Taa, ero yimaw takî tîwrata xe xa takî tî n̂ehtîkekn̂e Xose tîyopo. Iito rma tko tî xatken̂e noro maywen komo yaake. On wara kekn̂e yîwya so, Anana ka aano ciicoko, ahnoro en̂epecoko, kekn̂e tî yîwya so. Ero ke yîhyaw exihra ro mak takî tî xatken̂e maywen komo Xose yakro. Ero wa exiche so takî tî takno komo ya takî tî n̂esehtînomexpekn̂e Xose.

2 Ero yimaw takî tî nîwracekn̂e kar̂pe ro mak Xose Yîwratarî tî n̂encetken̂e Exipsiu komo, Paraw yawno komo.

3 On wara tî kekn̂e Xose takno komo ya, Xose ow ha. Ahce wa nai apapa, waipîra rma nai? kekn̂e tî yîwya so. Eikura ro makî tî ka xatken̂e akno komo. N̂eserepoketken̂e ro makî tî noro poko.

4 On wara tî kekn̂e Xose yîwya so, Oona cma re mîmokyaxe meyehra n̂he tak, kekn̂e tî. Ero ke yîmîtkoso takî tî cetken̂e. On wara tî kekn̂e hara yîwya so, Xose xa ow ha. Awakno komo rma ow, oona an̂en̂epethîrî komo. Exitu pona ow men̂epetken̂e epethîrî pona.

5 Ero poko tko eserepokara ehcoko. Yîrwomra marha ehcoko apoko so rma oyen̂epen̂enho me awexirî ke so. Kaan xa matko oyen̂epekn̂e ham xiya aywapu so. Waipîra ciino rin̂e me oyen̂epekn̂e.

6 Asak ro makî ka n̂icimn̂ipuntai rooma poko kehtoponhîrî komo. Nai rma 5 cimn̂îpu xa hara epetara naatî yehtopo, eperîrî yenmekîra kehtopo kom ha.

7 Aywapu so tko Kaan oyen̂epekn̂e waipîra awehtome so, roowo pono me rma ehtome so awepamrî komo. Ero wa oriyakn̂e akurunpetome so xa okre.

8 Ero ke amyamro pînî rma ow men̂epetken̂e xiya. Kaan xa oyen̂epekn̂e ham. Noro rma oriyakn̂e Paraw yîîm wara rma ha re. Noro mîn yenîn̂e me oriyakn̂e. Miyan komo yantoman̂e me marha oriyakn̂e Exitu pono komo yantoman̂e me ha.

9 Ero ke on wara wîîkes awya so, yohno men etocoko hara apapa yaka. On wara kacoko yîwya, Apa, on wara nîîkai amumuru Xose awya, Exitu pono komo yantoman̂e me rma oriyakn̂e Kaan, miyan komo yantoman̂e me rma. Ero ke yohno amoko ohyaka, nîîkai awya, kacoko yîwya.

10 Kosen pona tak esekenmatamko omîtwo awehtome. Iito marha ekenmakî amxîkrî komo, aparî komo marha, awoh komo marha oper̂a, paaka kom ha. Ahnoro awemyawno tak eeko omîtkoso n̂he, kacoko yîwya.

11 Iito awexitaw so tak knahmexe so. 5 cimn̂ipu rma ka nasî atîhtara ro mak naatî yehtopo. Ero ke omîtkoso n̂he amohcoko. Meye rma awexitaw so mepurantanketîkexe ro mak okwe, metînaketîkexe marha okwe. Ero wa men maxe amoro, ahyawno komo marha, kacoko. Ero wa kacoko apapa ya, kekn̂e tî Xose takno komo ya.

12 On wara marha tî kekn̂e yîwya so, Awero ro so rma tan kîmtapowasî awakro so, Benxamîn wero ro marha. Anarî pîn, ow xa tan kîmtapowasî awakro so, kekn̂e tî.

13 Apapa ya men ekatîmcoko oyehtopo, Exitu pono komo yopono me ro mak oyehtopo ekatîmtîkacoko yîwya. An̂enîthîrî komo rma ekatîmtîkacoko yîwya. Yohno men noro ehcoko xiya ohyaka, kekn̂e tî. Ero wa tî kekn̂e Xose takno komo ya.

