Taa, ero yinhîrî takî tî on wara xakn̂e Xuta, anana tak tî cekn̂e takno komo yai. Aturaw pono yaka tî cekn̂e. Iira tî mîk xakn̂e noro yosotî. Noro yaka tî cekn̂e.

2 Noro yaw cexitaw takî tî wooxam n̂een̂akn̂e Xuta, Kanan pono yemsîrî. Sua tî mîk xakn̂e wooxam yîîm yosotî. Noro yemsîrî tî nahsîyakn̂e Xuta cipici me.

3 Ero yinhîrî takî tî yipici n̂etahsîyakn̂e. N̂ewruyakn̂e tak ha tî, kîîrî me. Ere me tî noro nosohcekn̂e yîîm.

4 Ero yinhîrî takî tî n̂etahsîyakn̂e xa hara yipici. N̂ewruyakn̂e xa hara tî kîîrî xa hara. Onan me takî tî noro nosohcekn̂e hara yîson.

5 Ero yinhîrî takî tî n̂etahsîyakn̂e xa hara yipici. N̂ewruyakn̂e xa hara tî kîîrî me xa hara. Sera me takî tî noro nosohcekn̂e hara yîson. Kesibe po takî tî xakn̂e Xuta cipici yewruyataw.

6 Taa, n̂examronhîrî yetîtîkache takî tî tumumuru pici n̂een̂akn̂e Xuta, Ere pic ha. Tama tî mîk xakn̂e yipici yosotî.

7 Kicicme tko tî xakn̂e hara Ere, Xuta mumuru, poturme ewruxapu ha. Kicicme ro makî tî xakn̂e okwe. Ero wa ehtopo tî n̂een̂akn̂e Kporin komo. Ero ke tî noro pen waihkekn̂e Kporin komo rma.

8 Ero ke on wara tî kekn̂e Xuta Onan ya, Ai okopuci, awakno pen cinho yenaka tak etoko amoro yîmxîkri ciitome awya. Ero wa esko awakno pen xîkrî me cehsom ciitome awya, kekn̂e tî.

9 On wara tko tî Onan kekn̂e, Oyaknonho pen cinho yîmxîkreche owya omxîkrî mera nai okwe, kekn̂e tî. Ero ke taknonhîrî pen cinho yenaka cetakriche roowo pona makî tî n̂ekukekn̂e kica. Ero wa tî xakn̂e Onan okwe.

10 Kicicme tko tî n̂een̂akn̂e Kporin komo ero yipu. Ero ke noro pen marha takî tî waihkekn̂e okwe.

11 Ero ke on wara tî kekn̂e Xuta tumumuthîrî cinho ya, Tama ya ha, Aamo yaka etok hara. Yîhyaw ka esko iin̂omnî me ha ka. Amn̂e Sera yetîtîkache tak noro mak hara awahsîya hara, kekn̂e tî Xuta. Cerahtîmrî ke tî ero wa kekn̂e. Waihya hara men okwe omumuru xa hara Sera pen, kekn̂e tî. Ero ke tîîm yaka tî cekn̂e Tama. Iito makî tî xakn̂e pahkî.

12 Taa, pahkî exiche takî tî Xuta cinho pen waihyakn̂e okwe, Sua yemsîtho pen ha. Ero ke yîpînîn yaw tî ka nîwracekn̂e Xuta. Tîwratachonhîrî yîtîhkache takî tî Cimna pona cekn̂e. Toh komo poci yawoton̂e komo yenso tî cekn̂e. Ira marha tî cekn̂e Xuta yakro, Aturaw pono, yîhyaw ka xakn̂e noro.

13 Taa, ero wa n̂examro totopo tî n̂encekn̂e Tama. Aan̂onhîrî pen yîmînho tî cee Cimna pona toh komo poci yawotoso, kacho tî n̂encekn̂e.

14 Ero ke on wara tî kekn̂e Tama tîhnaw, Cetîtîkaxi tak nasî Sera. Awaknonhîrî pen cinho tak ahsîko, kahra rma nasî yîîm okwe yîwya, kekn̂e tî tîhnaw. Ero ke on wara takî tî xakn̂e Tama, tpononthîrî tî namruponkekn̂e iin̂o waixapu me cehtoponhîrî, poono. Anarî tî namruyakn̂e hara. N̂esewoponcekn̂e marha tî. Ero yinhîrî takî tî Cimna yesamarî yakumyaka n̂eremekn̂e esama maxixin yaw ha. Iina tî n̂eremekn̂e.

15 Taa, ero yaw takî tî mokyakn̂e Xuta, esama yaw. Tama takî tî n̂een̂akn̂e. Kîîrî pohkan̂e ro mîkro, kekn̂e takî tî Xuta. Ero wa tî kekn̂e ceewopoi exirî ke.

16 Ero ke n̂ecececekn̂e takî tî Xuta. Noro yakro tî nîmtapowakn̂e, Ai, kmokyasî cma re awenaka, kekn̂e tî yîwya. Omumutho cinho moso, kahra tî xakn̂e. Ai ha, kekn̂e tî wooxam. Ahce cokorî ka mîmya owya oyenaka amohtamci? kekn̂e tî yîwya.

17 Ai ha, kekn̂e tî Xuta. Taa, mehxa wekpesî amn̂e awoku oper̂a xîkrî, kekn̂e tî yîwya. Ai ha, kekn̂e tî wooxam, ahce xa ka mîmya owya oroto, Yaaro xa ham, oper̂a xîkrî n̂ekpe ham amn̂e, kachome tak owya? kekn̂e tî.

