Taa, Araw mumuru komo yehtopo wekatîmyas hara awya so. On wara xatken̂e noro mumuru komo Kporin komo mtapowataw Moises yakro Sinai Yîpîn po.

2 Araw mumuru komo yosotî tan wetahcasî, Natabe mîk xakn̂e potuthîrî ha. Abiu mîk xakn̂e ponan hara, Ereasa hara, Itama hara.

3 Ero wa xatken̂e Araw mumuru komo. Yîhkapexapu komo mîkyam xatken̂e, Kporin komo ya tîmsom pokono me ciixapu kom ha.

4 On wara tko xatken̂e Natabe pen hara, Abiu pen yakro, waihyatken̂e n̂examro pen okwe Kporin komo yamtakpon mîtkoso rma. Anarî men ke wehto ke kotoporem nakn̂iyatken̂e kica. Ero ke waihyatken̂e axawa imo po cexitaw so. N̂examro pen xîkîtho exihra ro mak xatken̂e. Ero ke Ereasa komo mak xatken̂e Kporin komo ya tîmsom pokono me, Itama yakro rma. Ero poko xatken̂e tîîm komo maywen me, Araw maywen me ha.

5-6 Ero yimaw on wara kekn̂e hara Kporin komo Moises ya, Repita komo eeko xiya omîn potaka. Iito tak Araw maywen me tak n̂examro cirko, ohyaka cewomsom maywen me ha.

7 Noro yanme n̂etapickacowpe, Ixaw Yana komo yanme marha. Kesentacho yaw mak n̂etapickacowpe. Kesentacho yawno poko mak n̂ehcowpe.

8 Aapo komo yenîn̂e me n̂ehcowpe, weeyu yenîn̂e me marha, tîmsom akn̂itopo yenîn̂e me marha, ahnoro ero yipu yenîn̂e me. Ero yipu komo poko mak n̂ehcowpe n̂examro Ixaw Yana komo yakronoman̂e me. Kesentacho yawno poko mak n̂etapickacowpe.

9 Araw maywen me tîmko Repita komo, yumumuru komo maywen me marha. Noro maywenî ro me tîmko. N̂examro mak tîmko yîwya Ixaw Yana komo poyino ha.

10 Araw komo reha cirko tîmsom pokono ro me, yumumuru komo yakro rma. N̂examro mak n̂ehcowpe ero warai me. Anarî mokyataw omîn yaka noro yipu men waihkacoko, kekn̂e. Ero wa kekn̂e Kporin komo Moises ya.

11-12 On wara xa hara kekn̂e Kporin komo Moises ya, On warai komo wahsîyasî oyanton me. Poturme ewruxapu komo yahsîra wasî kîrkom ha. Emasîn yakan me ewruyataw wooxam, kîîrî me ciki ewruyataw, noro yipu komo yahsîra wasî. Repita komo xa matko wahsîyasî noro yipu komo yemtaka hara. Oyantonî ro me naxe Repita komo.

13 Owyan me rma naxe poturme ewruxapu. Exitu pono mumuru pen komo Ow waihkekn̂e, kîrkom ha. Ero yimaw rma Ixaw Yana mumuru komo wahsîyakn̂e hara oyantonî ro me. Ero wa so wahsîyakn̂e tooto mumuru, poturme ewruxapu, awoh komo xîkrî marha poturme ewruxapu ha. Owyanî ro me wa nat ha noro yipu komo. Aporinî ro komo xa Ow ha, kekn̂e. Ero wa kekn̂e Kporin komo Moises ya.

14-15 On wara marha kekn̂e Kporin komo Moises ya axawa imo po, Sinai Yîpîn yamrinaw ha. On wara kekn̂e, Repita komo yukuknomakî ahnoro kîrkomo mak. Cewn̂e nuun̂i ewrutoponhîrî ehxapu komo yukuknomakî, ero yopono komo marha yukuknomak ahnoro. Iito re mewreko osotî komo, noro re yepamtho komo yosotî, noro re me cehsom komo yosotî marha, kekn̂e. Ero wa kekn̂e Kporin komo Moises ya.

16 Ero ke Repita komo nukuknomekn̂e Moises, Kporin komo kekn̂e ero yaw roro rma nukuknomekn̂e, n̂examro yukuknomakî, kacho yaw roro.

17 On wara tî xatken̂e Repi pen mumutho komo, osotî komo ka tan wetahcasî, Xehson, Koace, Merari, ero wa so tî xakn̂e Repi pen mumutho komo yosotî.

