Taa, ero yinhîrî takî tî Paraw makîrha takî tî wosowakn̂e hara asakî cimn̂ipu yenatiche. On warai tî n̂een̂akn̂e noro twosoto, tuuna yecihtaw tî n̂ecececekn̂e, N̂iru yecihtaw.

2 Iito exitaw takî tî paaka nawomyakn̂e ecihtaka cuupu yahso. 7 tî xakn̂e paaka. Kir̂wan komo tî mîkyam xatken̂e tupurukyem. Ecihtaka takî tî nawomyakn̂e cuupu yahso. Noro yipu tî n̂een̂akn̂e paaka.

3 Ero yinhîrî takî tî 7 xa hara n̂een̂akn̂e paaka hara. Eepu kwaw marha tî xatken̂e. Ecihtaka xa marha tî nawomyatken̂e. Cenporem pîn komo tî mîkyam xatken̂e okwe, yakporotho mak okwe. Yihcirî me awomxapu mîtkoso takî tî n̂ecececekn̂e iito.

4 Iito cexitaw takî tî tupurukyem pen non̂etîketken̂e okwe yakporotho komo, 7 pen komo rma non̂etken̂e. Ero yipu tî n̂een̂akn̂e twosoto Paraw. Ero yinhîrî tî pakekn̂e hara. Ero wa tî xakn̂e.

5 Ero yinhîrî takî tî nîwînîkyakn̂e xa hara Paraw. Wosowakn̂e xa hara tî. Puruma yepu takî tî n̂een̂akn̂e cewn̂e mak. 7 xakn̂e ero yeperîrî. Kir̂wan tî mîn xakn̂e puruma yeperîrî ehyatkawno xa okre.

6 Ero yinhîrî takî tî 7 me xa hara n̂eperwakn̂e ero re poko rma, eepu poko. Ehyatkawno pîn me takî tî xakn̂e okwe ero yeperîrî. Ocowo nîwîrîmatho me xakn̂e, resce n̂ixan nîwîrîmatho me ha.

7 Ero yinhîrî kir̂wan pen takî tî nahyakn̂e ehyatkawno pîn hara okwe. Ehyatkawno pen tî nahtîkekn̂e okwe kicicitho. Ero wa tî n̂een̂akn̂e Paraw twosoto, puruma yepu n̂een̂akn̂e. Ero yinhîrî pakekn̂e hara tî. Kwosotmo ham kopi, kekn̂e tî. Ero wa tî wosowakn̂e Paraw.

8 Enmapuche takî tî n̂eserepokekn̂e Paraw. Ero ke tî yaskomo nan̂ikpekn̂e. Yuhnari yîhtînon̂e komo marha tî nan̂ikpekn̂e miyan komo rma Exitu pono komo. Noro yipu komo ya tî twosotîmtoponhîrî n̂ekatîmyakn̂e. Camkî tko tî xatken̂e okwe. Apohana, ahce warai pokono na mîn menwo awosoto? ketken̂e makî tî okwe. Ero wa tî ketken̂e Paraw ya.

9 Taa, ero yimaw tak Paraw wokru yetakan̂e komo yantoman̂e tî nîmtapowakn̂e hara Paraw yakro. On wara tî kekn̂e yîwya, Kuu, kicicme wehxe ham okwe. Oroto mak wîhtînopu.

10 Pahxa amna poko mîrwonakn̂e apa amaywen komo poko. Amna mahrupekn̂e akurunî ro mîn yaka. Awru yain̂e komo yantoman̂enho yakro rma amna mahrupekn̂e.

11 Ero yinhîrî amna wosowakn̂e ero re kokmamrî po rma. Cehtopo pokono me rma amna wosowakn̂e.

12 Iito xakn̂e kar̂pamxan amna yakro ahruxapu hara. Ebrew yepamutho tî mîk xakn̂e akurunî ro yantonînho ha. Noro ya amna n̂ekatîmyakn̂e twosotîmtoponhîrî. Entache tak amna yehtopo tak n̂ekatîmyakn̂e. On warai pokono mîn mencow awosoto so, kekn̂e amna ya. Owya n̂ekatîmyakn̂e owosotîmtoponho pokono, oyakrono ya marha n̂ekatîmyakn̂e yîwyan pokono ro hara.

13 Yaaro xa n̂ekatîmyakn̂e ham. Yîmtapotarî yaw roro rma amna xakn̂e. Awokru yetakan̂enho me wîxakn̂e ero warai me xa hara ow mîîr̂akn̂e. Noro pen reha mîparaxkapekn̂e, kahsî makriyakn̂e, kekn̂e tî. Ero wa tî kekn̂e Paraw wokru yetakan̂e.

