Ero yinhîrî tak on wara xatken̂e Mirian komo Araw yakro, Moises poko nîmtapowatken̂e noro yanwekn̂e wara. Yipici poyero nîmtapowatken̂e noro poko. Kusita wosîn nahsîyakn̂e Moises cipici me. Noro yahsîrî ke kicicme nîmtapowatken̂e noro poko kica.

2 On wara ketken̂e, Moises ya mak ma n̂ekatîmya Kporin komo tîmtapotarî, kpanatanmetopo kom ha? Kîwya so reha ekatîmra ma nai ke? ketken̂e kica. Yîmtapotarî komo tko tî n̂encekn̂e Kporin komo.

3 On warai tî mîk xakn̂e Moises, yamoro cetîrwonmesom xa tî mîk xakn̂e, apehceme yîrwomnî ro mak. Ero wa xakn̂e anarî komo yopo ro mak, roowo poko hakno komo yopo.

4 Taa, yohno rma tak Moises komo nan̂ikyakn̂e Kporin komo, Araw, Mirian komo yakro rma nan̂ikyakn̂e. Amohcoko amyamro ahnoro osorwaw rma Kesentacho potaka, kekn̂e yîwya so. Ero ke cetken̂e n̂examro osorwaw rma.

5 Iito exitaw so tak Kporin komo tak nîhcekn̂e kaweresî chew, patawno chew ha. Kesentacho potaw n̂ecececekn̂e. Araw komo tak nan̂ikyakn̂e xa hara meyehra n̂he tak, Mirian yakro rma. Ero ke n̂examro cetken̂e Noro wece.

6-8 On wara kekn̂e Kporin komo yîwya so, Okopuci komo, omtapotarî men ka entacoko, on wara wasî aweronoman̂e komo poko, noro yipu exitaw achew so kesenpesî rma re yîwya enîhnî yenporî ke yîwya. Anarimaw kîmtapowasî noro yakro wosoto mak. Ero warahra tko wasî Moises poko reha. Oyanton xa moso Moises, omîn yenîn̂e xa. Oyewetîn̂e moso oyanwekn̂e pînî ro mak okre ahce na poko antometaw owya. Ero ke wa noro yakro kîmtapowasî yîn̂entarî me xa. Kir̂wantaw xa wekatîmyasî yîwya omtapotarî. Anarî pokono wara mak yîmtapotara wasî noro yakro. Aporin komo pun yenîn̂e rma moso. Ero ke ahce kacho twerîhra mîmtapotacow noro yipu poko? kekn̂e. Ero wa kekn̂e Kporin komo yîwya so.

9 Ero yimaw tak Kporin komo nîrwonakn̂e poko so. Ero yinhîrî tak cekn̂e hara. Ero wa xakn̂e Kporin komo.

10 Ero yinhîrî tak kaweresî cekn̂e hara. Kaan mîn yepoi exihra tak xakn̂e. Ero toche numutunwakn̂e tak Mirian pun. Repra ken̂e tak xakn̂e okwe. Ero yimaw noro wece n̂een̂akn̂e Araw. Repra ken̂e n̂een̂akn̂e.

11 Ero ke on wara kekn̂e Araw Moises ya, On wara cma re wîîkes awya apa, camkî ro mak nîmtapotai amna apoko kica. Kicicme amna n̂ehxe kica. Ero cma re cirihra mas amna pona kicicme amna yehtoponho.

12 Aaci pînîn yawno me cma re awexi xe wasî. Ceper̂ai rma exitaw pahkî rikomo wara tak na n̂ehtîke tmataxi ewruxapu wara okwe. Anarimaw ero wa n̂ewruya rikomo, yîraconhîrî me tmataxi. Ero warahra cma re miir̂asî aaci pun, kekn̂e. Ero wa kekn̂e Araw Moises ya.

13 Ero ke Kporin komo yakro tak nîmtapowakn̂e Moises. Apa, Kaan xa Amoro. On wara wîîkes awya, amna yepeka cma re makir̂wames hara, kekn̂e.

14 On wara tko n̂eyukyakn̂e Kporin komo, Aamo komo yetakwataw ketaw ha re noro yeepatarî pore, kicicme ehxapu me tak nasî 7 kaamo. Ero ke Mirian en̂epeko eeta yai. Eeta yawhra mak n̂expe 7 kaamo. Ero yinhîrî tîmîn yaka mokope hara, kekn̂e. Ero wa kekn̂e Kporin komo Moises ya.

15 Ero ke Mirian tak n̂en̂epetken̂e eeta yai. Iito n̂enmayakn̂e 7 kaamo eeta yaka mokuhnî me ro mak. Esama yaw tohra ka xatken̂e Ixaw Yana komo ero wa ka exitaw Mirian.

16 Ero yinhîrî tak mokyakn̂e Mirian tîmîn yaka hara. Ero yinhîrî tak esama yaw cetken̂e xa hara Ixaw Yana komo. Aseroci poi cetken̂e Paran yaxawan pona hara. Iito tak tîmîn komo n̂iir̂atken̂e xa hara. Ero wa xatken̂e.