1-2 Taa, on wara marha kekn̂e Kporin komo Moises ya, On wara kasko Ixaw Yana komo ya, On warai komo n̂ehcowpe awetarî komo yawhra, repra ken̂arî, ereh ken̂arî, tîkmotaxmu ken̂arî, kicicme ehxapu waixa pen yokoputho yaperî ke.

3 Ero warai komo n̂ehcowpe awetarî komo yawhra. Kîrkomo ero wa n̂ehcowpe, wooxam komo marha. Ero wa n̂ehcowpe awetarî komo yikicicirera ehtome. Awetarî komo yawno men Mîkro Noro ha. Ero ke yikicicirera cexpore nasî, kasko, kekn̂e. Ero wa kekn̂e Kporin komo.

4 Ero ke ero wara rma n̂iir̂atken̂e Ixaw Yana komo, ero warai ken̂arî komo naar̂atken̂e cetarî komo yai. Kporin komo kekn̂e Moises ya ero yaw roro rma ciino n̂iir̂atken̂e.

5-6 On wara marha kekn̂e Kporin komo Moises ya, On wara kacho tak ekatîmko Ixaw Yana komo ya, Anarimaw kicicme na nai apoyino komo, Kporin komo yanwekn̂e me na nai. Tpoyino komo na n̂emetanmekya kica. Ero wa na nai kîîrî, wooxam marha na anarimaw. Ero wa exitaw so kicicme naxe.

7 Ero ke kicicme cehtoponhîrî tak n̂ekatîmpe. Tîn̂emetanmekîthîrî tak n̂epemape noro kicicme cehtoponhîrî yecenarî xa. Ero yinhîrî kinta wicakî xa hara n̂epemape yîhremacho hara. Ero wicakî nîmpe epethîrî tîn̂emetanmekîthîrî ya.

8 Anarimaw emetanmexapunhîrî pen yananîhno exihra na nai okwe, epethîrî yahsîn̂e exihra. Ero wa exitaw kicicme ehtoponhîrî yepemacho nas Kporin komo purantan me. Tîmsom pokono ya rma nîmpe. Kahn̂eru marha nîmpe yîwya. Kicicme cehtoponhîrî yahruru me nîmpe tîmsom pokono ya.

9-10 Ero wa n̂expe ahnoro Ixaw Yana komo n̂ekîtho Kporin komo ya tîmsom ha. Tîmsom pokono yaka ekyataw yîwyan me tak nasî. Ero wa n̂expe yînmîthîrî komo ahnoro, kasko, kekn̂e. Ero wa kekn̂e Kporin komo Moises ya.

11-13 On wara marha kekn̂e Kporin komo Moises ya, On wara kasko Ixaw Yana komo ya, On wara na nai wooxam anarimaw ciin̂o yai ro na nai okwe. Ero wa cipici yehtopo yenîhra rma na nai iin̂o. Anarî poko ehtopo yenîn̂enho exihra na nai.

14 On wara tko na nîîke noro yin̂o, Anarî tko na nai opici poko kica, nîîke. Yaaro na ero wa nîîke anarimaw, kicicme rma na nai yipici. Tohnaw na ero wa nîîke anarimaw. Kicicme exihra rma na nai yipici.

15 Ero wa tîwya yîhtînoyataw cipici tak narpe tîmsom pokono yaka. Sepata yeperîrî yaposokaxapu marha narpe yîwya tîmsom 2 ritru mak. Cipici nîmrî mîn narpe iin̂o. Katî yakro esmara n̂expe sepata, kotoporem yakro marha esmara n̂expe. Cipici yewyomacho me tîmsom me exirî ke ero yipu yesmara n̂expe ero cheka. Kicicme rma nai ham, kacho me exirî ke ero yipu cheka esmara n̂expe.

16 Taa, tîmsom pokono tak yipici narpe Kporin komo yaka xa, Noro yepatai ececetotome.

17 On wara tak n̂irpe tîmsom pokono, tuuna ke narîhtope wooku yen er̂mo kahxapu. Tuuna ke narîhtope Kaan ya tîmxapu ke. Ero yinhîrî roowo pupuntho tak namekpe Kaan mîn yawno. Ero pahpe tuuna kwaka.

