Taa, ero yinhîrî takî tî rooma poko n̂ehtîketken̂e ro mak Kanan pono kom ha.

2 Ero ke Xako komo marha tî nahtîketken̂e puruma Exitu poi tîn̂ekîthîrî kom okwe. Ero ke on wara tî kekn̂e Xako tumumuru komo ya. Ai okopuci komo, etocoko xa hara Exitu pona kuru komo yaponso xa hara, kekn̂e tî yîwya so.

3 On wara tko tî n̂eyukyakn̂e Xuta tîîmî mtaka, Apa, on wara kan̂enho tko mîkro antomano rin̂e, Oyenso mokuhra ro mak men ehcoko amahtîkîthîrî komo yekîhra awexitaw so, kekn̂e thakwa amna ya. Cerewre ro mak kekn̂e amna ya.

4-5 Ero ke amna yakno men en̂epeko amna yakro. Ero wa en̂epetaw mak awya amna cesî. Noro yen̂epera awexitaw tohra thakwa nas amna okwe. Ero wara rma thakwa tko kekn̂e amna ya antomano rin̂e ha. Oyenso mokuhra ro mak men ehcoko awakno komo yekîhra awexitaw so, kekn̂e amna ya, kekn̂e tî.

6 On wara tî n̂eyukyakn̂e hara Ixaw, Ahce kacho ow mîwîrîmetken̂e ha ke okwe awakno komo yekatîmrî ke awya so? Nai ha amna yakno anarî hara, mîîketken̂e kica yîwya antomano rin̂e ya, kekn̂e tî.

7 Apa, ketken̂e hara yumumuru komo, amna yehtopo yentatîka xe tî xakn̂e antomano rin̂e, kyanan komo yehtopo marha. On wara kekn̂e amna ya, Ahce wa nai aamo komo, kar̂pe rma nai ha? Nai ha na anarî awakno kom hara? kekn̂e marha. Ero yanme thakwa amna n̂ekatîmyakn̂e yîwya amumuru yehtopo. Ehcoko men noro awakno ha, kesî men kîwya so, kahra thakwa xakn̂e amna, ketken̂e tî yîwya, tîîm komo ya.

8 Ero yinhîrî takî tî Xuta nîmtapowakn̂e hara tîîm yakro. On wara tî kekn̂e yîwya, Apa, oyakro xa en̂epeko kar̂pamxan ciki. Ero wa en̂epetaw awya amna tak ces ha. Tohra exitaw amna tîtwaiyaxe men okwe, amoro meero, amna xîkrî komo marha, kekn̂e tî.

9 Owî rma xa wekyas hara amumuru. Ekîhra oyexitaw ahyaka opona xa miir̂as ha. Kicicitho mîkro, kachome tak was awya miya roro yîtîhkan me ro mak.

10 Cecmamyaxe mak okwe. Pahxa rma amna cetaw amna tak nasî tmohso hara oroto, 2-nhîrî me tak ha, kekn̂e tî. Ero wa tî kekn̂e Xuta tîîm ya.

11 Ero ke on wara takî tî kekn̂e yîîm yîwya so, Taa, mîîcetu rma thakwa ham okwe. On wara tko wîîkes awya so, antomano rin̂e ya tîmsom aacoko kir̂wanî mko. Weewe yeperîrî aacoko, katî, ween, knahrî yayin, miiha, tîtko warai, amendowa, ero warai komo aacoko yîwya tîmsom ha.

12 Puranta marha aacoko. Anaponukrî komo yepetho rma aacoko yîramanxapunhîrî yakro rma. Akumixin komo potaw so meen̂atken̂e ero yakro rma aacoko. Twen̂ekarî mak na xakn̂e kayaritomo maywen anarimaw. Ero ke na ahsîra xakn̂e apurantanthîrî komo.

