Taa, eseresmatîkache so takî tî on wara kekn̂e Xose tîmîn yenîn̂e ya, Taa, yînahrî komo tak tîmko yîwya so yînarîrî kom ha. Yukumixin komo yaka enkakî. Yînarîrî komo yecenarî so enkakî. Yukumixin komo potaka so cirko xa hara yupurantanthîrî komo.

2 On wara tko cirko mahtîkîthîrî kumixin yaka, yupurantanthîrî enkapuche yukumixin potaka oparakwen tak enkak hara iina. Prata ciixapu mîn enkak ha, kekn̂e tî yîwya. Ero ke ero wara rma tî n̂iir̂akn̂e Xose mîn yenîn̂e.

3 Taa, enmapuche takno komo takî tî n̂en̂epekn̂e Xose iyoh komo yakro rma. Taa, etocoko hara, kekn̂e tî yîwya so.

4 Ero ke cetken̂e takî tî ewto poi. Taa, mooxe tohra rma ka exitaw so on wara tî kekn̂e Xose tîmîn yenîn̂e ya, N̂examro wenari tak etok ha. Yohno men etoko. Enîche so awya on wara kasko yîwya so, Ahce poyero awakren̂enhîrî komo memetanmecow hara kica? kasko yîwya so.

5 Oyantoman̂e parakwen tî maacow kica. Noro wokru yeetopo thakwa mîn ha. Iike marha tî ahce na poko cehtopo nîhtînoya. Kicicme ro mak mehcow kica, men̂epanîmcow mak ham kica, kasko men yîwya so, kekn̂e tî Xose.

6 Ero ke n̂examro wenari takî tî cekn̂e Xose mîn yenîn̂e. N̂examro yenîche n̂eiyakn̂e takî tî Xose mtapotachonho yaw roro.

7 Yîmtapotarî yentache on wara tî ketken̂e Xose yakno komo, Ahce kacho ero wa mîîke amna ya apa? ketken̂e tî yîwya. Cen̂epan̂em pînî ro mak amna.

8 Enko xe, puranta amna n̂ekyakn̂e hara ahyaka, tukumixin potawnonhîrî. Ero wa amna xakn̂e Kanan poi amna mokyataw ahyaka so. Ero ke awantoman̂e mîn yawno poko en̂epamra ro mak nas amna. Prata yarîhra ro mak nas amna en̂exa, ooru yarîhra marha.

9 Amna kumixin ka enko ha ke. Een̂ataw awya, onok kumixin yaw na meen̂a noro tak waihkakî. Amna pen meero ahsîko awanton me, ketken̂e tî yîwya. Ero wa tî ketken̂e Xose maywen ya.

10 Taa, ero wa ham, kekn̂e tî noro yîwya so. Onoke kumixin yaw na ween̂a noro mak wahsîyas cewn̂e oyanton me ha. Amyamro reha mîîcexe eponanîmton mera ro mak, kekn̂e tî. Ero wa tî kekn̂e Xose mîn yenîn̂e yîwya so.

11 Ero ke yohno rma takî tî n̂enîhcetken̂e tukumixin komo ahnoro rma. Enîhtoche n̂etamhoketken̂e tî noro n̂enîrî me.

12 Ero ke yukumixin komo takî tî n̂een̂akn̂e Xose mîn yenîn̂e. Yihcirî me tî n̂een̂akn̂e potuthîrî kumixin. Ero yinhîrî ponan kumixin takî tî n̂een̂akn̂e hara, ero yinhîrî tî ponan hara. Ero wara tî n̂een̂akn̂e yukumixin komo etponanî re. Mahtîkîthîrî kumixin pona roro tî n̂een̂akn̂e. Taa, Benxamin kumixin yaw takî tî n̂een̂akn̂e kopi parakwecitho, Xose parakwen.

13 Enîche nahwoketken̂e ro makî takî tî Xose yakno komo. Tponon komo tî nahyaxketken̂e ro mak okwe tahwokarî ke so. Taa, tukumixin komo tî n̂etamiyatken̂e hara, nakriyatken̂e hara tî toh komo mkahsî. Yaw xa marha tî n̂etîrametken̂e hara okwe ewto pona.

14 Xose mîn yaka tî cetken̂e hara. Xuta tî cekn̂e poturme. Noro yakro tî mokyatken̂e akno komo. Iito rma tî xakn̂e Xose. Noro yenîche mamaka takî tî nutupenwatken̂e xa hara cesewnaposo ro.

15 Ero yinhîrî takî tî takno komo n̂eiyakn̂e Xose hara. Ahce poyero ow memetanmecow kica? kekn̂e tî yîwya so. Camkîno me ma ow meen̂at ke? Enîhnî yenîn̂e men mîkro, kahra ma mehcow, kekn̂e tî yîwya so.

16 Yîmtapotarî yentache on wara tî kekn̂e Xuta yîwya, Ahce wa thakwa re kee amna awya apa? Ahce wa thakwa re amna n̂ehyapamhoke okwe? Kicicme amna xakn̂e kica. Ero poyero amna n̂en̂eke ham Kaan. Ero ke ahnoro rma amna ahsîko awanton me eroromero. Aparakwen n̂eexi yîhyaw noro meero ahsîko awanton me ha, kekn̂e tî yîwya.

