1-2 Taa, ero yinhîrî on wara kekn̂e hara Kporin komo Moises ya, Raatî akîhtocoko asakî. Prata papaknorexapu akîhtocoko ero me. Ero yakîhtoche tuu kacoko ero poko Ixaw Yana komo yan̂ihtopo me. Ero poko marha tuu kacoko awtotome so hara esama yaw.

3 Asakno rorono poko rma tuu kacoko Ixaw Yana komo yan̂ihtopo me. Ero wa kacho yencetaw yîwya so ahnoro tak mohtîkacowpe Kesentacho potaka.

4 Cewn̂an poko mak tuu ketaw Ixaw Yana yantoman̂e komo makî reha mohcowpe.

5 Taa, tuu ketaw esama yaw awtotopo komo me, resce n̂ixa tîmîyem komo makî ka tocowpe poturme.

6 Tuu ketaw xa hara suu n̂ixa tîmîyem komo tak tocowpe hara. Tuu karî ke mak tocowpe esama yaw.

7 Ixaw Yana komo yan̂ikî xe makî reha awexitaw so tuu kacoko rma re anarme n̂he ha tko, awtotopo komo mera. Ero wa tuu kacoko.

8 Araw mumuru komo cirko tuu kan̂e ro me. Tîmsom pokono komo mîkyam n̂examro tuu kan̂e ro me n̂ehcowpe. N̂examro yepamtho marha n̂ehcowpe amn̂e tuu kan̂e me mîya rorono komo rma.

9 Amn̂e arowonî ro po awexitaw so aaxatî pîn komo na mokyatu awemetanmeso so. Ero ke n̂examro waparî me tak na awto xe matu. Ero wa awcetaw so tuu kacoko tak ero poko rma raatî poko ha. Ero wa ketaw awya so aponaro so wasî, Aporin komo Ow ha, ponaro xa awehtopo komo. Kukurunpexe so, awemetanmekn̂enhîrî komo yopono me kiir̂axe so.

10 Awahwowataw so marha tuu kacoko. Ero wa kacoko aweseresmetaw so yukuknomaxapu po so. Nuun̂i yepatakacho po so marha tuu kacoko awokuthîrî komo pun tîmyataw owya, takn̂itîkaxmu me tîmyataw, Aaxe xa wasî, kacho me tîmyataw marha. Ero yimaw so tuu kacoko roro aponaro so xa oyehtome Ow, Aporin kom ha. Ponaro awehtopo komo xa Ow ha, Aporin kom ha, kekn̂e. Ero wa kekn̂e Kporin komo Moises ya.

11 Taa, ero yinhîrî kaweresî tak nawomyakn̂e Kesentacho meretîn̂i, yîmtapotacho mîn meretîn̂i ha. 2-înhîrî cimn̂ipu po, 2-nhîrî nuun̂i po rma, 20-nhîrî kaamo po, ero po xa nawomyakn̂e kaweresî.

12 Ero ke ero po tak cetken̂e Ixaw Yana komo esama yaw. Axawa imo pore cetken̂e Sinai Yîpîn yamrinawno poi ha. Yaake kaamo cetken̂e. Mooxe n̂he toche so tak kaweresî tak n̂eremekn̂e hara anarî pona Paran yaxawan pona ha. Iina xa n̂eremekn̂e.

13 Yihcirî ka mîn xakn̂e Ixaw Yana komo totopo Kporin komo yanme xa. Moises ya kekn̂e ero wa kachonho yaw roro rma cetken̂e.

14 On wara xa cetken̂e Ixaw Yana komo, poturme cetken̂e Xuta yepamtho komo tukuknon komo wenari. N̂examro yaan̂e me xakn̂e Nason, Aminatabe mumuru.

15 Isaka yepamtho komo yaan̂e me xakn̂e hara Natan̂aew, Sua mumuru.

16 Seburon yepamtho komo yaan̂e me xakn̂e hara Eriabe, Eron mumuru.

17 N̂examro toche Kesentacho tak n̂exixketken̂e. Exixkache tak Xehsonita komo cetken̂e hara esama yaw, Merarita komo marha. Kesentacho naar̂atken̂e n̂examro.

