1-2 Taa, ero yinhîrî on wara kekn̂e hara Kporin komo Moises ya, Araw komo ya, Repita komo tak yukuknomacoko Koace yepamtho komo mak ka. Osotî komo mewretaw yîîm komo yosotî mahyaw so rma mewrecoko, porin pen komo yosotî mahyaw so marha.

3 Kîrkomo mak yukuknomacoko 30 cimn̂ipu ehxapu komo mak ha. Iyopo ehxapu komo marha yukuknomacoko 50 ehxapu komo marha. Ero yopono komo mewrera tak ehcoko. Noro yipu komo ciicoko omîn yawno pokono me.

4 On warai pokono me so n̂ehcowpe n̂examro, Koace yepamtho komo, Kesentacho yawno komo pokono me, omîtwono pokono me xa. Ero yipu pokono me n̂ehcowpe.

5-6 Awetarî komo yai awcetaw so esama yaw Kesentacho yaka tak mohcowpe Araw, tumumuru komo yakro. Oyamtakpon yahruru tak n̂enîhtocowpe. Iike rma tak omtapotarî yen nahrucowpe yamata ha. Ero yinhîrî ero rma nahrucowpe xa hara wiir̂a warai picho ke hara. Ero yinhîrî tak ero nahrucowpe xa hara pono ke hara tîswayem ke. Aatopo komo tak numuncowpe emekna warai yaro.

7-8 Ero yinhîrî tak cuure yapon nahrucowpe hara poono ke, tîswayem ke ha. Ahruxapu pona tak n̂iicowpe paayu, kaxara yamehtopo, tutum, wooku yen, ero komo n̂iicowpe ero rataka so. Iito rma tko n̂expe cuure warai aapo po rma. Taa, ero komo ciitîkache ahnoro tak nahrucowpe poono ke hara cucurem ke hara. Ero tak nahrucowpe xa hara wiir̂a warai picho ke hara. Aatopo tak numuncowpe emekna warai yaro.

9-10 Ero yinhîrî tak weeyu yecepu nahrucowpe hara poono ke tîswayem ke. Ramha komo meero nahrucowpe, etahsîtopo mahkototopo marha, paayu warai marha, katî yen marha cetahsîsom yen ha. Ero warai nahrucowpe tîswayem ke. Ero yinhîrî ero yipu ahnoro womtocowpe wiir̂a warai picho ke hara. Ero wa ahruche aatopo pona nakricowpe weewe pona.

11 Kotoporem yakn̂itopo marha nahrucowpe ooru ke yîmkarinomaxapu. Poono ke nahrucowpe tîswayem ke. Ero yinhîrî tak nahrucowpe xa hara wiir̂a warai picho ke hara. Ero yinhîrî tak aatopo komo numuncowpe emekna yaro.

12 Ero yinhîrî omîn yawno pokono komo tak nahrucowpe hara poono ke tîswayem ke. Ero marha tak nahrucowpe xa hara wiir̂a warai picho ke hara. Ero yinhîrî aatopo ro pona nakricowpe weewe pona.

13-14 Ero yinhîrî wemronho tak nowcowpe tîmsom yakn̂itopo pono, bronse ciixapu pono ha. Towîche akn̂itopo nahrucowpe poono ke camnarexapu ke. Ero rataka tak n̂iicowpe akn̂itopo pokono komo. Wehto yen, okno puntho paraxkacho, caarapa warai, tutum, ero yipu komo ahnoro n̂iicowpe poono rataka. Iina ciriche nahrucowpe wiir̂a warai picho ke. Ero yinhîrî tak aatopo komo numuncowpe emekna yaro.

15 Ero wa omîn yawno komo nahrucowpe Araw komo omîtwono komo xa. Yumumuru komo marha nahrucowpe tîîm komo yakro. Ero wa ahruche, awtotopo komo po xa tak esama yaw Koace yepamtho komo tak mohcowpe ero komo yaan̂e. Omîtwono komo yapehra ro makî tko n̂ehcowpe ha. Apeche waihyaxe ro mak ha men okwe. Kesentacho yawno komo rma naar̂axe ahruxapu mak. Ero wa naar̂axe, kekn̂e Kporin komo.

