Taa, ero yinhîrî Kaan ya tîmsom yakn̂itopo nakîhcekn̂e hara sahsamaxapu, aakaxa yepu ha. Kaan ya tîmsom yakn̂itopo mîn nakîhcekn̂e. 1,3 metru n̂iir̂akn̂e kawnon. 2,3 metru n̂iir̂akn̂e ehyatkawnon. 2,3 metru xa marha n̂iir̂akn̂e akwerî hara. Ececenarî re xakn̂e ehyatkawnon, akwerî ha.

2 Paaka meretîrî warai marha n̂enpor̂akn̂e aakaxa yepu rma, 4 mak. Aapo yeknutaw n̂iir̂akn̂e. Aapo yecepu yar̂pîrî rma mîn n̂enpor̂akn̂e paaka meretîrî warai me. Aapo yakîhtotîkache tak ahnoro nîmkarinomekn̂e bronse ke.

3 Ero yinhîrî akn̂itopo pokono komo n̂iir̂akn̂e hara, bronse marha. Wemronho yen n̂iir̂akn̂e, wemronho yamehtopo, kamxuku yen, okno pun yanîmtopo, yîroron yaatopo. Ero warai komo n̂iir̂akn̂e bronse re mak.

4 Manari warai marha n̂iir̂akn̂e bronse rma. Wehto yapon mîn n̂iir̂akn̂e akn̂itopo yatumnawno, rakatawno xa.

5 Ero yinhîrî amoyekna komo tak n̂iir̂akn̂e aapo yatumnaka bronse rma. Eknutaw so n̂iir̂akn̂e mîîye warai yahsîn̂e komo.

6 Aatopo marha n̂enpor̂akn̂e asakî, aakaxa yepu. Enporiche nîmkarinomekn̂e bronse ke.

7 Yîmkarinomache ero numunukyakn̂e emekna warai yaro, akn̂itopo yawxawno yaro. Akn̂itopo yaatopo mîn xakn̂e kwahsî mayo warai. Ero wa nakîhcekn̂e akn̂itopo tpotokoi nakîhcekn̂e.

8 Esemokarî yen marha n̂iir̂akn̂e, yîhrepu marha, bronse rma. Wooxam komo kanapantho mîn n̂iir̂akn̂e ero warai me. Kaan mîn potaka mokyatken̂e wooxam komo ahce na ciiso n̂examro nîmyatken̂e tîkanapanthîrî komo ero me ciitome.

9 Ero yinhîrî Kaan mîn wacan n̂iir̂akn̂e hara. 46 metru ehyatkawnon n̂iir̂akn̂e waaca suu n̂ixan. Poono natpekn̂e waaca me riin̂u yatî kahxapu, kir̂wan̂he ekposîxapu ha.

10 20 aporwan n̂iir̂akn̂e suu n̂ixan ha. 20 marha n̂iir̂akn̂e aporwa yapon, bronse hara. Poono yahsîtopo marha n̂iir̂akn̂e prata ha.

11 46 metru ehyatkawnon marha n̂iir̂akn̂e waaca nohce wecan hara. 20 marha n̂iir̂akn̂e iina yan yaporwan hara. 20 marha n̂iir̂akn̂e aporwa yapon bronse hara. Poono yahsîtopo marha n̂iir̂akn̂e iina takrisom yahsîtopo prata hara.

12 23 metru ehyatkawnon n̂iir̂akn̂e oesce n̂ixan hara waaca, poono ha. 10 mak n̂iir̂akn̂e waaca yaporwan iitono. 10 marha n̂iir̂akn̂e aporwa yapon bronse hara. Poono yahsîtopo marha n̂iir̂akn̂e prata hara.

13 Ero wicakî ehyatkawnon xa marha n̂iir̂akn̂e resce n̂ixan hara waaca, 23 metru ehyatkawnon ha.

14 Iina n̂iir̂akn̂e waaca potarî kaamo yepatakacho n̂ixa. Waaca potarî xehxa n̂iir̂akn̂e poono waaca me. 6,9 metru kawnon n̂iir̂akn̂e iina takrisom poono. Iinan marha n̂iir̂akn̂e poono yaporwan, 3 mak. Iinan marha n̂iir̂akn̂e aporwa yapon komo 3 marha.

15 Ero wa xa marha n̂iir̂akn̂e waaca potarî yeco hara, poono n̂iir̂akn̂e waaca me hara. 6,9 metru ehyatkawnon xa marha n̂iir̂akn̂e iinan hara. Iinan marha n̂iir̂akn̂e poono yaporwan 3 hara, aporwa yaponî marha 3 xa marha.

16 Riin̂u yatî kahxapu mîn natpekn̂e poono, roro wacan me. Kir̂wan̂he ekposîxapu mîn kahyakn̂e. Ero wa n̂iir̂akn̂e roro wacan ahnoro tmamritîkaxi ro.

17 Bronse n̂iir̂akn̂e aporwa yapon komo. Poono yahsîtopo n̂iir̂akn̂e aporwa yarihtaka so. Aan̂apotu warai marha n̂iir̂akn̂e aporwa komo poko prata ha. Ero marha n̂iir̂akn̂e poono yahsîtopo me hara. Ero wa n̂iir̂akn̂e poono yaporwan ahnoro roro wacan yaporwan ha.

