okwe, kyopo so xa naxe okwe, ketken̂e.

32 Ero wa n̂ekatîmyatken̂e tîn̂enîthîrî komo. Ixaw Yana komo yahwokan̂e me nîmtapowatken̂e kica Kanan poko. On wara marha ketken̂e, Tpono komo yonon̂e wara ro mak nas iitono, yîrowon kom ha. Kaw xa naxe kopi iitono komo, amna n̂enîtho kom ha, ketken̂e marha.

33 Tooto imo komo xa amna n̂een̂akn̂e iito. Tooto imo yepamtho mîkyam Enake yepamtho kom ha. Makakatho mak kîîwî, kekn̂e amna n̂examro yenîche. Makakatho mak mîkyam, ketken̂e xa marha n̂examro amna poko, ketken̂e. Ero wa ketken̂e amna poko okwe, ketken̂e. Ero wa ketken̂e Kanan yenîn̂enho komo.