Taa, ero yinhîrî yamata nakîhcekn̂e hara Besarew aakaxa yepu sahsamaxapu ha. 1,1 metru nakîhcekn̂e ehyatkawnon. 0,7 metru nakîhcekn̂e akwerî. 0,7 metru nakîhcekn̂e kawnon ha.

2 Akîhtoche tak nîmkarinomekn̂e ooru ke esmanî ro ke. Ero ke marha nayayenpor̂akn̂e. Yamata yarokorî warai marha n̂iir̂akn̂e ooru re mak.

3 Emekna warai marha n̂iir̂akn̂e 4 mak ooru rma. Ero mko takî nasîsîknoyakn̂e yamata yawxaw so. Xehxan poko xakn̂e 2 emekna warai, mehxan poko xakn̂e 2 xa hara.

4 Ero yinhîrî aakaxa yepu n̂enpor̂akn̂e kwahsî mayo warai me asakî. Enporiche ooru ke nîmkarinomekn̂e.

5 Ero mko tak numunukyakn̂e yamata yawxarino yaro, emekna warai yaro. Yamata yaatopo mîn xakn̂e kwahsî mayo warai.

6 Yamata yahruru marha n̂iir̂akn̂e, ooru re tak. 1,1 metru ehyatkawnon n̂iir̂akn̂e. 0,7 metru akwerî n̂iir̂akn̂e. Amna pînîn yaw cma re masî, kacho mîn xakn̂e yamata yahruru.

7 Kerubin marha n̂iir̂akn̂e asakî ooru rma, etapaxapu ha. Yamata yahruru mapitawno me so mîn n̂iir̂akn̂e.

8 Xehxa n̂iir̂akn̂e anarî kerubin, mehxa n̂iir̂akn̂e anarî hara. Cewararînonhîrî rma n̂iir̂akn̂e, Amna pînîn yaw cma re masî, kacho, kerubin komo marha. Ooru rma mîn n̂iir̂akn̂e.

9 Etwece cewru n̂iir̂akn̂e kerubin. Ahruru wece yenîn̂e wara rma tko n̂iir̂akn̂e. Cetapoyetkaxi marha n̂iir̂akn̂e kerubin etwece. Yaimo yaporî wa xakn̂e. Yamata yahruru yahrun̂e wa xakn̂e aporî. Ero wa n̂iir̂akn̂e Besarew.

10 Ero yinhîrî cuure yapon tak nakîhcekn̂e hara Besarew aakaxa yepu rma. 0,9 metru nakîhcekn̂e ehyatkawnon. 0,5 metru akwerî nakîhcekn̂e hara. 0,7 metru kawnon nakîhcekn̂e.

11 Ooru ke nîmkarinomekn̂e, esmanî ro ke. Aapo yarokorî warai marha n̂iir̂akn̂e ooru re mak.

12 Aapo perî marha nakîhcekn̂e tmamritîkaxi ro. Kamorî wicak mak xakn̂e ero yakwerî. Ero poko tak n̂iir̂akn̂e aroko warai hara.

13 Emekna warai marha n̂iir̂akn̂e ooru rma, 4 mak. Ero yipu nasîsîknoyakn̂e aapo yeknu poko. Yîhrepu komo poko rma nasîsîknoyakn̂e.

14 Aapo perî pahnoke n̂iir̂akn̂e emekna mko, aapo yaatopo yumuntopo.

15 Aakaxa yepu tak n̂enpor̂akn̂e aatopo me asakî. Nîmkarinomekn̂e tak ooru ke.

16 Paayu marha n̂iir̂akn̂e aapo pono, kaxara yanîmtopo marha, weer̂a marha, tutum marha. Ooru rma mîn n̂iir̂akn̂e ero me, esmanî ro ooru. Wok yen komo mîn n̂iir̂akn̂e. Ero warai n̂iir̂akn̂e.

17 Ero yinhîrî ramha yecepu tak n̂iir̂akn̂e ooru rma, esmanî ro. Aama ke n̂etapekn̂e ero ciitome. Yîhtarî n̂iir̂akn̂e, yîhrepu, parakweci, epemrutun warai, ahnoro ero warai n̂iir̂akn̂e ooru rma etapaxapu. Cewararîno rma ooru n̂iir̂akn̂e ero yipu me.

