1-2 Taa, ero yinhîrî tak on wara kekn̂e hara Kporin komo Moises ya, Ai Moises, on wara kasko Araw ya, Ramha mko ciir̂ataw ecepu pona mîîmo rakatarî wece cewru cirko. Ero wa cirko ramha komo, 7 kom ha, mehxan weipotome maxixin ha, kasko, kekn̂e. Ero wa kekn̂e Kporin komo Moises ya.

3 Ero ke ero wara rma n̂iir̂akn̂e Araw, Kporin komo kekn̂e Moises ya ero yaw roro rma. Ramha komo n̂ewkor̂mekn̂e mîîmo rakatarî wece cewru ramha ecepu poi weipotome. Moises ya kekn̂e Kporin komo ero yaw roro n̂iir̂akn̂e.

4 On warai mîn xakn̂e ramha yecepu, ooru ciixapu mîn xakn̂e, aama ke ciixapu. Ero wa xakn̂e yîhtarî, ecepu marha ahnoro, epemrutun me enporixapu meero. Ramha yecepu kuknon n̂enpekn̂e Kporin komo Moises ya ero yaw roro rma n̂iir̂akn̂e. Ero wa n̂iir̂akn̂e.

5-6 On wara marha kekn̂e Kporin komo Moises ya, On wara cirko Repita komo, n̂examro an̂ihko Ixaw Yana komo chewnonho. N̂examro tak akir̂wamakî.

7 On wara akir̂wamakî, n̂examro caramakî tuuna ke akir̂wamachome so. Ero yinhîrî on wara kasko yîwya so, Ahpoci komo pahtîkacoko ahnoro. Ero yinhîrî tak aponon komo korokacoko hara kir̂wan̂he awehtome so, kasko yîwya so.

8 Ero yinhîrî on wara kasko hara yîwya so, Bui aacoko Kesentacho komo potaka, asakî aacoko kar̂pamxan warai re. Puruma aposokaxapu aacoko anarî yakro rma. Katî yakro ceskem. Anarînhîrî aacoko bui Kaan ya tîmsom me hara, kicicme awehtopo komo yahrutopo me tîmsom me hara.

9 Ero yinhîrî Repita komo tak an̂ihko Kesentacho komo potaka. Ixaw Yana komo marha an̂ihko ahnoro iina xa marha.

10 Ohyaka xa eeko Repita komo. Iina ekîche yîhtîpîrî komo tak nahsîcowpe Ixaw Yana komo.

11 Ero yinhîrî Repita komo tak nîmpe Araw owya. Ixaw Yana komo nîmîtho rma mîkyam ero wa tîmxapu komo. Ero wa nîmpe omîn yawno pokono ro me tak ehtome so.

12 Ero yinhîrî Repita komo tak bui tîpîrî nahsîcowpe asakno roro rma. Ahsîche anarî tîmcoko owya kicicme n̂examro yehtopo yahrutopo me. Anarînhîrî tak akn̂itîkacoko owya tîmsom me. Ero wa xa kicicme Repita komo yehtopo ahrucoko.

13 Ero yinhîrî on wara kasko Repita komo ya, Xiya epanatocoko Araw yeepatai, yumumuru komo yeepatai marha. Piiri ececetocoko, kasko yîwya so. Ero wa epanatoche so n̂examro tak tîmko owya ahnoro Repita komo.

14 Ixaw Yana komo warai pîn me cirko Repita komo. Omaywenî ro me xa tak naxe n̂examro reha.

15 Ero yinhîrî tak Repita komo n̂ehcowpe Kesentacho pokono ro me. Ero poko tak n̂ehcowpe. Ero wa nasî Repita komo yakir̂wamacho, owya tîmtopo marha. Powpow me tîmxapu wara rma naxe, owya tîmxapu ha.

16 Ixaw Yana komo poyino rma re mîkyam Repita komo, owya tîmxapu me so ha tko ahnoro. Ixaw Yana komo mumuru komo yemtakan me hara wahsîye, poturme ewruxapu komo yemtakan me ha.

17 Owyanî ro me xa naxe Ixaw Yana mumuru komo, poturme ewruxapu komo ahnoro. Ero wa naxe yumumuru komo, iyoku xîkrî komo marha. Exitu pono mumutho pen komo Ow waihkekn̂e potuthîrî pen komo. Ero kaamo po xa Ixaw Yana komo mumuru tak wahsîyakn̂e owyanî ro me.

18 Ero yinhîrî tak Repita komo wahsîye hara Ixaw Yana komo mumuru yemtakan me hara, poturme ewruxapu komo yemtakan me ha.

19 Ero ke Repita komo tak wîmye Araw komo ya, yumumuru komo ya marha Kesentacho poko ehtome so n̂examro yakro. Ixaw Yana komo yanme naxe Kesentacho yenîn̂e me. Ixaw Yana komo yehtoponho yahrutopo tîmn̂e me marha naxe eper̂a nahsîrî mera ehtome so omîn potaka tmokuche so, kekn̂e. Ero wa kekn̂e Kporin komo Moises ya.

20 Ero ke ero wara rma Repita komo n̂iir̂atken̂e Moises komo, Araw yakro. Ixaw Yana komo yakro rma ero wa n̂iir̂atken̂e. Kporin komo kekn̂e Moises ya ero yaw roro rma n̂iitîketken̂e.

21 N̂etakir̂wametken̂e tak Repita komo, tponon komo marha koroketken̂e. Ero yinhîrî n̂examro tak nîmyakn̂e Araw Kporin komo ya. Kicicme ehtopo komo yahrutopo marha nakn̂iyakn̂e akir̂wamachome.

22 Ero yinhîrî mokyatken̂e tak Repita komo Kesentacho yaka ero pokono me ehso. Araw nantomarî me tak xatken̂e ero poko, yumumuru komo nantomarî me marha. Ero wa Repita komo n̂iir̂atken̂e Araw komo. Kporin komo kekn̂e Moises ya ero yaw roro rma n̂iir̂atken̂e.

23-25 Ero yinhîrî on wara kekn̂e hara Kporin komo Moises ya, On wara marha n̂ehcowpe Repita komo, kîrkomo mohcowpe Kesentacho poko ehso. 25 cimn̂ipu ehxapu komo mohcowpe. Ero yopono komo marha mohcowpe 50 cimn̂ipu me ehtopo komo pona roro. Ero wicakî exiche tak ewrutoponhîrî komo n̂eexi tak Kesentacho poko ehtopo komo. Ero pokohra tak n̂ehcowpe 50 cimn̂ipu yopo exitaw ewrutoponhîrî komo.

26 Ero yopo exitaw so ewrutoponhîrî komo takno komo yakronoman̂e me rma n̂ehcowpe Kesentacho poko exitaw so. Kesentacho yawno poko xa tko exihra ro mak n̂ehcowpe. Ero wara xa Repita komo antomacoko, kekn̂e. Ero wa kekn̂e Kporin komo Moises ya.