1-2 Ero yinhîrî on wara tî kekn̂e Kporin komo Moises ya, Omîn tak ciicoko oyakro awesentacho kom ha. Yihcirî kaamo po ciicoko, yihcirî nuun̂i po ha.

3 Mîîmo ciriche yamata tak ehcoko ero yaka apanatanmetopo komo yen ha. Ekîche amtakpo yahruru tak akricoko yamata wacan ha.

4 Cuure yapon marha ehcoko mîîmo yaka. Ekîche ero ponan me ciisom tak ciicoko ero pona. Ero yinhîrî weeyu tak ehcoko mîîmo yaka. Ekîche weeyu komo tak potuhtocoko.

5 Ero yinhîrî kotoporem yakn̂itopo tak ehcoko mîîmo yaka. Yamata pahnoke rma ciicoko apanatanmetopo komo yen pahnoke ha. Mîîmo potarî yahruru marha akricoko.

6 Tîmsom yakn̂itopo marha ciicoko katpanaka mîîmo potarî yecen̂e.

7 Ero yinhîrî Araw komo yesemokarî yen marha ciicoko mîîmo potarî pahnoke. Mehxa nasî tîmsom yakn̂itopo, xehxa nasî mîîmo iina ciicoko iyotaka so. Esemokarî komo yen ciriche tuuna tak arkacoko ero yaka.

8 Ero yinhîrî ohroron wacan marha ciicoko, ohroron wacan potarî yahruru marha akricoko.

9 Ero yinhîrî katî tak ahsîko. Iike rma omîn kapeko, ero yawno komo marha ahnoro. Ero wa awya kaperî ke kir̂wan me tak miir̂asî owyanî ro me xa.

10 Kaan ya tîmsom yakn̂itopo marha kapeko, ero pokono komo marha. Ero wa kaperî ke owyanî ro me tak miir̂as ero hara.

11 Araw komo yesemokarî yen marha kapeko, yîhrepu marha. Ero wa kaperî ke ero komo xa marha miir̂asî owyanî ro me.

12 Ero yinhîrî Araw tak eeko omîn potaka, awakro so oyesentacho potaka ha. Iina marha eeko yumumuru komo. Ekîche n̂examro tîhko tuuna ke.

13 Ero yinhîrî Araw ya tak amrupoko noro ponon, ohyaka mohtopo ha. Amrupoche noro marha yîhkapeko oyantonî ro me tak ehtome, ohyaka tmohsom me ehtome ha.

14-15 Araw mumuru komo marha eeko iina. Ekîche n̂examro ya marha amrupoko ponon komo. N̂examro marha yîhkapeko yîîm komo mîhkapesî ero wa xa marha. Ero wa yîhkapeko oyanme etapickachome so, omîn yenîn̂e me ehtome so ha. Eroromerono me n̂examro yîhkapeko. Epamthîrî komo meero naxe amn̂e omîn yenîn̂e me miya rorono komo, kekn̂e. Ero wa tî kekn̂e Kporin komo Moises ya.

16 Ero ke ero wara rma tî n̂iir̂akn̂e Moises, Kporin komo mtapotachonho yaw roro rma.

17 On yimaw xa tî Kporin komo mîn nakîhcekn̂e Moises, 2-nhîrî cimn̂ipu po nakîhcekn̂e yihcirî nuun̂i po, yihcirî kaamo po ha. Ero po xa nakîhcekn̂e.

18 On wara tî Kporin komo mîn nakîhcekn̂e Moises, mîîmo yaporwan yaponî komo ka n̂iir̂akn̂e, ero yinhîrî sahsamaxapu tak nanîmyakn̂e hara piiri. Ero yinhîrî katawkure warai tak numunukyakn̂e emekna warai yaro, poono yaporwan marha nanîmyakn̂e piiri.

19 Ero yinhîrî roona warai takî tî n̂iir̂akn̂e Moises Kaan mîn me. Ero mkarino komo marha n̂iir̂akn̂e. Ero wa n̂iir̂akn̂e Kaanî mtapotachonho yaw roro rma.

20 Ero yinhîrî takî tî Kporin komo ya kpanatanametopo tak n̂enkayakn̂e yamata yaka. Aatopo komo marha numunukyakn̂e emekna warai yaro, yamata pokono yaro. Ero yinhîrî yamata tak nahruyakn̂e ahruru ke, Amna pînî yaw cma re masî, kacho ke ha.

21 Ero yinhîrî takî tî Kporin komo mîn yaka takî naar̂akn̂e yamata. Iina arîche ero yamtakpon yahruru tak n̂iir̂akn̂e, Kporin komo ya kpanatanmetopo komo yen yahruru me tak ha. Ero wa tî n̂iir̂akn̂e Moises Kporin komo mtapotachonho yaw roro rma.