17 Pîra ro mak, kekn̂e hara tî Xose yîwya. Yîhyaw n̂eexi oparakwen noro mak wahsîyas oyanton me. Amyamro reha etocoko rma aamo komo yaka hara. Erasîra rma etocoko, kekn̂e tî yîwya so.

18 Ero wa kacho yentache meyehra takî tî mokyakn̂e Xuta Xose yaka. On wara tî kekn̂e yîwya, Apa, kîmtapowasî cma re awakro. Yukurumîkno me xa kîhtînoyasî. Paraw nasî ero wara xa marha mas amoro hara, wîîkesî. Wara rma yîrwomra cma re mas opoko.

19 On wara mîîkekn̂e amna ya, Nai rma aamo kom ha? mîîkekn̂e. Anarî exihra nai ha awakno komo? mîîkekn̂e marha amna ya.

20 Ero ke on wara amna aweyukyakn̂e, Tîmkemu rma amna, poritomotho me thakwa tko nai ha okwe apapa. Amna yakno marha nas iito kar̂pamxan ciki. Noro n̂ewruyakn̂e poritomo me exiche tak apapa. Anarî cma re ka xakn̂e hara noro yaknonho pen. Noro pen waihyakn̂e thakwa okwe. Aknonhîrî cik mak nasî yîsonînhîrî pen mretho. Yîpînîn yaw xa apapa yehtopo mîkro, kekn̂e amna awya.

21 Noro yehtopo yentache awya on wara mîîkekn̂e amna ya, Taa, awakno ehcoko xiya. Enî xe men wasî, mîîkekn̂e thakwa amna ya.

22 Ahce okwe, kekn̂e rma amna awya, yîîm yai en̂epenî ro mak mîk noro. En̂epeche waihya men okwe yîîm, kekn̂e amna awya.

23 On wara tko mîîkekn̂e amna ya, Awakno komo rma ehcoko. Ekîhra awexitaw so, oyenso mokuhra ro mak men ehcoko, mîîkekn̂e amna ya, kekn̂e tî.

24-25 Ero yinhîrî amna cekn̂e hara tîîm yaka. Amtapotachonhîrî amna n̂ekatîmyakn̂e yîwya. Pahkî exiche on wara kekn̂e hara apapa amna ya, Okopuci komo, etocoko hara knahrî komo yaponso xa hara, kekn̂e amna ya.

26 On wara tko amna kekn̂e yîwya, Apa, tohra thakwa nas amna okwe. Amna mahtîkîtho cetaw mak amna cesî. Ero wa thakwa kekn̂e antomano rin̂e amna ya, Amahtîkîthîrî komo yekîhra awexitaw so oyenso men mokuhra ro mak ehcoko, kekn̂e thakwa amna ya, kekn̂e amna yîwya.

27-28 On wara n̂eyukyakn̂e apapa, Asakî wa xakn̂e opici pen mretho. Anarînhîrî pen cekn̂e pahxa ro mak ohyai. Kamara na n̂eskai ha okwe, wîîkekn̂e thakwa mak. Noro pen enîhra ro makî tak was okwe, kekn̂e amna ya.

29 On wara marha kekn̂e amna ya, Moso yarîche hara awya so waihya men okwe esama yaw. Noro waipuche tak owaikan̂e wara maxe okwe. Poritomotho me tak wasî kanahmutwe. Noro yipu rma ow mîwaikexe oyahwokacho ke okwe, kekn̂e apapa amna ya.

30-31 Ero ke apapa yaka owtoche, oyakro exihra exitaw moso kar̂pamxan, Okwe ro mak, wîîkesî. Apapa pen yemetanmekn̂e me ro mak was okwe. Noro ropotarî nasî moso ropotarî poko yimixapu wara. On wara men nas amn̂e, amna yakro exihra een̂ataw apapa waihyasî thakwa noro pen okwe. Ero ke amna nasî tîîm waihkan̂e me, kanahmutwem waihkan̂e me rma okwe. Ahwokacho ke waihkan̂e me nas amna okwe.

32 Opona rma tko wiir̂akn̂e amna mahtîkîtho yehtopo hara. On wara wîîkekn̂e apapa ya, Apa, moso yekîhra oyexitaw ahyaka hara, Kicicitho mîkro, kacho me tak wasî miya roro yîtîhkan me, wîîkekn̂e yîwya.

33 Ero ke on wara cma re wîîkes awya, ow xa matko ahsîko awanton me. Eroromero ow ahsîko. Moso xa matko en̂epeko kar̂pamxan akno komo yakro.

34 Ahce wa thakwa re kîwce ha apapa yaka moso kar̂pamxan yarîhra oyexitaw. Ero wara rma owcetaw apapa yahwokatîkacho ween̂as okwe, kekn̂e tî. Ero wa tî kekn̂e Xuta Xose ya.