18 Amoro ha tko, kekn̂e tî Xuta. Ahce xe mai, Yaaro xa, oyepeme xa ham, kachome awya? kekn̂e tî Xuta. Awemeknumci tîmko akuknonî ro ken̂arî, tawyocke rma tîmko. Awamoyin marha tîmko, mahsîyas ero rma. Ero wa ka tîmko owya, Oyepeme xa ham, kachome owya, kekn̂e tî. Ero ke erotho komo rma tî nîmyakn̂e yîwya. Ero yinhîrî enaka takî tî n̂etakriyakn̂e Xuta kica. Ero ke takî tî n̂etahsîyakn̂e Tama Xuta xîkrî me rma.

19 Taa, Xuta toche takî tî Tama cekn̂e tîîm mîn yaka hara. Ceewoponhîrî takî tî mohkekn̂e. Iin̂o waixapu ponon namruyakn̂e hara.

20 Taa, tok poci pahn̂e komo yaka cepatakache takî tî kabritu narpekn̂e Xuta wooxam yaka enaka tîtotoponhîrî yepetho me. Aturaw pono ya tî narpekn̂e, takrono ya rma. On wara tî kekn̂e yîwya, Moso kabritu tîmta wooxam ya meyeno ya. Tîmîche awya oyemeknumcitho men ek hara onmîtho yîwya. Oyamoyintho marha ek ha, kekn̂e tî. Ero ke kabritu takî tî naar̂akn̂e Ira. Wooxamu yenîhra rma tko tî xakn̂e okwe.

21 Ero ke iitono komo ya takî tî kekn̂e, Ahto nai wooxam kîîrî pohkan̂e ro? Tan tî xakn̂e kir̂wantaw esama yakumyaw, kekn̂e tî yîwya so. Apohana, kîîrî pohkan̂e ro exihra ro mak tan xakn̂e, ketken̂e tî.

22 Ero ke Xuta yaka tî n̂etîramekn̂e hara Iira. Wooxam yenîhra men wex okwe, kekn̂e tî yîwya. Iitono komo marha ketken̂e, Kîîrî pohkan̂e ro exihra ro mak tan xakn̂e, ketken̂e marha owya, kekn̂e tî yîwya.

23 Taa, n̂expe rma kr̂a okachotho yîhyaw wooxam yaw ha, kekn̂e tî Xuta. Noro yepor̂ataw kîwya kicicitho me kîhtînoyaxe so okwe iitono komo. Ero ke n̂expe rma. Maar̂e rma cma ha re epethîrî, kabritu ha. Wooxam yenîhra rma mehxe ha. Ero ke n̂expe rma yîhyaw, kekn̂e tî. Ero wa tî kekn̂e Xuta.

24 Taa, ero yinhîrî takî tî 3 nuun̂i exiche on wara tî ketken̂e iitono komo Xuta ya, Kicicitho me nasî Tama aparî kica, ketken̂e. Kîîrî poko xakn̂e ham kica. Tarke tak nasî okwe, ketken̂e tî. Kica, kekn̂e tî Xuta. Ehtatko kr̂a roro pona akn̂itome kîwya so, kekn̂e tî.

25 Ero ke Tama takî tî naar̂atken̂e kr̂a roro pona. Ero yimaw takî tî Xuta yemeknumcitho narpekn̂e Tama Xuta yaka, yukuknon ha. Amoyinthîrî marha tî narpekn̂e. On wara men kasko Xuta ya, kekn̂e tî aan̂e ya, Onoke kachotho tan ha, emeknumci, yukuknon ha? Onoke yamoyintho marha tan hara? Yîhtînoko ha men. Omxîkrî yîîmî rma mîkro on yosom ha, kasko men yîwya, kekn̂e tî.

26 Taa, tîkachothîrî yenîche takî tî Xuta ya on wara kekn̂e, Okwe, okachotho ro mak tan okwe. Kir̂wan̂he rma nai noro reha. Ow xa matko wasî kicicme kica. Omumuru ya yipici me ahsîpora rma weexi kica, Sera ya ahsîpora, kekn̂e tî. Ero wa tî kekn̂e Xuta. Ero yinhîrî noro pokohra ro makî takî tî xakn̂e. Ero wa tî xakn̂e.

27 Ero yinhîrî takî tî n̂ewruyakn̂e Tama. Asakno me tî n̂ewruyakn̂e.

28 Ewruporo xa exitaw takî tî tamorî ciki n̂enpekn̂e anarî. Enîche takî tî ewrunokan̂e n̂emeknumiyakn̂e mawîrka ke cucurem ke. Poturme ewruxapu moso, kacho tî mîn n̂imiyakn̂e.

29 Ero yinhîrî takî tî tamorî ciki n̂enkayakn̂e hara yaw xa marha. Ero yinhîrî takî tî akno n̂ewruyakn̂e poturu me hara. Ahce kacho awakno mîyoponka hara kica, kekn̂e tî ewrunokan̂e. Ero ke Peres me tî xakn̂e noro yosotî, poturu yosotî.

30 Ero yinhîrî noro yakno takî tî n̂ewruyakn̂e hara, cucurem ke emeknumixapu takî tî. Sera me tî xakn̂e noro yosot hara. Ero wa tî xakn̂e.