Taa, mawîrka kahyatken̂e xa hara. Yîswarexapu, camnarexapu, yucurexapu, ero warai kahyatken̂e. Kapuche tak Kaan mîn yawno pokono komo ponon me natpetken̂e. Araw ponon me natpetken̂e. Kaan mîn yawno noro totopo mîn natpetken̂e anana totopo pînî ro mak. Kaan kekn̂e Moises ya ero wa kachonho yaw roro rma natpetken̂e.

2 Eepoci ka kahyatken̂e. Ooru yatî rma kahyatken̂e mawîrka yakro. Yîswarexapu mîn kahyatken̂e, camnarexapu marha, yucurexapu marha. Riin̂u yatî yakro marha kahyatken̂e, kir̂wan̂he ekposîxapu yakro. Ero yipu kahyatken̂e eepoci me.

3 On wara tî ooru n̂iir̂atken̂e kahtome, papaknoyatken̂e panape cehso ro. Ero tak nawocetken̂e yaatî me. Ero tak kahyatken̂e mawîrka yakro. Yîswarexapu yakro, camnarexapu yakro, yucurexapu yakro, ero yipu yakro rma ooru kahyatken̂e. Riin̂u yakro marha kahyatken̂e, kir̂wan̂he ekposîxapu yakro. Yaana me kahyatken̂e, cenporem me ha.

4 Eepoci mici komo marha kahyatken̂e motawno kom ha. Ero tak natpetken̂e eepoci yen̂etî poko.

5 Aan̂apotu warai marha natpetken̂e. Eepoci me tatposom raconho rma natpetken̂e ero me. Ooru yatî kahxapu rma mîn xakn̂e aan̂apotu warai, mawîrka yakro kahxapu mîn xakn̂e. Yîswarexapu yakro, camnarexapu yakro, yucurexapu yakro, ero warai yakro kahxapu mîn xakn̂e. Riin̂u yakro marha kahyatken̂e, kir̂wan̂he ekposîxapu yakro. Ero yipu tak natpetken̂e aan̂apotu warai me. Kaan kekn̂e Moises ya ero wa kachonho yaw roro rma natpetken̂e.

6 Ero yinhîrî tak toopu ciki n̂enpor̂atken̂e hara oon̂ixi ha. Ero tak n̂iir̂atken̂e ahsîtopo yaka, ooru ciixapu yaka ha. Ero wa ciriche Ixaw pen mumutho pen komo yosotî mewretken̂e ero poko.

7 Ero wa mewreche ero komo tak nasîsîknoyatken̂e eepoci motawno poko. Tporin pen komo ponaro ehtome so Ixaw Yana komo ero wa n̂iir̂atken̂e. Kaan kekn̂e Moises ya ero wa kachonho yaw roro rma ha.

8 Aaraw yewantawno marha natpetken̂e yaana me xa marha. Eepoci wara rma kahyatken̂e. Ooru yatî, mawîrka yakro, yîswarexapu yakro, camnarexapu yakro, yucurexapu yakro, ero warai kahyatken̂e. Riin̂u yakro marha kahyatken̂e, kir̂wan̂he ekposîxapu yakro. Ero yipu kahyatken̂e.

9 Ececenarî re natpetken̂e akwerî, ehyatkawnon marha. 22 sencimetu n̂iir̂atken̂e akwerî, ehyatkawnon marha. Osopo natpetken̂e.

10 Ero yatpoche toopu ciki tak nasîsîknoyatken̂e ero rataka. 4 yatî tî n̂iir̂atken̂e toopu ciki. Epoi tî n̂iir̂atken̂e sahcu, toopaxu, kahbunkuru.

11 Ero mahyaka n̂iir̂atken̂e esmerawta, sapira, ciamanci, ero warai ha.

12 Ero mahyaka hara n̂iir̂atken̂e xasintu, akata, amecista, ero warai ha.

13 Ero mahyaka hara n̂iir̂atken̂e beriru, oon̂ixi, xaspe, ero warai n̂iir̂atken̂e toopu komo ciki. Ahsîtopo yaka rma n̂iir̂atken̂e, ooru ciixapu yaka.

