On wara marha kekn̂e moises, Ero ke Kaan mîn poko tak naxe Besarew, Aoriabe kom ha. Anarî komo marha naxe ero poko, Kporin komo nakîhretho kom ha. Yaake naxe yaana komo ero yipu poko. Ero ke mîn hak mak n̂iir̂axe Kaan mîn me ciisom, ero yawno ciisom marha. Kaanî mtapotachonho yaw roro rma n̂iir̂axe, kekn̂e. Ero wa kekn̂e.

2 Ero yinhîrî Besarew tak nan̂ikyakn̂e Moises, Aoriyabe marha. Ahnoro nan̂ikyakn̂e yaana komo, Kaan nakîhretho kom ha. Kaan mîn ciiso tmoku xatî komo. Ero ke noro yipu komo nan̂ikyakn̂e Moises.

3 Yîwya so tak Moises nîmyakn̂e Ixaw Yana komo n̂ekîtho Kaan mîn me ciisom ha. Ero yipu tak nîmyakn̂e Moises ciin̂e komo ya hara. N̂ekyatken̂e rma tko Ixaw Yana komo tanme ro so enmar̂atîxera. Kporin komo ya tîmtome n̂ekyatken̂e.

4-5 Ero ke ciin̂e komo ka nîtîtmamyatken̂e, Kaan mîn pokono kom ha. Moises yaka ka cetken̂e hara. On wara ketken̂e yîwya, Ai apa, mer̂pora xa n̂ekyaxe Kaan mîn me ciisom. Kporin komo mtapotachonho yopono me tak nas okyo, ketken̂e yîwya.

6 Ero ke on wara kekn̂e Moises Ixaw Yana komo ya eeta poko hakno komo ya, N̂eexi tak ha Kaan mîn me ciisom yenmetopo awya so. Ero yipu ekîhra tak ehcoko, kekn̂e. Ero ke ekîhra tak xatken̂e Ixaw Yana komo.

7 Mer̂pora xakn̂e yîn̂ekîthîrî komo Kaan mîn me ciisom. Cirirî yopo ro mak xakn̂e. Ero ke, N̂eexi, kekn̂e tak ekn̂e komo ya. Ero wa kekn̂e.

8 Taa, Kaan mîn poko tak xatken̂e yaana komo. Poono kahyatken̂e kawno, 10 ha. Riin̂u yatî mîn kahyatken̂e, kir̂wan̂he ekposîxapu. Kapuche porokucetken̂e mawîrka ke, yîswarexapu ke, camnarexapu ke marha, yucurexapu ke marha. Kerubin kuknon me natpetken̂e porokru me.

9 Kaw n̂iir̂akn̂e poono mko. Etîme re xakn̂e ehyatkawnon, akwerî marha. 12,5 metru ehyatkawnon n̂iir̂akn̂e, 1,8 metru n̂iir̂akn̂e akwerî hara.

10 Ero yinhîrî 5 poono natpekn̂e esen̂etî pona. Ero wa nakwerekn̂e cewn̂an me takî ehtome 5 me ehxapunhîrî. Ero yinhîrî anarînhîrî 5 poono natpekn̂e esen̂etî pona xa hara. Ero wa nakwerekn̂e ero hara cewn̂an me takî ehtome 5 me ehxapu hara.

11 Ero yinhîrî aan̂apotu yumuntopo warai ciki natpekn̂e hara tîswayem poono. Ero komo natpekn̂e takwekem yen̂etî pona. Ero warai xa hara n̂iir̂akn̂e anarî yen̂etî pona hara.

12 Yaake natpetken̂e aan̂apotu yumuntopo warai, 50 ha. Anarî yen̂etî pona natpekn̂e 50 xa marha. Etpoko etahsîtopo mîn xakn̂e aan̂apotu yumuntopo warai ha.

13 Poono yahsîtopo warai marha n̂iir̂akn̂e ooru ciixapu ha 50. Ero komo ke tak poono nasîsîknoyakn̂e cewn̂an me tak ehtome poono mîîmo yahruru ha.

14 Ero yinhîrî anarî komo natpekn̂e hara poono, kabra poci kahxapu ha. 11 yakenon mîn natpekn̂e mîîmo mkarino me.

15 Ehyatkawno mîn xakn̂e poono 13,5 metru. 1,8 metru xakn̂e akwerî hara. Esehyatkawanonke re xakn̂e 11 mko rma.

16 Ero yinhîrî 5 poono natpekn̂e esen̂etî pona akweretome. Ero yinhîrî 6 natpekn̂e hara esen̂etî pona. Ero wa nakwerekn̂e.

17 Ero wara akwereche nasîsîknoyakn̂e hara. Aan̂apotu yumuntopo warai natpekn̂e anarî yen̂etî poko. Yaake natpekn̂e 50. Ero yinhîrî 50 xa hara natpekn̂e aan̂apotu yumuntopo warai hara anarî yen̂etî pona hara.

18 Ero yinhîrî poono yahsîtopo warai ciki n̂iir̂akn̂e bronse, 50 n̂iir̂akn̂e. Ero ke rma tak nasîsîknoyatken̂e poono cewn̂an me tak ehtome ero hara.

