Taa, ero yinhîrî tak Kporin komo nîmtapowakn̂e xa hara Moises yakro. Axawa imo po rma exitaw so nîmtapowakn̂e Sinai Yîpîn yamrinawno po. 2-înhîrî cimn̂ipu po nîmtapowakn̂e, 1-înhîrî nuun̂i po. Ero wicakî exitaw Exitu poi mohtoponhîrî komo nîmtapowakn̂e Moises yakro.

2 On wara kekn̂e yîwya, Ai Moises, on wara kasko Ixaw Yana komo ya, Awatotoponhîrî komo me eseresmacoko yukuknomaxapu po xa.

3 On nuun̂i po rma ero me eseresmacoko, 14-nhîrî kaamo po awaparanwataw xa. On wara men ero yimawnonho me eseresmacoko, wîîkekn̂e awya so, ero yaw roro men eseresmacoko oroto, kasko yîwya so, kekn̂e. Ero wa kekn̂e Moises ya.

4 Ero ke ero wara rma kekn̂e Moises Ixaw Yana komo ya. Ai oyakno komo, Kwatotoponhîrî me takî tî ceseremetu, kekn̂e yîwya so.

5 Ero ke ero me tak n̂eseresmetken̂e axawa imo po cexitaw so Sinai yaxawan po. Yihcirî n̂uun̂i po n̂eseresmetken̂e, 14-nhîrî kaamo po awarpanwataw xa. Ero yipu poko Moises panatanmekyakn̂e Kporin komo ero wa kachonho yaw roro rma n̂eseresmetken̂e Ixaw Yana komo.

6 Kicicme ehxapu me tko tî xatken̂e anarî komo kîrkomo tooto pen yokoputho yaperî ke. Ero yanme Kwatotoponhîrî me eseresmara thakwa tî xatken̂e ero po. Ero ke Moises yaka mokyatken̂e n̂examro ero kaamo po, Araw komo yaka.

7 On wara ketken̂e yîwya so, Ai apa, kicicme ehxapu me nas amna tooto pen yokoputho yaperî ke. Ahce kacho Kporin komo ya tîmsom tîmîhra amna nai Ixaw Yana komo yakro? Ahce kacho amna tîmîhra nai kpoyino komo yakro yukuknomaxapu po? ketken̂e yîwya.

8 On wara kekn̂e Moises yîwya so, Ahri ka, Kporin komo mtapotarî ka wencesî. Ero wa n̂examro panatanmeko ero poko, kacho ka wencesî, kekn̂e.

9-10 Ero yinhîrî on wara kekn̂e Kporin komo Moises ya ero poko, On wara kasko Ixaw Yana komo ya, On wara na matu anarimaw, kicicme na matu okoputho yaperî ke awya so. Anarimaw mooxe na matu esama yaw. Ero wa awexitaw so Kporin komo ya Awatotoponhîrî komo yimawno me eseresmacoko rma.

11 2-nhîrî nuun̂i po eseresmacoko, 14-nhîrî kaamo po ha. Awarpanwataw xa tak eseresmacoko, awokuthîrî komo pun tonocoko. Awru komo marha tohcoko wahrututpamnî mak. Naatî yeperîrî marha ahcoko cîmîkno ha. Ero wara eseresmacoko.

12 Ero yimaw awotî komo yakwenho yîmtora ro mak men ehcoko cenmaxi ro. Awotî komo yocho yaxikwora marha ehcoko. Ero wa xa eseresmacoko Awatotoponhîrî komo yimawno me. Moises ya wîîkekn̂e ero wa kachonho yaw roro rma eseresmacoko.

13 Anarimaw on wara na nai apoyino komo, kicicme ehxapu me exihra rma na nai. Mooxe esama yaw exihra marha na nai. Noro yipu rma tko eseresmara na nai Awatotoponhîrî komo yimawno me okwe. Ero wa exitaw noro yipu twaihkapore nasî tîyanan komo chewno pîn me tak ehtome. Ero wa twaihkapore nasî Kporin komo ya tîmsom tîmîhra exirî ke yukuknomaxapu po. Kicicme nasî noro yipu okwe.

14 Anarimaw acheka so mohxapu ceseresma xe na nai Kporin komo ya Awatotoponhîrî komo me. Ero wa ceseresma xe cexîtaw kape rma. Kporin komo mtapotarî yaw roro makî tko n̂eseresmape. Ero wa panatanmecoko acheka so mohxapu komo, Ixaw Yana komo wara xa marha men eseresmacoko Watotoponhîrî komo me aweseresmetaw so, kasko yîwya so, kekn̂e. Ero wa kekn̂e Kporin komo Moises ya.

15 Taa, on wara xakn̂e Kesentacho, Kporin komo mtapotarî mîn ha, ciitîkache rma tak kaweresî nahruyakn̂e. Kokon̂i exiche tak kaweresînhîrî n̂etakîcekn̂e wehto warai me hara. Kesentacho yepoi tak xakn̂e cenmaxi ro.

16 Ero wara roro xakn̂e. Katpanaw kaweresî me xakn̂e ero yepoi. Kosope xakn̂e wehto warai me hara.

17 On wara xatken̂e Ixaw Yana komo, kaweresî yawomyataw Kesentacho meretîn̂i, cetken̂e tak n̂examro esama yaw. Ero yinhîrî tak kaweresî yeremetaw hara, n̂etakriyatken̂e tak.

18 Ero wara roro cetken̂e Ixaw Yana komo, Kporin komo yanme mak cetken̂e esama yaw. Noro yanme marha n̂etakriyatken̂e hara. Tohra exitaw kaweresî Kesentacho yepoi iito marha xatken̂e Ixaw Yana kom hara tohra.

19 Anarimaw pahkî xakn̂e kaweresî Kesentacho yepoi. Ero wa exitaw Kporin komo yanme xatken̂e Ixaw Yana komo iito rma pahkî.

20 Anarimaw so asakî ro mak n̂enmayakn̂e kaweresî Kesentacho yepoi. Ero wa exitaw so tohra xatken̂e. Kaanî mtapotacho wara rma n̂ewehcatken̂e, Iito rma ka ehcoko, kacho wara rma. Kaweresî toche tak cetken̂e hara. Kaanî mtapotacho wara xa marha n̂ewehcatken̂e tîtotome so hara. Kosope so rma awomuche kaweresî ero yimaw so rma cetken̂e, katpanaw so marha.

21 Anarimaw so yohno mak xakn̂e kaweresî Kporin komo mîn yepoi. Kokon̂i xakn̂e iito, enmapuche hara nawomyakn̂e hara. Ero wa awomuche cetken̂e xa hara Ixaw Yana komo esama yaw. Katpanaw so awomuche ero yimaw so marha cetken̂e. Kosope awomuche hara ero yimaw so rma cetken̂e.

22 Iito rma exitaw kawaresî Kesentacho yepoi tohra xatken̂e Ixaw Yana komo esama yaw. 2 kaamo mak exitaw iito tohra rma xatken̂e, 1 nuun̂i exitaw iito rma xatken̂e tohra marha xatken̂e, 1 cimn̂ipu exitaw iito rma tohra rma xatken̂e. Awomuche mak tak cetken̂e hara esama yaw. Ero wa roro xatken̂e Ixaw Yana komo.

23 Kporin komo yanme mak iito rma xatken̂e cetarî komo yaw. Noro yanme marha cetken̂e hara esama yaw. Kporin komo mtapotarî n̂ewehcatken̂e xa Moises ya kekn̂e ero yaw roro xatken̂e. Ero wa xatken̂e.