22 Ero yinhîrî takî tî cuure yapon naar̂akn̂e Moises Kesentacho yaka. Iina n̂iir̂akn̂e nohce n̂ixa, Kaan yamatan yahruru xehxa n̂hema.

23 Ero pona takî tî cuure nakriyakn̂e aapo pona Kporin komo yawno pona rma. Ero wa n̂iir̂akn̂e Kporin komo mtapotachonho yaw roro rma.

24 Ero yinhîrî takî tî ramha naar̂akn̂e Kporin komo yakro Kesentacho yaka. Cuure yapon yecen̂e rma n̂iir̂akn̂e suu n̂ixa hara.

25 Weeyu komo takî tî nakriyakn̂e ecepu komo potkoso, potuhcekn̂e marha tak. Ero wa Moises n̂iir̂akn̂e, Kporin komo yamtakpon weyuru me. Kporin komo mtapotachonho yaw roro rma tî ero wa n̂iir̂akn̂e.

26-27 Ero yinhîrî takî tî kotoporem yakn̂itopo naar̂akn̂e hara Moises Kporin komo yakro kesentacho komo yaka. Kaan yamatan yahruru mîtkoso n̂iir̂akn̂e. Iina ciriche kotoporem nakn̂iyakn̂e ero pona. Ero wa tî n̂iir̂akn̂e Kporin komo mtapotachonho yaw roro rma.

28 Ero yinhîrî mîîmo potarî yahruru tak nakriyakn̂e ahrutome tak.

29 Ero yinhîrî takî tî Kaan ya tîmsom yakn̂itopo n̂iir̂akn̂e katpanaka, Kesentacho komo potarî yecen̂e. Iina ciriche takn̂itîkaxmu tak nakn̂iyakn̂e ero pona, puruma yeperîrî marha nakn̂iyakn̂e ero pona. Ero wa tî n̂iir̂akn̂e Kporin komo mtapotachonho yaw roro rma.

30 Araw komo yesemokarî yen marha tî n̂iir̂akn̂e katpanaka Kporin komo yakro kesentacho pahnoke xa tak. Mehxa xakn̂e Kaan ya tîmsom yakn̂itopo. Xehxa xakn̂e mîîmo, iyotaka n̂iir̂akn̂e. Iina ciriche tuuna takî tî narkekn̂e ero yaka esemokarî komo.

31 Ero yaka takî tî Moises n̂esemokekn̂e, Araw marha, yumumuru komo marha. Tîhtarî komo marha tî koroketken̂e iina.

32 Kesentacho komo yaka cewom xe cexitaw so ero yaka tî n̂esemoketken̂e roro, tîhtarî komo marha koroketken̂e roro. Ero wa xa marha tî n̂esemoketken̂e Kaan ya tîmsom yakn̂itopo yaka tîcetaw so. Ero wa n̂iir̂atken̂e, Kporin komo kekn̂e Moises ya ero wa kachonho yaw roro rma.

33 Ero yinhîrî takî tî Kaan mîn roron wacan tak n̂iir̂akn̂e hara Moises. Ero ciriche ero yaw tak xakn̂e Kaan mîn, waaca yaw, Kaan ya tîmsom yakn̂itopo marha xakn̂e ero yaw. Ero ciriche, roro potarî yahruru tak nakriyakn̂e hara poono ha. Ero ciriche ciitîkaxi takî tî xakn̂e Kporin komo mîn.

34-35 Ciitîkache takî tî kaweresî nîhcekn̂e, mîîmo nahruyakn̂e, Kaan yakro Kesentacho komo nahruyakn̂e. Kporin komo weyuru marha Kaan mîn nawronohkekn̂e. Ero ke ewomra xakn̂e Moises kaweresî exirî ke meretwo, Kaan weyuru exirî ke marha mîîmo yawronohkan̂e. Ero wa tî xakn̂e.

36 Ahna na cetaw so Ixaw Yana komo kaweresî wenari mak cetken̂e. Kaweresî yetanîmîche mak Kporin komo mîn poi ero yimaw makî tî cetken̂e esama yaw.

37 Etanîmra exitaw kaweresî tohra tî xatken̂e Ixaw Yana komo esama yaw. Iito rma ka xatken̂e etanîmrî mîtwo.

38 Ero ke ero wa tî xakn̂e kaweresî Kaan mîn yepoi xakn̂e katpanaw. Kosope wehto takî tî xakn̂e hara ero yepoi. Ero wara roro xakn̂e Ixaw Yana komo n̂enîrî me. Ero yipu n̂een̂atken̂e ahna so na tîcetaw so. Ero wa tî n̂een̂atken̂e.