18 Ero yinhîrî tak Huben yepamtho komo tak cetken̂e hara tukuknon komo wenari xa hara. N̂examro yaan̂e me xakn̂e Erisuru, Seteu mumuru.

19 Simeaw yepamtho komo yaan̂e me xakn̂e Serumiew hara, Surisatai mumuru.

20 Kace yepamtho komo yaan̂e me xakn̂e Eriasape hara, Teuew mumuru ha.

21 N̂examro toche tak Koacita komo cetken̂e hara. Kesentacho yawno komo naar̂atken̂e Kaan mîtwono komo xa. N̂examro mokuhnaw ka Kaan mîn yawno komo nahruyatken̂e Araw komo aatome tak Koacita komo ya. Ero ke tak naar̂atken̂e.

22 Ero yinhîrî Eprain yepamtho komo tak cetken̂e xa hara tukuknon komo wenari xa marha. N̂examro yaan̂e me xakn̂e Erisama, Amiuci mumuru.

23 Manases yepamtho komo yaan̂e me xakn̂e Kamariew hara, Petasu mumuru.

24 Benxamin yepamtho komo yaan̂e me xakn̂e Abitan hara, Xiteon̂i mumuru.

25 Mapitaw xa tak cetken̂e Taan yepamtho komo tukuknon komo wenari xa marha. N̂examro yaan̂e me xakn̂e Aiese, Amisatai mumuru ha.

26 Ase yepamtho komo yaan̂e me xakn̂e Paxiew hara, Okran mumuru.

27 Nahtari yepamtho komo yaan̂e me xakn̂e Aira hara, Enan mumuru.

28 Ero wa Ixaw Yana komo cetken̂e esama yaw. Etponanî re cetken̂e. Ero wa cetken̂e.

29 Ero yimaw Moises tak nîmtapowakn̂e Obabe yakro, Reuew mumuru yakro. Moises woxin mîk xakn̂e Obabe, Micianita mîk ha. On wara kekn̂e yîwya, Ai taam, on wara kekn̂e Kporin komo amna ya, Meyeno men wîmyasî awya so arowon komo me, kekn̂e amna ya. Ero ke oroto amna cesî ero wece. Ero ke mîmokyasî cma re amna yakro. Awakronomes amna. Ixaw Yana komo wakronomes Ow amn̂e, kekn̂e Kporin komo amna ya. Ero ke cma re mîmokyasî, kekn̂e yîwya.

30 Apohana, kekn̂e tko Obabe, omoku xera was awakro so. Oyeken pona ketîrames hara oyanan komo yaka, kekn̂e.

31 Okwe, kekn̂e Moises yîwya, amna cma re tînom xera was awya. Axawa imo po amna yetakritopo poko cma re amna mîcamhokesî. Amna yewru wara rma mas amna yakro amokyataw.

32 Amna yakro amokyataw awakronomes amna. Amna tî nakronome Kporin komo. Ero ke ero wa xa marha amna awakronomes hara, kekn̂e. Ero wa kekn̂e Moises Obabe ya.

33 Ero yinhîrî tak Kporin komo yîpîn yamrinawnonho cetken̂e Ixaw Yana komo esama yaw. 3 kaamo cetken̂e. Ero wa cetaw so Kporin komo yamatan tak naar̂atken̂e aan̂e komo poturme, Kporin komo mtapotacho yen. Etakritopo komo yentome tî ero naar̂atken̂e.

34 Katpanaw cetaw so esama yaw kaweresî cekn̂e epoi so. Ero wara roro tî xakn̂e cetaw so etathîrî komo yai.

35 Taa, on wara roro kekn̂e Moises Kporin komo yamatan yaar̂ataw roro eeta yai, Apa, awomko. Awakro cetar̂maxmu komo yakpan̂e me awexi xe wasî. Aaxatî pîn komo weken̂emekn̂e me awexi xe wasî, kekn̂e roro.

36 On wara marha kekn̂e roro Kporin komo yamatan yir̂mikyataw hara, Apa, amok hara Ixaw Yana komo cheka hara mer̂pono pîn miw komo cheka, kekn̂e. Ero wa kekn̂e roro Moises.