13 Awakno komo marha aacoko. Etocoko tak ha yîhyaka.

14 Kaan ya xa tko awakronoma xe so wasî Karitî ro ya. Apînîn yaw so kayaritomo ciri xe wasî yîwya antomano rin̂e. Xiya awakno komo yen̂epen̂e me hara ciri xe wasî yîwya, iito tînomxapu ha. Benxamin yen̂epen̂e me marha ciri xe wasî yîwya. Ero wa antomano rin̂e ciri xe wasî Kaan ya. Kahwokesî rma okwe omumuru waihyataw. Wara rma ero wa exitaw kahwokesi thakwa mak okwe, kekn̂e tî. Ero wa tî kekn̂e Xako tumumuru komo ya.

15 Ero ke takî tî antomano rin̂e ya tîmsom naar̂atken̂e takro so. Puranta marha naar̂atken̂e tahsîsom yepetho. Pahxa ahsîxapu yepethonho marha tî naar̂atken̂e. Benxamin marha tî naar̂atken̂e takro so. Exitu pona takî tî cetken̂e xa hara Xose yaka.

16 Iito exitaw so takî Benxamin takî tî n̂een̂akn̂e Xose. Noro yenîche on wara tî kekn̂e tîmîn yenîn̂e ya, Moxam arko omîn yaka. Iito exitaw so oyok paraxkakî, tîyoko iyotî komo me. Iyuru komo marha aiko. Kir̂wan̂he tak etakakî kamarakataw eseresmachome so oyakro, kekn̂e tî yîwya.

17 Ero ke ero wara rma tî n̂iir̂akn̂e maywen, Xose mtapotarî yaw roro rma. Xose yakno komo tî naar̂akn̂e yîmîn yaka.

18 Ero wa tarîrî komo ke takî tî n̂eraswatken̂e xa hara Xose yakno komo. Ahce kacho kekpocow so tîmîn yaka hara kopi? ketken̂e tî. Puranta poyero tko na kekpocow so kopi, kukumixin komo potaka yîramanxapunhîrî poyero ha na. Yihcirî me tîtmokyatken̂e ero yimaw yîramanxapunhîrî poyero na kekpocow so xiya kopi. Kahsîyatu so men okwe anarimaw. Tanton me tak kahsîyatu so okwe. Koh komo marha na nahsîya buhu pen ha, ketken̂e tî.

19 Ero ke Xose mîn yenîn̂e yaka takî tî cetken̂e. Noro yakro tî nîmtapowatken̂e. Mîîmo metataw rma tî nîmtapowatken̂e.

20 On wara tî ketken̂e yîwya, Ai apa, pahxa amna mokyakn̂e oona ahyaka so. Tînahrî wece amna mokyakn̂e.

21 Ero yinhîrî amna cekn̂e hara. Kokon̂i cetakriyataw tukumixin amna nîmhokekn̂e. Iito rma tko xakn̂e hara kopi amna purantantho. Amna nîmyakn̂e ero wicakî rma xakn̂e kumixi potaw so. Ero wa xakn̂e ahnoro amna purantantho rma okwe. Ero ke eronhîrî rma amna n̂ek hara.

22 Oroto tahsîsom yepetho marha amna n̂eekî puranta. Tînahrî yahsî xe xa hara nas amna. Ero yepetho tan amna n̂ek ha. Pahxa yîramanxapunhîrî poko camkî mak nas amna. Onoke na nîramanîyakn̂e okwe, ketken̂e tî. Ero wa tî ketken̂e Xose yakno komo yîmîn yenîn̂e ya.

23 On wara tko tî n̂eyukyakn̂e Xose mîn yenîn̂e, Ahwokara ro mak ehcoko, erasîra ehcoko marha. Kaan xa nîmyakn̂e ham apurantan komo akumixin komo yaka rma. Ponaro awehtopo komo, ponaro aamo komo yehtopo marha Noro rma nîmye ham apurantan komo. Ohyaw rma xakn̂e apurantanthîrî komo, kekn̂e tî yîwya so. Ero wa kache Simeaw takî tî n̂ekyakn̂e yîhyaka so.

24 Ero yinhîrî Xose mîn yaka xa takî tî naar̂akn̂e noro yakno komo. Tuuna takî tî n̂ekyakn̂e ehtakorokacho komo. Iyoh komo marha tî nînahmekn̂e buhu kom ha. Ero wa tî n̂iir̂akn̂e Xose mîn yenîn̂e.

