Taa, Isake pen waipuche takî tî iito rma xakn̂e Xako Kanan po rma. Anarî yana komo chewno me tî xakn̂e tîîm pen yekenho po rma.

2 On wara tî xatken̂e Xako mumuru komo, ehtoponhîrî komo tan wekatîmyas awya so. Xose tî xakn̂e kar̂pamxan me kapu. 17 cimn̂ipu tî xakn̂e noro yewrutoponho. Ero yimaw tî tîîm yok nahmarî poko xakn̂e takno komo yakro, tîîm pici mrerî komo yakro. Bira, Siwpa, ero wa tî xatken̂e yîîm pici kom ha. N̂examro mrerî komo yakro tî tîîm yoku nahmarî poko xakn̂e Xose. Iito tî ka xakn̂e yîhyaw so. Ero yinhîrî takî tî tîîm yaka cekn̂e hara. Yîwya tî n̂ekatîmyakn̂e takno komo yehtoponho. Kicicme naxe kica oyakno komo, kekn̂e tî yîwya.

3 On wara tî xakn̂e Xako Xose poko, yiixe ro makî tî xakn̂e, akno komo xera n̂he tî xakn̂e. Poritomo me exitaw mak tî Xoxe n̂ewruyakn̂e. Ero ke tî yiixe ro mak xakn̂e. Ero ke tî Xose ponon natpekn̂e. Anarmerpa so kahxapu tî mîn natpekn̂e. Cucurem, tîswayem, tîxewekem, ero warai komo tî natpekn̂e tumumuru ponon me ha.

4 Ero wa tî xakn̂e yîîm, Xose xe xa tî xakn̂e. Akno komo yewresawra ro makî tî ero wara xakn̂e. Ero ke tî Xose xera ro makî tî xatken̂e. Tawake tî noro yîmtapotarera ro mak xatken̂e okwe. Ero wa tî xatken̂e Xose pen poko.

5 Taa, ero yinhîrî on wara takî tî xakn̂e Xose, wosowakn̂e ha tî. Twosotîmtoponhîrî takî tî n̂ekatîmyakn̂e takno komo ya. Ero yipu yekatîmîche yiixera takî tî n̂ehtîketken̂e akno kom okwe.

6 On wara tî kekn̂e Xose yîwya so, Entacoko ka, wekatîmyas awya so owosotîmtoponho.

7 On warai wenwo owosoto, mararî po cehcow puruma yeputho yawrutamirî poko. Ero yinhîrî onawrutamitho tak nawom piiri. Awyan komo reha n̂ececetocow owyan mamhoko. Piiri rma n̂eexi owyan, awyan komo reha nutupentacow owyan mamaka, kekn̂e tî. Ero wa tî twosotîmtoponhîrî n̂ekatîmyakn̂e Xose takno komo ya.

8 Ero ke on wara tî ketken̂e akno kom ha, Kopi, amna kayaritomon me ma re mai ke amn̂e awya? Amaywen me ma re nai amna ha ke awya? ketken̂e tî yîwya. Ero poyero nîîxatîmnoketîketken̂e ro mak tî okwe wosotîmtoponhîrî poyero, ekatîmtoponhîrî poyero marha.

9 Ero yinhîrî takî tî wosowakn̂e xa hara Xose. Ero ke tî twosotîmtoponhîrî n̂ekatîmyakn̂e xa hara takno komo ya. On wara tî kekn̂e yîwya so, Ai, oyakno komo, on wara wenwo owosoto, kah yaw weexi. Ohyaka moko kaamo, nuun̂i marha, xir̂ko marha 11 mak. Ero wa so mohcow ohyaka. Nutupentacow tak omamaka kopi, kekn̂e tî.

10 Tîîm ya marha tî n̂ekatîmyakn̂e twosotîmtoponhîrî. Ero ke Xose n̂eiyakn̂e yîîm. Kopi, ahce warai mîn menwo hara kopi awosoto? kekn̂e tî. Amna ma re wa mokya amamaka yutupentaxi? Owî, anocwan, awakno komo, ero wa ma re mokya amna amamaka yutupentaxi? Cesewnaposo ro ma re amna nutupenwa amamaka awya? kekn̂e tî yîwya. Ero wa tî kekn̂e yîîm Xose ya.