14 Ero wa kache Benxamin takî tî nîpîmîmiyakn̂e Xose. Tîpîmîmiso rma tî nîwracekn̂e. Ero wa xa marha tî Benxamin nîwracekn̂e.

15 Ahnoro takno komo tî n̂ewcokekn̂e Xose. N̂examro yîpîmîmiyataw marha tî nîwracekn̂e. Yîwratache so Xose yakro tî nîmtapowatken̂e akno komo. Ero wa tî xatken̂e.

16 Ero yinhîrî takî tî Paraw komo n̂encetken̂e Xose yakno komo mohtopo. Xose yakno komo mohcow, kacho tî n̂encetken̂e. Ero wa kacho yentache tawake tî xakn̂e Paraw, maywen komo marha.

17-18 Ero ke on wara tî kekn̂e Paraw Xose ya, On wara men kasko awakno komo ya, Aamo ka etocoko Kanan pona hara. Aporan komo tak akricoko awoh komo mkahsî awtotome so. Aamo komo ehcoko, apici komo, amxîkrî komo, awanton komo, ero wara. Ohyaka ka ehcoko ha. Oona amokuche so kir̂wan tak wenpes awya so roowo, aweken kom ha. Tan awexitaw so tak tînahpore xa maxe okre, kasko yîwya so.

19 Tarara komo marha aacoko xehxa Exitu pono. Apici komo yen me aacoko, amxîkrî komo yen me marha. Aamo tak ehcoko oona.

20 Awemyawno komo ponarora ro mak ehcoko. Kir̂wanî ro rma nasî awemyawno komo me, Exitu pono ahnoro, kacoko yîwya so, kekn̂e tî Paraw Xose ya. Ero ke ero wara rma tî kekn̂e Xose takno komo ya.

21 Ero ke ero wara rma tî xatken̂e Ixaw mumuru komo. Xose tî nîmyakn̂e yîtararan komo yîwya so Paraw mtapotachonho yaw roro rma. Poran komo marha tî nîmyakn̂e yîwya so.

22 Ponon komo marha tî nîmyakn̂e yîwya so. Cewn̂e so tî nîmyakn̂e yîwya so. Benxamin pononî reha tî nîmyakn̂e 5 yakenon. Exepeyu marha tî nîmyakn̂e yîwya 300 yakenon.

23 Tîîm yemyawno marha tî narpekn̂e yîwya so. Mîn hakî makî tî narpekn̂e kir̂wanî komo Exitu pono. 10 buhu narpekn̂e kir̂wanî ro ke tîmkawnoyem komo. 10 buhu xa hara tî narpekn̂e woosî kom hara. Puruma ke tîmkawnoyem mîk xakn̂e, iyuru ke marha, yîîm poran kom ha. Ero yipu tî narpekn̂e Xose tîîm yaka.

24 Ero ke takno komo takî tî n̂en̂epekn̂e Xose. Ero ke takî tî cetken̂e. On wara tî kekn̂e Xose yîwya so torî me so, Eseira men ehcoko esama yaw, kekn̂e tî. Ero wa tî kekn̂e Xose takno komo ya.

25 Ero ke takî tî cetken̂e Xose yakno komo. Exitu poi tî cetken̂e Kanan pona tîîm komo yaka.

26 Tîîm komo yenîche on wara tî ketken̂e yîwya, Apa, waipîra rma nai Xose. Exitu po nai. Iitono komo kopenaton me nasî, miyan komo kopenaton me rma, ketken̂e tî yîwya. On wara tko tî xakn̂e Xako, n̂esekatkekn̂e ro mak n̂examro yanwekrî ke.

27 Ero yinhîrî takî tî Xose mtapotachonho n̂ekatîmtîketken̂e yîwya. Ero wa men kacoko, kachonho tî n̂ekatîmtîketken̂e yîwya. Tarara marha tî n̂een̂akn̂e Xako ceen me Xose n̂ekpotho. Ero yipu yenîche tak tahwore takî tî xakn̂e hara, yîîm komo.

28 Yaaro ham, kekn̂e takî tî. Omumuru rma nai ham waipîra. Ero ke noro yenso kîwcesî owaipîrarî ha ka, kekn̂e tî. Ero wa tî kekn̂e Xako.