16 On wara marha kekn̂e Noro Moises komo ya, Ereasa xa cirko Kesentacho yawno yenîn̂e me etpoyino pîn yenîn̂e me. Araw mumuru mîk Ereasa ohyaka tmohsom mumuru. Ramha katî yenîn̂e me cirko, kotoporem yenîn̂e me marha takn̂isom ha. Katî yenîn̂e me marha cirko anarî hara katî, omîn yawno yenîn̂e me ciino ritopo kat ha. Ahnoro omîn yawno komo yenîn̂e me cirko noro. Oyamtakpon yawno komo yenîn̂e me meero cirko noro. Ero yipu yenîn̂e me cirko Ereasa.

17-20 On wara marha kekn̂e Kporin komo Moises ya, Araw komo ya ha, Koaceta komo yîtwermakî waipîra ehtome so. Twaihkaxmu mera men n̂ehcowpe. Repita komo chewno me exihra tak naxe okwe waipuche so. Oyamtakpon yawno komo yaka xa mokuche so Kaan mîn yawno mko yahruyataw waihyaxe men okwe. Ero ke Araw komo cokorî ka mohcowpe omîn yaka ero komo ahruso. Ahruche mak tak Koaceta komo mohcowpe tînarîrî komo wece. Araw komo mak n̂ehcowpe n̂examro yantoman̂e me yînarîrî komo poko. Ero arko amoro, on arko amoro hara, kexe Koaceta komo ya. Ero wa nantomexe waipîra ehtome so, kekn̂e. Ero wa kekn̂e Kporin komo Moises komo ya.

21-23 On wara marha kekn̂e Kporin komo Moises ya, Xehson yepamtho komo marha yukuknomacoko. Osotî komo mewretaw yîîm komo yosotî yakro so mewrecoko, porin pen komo yosotî yakro so marha. Kîrkomo mak yukuknomacoko 30 cimn̂ipu ehxapu komo. Ero yopo ehxapu komo marha yukuknomacoko 50 cimn̂ipu ehxapu komo meero. Ero yopono komo reha yukuknomara ehcoko. Ero warai komo yukuknomacoko Kesentacho pokono komo.

24-26 On warai pokono me reha n̂ehcowpe n̂examro, Xehson̂ita komo reha, Kesentacho yaan̂e me n̂ehcowpe, roona warai yaan̂e me n̂ehcowpe, ahruru yaan̂e me. Yîmkarino yaan̂e me marha n̂ehcowpe wiir̂a warai picho yaan̂e me ha. Amtakpo yahruru yaan̂e me marha, mîîmo potarî yahruru marha, mîîmo wacan marha poono, tîmsom yakn̂itopo wacanî rma mîn ero, waaca potarî yahruru marha, waaca mici marha, ero yipu yaan̂e me n̂ehcowpe Xehson̂ita komo.

27 Ahce poko so na exitaw so, mîîmo ciitopo poko exitaw so, yixkacho poko anarimaw, aatopo poko anarimaw, ahce na poko exitaw so Araw xa n̂expe n̂examro yantoman̂e me tumumuru komo yakro rma. Ero poko ehcoko amyamro Araw, amumuru komo yakro rma. Xehson̂ita komo antomacoko yînarîrî komo poko.

28 Ero yipu pokono me n̂ehcowpe Xehson̂ita komo Kesentacho yahruru yaan̂e me ha. Itama xa cirko n̂examro yantoman̂e me, Araw mumuru, ohyaka tmohsom mumuru ha.

29-30 Taa, Merari yepamtho komo marha yukuknomacoko kîrkomo mak. 30 cimn̂ipu ehxapu komo yukuknomacoko. Ero yopono komo marha yukuknomacoko 50 cimn̂ipu ehxapu komo meero. Ero yopono komo reha yukuknomara ehcoko. Ahnoro yukuknomacoko Kesentacho pokono kom ha.

31-32 On warai yaan̂e me n̂ehcowpe n̂examro hara Kesentacho me ciisom yaan̂e me. Sahsamaxapu yaan̂e me n̂ehcowpe mîîmo wacan ha, makwanan, mapatan, mapata yecetî, roro wacan yaporwan, ero yecetî, roowo cheka tpasahtosom, waaca mici, ero yipu pokono, ciitopo komo marha. Ero warai komo yaan̂e me n̂ehcowpe. On xa arko amoro, kacowpe Araw komo yîwya so etpoyino pîn komo ya. Yînarîrî komo n̂etacicowpe.