18 On wara xatken̂e Xehson pen yepamtho, yumumuru komo yepamtho komo xa, Ribn̂i yepamtho komo, Simei yepamtho komo. Ero wa xatken̂e Xehson pen yepamtho komo.

19 On wara xatken̂e Koace pen yepamtho hara, yumumuru komo yepamtho komo xa, Amraw yepamtho komo, Xisa yepamtho komo, Ebron yepamtho komo, Usiew yepamtho komo. Ero wa xatken̂e Koace pen yepamtho komo.

20 On wara xatken̂e Merari pen yepamtho hara, yumumuru komo yepamtho komo xa, Maari yepamtho komo, Musi yepamtho komo. Ero wa xatken̂e Merari pen yepamtho komo.

21 On wara n̂esetacatken̂e Xehson pen yepamtho, yumumuthîrî komo yosotî poko rma n̂esetacatken̂e. Ribn̂ita komo, Simeita komo, ero wa n̂esetacatken̂e Xehson pen yepamtho komo.

22 On wicakî yakenon mîkyam xatken̂e, kîrkomo yukuknomacho mak, cewn̂e nuun̂i ewrutoponhîrî ehxapu komo, ero yopono komo marha. 7.500 mîkyam xatken̂e.

23 Kporin komo mîn mapitawno me xatken̂e Xehson pen yepamtho. Iito xakn̂e yîmîn komo kaamo yemicitopo n̂ixa. Iina n̂iir̂atken̂e tîmîn komo.

24 Eriasape xakn̂e Xehsonita komo yaan̂e me, Raew mumuru ha.

25-26 Kporin komo yakro Kesentacho pokono me cehsom mîkyam Xehson yepamtho. On warai pokono mîkyam, mîîmo xa roona warai, mîîmo potarî yahruru, waaca metatan yahruru, Kaan mîn roron wacan, iipo nasî Kaan ya tîmsom yakn̂itopo ero wacan ha, waaca mici komo marha, ero pokono mîkyam. Ero yipu pokono me xatken̂e Xehson yepamtho komo.

27 On wara xatken̂e Koace pen yepamtho kom hara, Amramita komo, Xisarita komo, Ebronita komo, Usierita komo, ero wa n̂esetacatken̂e Koace pen yepamtho komo.

28 Noro yipu komo nukuknometken̂e Moises komo kîrkomo mak, cewn̂e nuun̂i ewrutoponhîrî ehxapu komo, ero yopono komo marha. 8.600 mîkyam xatken̂e. Kporin komo mîn yawno yenîn̂e me xatken̂e n̂examro Koace pen yepamtho komo.

29 On wara xatken̂e Koace yepamtho komo, tîmîn komo n̂iir̂atken̂e Kporin komo mîn mîtkoso suu n̂ixa.

30 Erisapan xakn̂e Koaceta komo yantoman̂e me, Usiew mumuru ha.

31 On pokono komo mîkyam Koace yepamtho komo, Kporin komo yamatan yenîn̂e mîkyam, cuure warai yapon, Kaan mîn weyuru, kotoporem yakn̂itopo, okno puntho yakn̂itopo, mîn hak yen komo Kaan mîn yaw poko ehtopo komo, Kporin komo yamtakpon mahruru, ero warai yenîn̂e mîkyam Koace yepamtho komo.

32 Taa, ahnoro Repita komo yantoman̂e me xakn̂e Ereasa reha, Araw mumuru, Kporin komo yaka cewomsom mumuru. Kporin komo mîn yawno yenîn̂e komo yantoman̂e mîk xakn̂e. Ero pokono mîk xakn̂e Ereasa.

33 Taa, on wara xatken̂e Merari pen yepamtho kom hara, Marita komo, Muhsita komo marha. Ero wa xatken̂e Merari pen yepamtho komo.

34 Noro yipu komo nukuknometken̂e kîrkomo cewn̂e nuun̂i ewrutoponhîrî me ehxapu komo, ero yopono komo marha. 6.200 mîkyam xatken̂e iyakenon komo. Ero wicakî xatken̂e Merari yepamtho komo.

35 Suriew xakn̂e Merari yepamtho komo yantoman̂e me Abiaiw mumuru ha. Tîmîn komo n̂iir̂atken̂e n̂examro Kaan mîn mîtkoso n̂ixa.

36-37 On warai pokono me xatken̂e n̂examro hara Merari yepamtho kom ha, Kporin komo mîn wacan yenîn̂e mîkyam xatken̂e sahsamaxapu yenîn̂e ha, waaca yecetî komo, mapata komo, mapata yecetî komo, mîn hak ciitopo komo, mîn hak yen kom ha. Ero yipu komo yenîn̂e mîkyam xatken̂e. Kporin komo mîn roron wacan yenîn̂e marha mîkyam xatken̂e, waaca aporwan, ecetî komo, roowo cheka tpasahtosom, waaca mici, ero warai yenîn̂e mîkyam xatken̂e Merari yepamtho komo.

