Taa, ero yinhîrî takî tî on wara xatken̂e Paraw yantonînho komo, kicicme tî xatken̂e yîwya. Asakî rma tî xatken̂e ero wara. Paraw wokru yetakan̂enho, iyuru yain̂enho marha, noro yipu komo tî xatken̂e kicicme Paraw ya.

2 Ero ke takî tî nîrwonakn̂e Paraw twokru yetakan̂e komo yantoman̂enho poko, iyuru yain̂e komo yantoman̂enho poko marha. Kicicme xa tî xatken̂e yîwya.

3 Ero ke n̂examro tî nahrupekn̂e, Tukurun komo yenîn̂e mîn yaka tî nahrupekn̂e, kahrutopo yaka, Xose xakn̂e iina rma. Ero wa tî n̂examro nahruyakn̂e Paraw.

4 Ero ke on wara tî kekn̂e Paraw kurun komo yantoman̂e Xose ya, Moxam cirko iina ahyaka rma. En̂epera men esko, kekn̂e tî. Ero ke ero wa tî n̂examro n̂iir̂akn̂e Xose. Iito tî xatken̂e pahkî n̂he ha re.

5 Taa, ero yinhîrî kosope takî tî wosowatken̂e Paraw yantonînho komo. Asakno roro rma tî wosowatken̂e ero po rma. N̂examro yehtopo pokono rma tî mîn xakn̂e wosotîmtopo komo. Anarî wosowakn̂e cehtopo poko, anarî wosowakn̂e hara cehtopo ro poko hara. Ero wa tî wosowatken̂e Paraw wokru yetakan̂enho, iyuru yain̂enho marha tî.

6 Enmapuche takî tî yîhyaka so cekn̂e Xose. Ero yimaw anarî me tko tî n̂een̂akn̂e n̂examro yewru, ahwora tî n̂een̂akn̂e.

7 Ero ke on wara tî kekn̂e Xose yîwya so, Ahce kacho ahwora mat oroto hara? kekn̂e tî yîwya so. Ero wa tî kekn̂e Paraw maywen komo ya, tîhyaka ahruxapu komo ya rma.

8 Ero ke on wara tî ketken̂e Xose ya, Amna wosotmo kopi, ketken̂e tî. Ero wa kacho mîn awosotîmtopo, kan̂e exihra tko nas okwe, ketken̂e tî yîwya. Ai ha, kekn̂e tî Xose, Kaan mak xa tko, Ero pokono mîn ham, kan̂e me kirmexpesî. Ero ke awosotîmtopo komo ekatîmcoko owya, kekn̂e tî yîwya so.

9 Ero ke Paraw wokru yetakan̂enho tî ka n̂ekatîmyakn̂e twosotîmtoponhîrî yihcirî me. On wara tî kekn̂e, On warai wenwo owosoto kopi, uupa yatî wenwo.

10 Tperemke n̂eexi, osorwaw n̂eexi peremru. N̂epemrutunta, kir̂wan̂he epemrutun wenwo. Ero yinhîrî ceperke n̂ex hara yohno rma. Tupurmem me rma n̂eperwakn̂e kopi.

11 Taa, Paraw parakwen n̂eexi oyemyaw. Ero ke uupa yeperîrî tak wîpotu. Wapikmo marha. Paraw parakwen yaka rma momoku yukun. Ero tak wîîm hara Paraw ya. Ero yipu wenwo owosoto, kekn̂e tî. Ero wa tî n̂ekatîmyakn̂e Paraw wokru yetakan̂enho.

12 Yîmtapotarî yentache takî tî on wara kekn̂e Xose yîwya, On wara kacho xa mîn menwo awosoto, osorwaw kaamo yenmatopo pokono mîn n̂ex ham osorwaw peremru.

13 Osorwaw enmapuche tak awahrunkes hara Paraw. Twokru yetakan̂e me tak awir̂asî xa hara Paraw. Noro yemyaka rma wokru mîmyasî. Pahxa mîxakn̂e ero wa xa marha awir̂as hara, kekn̂e tî Xose yîwya.

14 On wara marha tî kekn̂e Xose noro ya, Paraw wokru yetakan̂enho ya ha, On wara wîîkes awya oyakno, awahrunkache tak oponaro cma re masî. Owî cma re mekatîmyasî Paraw ya oyahrunkachome tak yîwya.

15 Ebrew komo rowon pononho ow. Xiya ehxapu thakwa mak ow, en̂epa me. Ero yinhîrî tak oyahruyatken̂e tantono kom hara. Tohnaw ro thakwa mak okwe oyahruyatken̂e. Kicicitho me exihra ro mak wîxakn̂e, kekn̂e tî. Ero wa tî kekn̂e Xose Paraw wokru yetakan̂enho ya.

16 Taa, ero yinhîrî on wara tî kekn̂e Paraw yuru yain̂enho hara tîhnaw, Nnn, kir̂wan̂he noro yehtopo pokono mîn n̂ex ham noro wosotîmtoponho. Ero ke owosotîmtopo wekatîmyas ow hara, kekn̂e tî. Ero ke on wara tî kekn̂e Xose ya, On warai wenwo ow hara owosoto, aixapu yeen n̂eexi okanataw, kahxapu ha. Osorwawno mîn n̂eexi kahxapu, tumutwem re.

17 Etantaw re n̂eexi kahxapu komo. Kanahtawno yaw xa n̂eexi puruma anarmerpa aixapu. Paraw yuru rma mîn n̂eexi. Torowo tko moko kahxapu yawnonho yahso okwe. Nahtîka ro mak okwe ahnoro puruma aixaputho. Ero wa nahtîka okanatawno yawnonho ha. Ero yipu wenwo owosoto, kekn̂e tî. Ero wa tî kekn̂e Paraw yuru yain̂enho.

18 On wara tî n̂eyukyakn̂e Xose, On wara kacho mîn menwo awosoto, osorwaw kaamo yenmatopo pokono mîn menwo ham osorwaw kahxapu, akanataw menwo ero komo.

19 Osorwaw ro enmapuche tak apîmkocesî Paraw. Kahsî tak apunthîrî nakriyasî weewe potkoso rma. Kwacinama yotî me tak nasî apunthîrî okwe, kekn̂e tî. Ero wa tî kekn̂e Xose Paraw yuru yain̂enho ya.

20 Taa, osorwaw enmapuche takî tî Paraw yewrutuponho me takî tî n̂enmayakn̂e. Ero po takî tî tmaywen komo n̂erewusmekn̂e ahnoro. Ero po xa marha tî ahruxapunhîrî komo nahrunkekn̂e hara, twokru yetakan̂e komo yantoman̂enho, tuuru yain̂e komo yantoman̂enho, ero warai komo tî nahrunkekn̂e Paraw.

21 Twokru yetakan̂enho takî tî n̂iir̂akn̂e twokru yetakan̂e komo yenîn̂e me hara. Ero ke takî tî Paraw wokru nîmyakn̂e hara yîwya. Ero wa tî xakn̂e noro.

22 Tuuru yain̂enho pen puntho tî paraxkekn̂e, nakriyakn̂e marha weewe potkoso. Xose mtapotachonho yaw roro rma tî n̂iir̂akn̂e Paraw okwe. Ero wa tî xatken̂e Paraw yantonînho komo.

23 Taa, Xose ponarora rma tko tî xakn̂e Paraw wokru yetakan̂e komo yantoman̂e. Twen̂ekarî makî tî xakn̂e okwe. Ero wa tî xakn̂e okwe.