Taa, on wara tî xakn̂e Xose hara. Exitu po tî xakn̂e. Ismaerita komo tî naar̂atken̂e iina. Taa, iito tî xakn̂e Paraw maywen, yukurun komo yantoman̂e. Exipsiu tî mîk xakn̂e. Potipa tî mîk xakn̂e noro yosotî. Noro yanton me takî tî Xose nîmyatken̂e Ismaew yepamtho komo epethîrî pona.

2 Kporin komo tko tî Xose nakronomekn̂e. Ehn̂an me ro makî tî n̂iir̂akn̂e ahce na poko exitaw. Ero wa tî xakn̂e Xose. Tantoman̂e yaw tî xakn̂e Exipsiu yaw.

3 Iito exitaw takî tî Xose yehtopo n̂een̂akn̂e antoman̂e. Kporin komo xa nai ham moso yakro. Ehn̂an me ro mak n̂iir̂asî Kporin komo. Nakronome ham, kekn̂e tî.

4 Tawake tî xakn̂e Potipa Xose poko. Ero ke tanton me n̂iir̂akn̂e. Ero yinhîrî tî tîmîn yenîn̂e me n̂iir̂akn̂e. Cemyawno yenîn̂e me marha tî n̂iir̂akn̂e, miyan komo yenîn̂e me rma.

5 Ero wa Xose ciriche takî tî Potipa wakrekn̂e Kporin komo noro yanme. Kir̂wan̂he makî tî n̂iir̂akn̂e Potipa yemyawno, mîîmo yawno. Iyoku tî n̂epamnoyakn̂e, waipîra so tî n̂iir̂akn̂e. Mararîn marha tî natîkrekn̂e kir̂wan̂he. Ero wa tî noro yemyawno n̂iir̂akn̂e Kporin komo Xose yanme.

6 Ero ke tî cemyawno yenîn̂e me xa tak n̂iir̂akn̂e. Cemyawno ponarora ro mak takî tî xakn̂e Potipa. Tînahrî ponaro makî tî xakn̂e. Ero wa tî xakn̂e Potipa. On wara marha tî xakn̂e Xose, tupunporem tî mîk xakn̂e, cepataporem marha.

7 Ero yinhîrî takî tî on wara xakn̂e Xose yantoman̂e pic hara kica, Xose wece tî n̂entîkekn̂e. On wara tî kekn̂e yîwya, Amoko oyenaka, kekn̂e tî kica.

8 Pîra ro mak, kekn̂e tî Xose yîwya, On wara nasî oyantoman̂e opoko, cemyawno yenîn̂e me oriye miyan komo yenîn̂e me rma. Ahce na ponarora ro mak nasî noro, Xose mak enîn̂e me n̂expe, kesî makî.

9 Oyopono exihra ro mak nasî anton komo, yîhyawno kom ha. Ahnoro nîmyakn̂e cemyawno oyemyaka. Amoro mak amîhra nas owya cipici me awexirî ke. Ero ke ahce wa thakwa re kicicitho poko wai hara kica? Kicicitho me ro mak wasî, apoko oyexitaw okwe. Kaan ya meero kicicme was okwe, kekn̂e tî. Ero wa tî kekn̂e Xose yîwya.

10 Ketîkekn̂e rma tko tî kica Potipa pici yîwya. Oyenaka amoko, kekn̂e roro tî kica. Enmar̂atîxera tî kekn̂e. Ewetîra ro makî tko tî xakn̂e Xose. Noro yenaka etakrira ro makî tî xakn̂e. Yîhyari tî tohra marha xakn̂e.

11 Taa, ero yimaw rma takî tî Potipa mîn yaka cekn̂e Xose tantoman̂e yemyawno poko. Anarî komo tko tî exihra xatken̂e iito mîîmo yaw, kîrkomo exihra.

12 Ero yimaw takî tî Xose nahsîyakn̂e Potipa pici. Ponon poko makî tî nahsîyakn̂e. Oyenaka men amok ha, kekn̂e xa hara tî yîwya. Sumai, tpononthîrî takî tî Xose nînomyakn̂e wooxam yemyaw rma. N̂emahciyakn̂e takî tî Xose mîîmo yai hara.

13-14 Xose yemahciche on wara takî tî n̂esehtîn̂oyakn̂e hara wooxam, Onî rma tko noro ponontho. Miya rma n̂emahciw kica, kekn̂e tî. Ero ke kîrkomo takî tî nan̂ikyakn̂e tîmîn yaw cetapickaxmu komo. On wara tî kekn̂e yîwya so, Kicicitho ro mak mîk n̂ekye ham kica oyin̂o Ebrew yepamtho. Owîrîman̂e mak mîk n̂ekye ham kica. Ohyaka moko kica oyenaka etakriso. Enko xe, pononthîrî ha. Kemtaraka ro mak kica.

15 Oyemtarakache tak n̂emahciw katpanaka. Tpononthîrî mak tak nînom ohyaw, kekn̂e tî. Ero wa tî kekn̂e Potipa pici kica kîrkomo ya.

16 Ero yinhîrî Xose ponontho takî tî nakriyakn̂e tîhyaka rma. Ciin̂o mokuche takî tî n̂enpekn̂e yîwya.

17 On wara tî kekn̂e ciin̂o ya, On wara n̂eexi kica Ebrew yepamtho an̂ekîthîrî, Okukmaxi moko kica.

18 Kemtaraka tko kar̂pe ro mak. Ero ke n̂emahciw mîîmo yai. Ontho mak nînom ohyaw tpononthîrî. Ero wa n̂eexi kica an̂ekîthîrî, kekn̂e tî Potipa pici ciin̂o ya.

19 Cipici mtapotarî tî n̂encekn̂e Xose yantoman̂e. Oyahsîso moko kica awanton, kacho tî n̂encekn̂e. Ero ke tî nîrwonakn̂e.

20 Ero ke kahrutopo yaka takî tî nahruyakn̂e Xose pen okwe. Paraw nahrutho komo xatken̂e iina rma tî nahruyakn̂e. Ero ke tî iito thakwa xakn̂e Xose pen kahrutopo yaw mak okwe.

21 Kporin komo rma tko nakronomekn̂e noro kahrutopo yaw exitaw. Yîpînîn yaw tî xakn̂e. Ero ke tawake takî tî n̂iir̂akn̂e ahruxapu komo yenîn̂e Xose poko.

22 Ero ke on wara tî Xose n̂iir̂akn̂e noro hara ahruxapu komo yenîn̂e, iitono komo yenîn̂e me takî tî n̂iir̂akn̂e, ahruxapu komo yenîn̂e me. Ahce na poko exitaw so iitono komo Xose makî tî xakn̂e enîn̂e me.

23 Xose n̂enîrî komo ponarora ro makî takî tî xakn̂e ahruxapu yenîn̂e ro. Ero wa tî xakn̂e noro Xose yakronoman̂e me exirî ke Kporin komo. Ehn̂an me ro makî tî n̂iir̂akn̂e ahce na poko exitaw. Ero wa tî Xose n̂iir̂akn̂e Kporin komo.