14 Ero ke Xose yan̂ikn̂e komo takî tî n̂en̂epekn̂e Paraw kahrutopo yaka. Noro takî tî nahrunketken̂e. Cetpoci tî ka nîhwekn̂e Xose, kir̂wan tî namruyakn̂e poono. Ero yinhîrî Paraw yaka takî tî cekn̂e.

15 On wara tî kekn̂e Paraw yîwya, Ai Xose, on wara weexi, kwosotmo kopi kosope. Ahce warai pokono na mîn wenwo owosoto, wîîkesî. Exihra tko nasî ekatîmn̂e. Oroto makî tko awehtopo wenta. Ero pokono xa mîn menwo awosoto, kan̂e xa mîkro, kacho wenta oroto apoko, kekn̂e tî Paraw Xose ya.

16 Ai ha apa. Ow pîn ha tko, kekn̂e tî Xose yîwya. Kaan xa tîwya awakronomacho na n̂ekatîmya awya, kekn̂e tî. Ero wa tî kekn̂e Xose Paraw ya.

17 Ero yinhîrî on wara tî kekn̂e Paraw Xose ya, Kosope kwosotmo. On warai wenwo owosoto, eepu yecihtaw kececeto, N̂iru yecihtaw.

18 Ero yimaw paaka wenwo ponan̂e rma. Ecihtaka tak nawomcow 7 ha. Kir̂wan komo mîkyam n̂ehcow, tupurukyem okre. Ero yinhîrî tak ecihtaka tak nawomcow cuupu yahso.

19 Ero yinhîrî 7 xa hara wenwo paaka hara. Cenporem pîn komo ro mak mîkyam n̂ehcow, yakporotho komo okwe. Kicicitho komo rma re ween̂asî paaka miya so Exitu pono komo. Noro yipu komo tko enîhra wasî kicicitho komo xa tak ha.

20 Ero yinhîrî yihcirî me awomxapu pen komo tak nonotîkacow okwe yakporotho komo. 7 pen komo rma nonocow tupurukyemînhîrî pen kom ha.

21 Noro yipu tonoche takporoso rma n̂ehcow kopi yihcirî me n̂ehcow ero wara rma kopi. Eseresmanînhîrî komo wara rma n̂ehcow hara kopi wepakîra rma okwe. Taa, ero yipu yenîche owosoto kpaka tak hara.

22 Ero yinhîrî takî kîwînko hara, kwosotmo xa hara. Puruma yepu tak wenwo hara cewn̂e mak. 7 me tak n̂eexi eperîrî ero re eepu pokono rma. Kir̂wan mîn n̂eexi eperîrî ehyatkawno okre.

23 Ero yinhîrî takî 7 me xa hara n̂epeta ero poko rma. Kicicme tak n̂epeta ehyatkawno pîn me. Ocowo nîwîrîmatho me mak n̂ex okwe, resce n̂ixan nîwîrîmatho ha.

24 Ero yinhîrî kir̂wanînhîrî pen tak nahtîka okwe kicicitho. Ero yipu wenwo kopi owosoto. Wekatmo ha re yaskomo komo ya. Ero warai pokono mîn ha, kahra ro makî tko n̂ehcow. Camkî thakwa mak n̂ehcow, kekn̂e tî. Ero wa tî kekn̂e Paraw Xose ya.

25 Ero yipu yentache takî tî on wara kekn̂e Xose Paraw ya, Ai ha apa, asakî ro mîwosotmo. Ero re pokono rma tko mîn menwo awosoto, On wara ciino men wiir̂as amn̂e, kacho mîn Kaan n̂enpotho awya.

26 7 cimn̂ipu pokono mîn menwo 7 paaka kir̂wan ha. 7 cimn̂ipu pokono marha mîn menwo hara 7 puruma yeperîrî hara kir̂wan. Ero re pokono rma mîn.

27 7 cimn̂ipu pokono xa marha mîn menwo 7 paaka cenporem pîn hara, yakporotho kom ha. Taa, 7 puruma yeperîrî menwo kicicitho hara, ocowo nîwîrîmatho ha. 7 cimn̂ipu pokono xa marha mîn hara. On wara kacho mîn menwo, 7 cimn̂ipu tak maxe amn̂e rooma poko xa okwe, kacho.

28 Taa, omtapotarî menta ero yaw roro rma masî amn̂e. Ero wara men ciino wiir̂asî, kesî Kaan awya awosotîmtoponhîrî ke.

29 Ero ke on wara tî ka mat ha, kir̂wan̂he ka anatîrî komo n̂eperwasî. Tînahke so xa tak maxe okre 7 cimn̂ipu ha kapu. Ero wa maxe ahnoro Exitu poko hakno komo.