18 Ceknake n̂iir̂akn̂e ramha yecepu. 6 peremru n̂iir̂akn̂e ecepu pokono. 3 n̂iir̂akn̂e xehxa, 3 n̂iir̂akn̂e mehxa hara.

19 3 parakweci n̂iir̂akn̂e anarî peremru poko. Amentowa yepemrutun warai me rma n̂iir̂akn̂e. Yar̂kwetkuru warai marha n̂iir̂akn̂e, epemrutunu mko marha n̂iir̂akn̂e yaake parakweci yakro. Ero wa n̂iir̂akn̂e peremru pokono, anarî pokono hara, 6 peremru cirihtîkaxi ro.

20 Ero warai xa marha n̂iir̂akn̂e eepu pokono hara. 4 mak parakwece n̂iir̂akn̂e ero poko reha. Amentowa yepemrutun warai marha n̂iir̂akn̂e ero mko yakro hara. Epemrutun warai marha, yar̂kwetkuru warai marha ero warai mko n̂iir̂akn̂e parakweci yakro.

21 Yuturun warai marha ciki n̂iir̂akn̂e peremru yetahsîtopo mahyaka rma. Anarî xa hara yuturun n̂iir̂akn̂e anarî komo mahyaka hara. Ero wara roro n̂iir̂akn̂e peremru mahyaka miyan mahyaka so rma.

22 Parakweci, peremru marha, eepu marha ahnoro mak n̂iir̂akn̂e cewararînonhîrî ooru. N̂etapekn̂e mak ciitome. Ero wa n̂iir̂akn̂e.

23 7 ramha marha n̂iir̂akn̂e ero yecepu ponan. Ramha yetahsîtopo yawototopo marha n̂iir̂akn̂e, ramha payun marha. Ooru rma n̂iir̂akn̂e ero yipu me esmanî ro ha.

24 Porin mîn xakn̂e ooru cewararîno, ramha me ciisom, ramha pokono me ciisom marha. 34 kiru wicakno mîn xakn̂e. Ero wicakno n̂iir̂akn̂e ramha, pokono komo marha.

25 Ero yinhîrî kotoporem yakn̂itopo makîrha nakîhcekn̂e hara. Aakaxa yepu nakîhcekn̂e ero me, sahsamaxapu ha. 0,5 metru akwerî nakîhcekn̂e. Ero wicakî xa marha nakîhcekn̂e ehyatkawnon hara. 0,9 metru nakîhcekn̂e kawnon hara. Paaka meretîrî warai n̂iir̂akn̂e aapo yecepu yar̂pîrî rma.

26 Ero yinhîrî tak aapo nîmkarinomekn̂e ooru ke esmanî ro ke. Ahnoro nîmkarinomekn̂e, awxaw so, paaka meretîrî warai, ahnoro mak. Aroko warai marha n̂iir̂akn̂e aapo mamhoko, ooru rma.

27 Aroko wara mahyaka rma emekna warai n̂iir̂akn̂e hara ooru xa marha. Xehxa asakî n̂iir̂akn̂e, mehxa asakî xa marha n̂iir̂akn̂e. Aapo yeknutaw so n̂iir̂akn̂e. Kwahsî mayo warai yumuntopo mîn xakn̂e emekna warai, aapo yaatopo ha.

28 Ero yinhîrî kwahsî mayo warai marha n̂enporakn̂e aakaxa xîkrî. Enporiche ero komo marha nîmkarinomekn̂e ooru ke.

29 Ero yinhîrî katî n̂esmekn̂e Kaan yaka cewomsom komo yîhkapetopo. Noro yipu komo yîhkapetopo mak mîn n̂iir̂akn̂e, anarî me cirihnî ro mak. Kotoporem marha n̂esmekn̂e, takn̂isom ha. Kir̂wan̂he xa n̂esmekn̂e kotoporem ero yipu yesman̂e ro komo wara rma. Ero wa n̂iir̂akn̂e.