38 Taa, on wara xatken̂e Moises komo, Araw komo, Araw mumuru komo, n̂examro yetarî xakn̂e Kaan mîn mîtkoso resce n̂ixa. Kesentacho potarî yecento rma xakn̂e. Kporin komo ya tîmsom pokono xa mîkyam xatken̂e. Ixaw Yana komo yanme tî nîmtapowatken̂e Kporin komo yakro. Anarî ro komo mokyataw so Kaan mîn yaka twaihkapore nas okwe, kacho ponaro xatken̂e. Ero wa xatken̂e.

39 Taa, Repita komo tak nukuknometken̂e Moises komo Araw yakro. Kporin komo yanme rma nukuknometken̂e. Osotî komo mewretaw yîîm komo yosotî yakro rma mewretken̂e. Kîrkomo nukuknometken̂e cewn̂e nuun̂i ewrutoponhîrî me ehxapu komo, ero yopono komo marha. 22.000 mîkyam xatken̂e ahnoro.

40 Ero yinhîrî on wara kekn̂e hara Kporin komo Moises ya, Ixaw Yana komo mumuru komo tak yukuknomacoko poturme ewruxapu komo mak. Cewn̂e nuun̂i ewrutoponhîrî me ehxapu komo yukuknomacoko, ero yopono komo marha. Yukuknometaw so osotî komo mewrecoko.

41 Ero yinhîrî Repita komo xa ahsîcoko oyantonî ro me. Ixaw Yana komo yemtakan me n̂examro ahsîko, poturme ewruxapu komo yemtakan me. Repita komo yok marha ahsîcoko Ixaw Yana komo yok yemtakan me, poturme ewruxapu yemtakan me. Noro yipu komo xa ahsîcoko. Aporin komo xa Ow ha, kekn̂e. Ero wa kekn̂e Kporin komo Moises ya.

42-43 Ero ke Ixaw Yana mumuru komo nukuknomekn̂e Moises poturme ewruxapu kom ha. Kporin komo mtapotachonho yaw roro rma nukuknometken̂e. Cewn̂e nuun̂i ewrutoponhîrî me ehxapu komo nukuknometken̂e, ero yopono komo xa marha. Osotî komo mewretken̂e. 22.273 mîkyam xatken̂e. Ero wicakî xatken̂e n̂examro.

44-45 Ero yinhîrî on wara kekn̂e hara Kporin komo Moises ya, Repita komo xa ahsîcoko oyantonî ro me, Ixaw Yana komo yemtakan me hara, poturme ewruxapu komo yemtakan me ha. Repita komo yoku marha ahsîcoko Kesentacho yaan̂e me Ixaw Yana komo yoku yemtakan me hara. Noro yipu komo xa ahsîcoko oyantonî ro me Repita komo. Aporin komo xa Ow ha, kekn̂e.

46-48 On wara marha kekn̂e Kporin komo, on wicakî naxe Ixaw Yana mumuru komo poturme ewruxapu komo, yaake naxe Repita komo yopono me. 273 naxe Repita komo yopono me. Ero ke ero wicakno komo n̂esepemacowpe 5 sikru so. Omîn yaw nasî sikru ero poko rma sikru yukuknomacoko tîmsomu ha. 20 xeera wicakno mîn sikru ha. Ero yipu ke n̂esepemacowpe. Puranta yahsîche yînmîthîrî komo Araw komo ya tîmcoko yumumuru komo ya marha. Ero wa tîmcoko iyopono komo yepetho, kekn̂e. Ero wa kekn̂e Kporin komo Moises ya.

49-50 Ero ke n̂examro yepetho tak nahsîyakn̂e Moises, Repita komo yopono komo yepetho ha. Repita komo rma re xatken̂e poturme ewruxapu komo yepetho me. Ecenarîra tko xatken̂e. Ero ke iyopono komo yepetho nahsîyakn̂e hara 1.365 sikru Ixaw Yana komo nîmîtho. Nasî sikru Kporin komo mîn yaw ero wicakno komo ke n̂esepemetken̂e poturme ewruxapu komo sikru pona ha.

51 Puranta tîmîche Moises ya ero rma tak n̂ekamyakn̂e hara Araw ya, yumumuru komo ya marha. Ero wa nîmyakn̂e Kporin komo mtapotacho yaw roro rma. Ero wa nîmyakn̂e.