30 Ero yinhîrî tak rooma poko tak maxe hara okwe, 7 cimn̂ipu hara. Tînahke xa awehtoponhîrî komo tak mîhcamnoyaxe okwe Exitu pono komo ahnoro. Metînatkexe mak okwe, metohkexe marha okwe. Ero wa tak maxe ero yimaw okwe Exitu pono komo.

31 Tînahke xa awehtoponhîrî komo poko twen̂ekarî ro mak tak maxe ero yimaw rooma poko xa thakwa awexirî ke so. Yînapumra ro mak maxe ero yimaw.

32 Asakî ro n̂enpo Kaan Paraw ya ero re pokono. Yaaro xa men ero wa wiir̂as amn̂e, kacho rma mîn asakî ro enpotopo. Yohno rma tî ero wa Kaan n̂iir̂a.

33 Ero ke on wara cexpore nasî, takîhsom xa cenpore nasî. Noro tak cirpore nasî Exitu pono komo yenîn̂e me.

34 Ero wa cirpore men nasî, wîîkes awya Paraw ya. Anarî komo marha cirpore nasî naatî yeperîrî yahsîn̂e komo. On wara n̂ehcowpe tînahke xa awexitaw so ha ka, amaywen komo natîrî yeperîrî nahsîcowpe, 7 cimn̂ipu pahkînon ha ka. Poyino mak nahsîcowpe on wicakî, 5 een exitaw eperîrî 1 mak nahsîcowpe ero poyino tîmtosom me. Ero wara roro nahsîcowpe miya roro.

35 Ahsîxapu tak n̂enmecowpe ewto imo pona so. Ero wa n̂enmecowpe Paraw yanme tînahke ka awexitaw so.

36 Ero yinhîrî tak rooma poko maxe hara okwe Exitu pono komo ahnoro. 7 cimn̂ipu maxe rooma poko. Ero yimaw tak yîn̂enmekîthîrî komo mahyaxe okre waipîra awehtome so atîhtara exitaw amararîn komo, kekn̂e tî. Ero wa tî kekn̂e Xose Paraw ya.

37 Taa, kir̂wan̂he tî n̂encekn̂e Paraw Xose mtapotarî. Maywen komo marha tî n̂encekn̂e kir̂wan̂he.

38 Ero ke on wara tî kekn̂e Paraw tmaywen komo ya, Anarî ma re ceen̂at ha moso warai, Kaan Yekatî ken̂arî ha? kekn̂e tî.

39 Ero ke on wara tî kekn̂e hara Paraw Xose ya, Awya makî cma Kaan n̂enpo pahxaro kehtopo komo. Ero ke anarî exihra ro mak nai ham awarai takîhsom xa.

40 Ero ke omîn yenîn̂e me tak kiir̂asî. Amtapotarî yewetîn̂e me marha naxe omaywen komo ahnoro. Ow mak wasî ayopono me kayaritomo me xa tak, kekn̂e tî. Ero wa tî kekn̂e Paraw Xose ya.

41-42 Ero yinhîrî takî tî tamoyeknathîrî mohkekn̂e Paraw. Xose yamorî yaka n̂iir̂akn̂e hara. Kir̂wan marha namrupekn̂e yîwya poono, riin̂u ha. Kir̂wan marha n̂iir̂akn̂e noro warî me exenaka. Ooru ciixapu mîn xakn̂e. On wara kekn̂e yîwya, Exitu pono komo kayaritomon me tak kirî ha. Miyan komo kayaritomon me rma masî, kekn̂e tî. Ero wa tî kekn̂e Paraw Xose ya.

43 Ero yinhîrî takî tî tîtararan yaw narpekn̂e Xose tmaywen komo ya. Asakî tî xakn̂e Paraw tararan. Anarî tî xakn̂e yaw Paraw totopo ro, kir̂wanî ro xa. Anarî tî xakn̂e hara tarara, yaw akrono ro komo totopo hara, kir̂wanî rma ha tko. Ero yaw Xose narpekn̂e. On wara tî ketken̂e aan̂e komo aar̂ataw iitono komo ya, Awosokmuru po so eremacoko moso mamakan wara, ketken̂e miyan komo ya rma. Ero wa tî Xose n̂iir̂akn̂e Paraw. Exitu pono komo kayaritomon me tî n̂iir̂akn̂e miyan komo kayaritomon me rma.

44 On wara marha tî kekn̂e Paraw Xose ya, Paraw xa ow ha. Ero ke on wara wîîkesî omaywen komo ya, Exitu poko hakno komo ya, Ahce na ciri xe awexitaw so awamorî ke so noro yanme mak ciicoko. Ahna na awetari xe awexitaw so noro yanme mak etaricoko, wîîkesî marha, kekn̂e tî. Ero wa tî kekn̂e Paraw Xose ya.

