Ero yinhîrî takî tî on wara xakn̂e Xako, tînahke Exitu pono komo yehtopo n̂encekn̂e. Ero ke on wara tî kekn̂e tumumuru komo ya, Ahce kacho etpona mak meen̂atu?

2 On wara kacho cma re wencekn̂e, Exitu po tî nai puruma, kacho. Ero ke iina etocoko knahrî komo yaponso waipîra kehtome so rooma yaka, kekn̂e tî. Ero wa tî kekn̂e Xako tumumuru komo ya.

3 Ero ke Xose yakno komo takî tî cetken̂e Exitu pona puruma yaponso. 10 makî tî cetken̂e.

4 Benxamin tî tohra xakn̂e, Xose yakno ha. Noro yen̂epera tî xakn̂e yîîm akno komo yakro. N̂eraswakn̂e tî, Ahce wa na nai noro cetaw okwe, kekn̂e tî. Ero ke tî en̂epera xakn̂e.

5 Kanan pono komo marha tî xatken̂e rooma poko. Ero ke Exitu pona tî cetken̂e puruma yaponso thakwa. Ero ke iina tîtosom komo yakro rma tî cetken̂e Ixaw mumuru komo.

6 Ero yimaw Xose tî xakn̂e Exitu pono komo yantoman̂e me. Noro xa tî xakn̂e puruma tîmn̂e me iitono komo ya. Ero ke yîhyaka rma tî cetken̂e akno komo. Noro mamakan me rma takî tî n̂esewnapetken̂e akno komo rma.

7 Kuu, n̂oon̂o komo rma mîkyam, kekn̂e tî Xose tîhnaw. Takno komo me rma tî n̂een̂akn̂e. Yîhtînon̂e pîn wara tko tî n̂esenpekn̂e. Rîîwoxe makî tî nîmtapowakn̂e akro so. On wara tî kekn̂e yîwya so, Ahtono ma amyamro ke? kekn̂e tî. Kanan pono amna. Tuuru yaponso cma re amna moko ahyaka, ketken̂e tî.

8 Takno komo me rma tî n̂een̂akn̂e Xose. N̂examro reha tî takno komo me noro yîhtînopîra ro makî tî xatken̂e.

9 Ero yimaw tak tî twosotîmtoponhîrî nîhtînoyakn̂e Xose. Kuu, oyakno komo nutupenwaxe amn̂e omamaka, kachonho rma mîn xakn̂e owosotîmtoponho, kekn̂e tî. On wara makî tko tî kekn̂e yîwya so, Amna waparî makî tko na amyamro okwe. Kar̂pen me amna yehtopo yenso mak na mîmohcow amna yaka, kekn̂e tî yîwya so.

10 Pîra ro mak apa, ketken̂e tî yîmtaka hara. Awanton mak amna. Tînahrî yaponso makî cma re amna moko ahyaka.

11 Noro mumuru re mak amna. Yaaro tîmtapotaxmu mak amna, awaparî komo pîn, ketken̂e tî yîwya.

12 Pîra ro mak, kekn̂e xa hara tî Xose yîmtaka so, kar̂pen me on roowo pono komo yehtopo yenso mohxapu mak amyamro kica, kekn̂e xa hara tî.

13 Pîra ro mak, ketken̂e xa hara tî akno komo yîmtaka hara, on warai xa amna, 12 me rma re ka amna xakn̂e etakno re, noro mumuru re rma, Kanan pono mumuru ha. Meye rma nas amna mahtîkîtho apapa yaw rma. Taa, anarînhîrî pen exihra thakwa nas okwe amna yaknonho pen ha, ketken̂e tî yîwya.

14 Yaaro wa wîîka awya so, kekn̂e tî Xose. Amna waparî mak amyamro okwe, wîîka.

15 On warai poko kukukmexe so, kekn̂e tî, amahtîkîthîrî komo yenîche mak owya ero yimaw mak, Yaaro tîmtapotaxmu kom ham amyamro, wîîkes awya so. Ero ke awen̂epera so wasî amahtîkîthîrî komo mokuhra exitaw. Yaaro waipîra nasî Paraw, ero wa xa marha yaaro wîîkes awya so.