11 Ero warai yekatîmrî ke Xose xera ro makî tî xatken̂e tîyopono wara ekatîmrî ke. Xose mtapotachonho ponaro rma tko tî xakn̂e yîîm ha. Ahce warai poko wa nîîka kopi? kekn̂e makî tî.

12 Taa, ero yinhîrî takî tî tîîm yoku tî naar̂atken̂e xa hara Xose yakno komo. Mooxe tî naar̂atken̂e Siken pona. Ero po takî tî nînahmetken̂e oper̂a.

13 Iito exitaw so pahkî on wara takî tî kekn̂e Ixaw Xose ya, Ai, okopuci amoko ka. On wara wîîkes awya, Siken po tî natu awakno komo koh komo nahmarî poko. Ero ke cma re ken̂epesî yîhyaka so, kekn̂e tî. Tanî was apa, kekn̂e tî Xose tîîm ya.

14 On wara kata awakno komo ya, kekn̂e tî yîwya, Kir̂wan̂he rma matu? Koh kom hara kir̂wan̂he natu? kaxi etoko. Ehtopo komo yentache ekatîmtamko owya, kekn̂e tî yîwya. Ero wa tî tumumuru n̂en̂epekn̂e Xako. Ebron woskaran pono tî mîkyam xatken̂e. En̂exa tî n̂en̂epekn̂e Siken pona.

15 Iina tîtoche woskara pore makî tî waimamyakn̂e okwe takno komo yeporîrî poko. Ai, kekn̂e takî tî iitono. Ahce mepor̂a? kekn̂e tî yîwya.

16 Oyakno komo tan wepor̂asî. Toh komo nînahmetu, ahna na toce okwe? Meen̂a n̂he na katî amoro? kekn̂e tî yîwya.

17 Miya tî cetken̂e, kekn̂e tî. On wara wentai yîmtapotarî komo, Kaikatko hara Totan pona, kacho wencekn̂e, kekn̂e tî. Ero wa tî kekn̂e Xose yakro esepoxapu. Ero ke Totan pona takî tî cekn̂e hara Xose. Iito takî tî takno komo n̂een̂akn̂e.

18 Taa, Xose marha tî n̂een̂atken̂e akno kom hara mooxe rma ka exitaw. Ero yimaw rma tî noro waihkacho poko n̂esencetken̂e okwe.

19-20 Mîkro ha twosotîmsom ha kica, ketken̂e tî. Xiya mokyasî. Ero ke kr̂a tîtwaikacerî. Okoputhîrî tar̂macerî ewtarî yaka. Amn̂e kr̂a apapa ya tîtkexe, Waihye ham okwe amumuthîrî pen ha. Kamara n̂eskai ham okwe, tîtkexe. Ero wa kr̂a ciicerî ha tohnaw kr̂a ehtome wosotîmtoponhîrî, ehn̂acho kr̂a entome kîwya so, ketken̂e tî.

21-22 Anarî me tko tî kekn̂e Hubenî reha. Xose tî n̂ewyomekn̂e waihkara ehtome so. On wara tî kekn̂e noro yîwya so, Noro kamxukutho yen̂epera men cehcerî kîwyam. On wara mak ciicerî ha pohnîntaw tasî. Tanî nai ewtarî. Ero yaka mak tar̂macerî. Etapara n̂hema cehcerî kîwyamu rma, kekn̂e tî. Ero wa tî kekn̂e Huben. Xose yewyoma xe tî xakn̂e, tîîm yaka tî arî xe xakn̂e. Ero ke tî ero wa kekn̂e yîwya so.

23 Taa, Xose mokuche takî tî noro ponontho takî tî mohketken̂e, kir̂wanînhîrî okwe. Cucurem tî mîn xakn̂e, tîswayem, tîxewekem, ero wai tî mohketken̂e okwe.

24 Ero yinhîrî takî tî Xose pen naar̂atken̂e ewtarî yaka. Ero yaka tî nar̂metken̂e. Yarîhnî tî mîn xakn̂e ewtarî, ewkura tî xakn̂e.