14 12 xakn̂e toopuci Araw yewantawno pokono, Ixaw mumutho pen komo yosotî yecenarî rma. Anarî yosotî xakn̂e anarî poko, anarî yosotî xakn̂e anarî poko hara, ero wara roro xakn̂e toopuci komo ahnoro. Ixaw Yana tribun komo yosotî mîn xakn̂e tmewreso toopuci komo poko.

15 Ero yinhîrî on wara n̂iir̂atken̂e ero, Araw yewantawno ha, ooru yatî tak n̂ekmetken̂e ososwa wara, asakî.

16 Ahsîtopo marha n̂iir̂atken̂e ooru. Emekna marha n̂iir̂atken̂e ooru xa marha. Ero komo tak nasîsîknoyatken̂e Araw yewantawno yeknu poko.

17 Ero yinhîrî ososwa warai tak n̂imiyatken̂e ero komo poko, amoyekna warai poko.

18 Ososwa mapirî tak n̂imiyatken̂e toopuci yahsîtopo poko hara, eepoci motawno poko ha.

19 Ero yinhîrî amoyekna xa hara n̂iir̂atken̂e ooru xa marha. Ero komo ciriche Araw yewantawno yeknu poko nasîsîknoyatken̂e ropoyino pona ha. Noro yewantawno mkai xa ero komo n̂iir̂atken̂e eepoci yai.

20 Ero yinhîrî asakî xa hara n̂iir̂atken̂e amoyekna xa hara. Ciriche ero komo n̂imiyatken̂e eepoci poko. Aan̂apotu yepoi xa n̂imiyatken̂e poono yîpîpîsmacho na.

21 Ero yipu ciriche yimici ke tak n̂imiyatken̂e tîswayem ke. Amoyekna n̂imiyatken̂e etpoko ero yipu ke. Ero ke cimiso tak xakn̂e Araw yewantawno pee kahra ehtome. Ero wa n̂iir̂atken̂e Kporin komo mtapotachonho yaw roro rma, Moises ya kekn̂e ero wa kachonho yaw roro rma ha.

22 Ero yinhîrî eepoci mkarino tak n̂iir̂atken̂e hara. Poono kahyatken̂e tîswayem. Ero tak nawocetken̂e eepoci mkarino me.

23 Ero rakataw tak ewtarî nawocetken̂e. Sowtatu ponon nasî cewtake yîpîmtaw ero wa xa nawocetken̂e. Ewtarî yawotoche ero yen̂etî poko tak natpetken̂e poono xa hara etamxokara ehtome. Ero wa natpetken̂e.

24 Ero yinhîrî kahri yeperîrî warai tak natpetken̂e eepoci mkarino poko. Mawîrka rma natpetken̂e tîswayem ha, camnarexapu marha, yucurexapu marha. Riin̂u yakro rma natpetken̂e ero me kir̂wan̂he ekposîxapu yakro. Eepoci mkarino perî poko natpetken̂e.

25 Yoroyoro marha n̂iir̂atken̂e yaake ooru rma, esmanî ro ha. Ciriche eepoci mkarino perî poko tak yoroyoro n̂imiyatken̂e kahri warai yotaw so ha.

26 Ero ke on wara xakn̂e ero perî pokono komo, kahri warai me atpoxapu, yoroyoro, kahri warai hara, yoroyoro hara, ero wara roro xakn̂e ahnoro tapomritîkaxi ro. Ero yipu yaw cekn̂e Araw Kaan mîn yaka ahce na poko cehtome. Ero yipu n̂iir̂atken̂e Kporin komo mtapotachonho yaw roro rma, Moises ya kekn̂e ero wa kachonho yaw roro rma.

27 Anarî komo marha natpetken̂e Araw ponon me hara, yumumuru komo ponon me marha. Riin̂u kahxapu natpetken̂e ero yipu komo me, kir̂wan̂he ekposîxapu ha.

28 Araw xapikan marha natpetken̂e, yumumuru komo xapikan marha. Poono yamtarino marha. Ero yipu komo natpetken̂e riinu kahxapu rma, kir̂wan̂he ekposîxapu.

29 Aan̂apotu warai marha kahyatken̂e. Mawîrka kahyatken̂e ero me yîswarexapu, camnarexapu, yucurexapu, ero warai kahyatken̂e. Riin̂u yakro rma kahyatken̂e, kir̂wan̂he ekposîxapu yakro. Ero wa n̂iir̂atken̂e Kporin komo mtapotachonho yaw roro rma, Moises ya kekn̂e ero wa kachonho yaw roro rma.