16 Cewn̂e mak en̂epecoko awakno komo amahtîkîthîrî komo wece. Anarî komo reha tanî rma maxe kahrutopo yaw. Ero wa kiir̂axe so yaarono me awehtopo komo yentome owya. Amahtîkîthîrî komo mokuhra exitaw waapa me mak tak kîhtînoyaxe so. Yaaro waipîra nasî Paraw ero wa xa marha yaaro xa tan kîmtapowas ow, kekn̂e tî. Ero wa tî kekn̂e Xose yîwya so.

17 Ero wa kache n̂examro takî tî nahrupekn̂e ahnoro rma okwe. Osorwaw ro tî n̂enmayatken̂e iito kahrutopo yaw okwe.

18 Ero yinhîrî n̂examro takî tî nan̂ikpekn̂e hara Xose osorwaw ro enmapuche. Mokuche so on wara takî tî kekn̂e yîwya so, On wara xa wîîkes awya so, On wara men ehcoko waipîra awehtome so. Kaan ponarono rma ow.

19 On wara xa kukukmexe so yaarono me awehtopo komo yentome owya, cewn̂e mak men̂ekacoko awakno komo kahrutopo yaw rma tînomsom ha. Amyamro reha etocoko hara. Puruma tak aacoko apici komo yuru, amxîkrî komo yuru marha.

20 Ero yinhîrî takî tko ehcoko amahtîkîthîrî komo ohyaka. Noro yenîche mak owya yaarono me tak kîhtînoyaxe so. Ero wa ehcoko waipîra awehtome so, kekn̂e tî. Ero wa tî kekn̂e Xose takno komo ya. Ero ke Xose mtapotarî tî n̂ewehcatken̂e.

21 Ero yinhîrî takî tî n̂examro re mak n̂esencetken̂e iito rma. On wara tî ketken̂e, Kicicme cehsom xa kîwyam ham kakno pen komo yemetanmekrî yanme kîwya so. Cerewre ro mak nîmtapowakn̂e kakro so. Ow en̂epera ehcoko, kekn̂e thakwa cma re kîwya so. Entan̂e pîn wara rma tko tîxatken̂e kica. Ero ke cesemetanmekyaxe kîwyam pen hara okwe, ketken̂e tî.

22 On wara tî kekn̂e Huben hara takno komo ya, Wîîkekn̂e rma re awya so, Rikomo emetanmekîra ehcoko. Kicicme men nas ero wa ciitopo, wîîkekn̂e. Owî tko ewetîra mîxatken̂e kica. Ero ke tak noro pen tak Kaan n̂epanîyasî oroto, kekn̂e tî. Ero wa tî kekn̂e Huben.

23 Yîmtapotarî komo rma tko tî n̂encekn̂e Xose. Noro men kencetu so, kahra ro makî tî xatken̂e akno komo rma. On wara tî xakn̂e Xose n̂examro yakro tîmtapowataw Exitu pono komo mtapotarî yaro makî tî nîmtapowakn̂e. Anarî makî tî n̂entamexpekn̂e yîmtapotarî yîwya so, Ebrew komo mtapotarî yaro tî n̂entamexpekn̂e. Ero ke, Noro men kencetu so, kahra thakwa tî xatken̂e.

24 Yîmtapotarî komo yentache n̂esewkor̂mekn̂e makî tî Xose. Ero yinhîrî takî tî wece so n̂esewkor̂mekn̂e hara tîmtapotachome tak akro so xa hara. Ero yimaw takî tî Simeaw pen nahsîpekn̂e. Napomipekn̂e marha tî akno komo wero ro rma okwe. Ero wa tî n̂iir̂akn̂e Xose.

25 Ero yinhîrî takî tî tmaywen nantomekn̂e takno komo yurmacho poko. On wara tî kekn̂e yîwya, N̂examro kumixin arîhtoko puruma ke. Arîhtoche awya yupurantan komo rma enkak hara yukumixin komo yaka so rma hara. Poran komo marha tîmko yîwya so, kekn̂e tî. Ero wa tî kekn̂e Xose tmaywen ya. Ero ke ero wara rma tî n̂iir̂akn̂e.