25 Ar̂mache rma takî tî n̂eremetken̂e Xose yakno komo ceseresmachome so. Ero yimaw rma tko tî Ismaerita komo n̂een̂atken̂e hara. Xireace poi tmohsom mîkyam xatken̂e. Kameru mkaw so tî mokyatken̂e. Exitu pona tîtosom komo tî mîkyam xatken̂e. Kotoporem tî naar̂atken̂e, ehci marha, naatî yeperîrî marha. Ero yipu komo tî naar̂atken̂e Exitu pona twarawantachome so.

26 Ero ke on wara tî kekn̂e Xuta takno komo ya, Ahce wa kehtome so kakno komo tîtwaiketu, kamxukuthîrî ceyamya ha? Ahce na ahsîra ro mak taxe okwe ero wa cir̂ataw?

27 Epethîrî pona xa matko n̂examro ya tîmcerî Ismaerita komo ya epethîrî pona. Etapara rma cehcerî kîwyamu rma. Kakno komo mîkro, kupun komo me cehsomu rma, kekn̂e tî. Taa, ero wa ham, ketken̂e tî akno kom ha.

28 Ero ke yîhyari so cetaw Micianita komo nîtîtmamyatken̂e takî tî. Xose takî tî nanîmyatken̂e akno komo ewtarî yai. Yîwya so tî nîmyatken̂e epethîrî pona. 20 exepeyu tî nahsîyatken̂e prata, takno komo yepethonho. Ero yinhîrî takî tî Xose pen naar̂atken̂e Ismaerita komo. Miya ro makî tî naar̂atken̂e Exitu pona. Ero wa tî naar̂atken̂e okwe.

29 Ero yinhîrî takî tî Huben mokyakn̂e hara ewtarî yepona. Xose exihra takî tî n̂een̂akn̂e ewtarî yaw okwe. Ero ke takî tî tpononthîrî nahyaxkekn̂e ceserepokarî ke.

30 Takno komo yaka takî tî cekn̂e hara. Okwe, kekn̂e tî yîwya so, kar̂pamxan pen exihra nai okwe. Ahna ya kîwce hara okwe? kekn̂e tî yîwya so. Ero wa tî kekn̂e Huben.

31 Ero yinhîrî takî tî on wara Xose ponontho n̂iir̂atken̂e hara akno komo, kabritu pen tî paraxketken̂e. Kamxuku kwaka takî tî noro pen ponontho nukpetken̂e kica.

32 Ero yipu takî tî naar̂atken̂e tîîm komo n̂enîrî. Yîwya takî tî n̂enpetken̂e. On amna n̂een̂e okwe meye esama yaw, ketken̂e tî yîwya. Onoke ponontho kyam tan ha? Amumuthîrî pen ponontho katî tan? ketken̂e tî yîwya.

33 Omumutho ponontho tan okwe, kekn̂e tî Xako, Kamara n̂eskai ham okwe. Narixkai ha na okwe noro pen, kekn̂e tî. Ero wa tî kekn̂e Xako.

34 Ero ke takî tî tpononthîrî nahyaxkekn̂e Xako. Kumixitho makî tî namruyakn̂e tîkamisan me hara. Xose pînîn yaw tî nîwracekn̂e mer̂pora kaamo okwe.

35 Noro yahwore xe rma tî re xatken̂e yumumuru komo ahnoro, emsîrî komo marha tî. Tahworetopo tko tî nanwekyakn̂e rma okwe. Pîra ro mak ha, tahwore exihnî me ro mak wasî. Omumutho pînîn yaw kîwracesî miya roro owaitopo pona roro, kekn̂e tî okwe. Ero wa tî nîwracekn̂e Xako tumumuthîrî pen pînîn yaw. Ero wa thakwa tî xakn̂e Xako.

36 Taa, on wara tî xatken̂e Micianita kom hara, Exitu pona cepatakache so iitono ya takî tî Xose pen nîmyatken̂e hara epethîrî pona. Paraw maywen ya tî nîmyatken̂e Potipa ya. Paraw kurun komo yantoman̂e ro tî mîk xakn̂e Potipa. Noro ya tî nîmyatken̂e Xose pen. Ero wa tî nîmyatken̂e ha.