33 Ero yipu yaan̂e me n̂ehcowpe Merari yepamtho komo Kesentacho yaar̂ataw awya so. Itama n̂expe n̂examro yantoman̂e me, Araw mumuru ha, ohyaka tmohsom mumuru ha, kekn̂e. Ero wa kekn̂e Kporin komo Moises ya.

34 Ero yinhîrî tak Koacita komo nukuknometken̂e Moises komo, Araw yakro, Ixaw Yana yantoman̂e komo yakro marha. Yukuknometaw osotî komo mewretken̂e yîîm komo yakro so, porin pen komo yosotî yakro so marha.

35 Kîrkomo mak nukuknometken̂e 30 cimn̂ipu ehxapu komo. Ero yopo ehxapu komo marha nukuknometken̂e 50 cimn̂ipu ehxapu komo meero. Ero yopo ehxapu komo reha yukuknomara xatken̂e. Kesentacho pokono komo mîkyam nukuknometken̂e ahnoro.

36 2.750 mîkyam xatken̂e. Porin pen komo yosotî yakro so osotî komo mewretken̂e.

37 Ero wicakî xatken̂e Koacita komo Kesentacho pokono kom ha. Kporin komo mtapotarî yaw roro rma n̂examro nukuknometken̂e Moises komo Araw yakro, Moises ya kekn̂e ero wa kacho yaw roro.

38-40 Ero yinhîrî tak Xehson yepamtho komo nukuknometken̂e hara. Yukuknometaw yîîm komo yosotî yakro mewretken̂e, porin pen komo yosotî yakro marha. Kîrkomo mak nukuknometken̂e 30 cimn̂ipu ehxapu komo. Ero yopo ehxapu komo marha nukuknometken̂e 50 cimn̂ipu ehxapu komo meero. Ero yopo ehxapu komo reha yukuknomara xatken̂e. Kesentacho pokono komo mîkyam nukuknometken̂e ahnoro. 2.630 yakenon mîkyam xatken̂e. Porin pen komo yosotî yakro so osotî komo mewretken̂e.

41 Ero wicakî xatken̂e Xehson yepamtho komo, Kesentacho pokono kom ha. Moises komo nukuknometken̂e, Araw yakro. Kporin komo mtapotarî yaw roro rma nukuknometken̂e.

42-44 Merari yepamtho komo marha nukuknometken̂e. Osotî komo mewretaw yîîm komo yosotî yakro so mewretken̂e. Porin pen komo yosotî yakro so marha mewretken̂e. Kîrkomo mak nukuknometken̂e 30 cimn̂ipu ehxapu komo. Ero yopo ehxapu komo marha nukuknometken̂e 50 cimn̂ipu ehxapu komo meero. Ero yopo ehxapu komo reha yukuknomara xatken̂e. Kesentacho pokono komo mîkyam nukuknometken̂e ahnoro. 3.200 mîkyam xatken̂e. Porin pen komo yosotî yakro so mewretken̂e osotî komo.

45 Ero wicakî xatken̂e Merari yepamtho komo Kesentacho yaan̂e kom ha, Moises komo nukuknometken̂e Araw yakro. Kporin komo mtapotachonho yaw roro rma nukuknometken̂e.

46 Ero wa nukuknometken̂e Repita komo ahnoro. Yukuknometaw yîîm komo yosotî yakro so mewretken̂e, porin pen yosotî yakro so marha. Moises komo xatken̂e yukuknoman̂e komo, Araw yakro, Ixaw Yana yantoman̂e komo yakro marha. Ero wa xatken̂e yukuknoman̂e komo.

47-48 Kîrkomo mak nukuknometken̂e 30 cimn̂ipu ehxapu komo. Ero yopono komo marha nukuknometken̂e 50 cimn̂ipu ehxapu komo meero. Ero yopono komo reha yukuknomara xatken̂e. Kesentacho yaan̂e komo mak nukuknometken̂e. 8.580 mîkyam xatken̂e.

49 Kporin komo mtapotarî yanme rma tînarîrî komo nîhtînoyatken̂e, ahce na poko cehtopo komo marha nîhtînoyatken̂e Noro yanme marha. Moises ya kekn̂e Kporin komo ero yaw roro marha n̂etahcatken̂e pokono ro me n̂examro yehtopo. Ero wa n̂etahcatken̂e.