Taa, ero yinhîrî tak on wara xatken̂e hara Ixaw Yana komo, ahce wa na cehtopo komo tak nîwîrîyaketken̂e okwe. Yîmtapotarî komo tko tî n̂encekn̂e Kporin komo. Ero ke tak ahwora tak xakn̂e n̂examro poko. Nîrwonakn̂e marha poko so. Ero ke Noro wehtorî tak n̂etahsîyakn̂e Ixaw Yana komo poko rma oco. Eeta mapitawno komo n̂ecakyatken̂e oco. Waihyatken̂e thakwa okwe etpoi so mak.

2 Ero ke Moises ya tak ketken̂e Ixaw Yana komo. Okwe, amna pen waihyas wehto ke oco, ketken̂e. Ero ke Kporin komo yakro tak nîmtapowakn̂e Moises. Ero wa yîmtapotache rma tak n̂eseikekn̂e hara wehto.

3 Ero ke Tabera me tak nosohcekn̂e Moises iitono eeta. Ero wa nosohcekn̂e tpoyino pen komo yecakrî ke Kporin komo wehtorî ke.

4 Ero yinhîrî on wara tak xatken̂e anarî yana komo, Ixaw Yana komo yakro mohxapu kom ha, mîn hak poko xa takî tî n̂epohketken̂e kica. Ero ke n̂examro poyero tak Ixaw Yana komo meero nîwracetken̂e xa hara. Okwe, okwe, okwe, onoke thakwa re kotmetu so okwe?

5-6 Exitu po kexitaw so cma ootî tîton̂etken̂e okre epethîmra ro mak okre. Pepinu marha tahyatken̂e iito okre, meransia, pohu, senora, aar̂u, ero yipu komo tahyatken̂e iito okre. Tan reha expora ro mak taxe kica. Maana mak nasî knahrî komo kica ero re mak, ketken̂e. Ero wa ketken̂e okwe Ixaw Yana komo.

7 Pin̂ipici me xakn̂e maana kowentu yatho wicakî so mak. Sîîpo wara cik xakn̂e tîxeweke cik ha re. Ero wa xakn̂e maana.

8 Ero yipu n̂enmekyatken̂e Ixaw Yana komo tînahrî komo me. Enmekîche nakihyatken̂e tak akihtopo ke, naposoketken̂e anarimaw. Akipuche nîyetken̂e tak tahrem yaw. Anarimaw so nayatken̂e tuuru komo me. Katî me poxwakn̂e okre aseci me ha.

9 Kosope reha cicakî n̂etakicekn̂e mîn hak poko. Ero yimaw marha maana me n̂etakîcekn̂e cicakî yakro rma. Ero wa xakn̂e maana.

10 Okwe, okwe, okwe, ketîketken̂e rma tko kica Ixaw Yana komo. Tîmîn komo potaw so rma nîwracetken̂e kica. Ero poyero tî nîrwonakn̂e xa tak Kporin komo n̂examro poko. Moises marha n̂eserepokai poko so.

11 Ero ke on wara kekn̂e Moises Kporin komo ya, Apa, awanton mak ow ha. Ahce kacho wa ow memetanmekya? Moxam yenîrî poko thakwa ow mantomesî oyemetanmetopo me mak okwe. Ahce wa oyexirî ke an̂enîrî mexan pîn me ow meen̂a okwe? Ero wa oyenîrî ke na moxam yaatopo poko ow mantomai okwe. Tawsîn̂em yaan̂e wara xa ow miir̂e Apa okwe.

12 Omxîkrî me katî moxam meen̂a? On̂iritho me katî n̂ewruyatken̂e? Ahce kacho wa owya mîîke, Moxam arko awenawno wara xa, mîîke owya? Ewruxan naar̂asî cepeka ero wa moxam arko amoro yîrowon komo me onîmrî pona, mîîkes owya. Amn̂e arowon komo me wîmyasî, mîîkekn̂e pahxa moxam porin pen komo ya. Yaaro xa mîîkekn̂e esemîknopîn me ro mak. Ero pona xa moxam arko, mîîkes ha owya. Ahce kacho wa ero wa mîîke owya okwe?