25 Taa, on wara kacho tî n̂encetken̂e Xose yakno komo, Antomano rin̂e yakro tî meseresmetu oroto. Kamarakataw tî mokya, kacho. Ero ke yîwya tîmsom takî tî mohketkekn̂e tawcin komo yawno. Ero wa tî nowyatken̂e.

26 Ero yinhîrî takî tî Xose mokyakn̂e tîmîn yaka. Mokuche tak noro ya tîmsom takî tî n̂ekyatken̂e mîîmo yaka xa tak. N̂esewnapetken̂e takî tî Xose mamaka. Ero wa tî xatken̂e.

27 Ero yinhîrî takî tî n̂examro yakro tî nîmtapowakn̂e Xose. Ehtopo komo tî n̂encekn̂e. Ahce wa nai aamo komo owya mekatîmyatken̂e noro? kekn̂e tî yîwya so. Kir̂wan̂he rma nai, waipîra nai ha? kekn̂e tî yîwya so.

28 Nhnk, kir̂wan̂he rma nas apapa, kar̂pe rma cik nas ha. Amaywenî rma mîk ha, ketken̂e tî. Ero wa kache nutupenwatken̂e xa hara noro mamaka, n̂esewnapetken̂e xa.

29 Ero yinhîrî takno ro xa takî tî n̂een̂akn̂e Xose. Benxamin tî mîk n̂een̂akn̂e tînocwan yenakanî ro xa. Ero ke on wara takî tî kekn̂e yîwya so, Awakno komo moso ha, amahtîkîthîrî komo? Owya mekatîmyatken̂e noro na moso ha? kekn̂e tî yîwya so. Nhnk, noro mîkro ha, ketken̂e tî yîwya. Ero ke yîwya tî kekn̂e hara Xose, Kir̂wan̂he xa awakre xe was okopuci Kaan ya, kekn̂e tî yîwya.

30 Ero yimaw takno pînîn yaw xa takî tî n̂ehtîkekn̂e Xose. Ero ke yohno tî cekn̂e anana. Ahna kîwce yîwrataxi? kekn̂e tî tîhnaw. Tamtakpon yaka rma tî n̂ewomyakn̂e. Iito tî nîwracekn̂e.

31 Ero yinhîrî takî tî n̂esewkorokekn̂e hara. Tîwrata xe cehtopo makî tî ka nînîmyakn̂e takno komo yaka tîtotome hara. Taa, erewsî tak etakacoko ha, kekn̂e tî tmaywen komo ya.

32 Ero ke takî tî n̂etaketken̂e. Cewyaro so tko tî n̂etaketken̂e. Mehxa tî n̂etaketken̂e Xose yotî ro. Xehxa n̂hema Xose yakno komo yotî ro tî n̂etaketken̂e hara. Mehxa n̂he takî tî Exitu pono komo yotî ro tî n̂etaketken̂e hara. Cewyaro so tî n̂etaketken̂e ceseresmaxmu komo yotî. Ero wa tî n̂etaketken̂e. Ebrew komo yakro tî eseresmara ro makî tî xatken̂e Exipsiu komo. Kicicme ro makî tî xakn̂e yîwya so Ebrew komo yakro ceseresmacho komo. Ero ke tî ero wa n̂etaketken̂e.

33 Xose yeepatai rma tko tî akno komo n̂eremanmekyatken̂e maywen kom ha. Xehxa tî potuthîrî n̂eremanmekyatken̂e. Etpona re tko tî eremanmekno n̂iir̂atken̂e mahtîkîthîrî pona roro. Ero ke tî n̂eserepoketken̂e Xose yakno komo etpona re eremanmekno rirî ke so.

34 Eremache so iyotî komo takî tî n̂ekampekn̂e Xose. Mer̂pora ro makî tî n̂ekampekn̂e Benxamin yotî reha 5 paayu ro mak okyo. Anarî komo yotî reha tî n̂ekampekn̂e 1 paayu so mak. Taa, iyotî komo yekampoche n̂eseresmetken̂e takî tî. Wooku marha tî n̂eer̂atken̂e tahwore. Ero wa tî n̂eseresmetken̂e Xose yakro rma.