19 Ero mkarino xa hara natpekn̂e mîîmo yahruru. Kahn̂eru picho yucurexapu natpekn̂e ero me. Ero yinhîrî ero mkarino xa hara natpekn̂e. Wiir̂a warai picho mîn natpekn̂e ero me mîîmo yahruru me xa hara. Ero warai natpekn̂e mîîmo yahruru komo.

20 Ero yinhîrî tak aakaxa yepu tak nakîhcekn̂e Kaan mîn wacan me. Sahsamaxapu mîn nakîhcekn̂e. Akîhtoche piiri tak nanîmyakn̂e.

21 4,5 metru ehyatkawnon nîhkocekn̂e sahsamaxapu. 0,7 metru akwerî nakîhcekn̂e. Ero wicakno komo nakîhcekn̂e sahsamaxapu mîîmo wacan ha.

22 Mayahsîtopo komo marha n̂iir̂akn̂e asakî so sahsamaxapu mapitaka so. Ero wara re nakîhcekn̂e sahsamaxapu komo ahnoro.

23-24 Ero wa nakîhcekn̂e sahsamaxapu. 20 sahsamaxapu nakîhcekn̂e suu n̂ixan. Ero yapon marha n̂iir̂akn̂e prata ha. 40 n̂iir̂akn̂e apon komo. Ero mko poko sahsamaxapu n̂etahsîyakn̂e mayahsîtopo ke.

25-26 Ero wicakî xa marha n̂iir̂akn̂e nohce n̂ixan hara sahsamaxapu 20 yakenon ha. 40 marha n̂iir̂akn̂e sahsamaxapu yapon prata ha. Asakî so tî n̂iir̂akn̂e sahsamaxapu makataka so.

27 Ero yinhîrî sahsamaxapu nakîhcekn̂e xa hara oesce n̂ixan hara. 6 mak nakîhcekn̂e iinan komo mîîmo wacan me.

28-30 Asakî so marha n̂iir̂akn̂e mîîmo yeknutawno ponan sahsamaxapu hara. Etpoko tak nasîsîknoyakn̂e meretkoso, mapitaw so marha. Kuripara ke nasîsîknoyakn̂e. Ero ke 8 xakn̂e sahsamaxapu komo mîîmo yeknutawno ponan komo. 16 n̂iir̂akn̂e sahsamaxapu yaponî kom hara prata ha. 2 so n̂iir̂akn̂e sahsamaxapu makataka so. Ero wa xakn̂e sahsamaxapu komo ha.

31 Ecehtotopo mko marha n̂enpor̂akn̂e aakaxa yepu 5 mak. Mîîmo wacan yaro tumunsom mîn xakn̂e, xehxan yarono ha.

32 5 xa marha n̂enpor̂akn̂e mehxan yaro tumunsom hara. 5 marha n̂enpor̂akn̂e resce n̂ixan yarono hara.

33 Ehyatkaw xa tak n̂iir̂akn̂e rakatawno, waaca yaro tumunsom, ecehtotopo ha. Mîîmo yeknutawno n̂ixa cekn̂e miya roro anarî yaka eknutawno yaka hara.

34 Sahsamaxapu yakîhtoche ooru ke nîmkarinomekn̂e. Emekna warai marha n̂iir̂akn̂e sahsamaxapu pokono. Ooru rma mîn n̂iir̂akn̂e. Ecehtotopo marha nîmkarinomekn̂e ooru ke. Ero wa nîmkarinomekn̂e.

35 Ero yinhîrî on warai n̂iir̂akn̂e hara, poono kahyakn̂e. Mawîrka mîn kahyakn̂e yîswarexapu, camnarexapu, yucurexapu. Riin̂u marha kahyakn̂e, kir̂wan̂he ekposîxapu. Ero yipu kapuche, atpoche marha kerubin kuknon ciki natpekn̂e ero porokru me. Yaana komo xa natpetken̂e ero yipu.

36 Ero yinhîrî tak aakaxa yepu xa hara n̂enpor̂akn̂e. 4 mak n̂enpor̂akn̂e poono yaporwan ha. Enporiche ooru ke tak ero nîmkarinomekn̂e. Poono yahsîtopo marha n̂iir̂akn̂e ero mko poko, ooru ha. Mapata yapon marha n̂iir̂akn̂e, prata, 4 ha.

37 Mîîmo potarî yahruru marha n̂iir̂akn̂e poono. Riin̂u yatî xa hara kahyakn̂e yîswarexapu, camnarexapu, yucurexapu. Kapuche ero porokru marha natpekn̂e yîratari. Ero warai kahyakn̂e poono, natpekn̂e marha mîîmo potarî yahruru me.

38 Ero mapatan marha n̂enpor̂akn̂e 5 ha. Poono yahsîtopo komo marha n̂iir̂akn̂e ero poko. Ero yinhîrî mapata nîmkarinomekn̂e ooru ke. Mapata yapon tak n̂iir̂akn̂e bronse. Ero wa n̂iir̂akn̂e.