13 Kootî xe nas amna okwe, kexe emapona kica. Tîwrataro ero wa kexe omamhoko kica. Ahn̂i xan thakwa re moxam yotî wetake okwe? Mer̂pora ro mak naxe okyo.

14 Ow mak moxam yarîhra thakwa wasî cewn̂e. Oyopo ro thakwa mak nas okwe moxam yaatopo.

15 Moxam yaan̂e me rma oyexi xe awexitaw ow mak waihkakî oroto. Ero wa xa ow cirko opînîn yaw awexitaw. Oyahwokatîka xera cma re was okwe, kekn̂e. Ero wa kekn̂e Moises Kporin komo ya.

16 Ero ke on wara tak kekn̂e Kporin komo Moises ya, Taa, on wara wîîkes awya, Ixaw Yana poritomon komo an̂ihko xiya ohyaka. Yaake an̂ihko 70 ha. Anîhtînorî komo eeko, poritomo komo, antomano riin̂e me cehsom kom ha. Noro yipu komo eeko Kesentacho potaka. Iito tak n̂ececetocowpe awakro.

17 N̂examro mokuche Ow tak kîhcesî. Awakro kîmtapowasî iito. Oyekatî nasî aropotaw. Noro raconho tak wowyasî aropotai n̂examro pona ciitome hara. Ero wa wiir̂asî ecehtono rin̂e me ehtome so awakro ayopo tîmtapotaxmu komo yecehton̂e me ha. Awakronomarî ke tak yîwya so cewn̂e exihra tak masî ecehtono rin̂e ha.

18 Ero yinhîrî on wara kasko Ixaw Yana komo ya, Oponaro xa tak ehcoko wooto tonotome tak awya so pahxaxa. Kporin komo rma awratarî komo n̂entai. On wara mîîkace, Wotohto poko ro mak taxe okwe. Ero warahra n̂he cma tîxatken̂e Exitu po kexitaw so. Kir̂wan̂he tîxatken̂e iito okre, mîîkace kica. Tîwrataro mîîkace kica. Ero ke pahxaxa tak Kporin komo rma awotmexe so. Yînmîthîrî tak mon̂exe ha.

19-20 Cewn̂e kaamo mak tonotîkara wa maxe, asakî kaamo mak tonotîkara, 5 kaamo mak tonotîkara, 10 kaamo mak tonotîkara, 20 kaamo mak tonotîkara. Nuun̂i cenatkaxi ro xa wa mon̂exe ha. Mer̂pora ro mak mon̂exe awewnarî komo yaro cepatakaxi ro. Ero yimaw tak mîpoxunkexe ro mak awotî komo. Ero wa men awir̂axe so Kporin komo Noro yanwekrî ke awya so. Achewno komo Mîk ha Kaan. Noro n̂entarî me rma mîwratace kica. Ahce kacho Exitu poi tîtmokyatken̂e kica? mîîkace kica. Ero ke ero wa awir̂axe so ha, kasko yîwya so, kekn̂e. Ero wa kekn̂e Kporin komo Moises ya.

21 Ero yinhîrî tko on wara kekn̂e Moises Kaan ya hara, Apa, mer̂pono pîn chewno ow okyo. 600.000 moxam kîrkomo yukuknomacho mak, karitî komo kuknomacho mak ha. On wara tko mîîkes owya, Ero warai komo wîyotmesî nuun̂i cenatkaxi ro, mîîkes okyo.

22 Ero wicakno komo yecenarî ma re nai toh komo waihketaw totî komo me? Ootî pen katî nanîmyatu ahnoro tuuna imo kwawno ha, totî komo me? kekn̂e.

23 On wara tko Moises mtaka n̂eyukyakn̂e Kporin komo, Ai Moises, Aporin komo xa Ow ha. Kawra n̂he tak nai Aporin komo yaporî awya? Meen̂asî rma wa ha wooto tîmtopo owya omtapotarî yaw roro rma. Ero poko oyehn̂acho katî meen̂a awya? kekn̂e. Ero wa kekn̂e Kporin komo Moises ya.

24 Ero ke Ixaw Yana komo yaka tak cekn̂e Moises. Kporin komo mtapotarî n̂ekatîmyakn̂e yîwya so. Poritomo komo marha nan̂ikyakn̂e 70 yakenon. Mokuche so tak Kesentacho mamhoko panahcetken̂e.