30 Ooru marha papaknoyatken̂e panape cehso ro. Araw xapikan pokono ro mîn n̂iir̂atken̂e. Ciriche on wara kacho takî tî mewretken̂e ero poko, Kporin Komo Yanmen Xa Moso, kacho mewretken̂e. Wakîknoyatken̂e mewren̂e ro komo nmewretho wara rma.

31 Mewreche tak yimici n̂imiyatken̂e ero poko tîswayem ha. Ero ke n̂imiyatken̂e Araw xapikan poko. Ero wa n̂iir̂atken̂e Kporin komo mtapotachonho yaw roro rma, Moises ya kekn̂e ero wa kachonho yaw roro rma.

32 Ero yipu komo n̂iir̂atken̂e Kaan mîn me. N̂iitîketken̂e tak tara wara. Ero wa n̂iir̂atken̂e Kaan mîn, Kaan yakro kesentacho kom ha. Kporin komo mtapotachonho yaw roro rma n̂iir̂atken̂e, Moises ya kekn̂e ero wa kachonho yaw roro rma. N̂iitîketken̂e tak.

33 Ero yinhîrî tak Kaan mîn me ciisom tak n̂ekyatken̂e Moises yaka. Ahnoro n̂ekyatken̂e, mîîmo yahruru, aapo komo, weeyu, yamata, poono yahsîtopo, sahsamaxapu, aatopo komo, waaca yaporwan, aporwa yapon,

34 mîîmo mkarino komo, kahn̂eru picho yucurexapu, wiir̂a warai picho. Ero warai n̂ekyatken̂e mîîmo mkarino komo ha. Mîîmo rakatawno marha n̂ekyatken̂e poono ha.

35 Kaanî mtapotarî yen marha n̂ekyatken̂e yamata ha, aatopo komo marha, yamata yahruru marha, Amna pînîn yaw cma re masî, kacho ha.

36 Cuure yapon marha n̂ekyatken̂e. Ero payun komo marha. Puruma yupuxapu marha n̂ekyatken̂e. Kaan yehtopo kuknon mîn puruma.

37 Weeyu komo marha n̂ekyatken̂e cecehkem ha, ero pokono komo marha. Katî marha n̂ekyatken̂e ramha wokru ha.

38 Kotoporem yakn̂itopo marha n̂ekyatken̂e ooru ciixapu ke yîmkarinomaxapu, katî marha n̂ekyatken̂e Aaraw komo yîhkapetopo, kotoporem takn̂isom, mîîmo potarî yahruru poono ha,

39 Kaan ya tîmsom yakn̂itopo, ero rakatawno wehto yapon, bronse ciixapu komo ahnoro ha, kwahsî mayo warai komo, aapo pokono komo, esemokacho, yîhrepu marha,

40 Kaan mîn roron wacan poono, ero yaporwanî komo, aporwa yaponî komo, roro potarî yahruru, poono mici, roowo cheka tpasahtosomu komo. Ahnoro n̂ekyatken̂e Kaan mîn pokono komo, Kporin komo yakro kesentacho pokono komo ha.

41 Araw ponon marha n̂ekyatken̂e, Kaan mîn yaka ewomtopo. Kaan ya tîmsom poko exitawno marha n̂ekyatken̂e, yaw ehtopo kom ha. Araw mumuru komo ponon marha n̂ekyatken̂e Kaan ya tîmsom poko etapickatopo kom ha. Ahnoro ero yipu n̂ekyatken̂e.

42 Ahnoro n̂iir̂atken̂e Kporin komo mtapotachonho yaw roro rma, Moises ya kekn̂e ero wa kachonho yaw roro rma.

43 Ekîche yîwya so yîn̂ekîthîrî komo n̂een̂akn̂e Moises ahnoro. Nhnk, Kporin komo mtapotachonho yaw roro rma miice ham okre, kekn̂e Moises yîn̂irithîrî komo poko. Ero wa kache ciin̂enhîrî komo poko tak nîmtapowakn̂e Moises. Kaan yakro nîmtapowakn̂e n̂examro yakronomacho poko. Ero wa nîmtapowakn̂e Moises.