18 On wara n̂iir̂akn̂e waaca potarî yahruru, poono rma mîn n̂iir̂akn̂e mawîrka yîswarexapu, camnarexapu, yucurexapu. Riin̂u marha kahyakn̂e ero me, kir̂wan̂he ekposîxapu. Ero yipu kahyakn̂e waaca potarî yahruru me, tmewreso kahyakn̂e. 9 metru n̂iir̂akn̂e ehyatkawnon, 2,3 metru n̂iir̂akn̂e kawnon hara.

19 Potarî yaporwanî komo marha n̂iir̂akn̂e, 4 mak. 4 marha n̂iir̂akn̂e aporwan yapon. Aporwa yarihtaka n̂iir̂akn̂e poono yahsîtopo, aan̂apotu warai marha. Prata ciixapu komo mîn n̂iir̂akn̂e. Aporwa yarihtaka xa n̂iir̂akn̂e xapika warai prata rma. Ero wa n̂iir̂akn̂e waaca yaporwanî komo.

20 Bronse reha n̂iir̂akn̂e poono yecetî komo roowo cheka tpasahtosom ha. Ero yipu ke poono xakn̂e cecehtoso, mîîmo yahruru, waaca yahruru marha. Ero wa xakn̂e.

21 Taa, kekn̂e Moises Repita komo ya, Kaan mîn me ciisominhîrî yukuknomacoko ahnoro kpanatanmetopo komo mîn me ciisomînhîrî ha. Ero wicakî xa nasî, kachome kîwya so, kekn̂e. Ero ke nukuknometken̂e. Itama xa xakn̂e yukuknoman̂e me xa. Araw mumuru mîkî xakn̂e Itama, Kaan yaka cewomsom mumuru ha.

22 Moises mtapotarî yaw roro rma xa n̂iir̂atken̂e Kaan mîn Ixaw Yana komo, Ero wa men ciicoko, kachonho yaw roro rma. Besarew xa xakn̂e Kaan mîn cirpon̂e me, Uri mumuru, Uru parî ha. Xuta yepamtho mîk xakn̂e. Noro xa xakn̂e cirpon̂e me, Besarew ha.

23 Besarew yakronoman̂e xakn̂e hara, Aoriabe, Aisamake mumuru ha. Tan yepamtho mîk xakn̂e. Yaana xa mîk xakn̂e ahce na ciitopo poko. Poono mewren̂e mîk xakn̂e, riin̂u kahn̂e marha, kir̂wan̂he ekposîxapu kahn̂e ha. Mawîrka kahn̂e marha mîk xakn̂e yîswarexapu, camnarexapu, yucurexapu, ero yipu kahn̂e mîk xakn̂e. Noro yipu mîk xakn̂e Aoriabe, Besarew yakronoman̂e ha.

24 Taa, on wicakî xakn̂e ooru Kaan mîn me ciisomînhîrî ha, 1 tarentu wicakî xakn̂e. Ero wicakno me nukuknometken̂e yukuknomacho ke, Kaan mîn yawno ke.

25-26 Prata marha xakn̂e Kaan mîn me ciisom. On wara prata n̂epamnoyatken̂e, Ixaw Yana komo nukuknometken̂e ahnoro iyakenon. Yukuknometaw so prata nahsîyatken̂e yîhyai so Kaan mîn me ciisom ha. 6 kramu wicakî so nîmyatken̂e. Ero wicakî nukuknometken̂e yukuknon ke, Kaan mîn yawno ke. Kîrkomo mak nukuknometken̂e, poritomo komo mak ha. 20 cimn̂ipu ewrutoponhîrî ehxapu komo mak nukuknometken̂e, ero yopono komo marha. Noro yipu komo nîmyatken̂e prata. Mer̂pora xatken̂e yukuknomaxapu komo, 603.550. Ero ke mer̂pora marha xakn̂e prata Kaan mîn me ciisom. 3,4 tarentu wicakî xakn̂e. Ero wicakî xakn̂e.

27 On wara n̂iir̂atken̂e ero prata ha, nukuyatken̂e ahnoro 3,4 tarentu wicakno rma. Eronhîrî tak n̂iir̂atken̂e Kaan mîn yahruru yaporwan yapon me, Kaan yamatan yahruru yaporwan yapon me marha. Yaake n̂iir̂atken̂e, 100. 6 krama wicakî so n̂iir̂atken̂e aporwa yapon komo.

28 Prata yakwenho rma xakn̂e. Ero tak n̂iir̂atken̂e poono yahsîtopo me hara, waaca yaporwan kanahtawno me marha, aporwa yan̂apotun warai me marha.

29 Bronse marha xakn̂e Kaan mîn me ciisom. Ixaw Yana komo nîmîtho xa marha mîn xakn̂e, Kaan ya yînmîthîrî kom ha. Mer̂pora xa marha xakn̂e ero hara, 2,4 tarentu wicak ha.

30-31 Ero tak n̂iir̂atken̂e aapo me, Kaan mîn roron potarî yaporwan yapon me. Kaan ya tîmsom yakn̂itopo me marha n̂iir̂atken̂e. Ero yatumnawno me n̂iir̂atken̂e wehto yapon me ha. Ero payun me, wehto pokono me, roro wacan yaporwan yapon me, roowo cheka tpasahtosom me, mîîmo yahruru yecehton̂e komo me, roro wacan yecehton̂e me marha. Ero yipu me tî n̂iir̂atken̂e bronse ha. Ero wa n̂iir̂atken̂e.