25 Ero yimaw tak Kporin komo nîhcekn̂e kaweresî yaw rma. Moises yakro nîmtapowakn̂e. Cekatî raconho tak nowyakn̂e Moises ropotai. Noro tak n̂iir̂akn̂e 70 komo ropotaka hara. Ero yinhîrî tak Kaanî mtapotarî tak n̂ekatîmyatken̂e Kporin komo Yekatî exirî ke yîropotaw so. Ero yimaw mak n̂ekatîmyatken̂e Kaanî mtapotarî. Ero yinhîrî ekatîmra xa hara xatken̂e. Ero wa xatken̂e 70 komo.

26 Asakî tko mokuhra xatken̂e n̂examro yakrono komo rma ha re. Tîmîn komo yaw rma xatken̂e. Ewtaci, Metaci, ero wa xakn̂e n̂examro yosotî. Poritomo komo yosotî mewretaw n̂examro yosotî marha mewretken̂e. Kporin komo mîn yaka tko mokuhra xatken̂e. Noro yipu komo ropotaka rma tî mokyakn̂e Kporin Komo Yekatî. Ero ke n̂examro marha n̂ekatîmyatken̂e Kporin komo mtapotarî iito rma eeta yaw.

27 Ero ke kar̂pamxan tak cekn̂e Moises yaka kar̂pe. On wara kekn̂e yîwya, Apa, on wara naxe Ewtaci, Metaci komo kopi, Kaanî mtapotarî n̂ekatîmyaxe mînto eeta yaw rma kopi, kekn̂e yîwya.

28 Ero yipu yentache on wara kekn̂e Xoswe, Nun mumuru, Moises yakronoman̂e, akronoman̂e mexan xa. On wara kekn̂e, Apa, Moises, n̂examro yîtîtmamnoko kopi, kekn̂e.

29 On wara tko n̂eyukyakn̂e Moises, Owara rma n̂examro exi xera ma mai ke? Ero wara xa matko exi xe so was ow ha Kporin komo yanan komo ahnoro rma, weronomano rin̂e me exi xe so wasî. Kporin komo ya cekatî ciri xe wasî yîropotaka so ahnoro, kekn̂e. Ero wa kekn̂e Moises.

30 Ero yinhîrî tak tîmîn komo yaka cetken̂e hara Moises komo, poritomo komo marha. Ero wa cetken̂e.

31 Ero yinhîrî nocowonakn̂e tak Kporin komo yanme rma. Turukwarî warai tak n̂ekyakn̂e ocowo tuuna imo yecihtai. Roopore xa mokyakn̂e turukwarî warai 1 metru wicakî mak roowo yepore. Cewn̂e kaamo ketaritopo wicakî xakn̂e turukwarî warai mehxa mehxa wara Ixaw Yana komo yetarî panaw.

32 Ero ke turukwarî warai nahsîyatken̂e Ixaw Yana komo kokmamso ro, cenmakaxi ro marha, kokmamso ro xa hara. Wahra so mak ahsîyataw anarî komo 2,200 ritru wicakî nahsîyatken̂e. Anarî komo reha nahsîyatken̂e ero yopo ro mak. Miya so n̂enmekyatken̂e tînahsîthîrî komo cetarî komo tmamritîkaxi ro.

33 Ero yipu ton̂etaw rma tko, yîmtaw so rma exitaw Ixaw Yana komo poko nîrwonakn̂e xa hara Kporin komo. Eper̂an komo tak n̂ekpekn̂e cerewrem ro mak oko.

34 Ero ke on wara tak nosohcetken̂e iitono ewto, Kibroce-Ataapa on ham, ketken̂e. Ero wa nosohcetken̂e. Ero wa nosohcetken̂e mîn hak xatînhîrî pen komo yokoputho yahruru ke iina. Ero wa nosohcetken̂e.

35 Ero yinhîrî tak Kibroce-Ataapa poi cetken̂e hara Aseroce pona hara. Iina tak tîmîn komo n̂iir̂atken̂e hara. Ero wa xatken̂e.