18 On wara kape tîmsom pokono wooxam ya, Tanî rma ka esko Kporin komo yepatai, kape. Yîhpoci tak nîmhokape. Noro yemyaka marha merurkape sepata aposokaxapu, kicicme noro yehtopo yîhtînomexpotopo. Ero yinhîrî tîmsom pokono tak nahsîpe tuuna, wooxam yîwîrîman̂e.

19 Ero yinhîrî on wara kape tîmsom pokono wooxam ya, Yaaro men kasko oroto Kaan n̂entarî me rma. On wara wîîkes awya kir̂wan̂he rma na mai, awenaka mokuhra ro mak na n̂ehxe anarî ha? Aan̂o yairo exihra rma na mehxe? Ero wa awexitaw awîrîmara exi xe was on tuuna cîmîkno, yîwîrîmano rin̂e ha, kape yîwya.

20 Anarimaw aan̂o yairo rma na mehxe, kicicme rma na mehxe kica. Anarî na mokye awenaka aan̂o pîn, kape hara.

21-22 On wara marha kape yîwya tîmsom pokono, Taa, Kaan n̂entarî me xa kasko. Awerepesî men Kporin komo tohnaw ketaw awya, kape tak. Kicicme awexitaw awîrîman̂e me exi xe wasî on tuuna. On yanme rma awethîrî wahrututpamyasî. Apetî marha macesî. Kporin komo rma ero wa awir̂asî. Apoyino komo nîwîrîyakarî me marha awir̂asî Noro. Kicicitho mîkro, kan̂e me naxe apoko. Kporin komo yanme rma ero wa naxe. Kaan nîwîrîmarî mîkro, kan̂e me marha naxe apoko Noro yanme, kape tîmsom pokono. Taa, on wara n̂eyukpe hara wooxam, Yaaro mîîkesî, ero wara rma orin̂e me exi xe wasî, kape. Ero wa wooxam kape.

23-24 Ero yinhîrî tak wooxam yîwîrîmacho mewrepe tîmsom pokono karita poko. Mewreche mewrexapu n̂ickape hara tuuna ke cîmîkno ke rma. Ero yinhîrî tak wooxam ya n̂erpope tuuna, cîmîkno, yîwîrîman̂e ha. Ero ke tak cesî yîropotaka cîmîkno me xa.

25-26 Ero yimaw rma ka Kaan ya tîmsom tak nahsîpe tîmsom pokono sepata aposokaxapu. Kicicme mehxe ham okwe, kacho mîn tîmsom. Ahsîche nanîmpe, powpow me Kporin komo ya tîmtome. Ero wa ciriche akn̂itopo yaka narpe sepata. Wahra mak ero poi nahsîpe tamorî ke. Ero nakn̂ipe akn̂itopo pona. Ero yimaw xa tak wooxam ya n̂erpope tuuna.

27 Tuuna yerpoche wooxam ya, kicicme ehxapu me exitaw, ciin̂o yairo ehxapu me exitaw noro pen tak nîwîrîmesî. Cîmîkî xa tak n̂ehtîkesî wethîrî yaw. Wethîrî wahrututpamnoyasî marha, petî macesî marha. Noro poyino komo marha tak nîmtapowaxe noro poko. Kaan nîwîrîmarî noro ham okwe, kexe tak.

28 Kicicme exihnî me tko exitaw wooxam, ciin̂o pîn pokononho pîn me exitaw Kporin komo nîwîrîmarî mera rma nasî. Nîmxîkwasî marha kir̂wan̂he.

29 Ero wa nasî apanatanmetopo komo ahyai ro so apici komo yîhtînoyataw awya so. Cin̂oyemu rma na cee anarimaw ciin̂o yai ro mak ekicicireso okwe.

30 Anarimaw cipici yewyomacho nîhtînoyasî mak noro yin̂o. Kîîrî tko na nai opici poko, nîîke na. Ero wa ketaw Kesentacho yaka cipici narpe Kporin komo yepatai ececetome. Ero wa apanatanmetopo komo yaw roro rma wooxam n̂irpe tîmsom pokono watohnî me ro mak.

31 Ero wa ciriche, Cipici yemetanmekn̂e pîn mîkro, kacho me rma nasî iin̂o. Wooxam xa nasî cen̂ekxamu me kicicme cexirî ke, kasko Ixaw Yana komo ya, kekn̂e. Ero wa kekn̂e Kporin komo Moises ya.