26 Ero yinhîrî takî tukumixin komo takî tî nakriyakn̂e Xose yakno komo toh komo mkahsî. Akriche takî tî cetken̂e hara.

27 Mooxe n̂he tîtoche so takî tî cetarî komo n̂eenatken̂e. Ero yimaw takî tî anarî nîmhokekn̂e tukumixin tok nahrî merurkachome. Yîmhokache tupurantanthîrî tî n̂een̂akn̂e hara iito okyo. Kumixi potaw rma tî xakn̂e.

28 Ero ke on wara tî kekn̂e takno komo ya, On hara opurantantho okyo. Tanî rma nas okumixin potaw, kekn̂e tî yîwya so. Ero ke n̂eserepoketken̂e xa takî tî n̂examro. N̂eraswatken̂e ro makî tî okwe. Ahce wa tak Kaan kiir̂atu so hara kopi? ketken̂e tî.

29 Ero yinhîrî tko tî cetken̂e rma esama yaw. Kanan pona roro tî cetken̂e tîîm komo yaka, Xako yaka hara. Noro yenîche cehtoponhîrî komo takî tî n̂ekatîmtîketken̂e yîwya.

30 On wara tî ketken̂e tîîm komo ya, Apa, Exitu pono komo yantoman̂e yakro amna nîmtapotai. Amna xatî pîn wara tko nîmtapotai okwe. Amna yein̂e wara ro mak kai kopi. Exitu pono komo waparî me mak amna n̂een̂e okwe.

31 On wara tko amna n̂eyukyakn̂e yîmtaka, Pîra, yaaro tîmtapotaxmu mak amna, cemarontanî ro. Awaparî pîn komo ro mak amna.

32 12 me cma re ka amna xakn̂e etakno re, noro mumuru re ha, kekn̂e marha amna yîwya. Anarînhîrî pen exihra nas amna yaknonho pen okwe. Amna mahtîkîtho reha nasî tîîm yaw Kanan po, kekn̂e marha amna yîwya.

33-34 On wara tko kekn̂e hara noro, iitono komo yantoman̂e, On wara xa kukukmexe so, Cemarontan xa ham amyamro, kachome owya, anarînhîrî tînomcoko tan awakno komo rma ohyaw. Amyamro reha etocoko hara. Amxîkrî komo yuru tak aacoko, apici komo yuru marha. Ero yinhîrî tak amohcoko xa hara. Amahtîkîthîrî komo men ehcoko. Noro yekîche mak awya so wîîkesî, Cemarontan komo xa ham mîkyam, kwaparî pîn kom ham, wîîkesî tak apoko so. Ero yimaw tak awakno komo wahrunkes hara ahruxapunhîrî pen. Ero yinhîrî mîwarawanwaxe tak amna yakro, kekn̂e thakwa amna ya, ketken̂e tî. Ero wa tî ketken̂e Xose yakno komo tîîm komo ya.

35 Ero yinhîrî tak tukumixin komo ahnoro narketken̂e yamoro. Arketaw yîwya so tukumixin yaw so rma tî n̂een̂atken̂e tupurantanthîrî komo ahnoro rma kopi. Yîîm komo marha tî n̂een̂akn̂e yupurantanthîrî komo. Ero ke takî tî n̂eraswatken̂e ro mak okwe.

36 Ero yinhîrî takî tî on wara kekn̂e yîîm komo yîwya so, Ow mak mumumukexe okwe. Xose pen exihra nas okwe, Simeaw pen marha exihra tak nas hara. Oroto tak Benxamin yarî xe maxe hara okwe. Owîrîmacho me xa nasî ero yipu okwe, kekn̂e tî.

37 On wara tko tî kekn̂e Huben tîîm ya, Apa, oyakro xa en̂epeko Bencamin. Wekyasî rma hara amn̂e oyakro ro rma. Ekîhra oyexitaw ketaw ha re omumuru komo waihkak asakno roro rma, kekn̂e tî yîwya.

38 Pîra, kekn̂e tî yîîm yîmtaka. Omumuru yen̂epera was awakro. Aknonhîrî pen waihyakn̂e okwe. Cewn̂e mak tak nasî moso oroto okwe aknomra. Moso pen xa hara na waihya esama yaw awcetaw so. Poritomotho me wasî kanahmutwe tak ha. Ero yipu rma owaikan̂e me thakwa maxe okwe oyahwokacho ke, kekn̂e tî. Ero wa tî kekn̂e Xako tumumuru komo ya.