45 Ero yinhîrî takî tî Xose nosohcekn̂e Paraw anarme. Sapenace-Pan̂eia me tak kosohcesî oroto, kekn̂e tî yîwya. Yipici marha tî nîmyakn̂e yîwya, Asenace tî osot ha. Potipera yemsîrî tî mîk xakn̂e. Yaskomo tî mîk xakn̂e Potipera Oon pono ha. Noro yipu yemsîrî tî nîmyakn̂e Paraw Xose pici me. Taa, ero yinhîrî miya so takî tî n̂etar̂akn̂e Xose Exitu poko hakî, mapitaka roro tî cekn̂e.

46 30 cimn̂ipu tî xakn̂e Xose yewrutoponho ero yimaw, Paraw yakrono ro me cecir̂ataw, Exitu pono komo kayaritomon yakrono ro me ecir̂ataw ha. Paraw rma ero wa n̂iir̂akn̂e. Ero ke takî tî miya so cekn̂e Xose. Exitu pono komo chere tî cekn̂e miyan komo chere rma.

47 Ero yimaw takî tî n̂eperwakn̂e xa Exitu pono komo natîrî. Ehyatkaw so xa tî n̂eperwakn̂e. 7 cimn̂ipu pona roro tî ka ero wa n̂eperwakn̂e.

48 Ero ke ero yimaw tî puruma yeperîrî n̂enmekpekn̂e Xose. Exitu pono komo natîrî yeperîrî n̂enmekpekn̂e ahnoro ewto pona so. Ewto pono komo mararîn xakn̂e ewton komo mamhoko. Ero ke mararî yosom komo yewton pona so rma tî n̂enmekpekn̂e puruma yeperîrî.

49 Mer̂pora ro makî tî n̂enmekpekn̂e tuuna imo yecihtaw nasî mer̂pora axawa pupuntho ero wara xakn̂e. Enmexapu tî ka nukuknomekn̂e. Ero yinhîrî takî n̂epamyakn̂e xa takî tî yukuknomarî yopo ro mak tak. Ero wa tî xakn̂e.

50 Taa, ero yimaw takî tî Asenace n̂ewruyakn̂e kîîrî re ciki. Asakî ro tî n̂ewruyakn̂e Xose mumuru re. Ero wa tî n̂ewruyakn̂e Asenace mrerî, Potipera yemsîrî mrerî ha. Yaskomo tî mîk xakn̂e Potipera, Oon pono ha.

51 Potuthîrî tî nosohcekn̂e Xose Manases me. On wara tî kekn̂e yîîm, Ahwora oyehtoponho ponarora tak oriya Kaan ham. Oyanan komo pînîn yawra tak oriya ham, kekn̂e tî. Ero ke Manases me tî nosohcekn̂e noro.

52 Ponan hara tî nosohcekn̂e Eprain me hara. On wara tî kekn̂e Xose ero yimaw, Omxîkrî tak nîmya ham Kaan owya. Tanî rma nîmya ham cesemetanmeso oyehtoponho to rma, kekn̂e tî. Ero ke tî ero wa nosohcekn̂e ciki.

53 Taa, ero yinhîrî tak kir̂wan̂he naatî yepetachonho takî tî n̂enahcakn̂e okwe, 7 cimn̂ipu kom ha.

54 Ero yinhîrî takî tî atîhtara xakn̂e mararîn komo ahnoro okwe. 7 cimn̂ipu atîhtara nasî anatîrî komo amn̂e, kekn̂e tî Xose. Ero wa kachonho yaw roro rma tî xakn̂e okwe. Anarî roowo pono komo natîrî marha tî atîhtara xakn̂e. Ero ke rooma poko takî tî xatken̂e miyan komo rma. Turke reha tî xatken̂e Exitu pono komo ahnoro.

55 On wara tî xatken̂e Exipsiu komo, miyan komo rma, rooma poko cexitaw so, Paraw yaka tî cetken̂e, Tuuru xe nas amna okwe, ketken̂e. On wara tko tî kekn̂e Paraw, Xose ya katatko. Yîmtapotarî men ewetîcoko, kekn̂e makî tî yîwya so.

56 Roowo poko hakno komo tî xatken̂e rooma poko okwe. Ero ke mîîmo mko tak tî nahrunkekn̂e Xose yînahrî komo tîmtome epethîrî pona. Nîromanatken̂e ro makî tî okwe Exipsiu komo meero.

57 Mîn hak ewto pono komo tî rooma poko xatken̂e ero yimaw, roowo pono komo ahnoro. Ero ke thakwa tî mokyatken̂e Exitu pona. Xose yaka makî tî mokyatken̂e tînahrî komo yaponso. Ero wa tî xatken̂e.